Read Ninia Yali YOHANES 10 Bible Online

YOHANES 10 - Ninia Yali bible

YOHANES 10

¹Hweag-esasireg, Yesus en ekenim hweag-esauk kwit, “It ap domba hukmu kuruk kwit, sok yendeg kwe kuk fug angge, elehet sohwandoho kuruk halug ai, ap uwan angge waroho heraharuk on.

²Ne, ap eke sok yendeg kwe kuruk halug neg de, at ap domba hwalduk on.

³At domba hwalduk on anyo waharuk halug, at ap domba kahal-enesug wereg anyo en sok husuruk. At andomba anyo at ele holduk mu, enunuk yiko og-eneplug wilibik lauk.

⁴At andomba neg mundoho og-eneplug wilibik lalug, at dam lauk kweleg, at ele holeg ma, at ombolim mutlug lauk.

⁵Ap enamu on enombolim mug-eneplug lauk eleg. Ap enamu enele fureberuk eleg ma, longgo uhup lit deg, ulug, dik-demdoho hweag-hisihi,” ulug, hweag-esasi.

⁶Wene hweag-esasi su wal-heheg hweag-esasi famen, at bolug hweag-esasi anyo it furebouk fug angge welatswa.

⁷Furebouk fug angge wereg ma, at Yesus en ekenim hweag-esauk kwit, “Domba kurukmu sok de an.

⁸An wam fug mu, it ap atam waharuk katswa anyo mundoho uwan angge waroho heraharuk on neg wereg ma, domba en it enele holuk fug angge welatswa.

⁹Sok kurukmu re an. It ap sok an welahi su fene en kwik waharuk halug, enahap wendat-dahup. Enahap wendareg lit, wilibik laheg, kwik waheg, duruk kwit, enenggela angge nauk on nil lauk kamuhup.

¹⁰It ap heraharuk on anyo en, domba herahakeg, uwan angge enowareheg, siahap debeseheg, dul ulug, waharuk famen, an neg de enoluk enebuhuk en waharihik. Enoluk enepuk kwit, enoluk mun nik on hwelowag ulug, waharihik.

¹¹Domba fanoroho hwalduk kahi an. At domba fanoroho hwalduk on anyo en andomba enobahet wararuhuk fano boruk famen,

¹²it ap foman, Su nit nenendomba eleg ma, ulug, furoho hwalduk fug. We onggo hwelaul, bolug, hwalduk on anyo neg de, olomene waharuk mu inil halug, domba anyo lin-esalug, longgo uruk. Longgo uruk kweleg, olomene anyo en domba aeg senggel-enepuk kwit, del-fol esauk.

¹³It ap anyo en we onggo hwelaul bolug, domba furoho foroho wereg fug mu, lin-esalug, longgo uruk.

¹⁴ Domba fanoroho hwalduk kahi an. An nakni en an olukdeg. Ne, an den at nolukdeg. Nit welahe anyo higitdoho, an den airoho neg nandomba noluk, ne, iren an enolukdeg. Airoho deg lit, an nandomba enobahet wararuhuk boruk kahi.

¹⁶An nandomba hukmu suma neg wereg fug. Foma amu on ekema wereg ma, og-enebil lauk karuhukdeg, inim feseik waruhuk ulug wenggeloho wereg ma, feseik waharuk kwit, it an nele holeheg, ne, enebe misig sebereg[25] kweleg, hwalduk on misig an namu neg enebe hwal-enebeheg, duruk karuhuk.

¹⁷Noluk aruhuk ulug, wararuhuk boruk kahi mu, Nakni enda hundig napuk.

¹⁸It ap homi en an waroho nobahauk fug alereg. An nendan bolug neg wararuhuk. An wararuhuk boruk halug ai, waraheg, ne, noluk aruhuk boruk halug ai noluk aheg, ai neg duhuk ulug, Nakni en melale nobahasi mu, ulug, dik-demdoho hweag-hisihi,” ulug, hweag-esasi.

¹⁹Wene ai anyo hweag-esasi fam it Yahudi on enenda minggit-manggat dausa.

²⁰Minggit-dauk kwit, it foman, “At mungguat eke endama kwisi mu, wenenebo duruk kweleg, nunggwelug at ele holduk kahep?”

²¹uruk kweleg, it foman, “Eleg. Wene ai, ap mungguat endama wereg on en uruk fug. Mungguat en ap inil siag on fano hiling-enebuk alereg behep?” ulug, uswa.

²²Airoho uswa ma, fobik o Yerusalem it ap Yahudi on Allah obam wirig witfag ale ebetuk kwit, soni esetuk salim higit aik wahasi. Anyo salim o sanim deg latsi mu,

²³Yesus Allah obam wirigmu sokolma o wirig eke Salomo soalegma etmano lauk katsi.

²⁴Etma lauk mu, it Yahudi on at akit kabog-dik wahausareg, “Nenenda sug-sagdoho wereg kweleg, nunggwenam nit fagdoho hweag-nesa fug angge welaruhun? Allah en eneko unduhuk febag on Kristus anyo hat halug, mun fagdoho hweag-nesakin.”

²⁵Hweag-utswa ma, aren, “An mun hweag-hesauihik famen, hit demdoho bouk fug angge welahep. Nakni unuk fam duruk kahi anyo fam nabug fag-duruk kahi famen,

²⁶hit an nandomba on eleg ma, an demdoho bolug henenda nobam dip-debouk fug angge welahep.

²⁷An nandomba ai re, an nele holduk. An den it nolukdeg ma, iren an mug-naplug waharuk.

²⁸Mug-napil waharuk halug, an enoluk mundoho welam on eneluk enepuk kahi mu, it elehapdoho fesehuk fug. Ne, ap homi en oho nenggikmen del-enebuhup fug.

²⁹Di ap su ap enomamne maben hag famen, nan domba humdoho og-nitsi on Nakni anyo neg de, amu omamne humdeg[26] ma, ap homi en domba an Nakni enggikmen del-enebuhup fug.

³⁰An Nakni ninim misig neg welahe,” ulug, hweag-esasi.

³¹Hweag-esasi mu, it Yahudi on en Yesus ekenim warukohon ulug, helep wausa.

³²Wausa ma, Yesus en, “An fano duruk kam on hweag-nitsi anyo, hit hinil hahup en, humdoho dil lauk katihik famen, ke dirihik fam hit ketia helep fam nowarukoho, duruk kahep?”

³³ Ulug, hein og-esasi mu, it Yahudi on en, “Hat fano dirihin fam howatul ulug duruk kahe fug. Ite, Allah siahap-biahapdoho feheg, ne, hat de ap famen, Allah hag dil laheg, duruk kahen ai fam howatul ulug duruk kahe.”

³⁴ Ulug, hweag-utswa ma, aren, “Allah en wene melaloho hweag-hesauk kwit, Hit Allah hag welahep, ulug, lisu baleg wereg anyo eleg a?

³⁵Allah wene lisu baleg ai, eleg atuk fug nenelukdeg ma at Allah en it ap homi at ele holfag anyo, Hit Allah hag welahep, hweag-esebag ma,

³⁶at Nakni en eneko nobahabagdeg, kwenangma suma mon-nabik wahasi an anyo en, An Allah amloho, hweag-hesauk fam hit nunggwelug, Hat Allah siahap-biahapdoho foruk kahen, ulug, hweag-nutuk kahep?

³⁷An Nakni duruk ale duruk kahi fug halug, hiren an demdoho bolug, henenda nobam dip-nobahakup fug fano famen,

³⁸duruk kahi halug, hiren an demdoho bolug, henenda nobam dip-nobaharuk kahep ha siag deg halug, an Nakni nendama wereg, ne, an at endama welahi, ulug, hit henoluk amuhup en duruk kahi ale ai neg demdoho boruk kamek,” ulug, hweag-esasi.

³⁹Hweag-esasi mu, at ekenim senetul ulug duswa famen, enenggikmen fetengdoho wilipsi.

⁴⁰ Wilipsireg, Ik Yordan foma fil nindig-atsireg, at Yohanes atam ap homi ikma belap-enepuk katsimu, etmano bok aik lasi.

⁴¹Bok aik lasireg wereg ma, ap homi humdoho at akit wahausareg, “At Yohanes en nenoluk am on nenakol wereg on duruk katsi fug famen, ap su abug hweag-nesauk anyo neg de, demdoho neg hweag-nesauk hehe,”

⁴²ulug, ap homi humdoho Yesus demdoho bolug, enenda obam dip-debousa.