Read Ninia Yali ULANGAN 8 Bible Online

ULANGAN 8 - Ninia Yali bible

ULANGAN 8

¹At Musa en airoho hweag-esebagdeg eke diroho hweag-esebag: “At Allah en kwenang it henombasi fam og-hesahuk ulug abug wene waroho hweag-esasi on anyo fam wereg lit, henebe humdoho aheg, hit henoluk eke inim welaheg, duhup en de, wene melaleg an den yoho su hweag-hisihi on mundoho etare hiren fik-furoho duruk kamuhup.

²Tahun 40 en duruk kweleg henakni TUHAN Allah en kobokwe mun yatdoho o lei kwe og-heneplug wahasi anyo fahet ebet-hakiyug! Kobokwe airoho og-heneplug wahasi aire hiren TUHAN awene melaleg anyo holoho duruk kamlusa ane, eleg a, ulug. Ne, Aren hit henenda deg ale anyo oluk amag ulug de hit henobabut bal-hesauk kwit disi ai.

³ Aren hit henesiburu obok howag ulug debelug en, Aren hit nowag ulug siburu manna ai it henombasi et hit et siburu ai on owanam etma nauk katuhup fug on og-hesauk katsi. TUHAN en airoho disi aire ap homi re nauk angge fam neg de enoluk wereg fug, we An henakni TUHAN en nele uruk kahi on ai mundoho wauk halug heneluk mundoho welamuhup, ulug melal-henebikoho disi.

⁴Hit henebe 40 tahun ai duruk kweleg de henasum wan-dauk on mining aheg, heneyog fireheg, duruk katsi fug.

⁵Ap enaknisi en enomaliki melal-enepuk hagdoho hit henakni TUHAN Allah en melal-henepuk katsi ai wenggel-hauk kamuk!

⁶Aireg ma, At henakni TUHAN Allah en diroho duruk kamuk ulug awene melaleg wereg ale ai mundoho duruk kamuk. Awene melaleg wereg aleroho wereg lit de At ebe along mun leho wereg anyo boruk kamuk.

⁷Hit henakni TUHAN Allah en hit og-heneplug de kwenang mun hesiligmu, ik humon humdoho wirig atuk mu, ik eleruk wilipukmu, ik kwenang apmane wilibik watlug hul kwesaloho donggo kwe inim, alo kwe inim wilibik waheg duruk on mel, wereg ma etma henobahaik lahu.

⁸O kwenang etma fam en de gandum inim, anggur inim, e ara anggen inim, e delima anggen inim, e zaitun inim, kin ahalue inim yig-henepuk karuhu.

⁹O etman de hit henasiburu obokdoho, henangge elegdoho eke welamuhup fug. Helep sili on fam de bosie on welaruhu, ne duk-duk funureg on famen de hiren tembaga fialduk kamuhup.

¹⁰Hit henendama boruk aleroho nauk kwit, nenakni TUHAN Allah en kwenang hesilig on og-nesasi ulug At dang duruk kamuhup,” ulug hweag-esebag.

¹¹ Airoho hweag-esebagdeg eke diroho hweag-esebag: “Hiren henakni TUHAN Allah anyo henapeleg ahep ha no ulug henape hebeloho duruk kamuk. An den wene melaleg yoho su hweag-hesauk kahi on mundoho eiyare misig oho eke seramap debehup hayog.

¹²Henasiburu henahum homoroho nalug, henobam henebe wereg ma fahet buhundoho wit-deheg,

¹³henowam sapi, kambing, domba mel, henengge emas, perak mel, henangge di angge su angge amu on mel hum aheg duruk kwit halug,

¹⁴hit henonggwareg en leho fahat dauk kwit de hit o Mesir ap homi en sebel-hinisugmen loloho og-heneplug wilibik wahasi on henakni TUHAN Allah anyo henapeleg ahep ha no re furoho kahaleg lamuk.

¹⁵At henakni TUHAN Allah en de kwe o lei humon dakdeg on fene, kisu ap homi hwaik-enepuk on inim, ebeiyug aeg olok humon inim wereg kwe og-heneplug wahasi. Kwenang iringgigmu ik elegma og-heneplug watlug halug de hit henahum ningdoho nowag ulug Aren ik helep wirik on famen ik fulohomdoho wilibi feik waharuk katsi.

¹⁶O leimu etmano wereg lit de hit nowag ulug siburu manna it henombasi mel oho inil hauk katswa fug on anyo og-hesauk katsi. At TUHAN en airoho duruk katsi aire ambiangma fanoroho henobahakuk ulug, henobabut baleheg, henenda leho fahat da fug angge sebele fahat dalug duruk kamag ulug henobahakeg, dil waharuk katsi ai.

¹⁷Aireg ma re, hiren boruk kwit nit nenonggwareg nenomamne fam, nenonggwareg en debelug nenenggik wereg atuk kahe ulug airoho bouk fug.

¹⁸At henakni TUHAN Allah en neg henenggik werehap henobahasi anyo wenggel-hakiyug. Aren atam it henombasi inim abug wene wat-esebag on anyo ketia huli en inim at dahan debouk fug angge wereg lit, hit airoho henepuk ai.

¹⁹Henakni TUHAN Allah obam henenda ebereg neg wereg lit, amu on fahet allah ulug mot-duruk on etmano fam mutlug lauk kwit apne weheg, obahet deheg, dik laul ulug duk fug. Hiren lahe airoho duruk kamuhup halug de hit de dik-demdoho elehapdoho henobahaku, ulug henenda ebereg welamuhup en de yoho an den hweag-hesauk kahi ai.

²⁰Hiren At henakni TUHAN Allah ele holoho duruk eleg halug de, ap homi enunggul unuk amu on hit hinil hanim elehap debesehu ai hagdoho Aren hit airoho elehap henobahaku,” ulug hweag-esebag.