Read Ninia Yali ULANGAN 9 Bible Online

ULANGAN 9 - Ninia Yali bible

ULANGAN 9

¹At Musa en airoho hweag-esebagdeg eke diroho hweag-esebag: “Nori nerekwi mel henesanggo furoho holiyug! O yohore ap homi enunggul unuk hit hag on de fug, it enunggul unuk hum deg lit enomamne hum enap enobam sebelik kulug welamuhuk en de Ik Yordan baloho nindig amluhup ai. It enobam kota re mun humon helep lehet mun yit-yatdoho witil bohol fam hagdoho wirig wereg.

²Ne, ap homi enebere enobahare mun hum enap deg lit de enomamne along deg. Enowag yatdeg-batdeg enap, deg ma re ap homi eke en it inim weim yapuk kwit mabenap debesouk fug alereg ulug urukmu henesanggo mundoho holduhup anyo.

³Famen de ketiare At henakni TUHAN Allah ebe indok en di angge su angge han weratil lauk anyo hagdoho, henelohotma at dam lauk kwit ap homi ai enalong elehap debeseil laukmu hinil domog hahup neg. Aren airoho henelohotma enalong elehap debesehumu, At TUHAN en abug hweag-hesasi hagdoho hiren folo-folo muko feseik laheg, enebe elehapdoho feseheg, duhup.

⁴At henakni TUHAN Allah en hit fahet airoho mug-esauk halug de hit henendama en de, Nit mun fano. Nenakni TUHAN enda ahayeg ale neg duruk kahema, Aren nit o suma og-nesa ale higitdoho og-nesauk ai, ulug airoho bouk fug. Hiren de airoho duruk kahep fug famen de At henakni TUHAN Allah en ap homi ai muko wilibi fesehu aire, it enobabut mun siag on neg duruk ai en. At nenakni TUHAN Allah en de it nenombasi Abraham, mel Ishak mel, Yakub mel, hweag-esauk kwit, Diroho og-hesahuk ulug abug hweag-esebag on anyo dip ukwag ulug enda bebagdeg o etma hit sebelik kukwag ulug og-hesahu.

⁶Hit henendama en At nenakni TUHAN Allah en kwenang mun hesiligmu etma re nit hwela alereg en og-nesasi re bouk fug. Hit de henunggul owag mun helep hag mun haroreg lit ap homi enele holoho duk fug on anyore hit.

⁷Hit o leimu en henakni TUHAN Allah olokap kwelapuhup ale anyo ebet hakiyug. Hit O Mesir embeselug waharuhup hwili en angge dil-dil o suma waharuhup hwili re henakni TUHAN Allah ahummu het kwelabeg ale neg dil waharuk katuhup.

⁸Henobabut airoho neg dil waharuk kwit Dom Sinai fam wereg lit ohore henakni TUHAN Allah enda ahe lahaukwag ulug mun ebenaheg ale duruhupmu, Aren hit henebe mundoho elehap henepmin ulug disi anyo.

⁹ Airoho henepsi aire At henakni TUHAN Allah en wene abug waroho og-nenepsi on anyo helep on fam baloho fesi angge an wamin ulug dom fam laharihik deg nukoho 40 en siburu mel, ik mel na fug angge welatihik.

¹⁰Hit dom indipmu kabogdeg wereg kweleg At henakni TUHAN Allah ebe indok sahalimu wereg lit ele fam hweag-hesasi on anyo, At onggwareg en helep on biren angge fam lisu baloho fesi angge an og-nitsi.

¹¹Airoho og-nitsi ale aire nenggik nukoho 40 en anyo mundoho welatihikdeg wene waroho og-nenepsi on helep on biren angge fam baloho og-nitsi.

¹²Airoho og-nitsireg de At Nenakni TUHAN en an hweag-nutuk kwit de, Ap homi o Mesir og-eneplug waharihin on etmano en siag dehesa anggere hat folo-folo wambin. Iren de An den diroho-suroho duruk kamuk ulug komo enepihik on anyo sahaloho embeselug de kembu mot-duruk kamul ulug eke wirehesa, ulug hweag-nitsi.

¹³Airoho hweag-nitsireg de eke diroho hweag-nitsi, Ap homi etma enobabut de mun haro siag enunggul owag helep hag deg ai An mundoho noluk.

¹⁴Aireg ma re it ai ap homi en eke wenggel-enesahup hayog dohore An den it Israel on ai elehap debesemin ulug duruk kahi anggere, haren An kwe bal-nabuk fug. It mundoho elehap debeselug de, hat neg de it ap homi Israel on enomamne we dotdeg on eta hag de fug, ite haren ondohoma on enunggul unuk humon, enomamne along on enakniap habuhuk, ulug, hweag-nitsi.

¹⁵Airoho hweag-nitsi mu hol halug, nambol sombandoho wambik watmin ulug de Aren wene waroho og-nenepsi on helep biren angge fam baleg wereg angge etano nenggik foma-foma seneko dom anyo fene indok ambulbul laharuk kweleg wambik waharihik.

¹⁶Airoho wambik waharuk kwit nil fu hauihik hag de, hiren At henakni TUHAN Allah diroho-suroho duruk kamuk ulug hweag-hesasi on anyo ele sahaloho re hit henonggwareg fahet kembu emas on indokma lop-lop debelug sapi hag angge henakni TUHAN Allah il hanim wutuhupdeg mun siag duruhupmu nil hesauihik.

¹⁷Airoho hesauihik deg de Allah en wene abug yiko og-nenepsi on helep on biren angge fam baleg angge etano hinil hanim borahe deberihik mu mun irik-erapdoho wililinggin-welelenggen disi.

¹⁸Airoho debeselug nikangge domma lahalug de an Nenakni TUHAN il hanim nelenggen kwenangma dimi-debelug mot-duruk men nenggik nukoho 40 en ik mel, siburu mel na fug angge welatihik. An airoho dirihik aire At nenakni TUHAN Allah en, An nil hanim mun An den siag boruk kahi on anyo dehesa, ulug ahummu het disi ai fam dirihik.

¹⁹ At henakni TUHAN ahummu olok hang disireg hit henobam ahummu het-bet uruk kwit mundoho elehap henobahaikoho duruk katsi mu an nakol en dirihik famen de fobik hweag-itihik on oho At TUHAN en nele holsi.

²⁰At henakni TUHAN en oho at Harun obam ahum kwe het-besireg, ebe mundoho binggi watmin ulug disi famen de an den at obahet somban irihik.

²¹Ne, hit henenggik en kembu emas on fam wituhup on anyo an den indokma hwik-esa kwirihik. Airoho kwelabe ferihik mu indok en nasimu re an den luluhun-lalahan esauk men kwenang al hag atsi mu, anyo an den oko ik dom fam en eleruk wambik waharuk on anyo fam kwelabe feserihik.

²² Ne, hit o Tabera en mel, Masa en mel, Kibrot Taawa en mel henakni TUHAN olokap kwelabe foruhup anyo.

²³ Airoho dulug At henakni TUHAN en hit o Kades-Barnea etma embeselug o kwenang hit og-hesahukmu etma welamuhup en ulug waharuk kwit de At henakni TUHAN Allah en diroho sebelik kwiyug ulug hweag-hesasi on anyo demdoho hweag-nesasi ulug ele holoho duk ale henerim en de ele sahaloho siag duruhup.

²⁴O endam en an hit henobabut noluk atsi huli en anggere, hit de nenakni TUHAN ele sahaloho foruk kwit neg welahep.

²⁵Airoho neg duruk kahep ai en henakni TUHAN en henebe elehap henepmin ulug disi ale ai an noluk deg. Airoho isi ai en an henakni TUHAN il hanim nelenggen dimi-debelug norohole belabeg sahaun uruk kwit nukoho 40 en wereg lit somban diroho irihik: Nakni TUHAN Hat hunuk mun leho welahen on nakni. Hat honggwareg homaliki ai it ap homi Mesir on enamingming angge atlug wereg ma homamne humon fam deloho og-eneplug wilibik waharihin on deg ma, Haren elehap debesouk fug.

²⁷Haren it ap homi Israel on enobabut mun siag deg lit hele holoho duk fug aleroho enenda haroreg lit siag neg duruk on etma fam hil fubi debeseruk kam fug. We it hamingming angge on Abraham, Ishak, Yakub mel enobam ebet hakiyug, nakni.

²⁸Hat homaliki ai mundoho elehap debesehun halug de ap homi Mesir on en de diroho uhup: Allah en de omaliki o it og-esahuk ulug wene abug hweag-esasireg enebe og-eneplug lasi anyo re, Aren og-eneplug la fug ale dehen erim enepsireg o leimu ap homi elegma etma en enowatmin ulug og-eneplug lasi oma re, ulug uhup.

²⁹Aireg famen de Hat hendama wenggel-hakin, nakni. It homaliki ai Hat homaliki amag ulug momal-enepihin deg, homamne mun along on ai fam it o Mesir en og-eneplug waharuk kahen ale ai henda wenggel-hakin, nakni, ulug, hweag-itihik,” ulug, hweag-esebag.