Read Ninia Yali ULANGAN 7 Bible Online

ULANGAN 7 - Ninia Yali bible

ULANGAN 7

¹ Eke hweag-esauk kwit, “Hit henakni TUHAN Allah en hit og-heneplug o kwenang mundoho welamuhupmu etma lauk kwit, ap homi enunggul unuk humdoho muko wilibi feseruk karuhu. Hit hinil hanim de Aren ap homi hit hag de fug we enomamne humon, enunggul unuk hum enap sabiren angge muko wilibi fesehu. It ap homi enunggul unuk etare Het enap, Girgasi enap, Amori enap, Kanaan enap, Feris enap, Hewi enap, Yebus enap, ai.

²At henakni TUHAN Allah en lahe ap homi enunggul unuk enap ai hit henapma og-hesauk halug hiren it enalong elehapdoho feselug de mundoho binggi enowariyug. Hiren it fahet enelaheg enebuk fug, ne hinim diroho duhuk ulug wene maruk fug.

³Hiren iron henohwesi-henahunsi amag ulug og-enebuk fug, ne hit henomaliki on en oho it enomaliki on og-enebik lowag ulug hweag-esa fug.

⁴Ne, hit henomaliki TUHAN enambolma embeselug amu on fahet allah hagdoho ulug mot-duruk on etma fam apne wag lahup halug de, kembu ap homi Allah enapeleg on en apne wauk on anyo fam apne wahup ai fam TUHAN olok henobam folug mun fundoho elehap henebuhu.

⁵ Ai halug de it ap homi etman enanggembu fahet waroho yaldukmu obale ai meiyal-eseheg, iren helep ousa helep unduhuk ulug uruk on etma mel welelenggen eseheg, iren enanggembu Asyera unukdoho ulug durukmu etma dukom eseheg, enanggembu ilit angge hwesesengge oho on fam apne wauk on etma indok yaleheg, diyug.

⁶ Hit henebe henakni TUHAN Allah onggwareg angge on welahep ma ulug etma on mundoho airoho diyug. Di ap homi su ap homi enunggul unuk humdoho kwenangma suma wereg on en de hit neg de At TUHAN Allah en At omaliki memereg on amag ulug momal-henepsi.

⁷Hit henakni TUHAN en enda hundig henepsireg momal-henepsi aire, ap homi enunggul unuk humdoho wereg on etmano en hit neg de henunggul unuk humdeg en ulug de fug. Demdoho re o kwenangma suman de ap homi henunggul unuk we dorangge on welahep anyo.

⁸Famen de At TUHAN en hit momal-henepsi aire Aren hit fahet enda hundig besireg, ne atam it henombasi inim abug wene og-esasi on anyo dip-debemin ulug disi. Ai fam de hit raja Mesir ahun obam amingming angge apdoho weregman hinili oko omamne humon fam loloho wilibi henobahaik wahasi ai.

⁹ Henakni TUHAN Allah re we Allah misig ai neg anggere wenggel-hakiyug. Ne, At Allah aire dipdoho neg duruk ahun. At TUHAN ai en abug wene hweag-esauk on de dahandoho eke duruk eleg we dipdoho neg duruk. Ne ap homi At obam enenda hundig deg lit At awene melaleg anyo holoho neg duruk halug de Aren it enobam enda hundig enepuk kwit, iron en ondoho on ohore mun hum-hamdoho endag-atil lauk on fam ohore enda hundig neg enepuk.

¹⁰Famen de Aren ohore ap homi At fam enerim boruk on de enenda esa fug angge unggum enobam feseruk.

¹¹Aireg ma re wene hit duruk kamuhup on fahet yoho hweag-hisihi on aire mundoho holoho higitdoho neg duruk kamuk,” ulug hweag-esebag.

¹² Airoho hweag-esebagdeg eke diroho hweag-esebag: “Allah en diroho duruk kamuk ulug komoroho hweag-hesasi on ai hiren fubi debelug duruk halug de hit henakni TUHAN Allah en de diroho henebuhuk ulug abug wene isi on ai dipdoho neg duruk karuhu. Aren hit henombasi fam hweag-esasi hagdoho hit henobam inim enda hundig henepuk karuhu.

¹³Aren hit henobam enda hundig henepuk kwit fanoap henepukmu, henomaliki hum aheg, henebe esan log-aheg atuk kamuhup. Aren hit heneyabukmu fanoap deberukmu, gandum anggen humdoho yihikeg, anggur inim zaitun inim humdoho yihikeg duruk karuhu. Ne, Aren hit henobam fanoap henobaharukmu re henowam sapi, kambing, domba hum aheg duruk kamuhup. Di angge su angge mundoho fanoap henobahakuk isi angge etma re, TUHAN en it henombasi abug wene hweag-esasi higitdoho o kwenang hit og-hesahumu etma og-hesahu.

¹⁴Ap homi di enunggul unuk su enunggul unuk humdoho kwenangma wereg on suma en de enunggul unuk we dem misig ulug oho eke hit fanoap henobaharuk oma hag fulularoho eke og-esauk fug. Hit henebe fam en oho ne henowam fam en oho re misig eke ibilireg laruhu fug.

¹⁵Di ouk su ouk henobam am no ulug de Aren hit henebe mapnu henesug laruhu, ne di ouk su ouk o Mesir on fam atuk mu hinil hauhup on anyore hit famen yatma deberuk kwit de ouk bouk ai on de it heneselei on enobam feseruk karuhu.

¹⁶Di enunggul unuk su enunggul unuk TUHAN en hit henapma feseruk on de mundoho elehap debeseruk kamuk; it fahet enelaheg enebuk fug. It Allah enapeleg on en enanggembu apne wauk on etma fam mot-duk fug, hiren airoho duhup ai fam de hit henonggwareg en alema re fahat dahup.

¹⁷Ap homi etma it enebe bumbuk humdeg ma hiren muko wilibi fesouk fug ale atuk karuhu lit deg.

¹⁸Famen de it enobam henekol enebuk fug; Hit henakni TUHAN Allah anyo en raja Mesir on inim at omaliki hwal-enepuk on inim fam debesesi ale anyo ebet hakiyug.

¹⁹Along on humdoho duruk kwit anggin-fanggin anggolo on enobam feheg durukmu hit hinil hauk katuhup ale anyo wenggel-hakiyug. At Henakni TUHAN Allah en de omamne humon fam hit loloho wilibi henobahaik wahasi. Ai higitdoho neg ap homi hiren henakol enebuhup on etma mundoho fam de At henakni TUHAN Allah en duhu.

²⁰Airoho duruk kwit At henakni TUHAN Allah en it enesahali kwe youk debeserukmu,[9] it ap homi enakol en enahap wendaroho ulug longgo ik lauk kamuhup on ohore mundoho elehap debeseruk karuhu.

²¹Hit henakni TUHAN Allah fahat henusug on aire Mun Along wereg lit Leho wereg ahun deg ma, hiren ap homi etma fam henakol enebuk fug.

²²Ap homi etma re hiren folo-folo elehap debesehupmen de olomene hag angge olok on neg saha uruk kwit hit senggel henebuk no ulug, it enebe hit henolohotman dot heg dot heg muko wilibi feseruk karuhu.

²³Airoho hit henakni TUHAN Allah en it heneselei on hit henenggikmu og-hesauk karuhu. Aren it ap homi heneselei on ai buhul-bahal esauk kwit mundoho elehap debeseruk karuhu.

²⁴Aren it heneselei on ai enowesi raja etmano hit henenggikmu forukmu, hiren it mundoho binggi enowatuk mu re it enunuk eke ebereg welamuhup fug. Ap misig eke hit henelohotma inatlug hambukdoho hit hinim weim yapuk karuhu fug. We hiren neg it enebe mundoho elehap debesehup.

²⁵It enanggembu kanggog wiroho wereg ma iren apne wauk on ai mundoho han yaliyug. Ne, emas halug oho perak halug oho obam dopno deg anggere hit henonggwareg fahet ulug oho eke wahup hayog. Hiren wene komo ai sahaluhup halug hit henebe waramuhup. At henakni TUHAN Allah aire kembu apne wauk ale aire Aren mun erim deg ma re.

²⁶Hiren kembu ai on hit henobam wirigmu walug feik wamuhup halug de At Allah en ai on fam hururung deberuk kwit ai hit hinim hururungdoho henobahauk no. Ai on de mun hururung deg ma hiren henendama we seram debeselug henerimdoho wereg lamuk,” ulug hweag-esebag.