Read Ninia Yali YOHANES 11 Bible Online

YOHANES 11 - Ninia Yali bible

YOHANES 11

¹ Ap eke unuk Lazarus obam Betania, hwe Maria aut Marta inim enobam misigmu welatswa ma, ouk wasi.

² Hwe Maria ai, hwe Tuhan eyog fam ahalue hilili folug, oruk fam horisi anyo at. At owe Lazarus anyo ouk wasi mu,

³autsi hwelani anyo en yonggo mondotuk kwit, “Nenowe. Ap hat henda hundig anyo ouk wasireg wereg,” ulug, Yesus hweag-irik lowag ulug, mondotswa.

⁴Mondotswa anyo, lasireg, hweag-itsi mu, Yesus holsireg, ori hweag-esauk kwit, “At Lazarus ouk wasi ai, wararuhu ulug wasi fug. Ite, an Allah amloho eke duruk mu nealug, leho nobahakup fam, Allah oho leho neg howag ulug, wasi,” ulug, hweag-esasi.

⁵At Yesus en Marta inim, owe inim, Lazarus inim, enda hundig neg welatsi.

⁶Enda hundig neg welatsi famen, Lazarus oukdeg ulug holsireg, apenen nukoho birenam etma neg bok atsi.

⁷Bok atsireg, at ele wauk on hweag-esauk kwit, “Nenambol sombandoho o Yudea lakohon.”

⁸Hweag-esasi mu, iren, “Yehei Guru! It ap Yahudi on en we horog ketia helep fam howarukoho duruk mu esauihinmu etmano deg kweleg, laul neg uruk kahen a?”

⁹Ulug, hein og-hausa ma, aren, “Yaho! Nukoho misiham mo yatuk kweleg, 12 jam aik lauk anyo a, eleg a? Ne, ai halug, it ap o nukoho fam lauk halug, o seleg inil hauk mu, eneyog douk-fouk uruk fug.

¹⁰It ap hup anggo lauk halug neg de, at selehap enepuk on anyo enendama selehap enepuk eleg ma, eneyog douk-fouk uruk kweleg, lauk kamuhup,” ulug, hweag-esasi.

¹¹Ai hweag-esasireg, wene ekenim hweag-esauk kwit, “Nenare Lazarus nohoruk mu, an oluge feik lamin.”

¹²Hweag-esasi mu, it at ele wauk on en, “Nenowe. At we nohoruk halug, fano atmisi,” ulug, hweag-utswa.

¹³At Yesus en at Lazarus waratsi mu ulug, hweag-esasi famen, iren, “We nohoruk kweleg uruk,” bousa ma,

¹⁴at Yesus en fagdoho hweag-esauk kwit, “Lazarus mundoho waratsi.

¹⁵Ne, hiren an demdoho bolug, henenda an nobam dip-nobahakup en an at anyo inim etma welatihik fug. Aireg ma, suma hinim welatihik ai hit fahet welatihik mu, nahayeg boruk kahi. At weregma lakohon.”

¹⁶Airoho hweag-esasi mu, at Tomas unuk Biren Omalik soaleg anyo en ori hweag-esauk kwit, “Nit at inim waramul en, ninim lakohon,” ulug, hweag-esasi.

¹⁷Airoho hweag-esasi mu, Yesus lasireg, at Lazarus ap wareg on feserukmu fousa ma nukoho ohwanam welatsi holsi.

¹⁸O Betania o Yerusalem horogma kwe lauk mu 3 kilometer hag welatsi mu,

¹⁹it Yahudi on humdoho en Marta Maria inim enowe waratsi mu, enenda aho ware fesoul ulug, wahausa.

²⁰Esa wahausareg, wereg ma, at Marta en Yesus waharuk ulug holsireg, Maria olma hwerieg kweleg, at dagma ha wilipsi.

²¹Ha wilipsireg, Yesus hweag-utuk kwit, “Yehei nowe! Hat suma welalen man, an nowe waralep fug famen,

²²ketian haren Allah heng-duruk halug, at og-hitmisi ai an noluk.”

²³Hweag-itsi mu, at Yesus en, “Hat howe anyo oluk atlug inatmisi,” ulug, hweag-itsi.

²⁴Hweag-itsi mu, at Marta en, “Yu o! At fobik o ahae fotogdoho ap homi enoluk apdoho unduhuk feseruk salim oluk atlug inaruhu noluk.”

²⁵Ulug, hweag-itsi mu, at Yesus en, “Ap homi enoluk apdoho feseruk kahi an deg ma, hit eke en an demdoho bolug, henenda nobam dip-nobaharuk kahep halug, waramuhup famen, henoluk atlug, inamuhup.

²⁶Ne, it ap eneluk wereg lit, an demdoho bolug, enenda an nobam dip-nobaharuk halug, waramuhup fug. Wene su anyo demdoho behen a, eleg ane?” ulug, hein og-hasi.

²⁷Hein og-hasi mu, at hwe Marta en, “Yu o, nowe. Allah amloho eneko unduhuk febag on Mesias o kwenangma suma waruhu anyo hat, boruk kahi,” ulug, hweag-itsi.

²⁸Ai hweag-itsireg, at Marta owe Maria anyo ling-long hwirik lasireg, wahasi mu, hweag-utuk kwit, “Maria yei! Guru anyo suma wahareg, hwi-hapuk,” ulug, hweag-itsi.

²⁹Hweag-utuk on Maria holsireg, inatlug, folo-folo Yesus akit lasi.

³⁰Yesus anyo enobam silimu kwisi fug. Marta inim ambi atswama etano owan wereg ma ha lasi.

³¹Ne, it ap Yahudi on hwe Maria inim olma wereg lit, enenda aho ware feseruk on anyo en, hwe Maria inatlug folo-folo wilibik lauk mu, hausareg, “At waratsi on fousama etmano oba yarik laha,” bolug, mutlug lausa.

³²Mutlug lauk mu, hwe Maria Yesus weregma ha lasireg, Yesus apma sebe ulug, “Yehei nowe! Hat suma welalen man, an nowe waralep fug,” ulug, hweag-itsi.

³³Hweag-itsi mu, Maria inim, it ap Yahudi on Maria mutlug lausa anyo inim, oba neg yatuk mu, Yesus il esasireg, “Nenda humon napuk ahi,” ulug, enda hesilduk kwit,

³⁴“Yaho! At ebe kema foruhup?” Hein og-esasi mu, iren, “Ha ma, nowe.”

³⁵Hweag-utswa ma, at Yesus en oba yatsi.

³⁶Oba yatuk mu, it ap Yahudi on en, “Yaho! At Lazarus enda hundig humon deg ma, oba yatuk su furiek.”

³⁷Uruk kweleg, it foma neg, “Yaho! Ap su, il siag on fano hilinggisi anyo en at Lazarus waram no, olukdeg kweleg, fano duk fug alereg en welatsi a? Hilinggelep litdeg,” uswa.

³⁸Uswa ma, Yesus ekenim, “Nenda humon napuk ahi,” ulug, ap wareg on feserukmu etmano lasi. Ap wareg on feserukmu ai re, owik ambilikmu helep fam sok lareg ma,

³⁹Yesus en, “Helep sok lareg su domako husiek.” Hweag-esasi mu, at Lazarus aut Marta anyo en, “Nowe ahwi! Waratsi mu, nukoho ohwanam welatsi mu, mundoho amben duruk.”

⁴⁰Hweag-itsi mu, Yesus en Marta hweag-utuk kwit, “Haren an demdoho bolug, henda nobam dip-nobaharuk halug, Allah unuk mun leho foruk kwit, duruk mu neamihin, hweag-hirihi anyo a, eleg a?”

⁴¹Hweag-itsi mu, helep domako hususwa ma, Yesus anyo il lahap-hauk kwit, “Nakni. Haren an nele mun holehen ma, dang-habihi.

⁴²Haren an nele mundoho holduk kahen anyo, an nolukdeg famen, it ap homi hesangge unduhuk wereg su anyo, haren an mon-nabik waharihin demdoho boukwag ulug, hweag-hirihi,” ulug, hweag-itsi.

⁴³Hweag-itsireg, at ele humon fam, “Lazarus yei! Wilibik ma!”

⁴⁴Hweag-itsi mu, at waratsi anyo wilibik waharuk kwit, enggik eyog sum hwililipdoho hetdeg, ne, sum eke orohole unggul bombaleg angge wilibik wahasi. Wilibik wahasi mu, at Yesus en, “Lauk kamag ulug, sum hwililipdeg ai fisela-diek,” ulug, hweag-esasi.

⁴⁵Airoho hweag-esasi mu, duswa ma, it Yahudi on Maria mutlug lausa anyo en Yesus duruk mu inil hausareg, iren Yesus demdoho bolug enenda obam dip-debousa.

⁴⁶Ne, it foman neg de, ap Farisi on enekit lausareg, Yesus disi ale bilinggoho hweag-esausa.

⁴⁷Hweag-esa lausa ma, it ap Allah il hanim ap homi enobahet duruk on imam anyo enowesi inim, it Farisi on inim en, it ap wene bilingguruk on mahkamah enap kabog-debeseswareg, uruk kwit, “Ap ai, nenoluk am on nenakol wereg on humdoho dil lauk mu, nit nangginuhuk?

⁴⁸Dil lauk kamag ulug embeseruk halug, it ap homi mundoho enenda at demdoho bolug, obam dip-deberuk kwit, mutlug lauk kamuhup angge re, it ap Roma on wamuhupdeg, Allah obam wirig inim, nit ap homi nenebe inim siahapdoho feseruk mu esahuk mu, nangginuhuk?” ulug, uswa.

⁴⁹Uswa ma, ap iron eke tahun ai fam Allah obam wirigmu imam agung unuk de Kayafas anyo en, “Yaho! Hit mun henapeleg wongdoho welahep hisihi.

⁵⁰Nit ap homi nenebe abirangge elehapdoho fesouk ale siag. Ite, ap misig en nit ap homi mundoho nenobahet wararuhu neg, fano furebehep a, eleg ane?” ulug, hweag-esasi.

⁵¹Wene hweag-esasi ai, at amu endaman wenggeloho hweag-esasi fug. Ite, tahun ai fam imam agung wereg lit, duruk katsi mu, at Allah en at endama deberuk kweleg, fobik at Yesus ap homi Israel on enobahet wararuhu mu, ulug, hweag-esasi.

⁵²Ap homi Israel on enobahet neg ai fug. Ite, it ap Allah omaliki di o su o sahareg wereg anyo misigmu kabog-debesehuk en enobahet wararuhu mu, ulug, hweag-esasi.

⁵³Hweag-esasi ai salim, it Yahudi on en Yesus waruhuk ulug, enenda wenggeloho fousa.

⁵⁴Enenda airoho wenggeloho fousa ma, Yesus ap Yahudi inil hanim ekenim lauk katsi fug. Etman o sili eke Efraim o leimu horog etma lasi. Lasireg, at ele wauk on inim etma welatsi.

⁵⁵Wereg ma, it Yahudi Allah andomba waroho soni Paskah esetuk salim higit aik wahasi mu, owan esetuk fug mu, it ap homi Allah il hanim enebe fik-foukdoho horeg eleg angge nauk eleg ma, it ap Yahudi duruk ale higitdoho dukwag ulug, ap homi humdoho enobam en o Yerusalem etma fik-fouk da lausa.

⁵⁶Lausareg, it ap Allah il hanim duruk on imam anyo enowesi inim, it ap Farisi on inim en, “At ebe kema wereg anyo fu haluhupdeg, ebe nit senetul en, hweag-nesa manu,” ulug, wene melalswa ma, Allah obam wirigmu inil fururuk kwit, “At Yesus soni esetukmu watmisi a, eleg ane? Hit keroho behep?” ulug, it hein og-og atswa.