Read Ninia Yali ULANGAN 6 Bible Online

ULANGAN 6 - Ninia Yali bible

ULANGAN 6

¹Airoho hweag-esebagdeg eke uruk kwit, “Hit henakni TUHAN Allah en o hit horog ketia hwelahupdeg welamuhupmu etma wereg lit duruk kamuhup ale wene melaleg su abirangge hweag-esakin ulug an mingming napsi.

²Hit henebe inim, hiren ondohoma on inim en hit henoluk welamuhup huli ai o welamuhupmu etma henoluk eke inim yatdoho welamuhup en de henakni TUHAN Allah anyo along bolug leho foruk kwit At awene melaleg an den hweag-hesauk kahi on au holoho furoho duruk kamuhup.

³Ai halug de nori nerekwi inim henesanggo holiek. At henakni TUHAN Allah en atam hit henombasi fam abug wene og-esebag ale higitdoho o kwenang hesiligmu sig belabegma etma wereg lit henunggul unuk hum aheg, henobam finik-fanoroho welaheg, duhup en de wene melaleg ai higitdoho neg duruk kamuk.

⁴ Nori nerekwi inim henenda wenggel-hakiyug! We TUHAN amu neg,[6] nit nenakni Allah re we TUHAN ai amu neg!

⁵ Henenda abirangge en henakni TUHAN Allah fam mundoho henenda hundig duruk kamek. Henenda hundig welahep ale aire henebe wereg fam inim henobabut duruk fam inim enamoho duruk kamek.

⁶ Wene melaleg an den yoho hweag-hesauk kahi on eiya misiham ulug oho eke henapeleg-am fug.

⁷Hit henomaliki fam inim hweag-esauk kamuk neg. Hiren olman nim kwe noruk kwit nim, kel wat-dauk kwit inim, yabuk duruk kwit inim, hweag-esauk kwit neg welamek.

⁸Hiren wene su ebereg lamuhup en de henenggik folfalik[7] fam bug debeheg, henelahama bug debeheg, henobam sok ambiangma inim sokole fam inim baloho feheg diyug,” ulug hweag-esebag.

¹⁰ Airoho ebagdeg eke uruk kwit de, “Henakni TUHAN Allah en it henombasi Abraham, Ishak, Yakub fam abug hweag-esauk kwit, Aren kwenang ai hit og-hesahuk ulug hweag-esebag. O kota ebe sili humon, di angge su angge wereg neg deg ma, o hiren wituhup fug mu etma og-hesahuk.

¹¹O ilonggoma re di angge su angge en hoporeg laruhu famen de hiren kwelapuhup anggere fug. Hiren ik bohwe habulig on hweahakup famen de hiren habulduhup on de fug. Hiren anggur inim zaitun inim yabuk wirig hwelahup famen de hiren yag-dauhup on de fug. At henakni TUHAN en o etma og-heneplug lahumu, hit nauk on henenda boruk ale higitdoho etmano mundoho hwelahup deg,

¹²hit o Mesir ap enapma sebel henesugmen og-heneplug wilibik wahasi on TUHAN anyo henapeleg amuhup hayog de furebeiyug.

¹³ Hit henakni TUHAN Allah along leho boruk kwit, At obam neg apne wauk kamek, ne hiren hombuk balduk kwit halug de At unukdoho neg duruk kamek.

¹⁴Ap homi enunggul unuk amu on hit welamuhup mu etman maseroho welamuhup on etma en amu on fahet allah-ap debelug apne wauk hagdoho duruk kamuhup fug.

¹⁵Hiren lahe amu on fahet allah hag debelug apne wauk halug de, hit henakni TUHAN Allah hit henesahalimu wereg on aire amu angge inim higirap duruk ale erim deg ma, At TUHAN Allah en henobam olok heneplug mun elehapdoho henobahaku.

¹⁶ Hiren o Masa wereg lit duruhup anyo hagdoho henakni TUHAN Allah abut baluk fug.

¹⁷Wene melaleg At henakni TUHAN Allah en og-hesasi on ai mundoho holoho neg duruk kamuk.

¹⁸At henakni TUHAN en boruk kwit su bul heiroho fano katuk deg boruk on neg duruk kamuhup halug de hit henebe finik-fanoroho welamuhup. Kwenang hesilig on it henombasi fam abug wat-esasi on aire hit henengge aruhu.

¹⁹At TUHAN en wene abug og-hesasi hagdoho hiren heneselei on muko wilibi feseruk kamuhup.

²⁰Fobik lahe it henomaliki en hein og-hesauk kwit, Nunggwelug nit nenakni TUHAN Allah ai en wene melaleg etma holoho duruk kamag ulug melal-nenepsi? ulug hein og-hesauk halug de,

²¹hiren onggo diroho hweag-esauk kamuhup, Endam de nit raja Mesir on ai amingming angge atlug weregman, At TUHAN en omamne humon fam loloho wilibi nenobahaik wahasi.

²²At TUHAN en along on humdoho mel, mun namel-mel on mel, ap homi Mesir inim, enowe raja inim autsi at apma wereg lit eyabuk duruk on inim fam forukmu nit ninil en hauhuk.

²³Aren nit o Mesir en loloho wilibi nenobahaik wahasi aire nit o suma og-neneplug waikoho lit, ne kwenang su atam nit nenombasi fam abug hweag-esasi aleroho nit og-nesasi.

²⁴Nit nenakni TUHAN Allah ai en nit At awene melaleg holoho deheg, At mun along wereg ulug leho feheg duruk kamag ulug hweag-nesasi. Niren airoho duruk halug de ap homi nit nenenggul unuk on finik-fanoroho welamag ulug Aren hwal-nenepuk karuhu.

²⁵Niren bekitdoho At TUHAN Allah wene melaleg[8] duruk kamuk ulug hweag-nesasi on ai holoho duruk halug de Aren nit fahet endama ahayeg hauk karuhu, ulug hweag-esauk kamuhup,” ulug hweag-esebag.