Read Ninia Yali ULANGAN 5 Bible Online

ULANGAN 5 - Ninia Yali bible

ULANGAN 5

¹At Musa en ap homi Israel on mundoho kabog-debesebagdeg it hweag-esauk kwit, “Nori nerekwi inim, wene melaleg an den yoho hweag-hesamin on su henesanggo furoho holiek. Fik-furoho bilingguruk kwit de higitdoho neg duruk kwit obam dipdoho neg duruk kamuk.

²Dom Sinai fam anyo en de At Nenakni TUHAN Allah en wene abug wene katukdoho hweag-nesauk kwit de,

³it nenombasi fam neg hweag-esasi fug, ite nit suma welahe on fam inim hweag-nesasi.

⁴Indok dom fam anyo en de TUHAN en hit henobam bekit ele hweag-hesamin ulug disi.

⁵Famen de hiren indok anyo fam henekol boruhup deg dom anyo fam lahauk fug ale duruk en de, anyo salim an Allah dulug hit dulug bul inatihik deg TUHAN en ele uruk ale anyo hweag-hesamin ulug inatihik. Airoho inatihik mu At TUHAN en ele unduhuk foruk kwit,

⁶O Mesir hit sebeloho fahat hinusugmu en og-heneplug wilibik waharihik on henakni TUHAN Allah An at.

⁷Hiren henenggembu amu on fam allah-ap debelug apne wauk kam fug. We An neg napne wauk kamek.

⁸ Hiren henonggwareg fahet kembu ilit angge on bohol fam wereg angge obabut hag on inim, kwenangma wereg on obabut hag on inim, ikma kwenang apma wereg on obabut hag on inim, ahut hilingguk fug.

⁹ An henakni TUHAN Allah re amu on etma inim higitap napuk ale nerim anggere kembu ilit angge etma fam apne wauk kam fug. Ap homi An enerim napuk on de An den it enobam unggum foruk men neg iren ondohoma on en henahaneg on inim ohwaneg on inim hwili foruk karuhuk.

¹⁰Famen de ap homi An nobam enenda hundig napuk kwit, nele holoho napuk halug de An de it enombasi mundoho endag-atil neg[5] lauk kamuhup on fam mundoho nenda hundig enepuk kahi ale anyo ename fesehuk.

¹¹ An Henakni TUHAN Allah nunuk fam hesangge duruk on unggum og-esauk kahimu, An nunuk hesangge uhup hayog.

¹² An henakni TUHAN Allah en melal-henepuk kahi higitdoho hiren nukoho sabit on anyo mun eneg on ulug leho foruk kamek.

¹³ Nukoho folfalik en de hit yabuk duruk kamuhup ulug og-hesauk kahi,

¹⁴famen de nukoho sabit angge aire An henakni TUHAN Allah nobahet eneko nobaharuk kamuk. Nukoho ai salim de hit inim, henomaliki inim, henamingming angge inim, henowam inim, ap bohon hit henobam wereg on halug inim, ap misig eke en yabuk duhup hayog. Hit henonggwareg hagdohore it henamingming angge ohore kel wat-dauk kamuhup fano.

¹⁵Hiroho atam o Mesir ap enapma sebel henusug lit wereg ma henakni TUHAN Allah nomamne humon fam fisela doho henobaharihik ale anyo wenggel-hakiyug. Ai halug de nukoho sabit on aire nukoho eneg on ulug leho foruk kamek.

¹⁶ O kwenang hit og-hesauihik on fam etma heneluk yatdoho wereg lit henobam fanoroho welamuhup en de, henaknisi henisingasi enalong beheg, hwal-enebeheg duruk kamek. Ulug An henakni TUHAN Allah nawene ai hweag-hisihi.

¹⁷ Ap homi binggi enowaruk fug.

¹⁸ Hambena duk fug.

¹⁹ Ap homi enengge herako wa fug.

²⁰ Ap homi amu on fam wene seiale enobam dopno esa fug.

²¹ Ap homi amu on enengge, enobam inim, enanggwenang inim, enohwesi inim, enamingming angge inim, enowam hwalduk on inim, wam keledai inim, di angge su angge ap homi fahat dalug angge etma suahi uk fug.

²² Ulug hit dom indipmu anyo kabog-duruhupmu wene melaleg ai on neg At TUHAN en og-hesasi. At ele uruk kwit de ele bag uruk kwit ele indok fam inim hena betereg on famen inim uruk kwit wene amu on eke hweag-hesasi fug, we wene melaleg ai on neg hweag-hesasi. Hweag-hesasireg Aren helep biren angge fam baloho folug an og-nitsi,” ulug hweag-esebag.

²³Eke hweag-esauk kwit, “Dom anyo fam indok ambulbul humdoho duruk kwit heik deg ma etmano en ele uruk on henesanggo holduhup deg, hit henunggul unuk domog en henowesi melal-henepuk on inim, it henowesi log-lohon ap homi enobahet wereg on anyo an nakit wahausareg,

²⁴iren uruk kwit, Nit indok famen At ele urukmu holehe on aire nenakni TUHAN Allah At mun seleg ambogbag wereg ale inim, Along humon wereg ale inim anyo ename feheikma hehe. Allah ele airoho eheik famen de we bolandoho atlug ap homi enoluk wereg.

²⁵Famen de ketia nit nenebe waramukoho lahe nunggwelug no? Indok mun humon ai en nit elehap nenebikohoreg oma! Niren boruk kwit de At TUHAN Allah eke inim ele uruk halug de nit eke inim waramul lit deg boruk kahe.

²⁶Allah mun oluk neg wereg on anyo en indok famen ele uruk kweleg de ap homi kema on en eke enoluk welatsi behep?

²⁷Aireg anggere hat Musa lamihin deg de At TUHAN Allah en nit fahet imisi ale ai walug nit hweag-nesa watmihin mu, niren hole folug ele holoho duruk kamul, ulug hweag-nutswa.

²⁸Airoho hweag-nutswa ma airoho uruk on anyo TUHAN en holsireg, TUHAN en an hweag-nutuk kwit, Ap homi ai en ehesa on aire An mundoho holihi anggere, iren ehesa on aire demdoho ehesa.

²⁹It inim iren ondohoma on inim mundoho-mundoho enobam fanoroho welamuhup en, iren fobik en An leho nobahakeg, An nele hole folug higitdoho deheg, duruk kamuhup famen airoho duruk kamuhup fug lit deg.

³⁰Anggere ketia lamihin deg it ap homi ai enobam sabo saleg kwe etmano hundomog lowag ulug hweag-esa lakin.

³¹Ai famen, Musa, hat neg de nikangge suma watlug An ninim welatmihin. Wereg lit de An den Nawene melaleg inim diroho-suroho duruk kamuk ulug on anyo inim og-hitmin. It enanggwenang og-esahukmu etma wereg lit wene ai fam nele holoho duruk kamag dohore it fam hweag-esakiyug, ulug hweag-nitsi.

³²Nori nerekwi inim hit henakni TUHAN Allah en awene melaleg hweag-heseheik on aire ele holoho duruk kwit fik-furoho duruk kamuk. Wene melaleg ai famen misig eke sahaloho embesouk fug.

³³Hit henobam og-hesahumu etma henobam fanoroho neg welamuhup en de henakni TUHAN Allah en wene melaleg hweag-hesauk on ai higitdoho neg duruk kamuk, ulug hweag-nesasi anyo,” ulug hweag-esebag.