Read Ninia Yali YOHANES 1 Bible Online

YOHANES 1 - Ninia Yali bible

YOHANES 1

¹Walhilmu Wene anyo welatfag. Wene anyo re, Allah inim welatfag. Ne, Wene anyo re Allah inim wereg lit, ebe Allah at welatfag.

²Wene ai, o walhilmu Allah inim welatfag.

³Wene anyo fene en di angge su angge abirangge wal-debag. Di angge su angge wal-debag anyo at eleg kweleg, eke wal-debag fug.

⁴Di ap homi su ap homi enoluk enepuk indip[1] at neg welatfag. Ne, enoluk indip anyo en ap homi enendama selehap enepuk katsi.

⁵Seleg anyo ai o mumdegma selehap duruk famen, o mum en o seleg su, kun duk fug angge wereg.

⁶ At Allah en ap eke ayonggo unuk Yohanes mondorik wahasi.

⁷Ne, at Yohanes anyo en, ap homi enendama selehap enepuk anyo mun fagdoho hweag-esauk kamag ulug, wahasi. At hweag-esauk anyo fam di ap homi su ap homi mundoho seleg anyo demdoho bolug ai fam dip-deboukwag ulug, hweag-esa wahasi.

⁸At ap homi selehap enepuk ai, at Yohanes fug famen, at Yohanes en selehap enepuk anyo neg fagdoho hweag-esauk kamag ulug, wahasi.

⁹Seleg ebe on o kwenangma suma kwik waharuk on, di ap homi su ap homi mundoho enendama selehap enebuk on anyo wambik wahasi.

¹⁰At o kwenangma suma wambik wahasireg, welatsi. O bohol kwenang aren neg wal-debag famen, it ap homi kwenangma suma wereg anyo en at enegdeg ma furebouk fug angge welatswa.

¹¹At obam neg wambik wahasi famen, it ap homi at owe aut anyo en at ebe wa fug angge welatswa.

¹²Ebe wa fug angge welatswa famen, it foma enenda at demdoho bolug obam dip-debousareg, wausa halug neg de, “Hit Allah omaliki amuhup fano,” ulug, onggwarehap debesesi.

¹³It ap anyo ap homi enomaliki endag-enepuk hag endag-enepsi fug. Ne, ap homi kwenangma on en, An nomalik enderuhuk, bolug, endag-enepuk hag endag-enepsi fug neg. Ite, enakni Allah en neg endag-enepsi.

¹⁴At Wene anyo ap at atsireg, ninim welatsi. Ninim wereg lit, at angge dindikdeg lit, enda hundig en nenebeheg, Allah airoho wereg, ulug furoho hweag-neseheg, duruk mu, niren ninil hauk kwit, at Allah amloho ilahambi akni en leho fesi anyo mun leho neg wereg ma hauhuk.

¹⁵At Yohanes en ele hum fam at anyo mun fagdoho hweag-esauk kwit, “Ap eke nombolim waruhu anyo, an endag-am fug mu, at dam welatfag ma, an de sebeleg. Ne, at mun leho, ulug, hweag-hesauk katihik anyo ebe su,” ulug, hweag-esauk katsi.

¹⁶At angge dindikdeg lit, enda hundig en nit ap homi nenepuk ale eleg am fug angge nenepuk kweleg, nit mundoho en wauhuk.

¹⁷At Allah en awene melaleg anyo, Musa fene en hweag-nesebag famen, Allah enda hundig en nenebeheg, Allah airoho wereg, ulug, furoho fagdoho hweag-neseheg, duruk ale ai Yesus Kristus fene en unug-nesasi.

¹⁸Ap homi en Allah mundoho inil hausa fug. At Allah amloho ilahambi Akni inim higit on en neg de, Allah abug fagdoho hweag-nesasi.

¹⁹It ap Yahudi enowesi on en ap Allah il hanim duruk on imam mel, ap Lewi on mel, at Yohanes, “Hat ap sa?” ulug, hein og-howag ulug, o Yerusalem en at akit wahausa. Akit wahausa ma, at Yohanes en fagdoho hweag-esasi ale su.

²⁰At Yohanes en onggo hweag-esauk ale nerim besi fug. Ite, “Allah en eneko unduhuk febag Kristus anyo an de fug,” ulug, enameg fagdoho hweag-esasi.

²¹ Hweag-esasi mu, it anyo en at Yohanes hein og-hauk kwit, “Ne, ai halug, hat Elia ane?” Uswa ma, at Yohanes en, “Elia anyo oho an fug neg.” Hweag-esasi mu, iren, “Ai halug, at ap Allah wene hweag-nesa waruhu on nabi [2] anyo hat ane?” Uswa ma, aren, “Ai oho, an fug neg.”

²²Hweag-esasi mu, iren at hweag-utuk kwit, “Ne, ai halug, hat sa? It mon-nenebik wahesa anyo wene walug hweag-esa laul on ebe hweag-nesakin abi! An ap aireg on, ulug, fagdoho uruk kahen anyo ke?” ulug, hweag-utswa.

²³ Hweag-utswa ma, at Yohanes en, “At Nabi Yesaya anyo en uruk kwit, Ap eke o leimu ap homi elegma ele hum uruk kwit, At Tuhan waruhu kwe fik-foukdoho yatuk kamek, ebag ai, an,” ulug, hweag-esasi.

²⁴It wahausa anyo re, it ap Farisi on[3] en mon-enebik wahausa ma,

²⁵wahausareg it anyo en Yohanes hein og-hauk kwit, “Haren, an Allah en eneko unduhuk febag anyo eleg. Elia eleg, Ap Allah wene hweag-nesa waruhu on nabi anyo eleg ehen famen, nunggwelug, ap homi ikma belap-enepuk kahen?” ulug, hein og-hausa.

²⁶Hein og-hausa ma, at Yohanes en, “Eleg. An ap homi ikma belap-enepuk kahi men, ap eke hit furebouk fug angge wereg kweleg, wahasireg henenggelegma wereg.

²⁷At anyo nombolim waruhu famen ap leho on deg ma, an den at eyog ahut sepatu ahale anyo lolihi ha fug alereg,” ulug, hweag-esasi.

²⁸Wene ai hweag-esasi anyo, at ap homi ikma belap-enepuk katsi mu Ik Yordan foma fil o Betania etmano wereg lit, hweag-esasi.

²⁹Noholug, likia, Yesus Yohanes akit waharuk mu il hasireg, at Yohanes en, “Ap homi kwenangma on enesiag elehapdoho foruk on Allah andomba waharuk su hakiek.

³⁰Ap eke an nombolim waruhu anyo an endag-am fug mu, at atam welatfag ma, an de sebeleg. Ne, at de mun leho, ulug, hweag-hesauihik anyo ebe su.

³¹At ebe an furebouk fug angge welatihik men, ap homi Israel on at enoluk amag ulug, ikma belap-enebil waharihik anyo,” ulug, hweag-esasi.

³²Hweag-esasireg, at Yohanes en fagdoho uruk kwit, “Suwe bel boholman daril wambik waharuk hag, Allah Aheime anyo Yesus obam wambik wahasireg wereg ma, an nil hauihik.

³³An neg de, at furebouk fug angge welatihik famen, at ap homi ikma belap-enebukwag ulug, mon-nabik wahasi anyo en, Allah Aheime wambik waruhureg, at eke obam wereg ma, hil hahun anyo ai, Allah Aheime henobam belabik waruhu anyo, hweag-nitsi mu,

³⁴an higitdoho nil hauihikdeg, Su re Allah amloho, ulug, fagdoho hweag-hisihi,” ulug, hweag-esasi.

³⁵Noholug, likia, at Yohanes it at ele wauk on biren inim wereg lit,

³⁶Yesus lauk mu il hasireg, “Yaho. Allah andomba lauk ai hakiek.”

³⁷Hweag-esasi mu, it at ele wauk on biren anyo at Yohanes isi ale holswareg, Yesus mutlug lausa.

³⁸Mutlug lauk mu, Yesus alukwe endenoho il fu esauk kwit, “Yaho. Hit nunggwe angge heraril waharuk kahep?” Hein og-esasi mu, iren, “Rabi ao! Hat hobam ke?” ulug, hein og-hausa. (“Rabi ao,” uswa ai, nit nenele fam, “Nenakni guru ao,” ulug, uswa.)

³⁹Airoho hein og-hausa ma, Yesus en, “Ha manik,” hweag-esasi mu, inim lausareg, at obam inil hausa. Ne, ai salim o hupmu jam 4 hag aik lasi mu, inim bok atswa.

⁴⁰Ap biren en Yohanes hweag-esasi ale hole folug, Yesus inim lausa anyo eke Andreas, Simon Petrus aut anyo.

⁴¹At anyo owe Simon bekit hweahaik lasireg, “Simon ahwi! Mesias anyo mun wahasi mu ninil hehe,” ulug, hweag-itsi. (Mesias[4] hweag-itsi ai, nit nenele fam, Allah en eneko unduhuk febag on Kristus, ulug, hweag-itsi.)

⁴²Hweag-itsireg, Simon hondoholug at Yesus akit lasi mu, Yesus il hasireg, “Hat Simon Yona amloho deg lahen famen, hunuk de Kefas hweag-hutuk kamuhup,” ulug, hweag-itsi. (Ai hweag-itsi ai, ap Yunani enele fam Petrus ai, “Helep,” ulug, hweag-itsi.)

⁴³Noholug, likia, at Yesus en o Galilea lamin ulug wenggelsi. Wenggelsireg, lauk kwit, ap Filipus hweahasireg, “Nombolim ma,” ulug, hweag-itsi.

⁴⁴At Filipus obam Betsaida, Andreas Petrus inim enobam misigmu etma welatswa.

⁴⁵“Nombolim ma,” ulug, hweag-itsi mu, Filipus anyo en ap Natanael hweahasireg, hweag-utuk kwit, “Natanael ahwi! At eke waruhu, ulug, at Musa en Allah wene melaleg lisu baleheg, ne, it ap Allah wene hweag-esauk katfag on nabi omano en baleheg, balfag ebe ai, Yusuf amloho Yesus obam Nazaret on deg ma, mun wahasi mu, ninil hehe,” ulug, hweag-itsi.

⁴⁶Hweag-itsi mu, at Natanael en, “Yaho hwi! Malik omare! Ebe on o Nazaret etma en wam ale ulug ehen a?” Hweag-itsi mu, at Filipus en, “Hat ha ma.”

⁴⁷Hweag-itsi mu, at Yesus ap Natanael at akit waharuk mu hasireg, “Ap Israel ebe on ele biren uruk eleg on su furiek” isi.

⁴⁸Isi mu, at Natanael en, “Yaho hwi! Malik omare! Hat nangginoho an nebe holuk aha?” Hweag-itsi mu, at Yesus en, “Filipus en owan hwi-hapuk eleg ma, hat e ara indipmu hwerieg ma nil mun hiihi.”

⁴⁹Hweag-itsi mu, at Natanael en, “Guru ao! Allah amloho ap homi Israel enowe unuk bogdeg raja hat hihi.”

⁵⁰Hweag-itsi mu, at Yesus en, “Hat e ara indipmu hwerieg wereg ma hiihi, ulug, hweag-hirihi ai fam henda demdoho bolug an nobam dip-nobahaken a? Hat duruk mu hehen su ai, dotdeg hag duruk mu hehen famen, fobik neg de, mun humon duruk mu hahun.”

⁵¹ Hweag-itsireg, it hweag-esauk kwit, “Fobik bohol heale folug, it yonggo Allah en mon-enebik waharuk on malaikat omano en an Ap endag-atihik an nebene wambik waheg, boholma lahakeg, duruk mu hauk kamuhup, ulug, dik-demdoho hweag-hisihi,” ulug, hweag-esasi.