Read Ninia Yali YOHANES 12 Bible Online

YOHANES 12 - Ninia Yali bible

YOHANES 12

¹Enenggik foaben welatlug, malog hag, Allah andomba waroho soni Paskah esetuk salim owan higit atuk eleg kweleg, at Yesus o Betania ap Lazarus waratsi mu oluk apdoho unduhuk fesi on anyo weregma lasi.

²Lasi mu, it ap homi etman soni bobag esag-utswa ma, Marta en soni yohwan-enepuk kweleg, ap homi yonggo feseswa on inim Yesus inim hweria atlug siburu nauk mu, Lazarus inim nausa.

³ Airoho it nauk kweleg, at hwe Maria en ahalue amben fano on unuk narwastu hwenanggeg onggo hum on fam hundutuk angge setengah liter walug, Yesus eyog fam hilili fesireg at onggwareg oruk fam horisi. Horuruk kweleg, ahalue anyo amben olma saha isi.

⁴Saha isi mu, it Yesus ele wauk on eke Simon amloho Yudas Iskariot Yesus senerukwag ulug onggo hwelaroho yonggo lahu on anyo en,

⁵“A! Ahalue su re, uang perak [27] owag 300 fam onggo hunduko ap enengge eleg halug, og-esa on famen deheik su, nunggwelug deheik behep?” isi.

⁶Wene airoho isi ai, it ap enengge eleg on enelaheg bolug isi fug. Ite, at ap heraharuk on deg ma, eneuang kabogdoho yohwareg angge anyo at foroho lit, foma hweleheg duruk katsi mu atlug, isi.

⁷ Isi mu, at Yesus en, “Eleg, it ap enengge eleg anyo ai, mundoho hinim welamuhup famen, an neg de ninim mundoho welamuhuk fug mu, hwe su, an nebe waratlug owikmu kwelap-nabuhup mu ulug, ahalue su nobahakeik ma, embeseiyek,” ulug, hweag-esasi.

⁸

⁹Hweag-esasi mu, it Yahudi humdoho anyo en Yesus o Betania etmano wereg, holswareg, at Yesus neg inil haul ulug, lausa fug. Ite, ap Lazarus waratsi mu Yesus en oluk apdoho unduhuk fesi anyo oho inil haul ulug, lausa.

¹⁰Lausa ma, Yesus en Lazarus oluk apdoho unduhuk fesi fam it Yahudi on humdoho it enowesi enewene embeselug, Yesus demdoho bolug, enenda at obam dip-debousa ma, it ap Allah il hanim duruk on imam enowesi en Lazarus oho watul ulug, enenda wenggeloho fousa.

¹¹

¹²Likia it ap homi humdoho soni esetukmu kabog-dik lausa anyo en, Yesus o Yerusalem waharuk ulug holswareg,

¹³ e lua hag enggela kisilig angge walug, Yesus ha wilibik lauk kwit, “Nit ap Israel fahat-nensug on raja at Tuhan en mondorik wahasi su, mot-dukohon. Allah en fanoap dukwag,” ulug, enele amitmit dil lausa.

¹⁴ Enele amitmit dil lauk kweleg, at Allah en, “Hit o kota Sion welahep on henakol bouk fug. Hit henowe unuk bogdeg raja, keledai omalik ambolowag fam huratlug, waharuk su hakiyug,” ulug, ebag wene lisu balfag anyo higitdoho, at Yesus keledai omalik eke hweahasireg, ambolowag fam huratlug lasi.

¹⁵

¹⁶Ai disi anyo, it Yesus ele wauk on furebouk fug angge welatswa famen, fobik at Yesus waratfag fam Allah en leho fesi mu, at airoho debehup wene lisu baleg anyo, “Nit anyo deberuhuk hehe,” ulug, ebetswa.

¹⁷It ap homi humdoho Yesus inim wereg lit, Lazarus waratsi mu, oluk apdoho unduhuk fesireg, owikmen wilibik wamag ulug, “Ma,” ulug, hweag-utuk mu hausa anyo en, “Yesus airoho duruk mu hauhuk,” ulug, ap homi fagdoho hweag-isil lausa.

¹⁸Fagdoho hweag-isil lausa ma, enoluk am on enakol wereg on at disi on su, it ap homi humdoho holswareg, at akit lausa.

¹⁹Akit lausa ma, it Farisi on en enele mag-mag atuk kwit, “Yaho! Di ap homi su ap homi mundoho neg at mutlug lauk mu, nit eke dela angge famen, duk fug ale atsi furiek?” ulug, enele matswa.

²⁰Allah mot-dul ulug, soni esetukmu lausa anyo ai, it ap homi Yunani on inim lausa ma,

²¹Filipus o Galilea obam Betsaida on anyo akit lausareg, hweag-utuk kwit, “Nowe. Nit Yesus haul en wahe.”

²²Hweag-utswa ma, at Filipus en Andreas hweag-irik lasireg, ai en it biren et Yesus hweag-irik lausa.

²³Hweag-utswa ma, at Yesus en, “An Ap endag-atihik anyo leho nobahaku salim horog aik wahasi.

²⁴Wene su demdoho hweag-hesauk kahi. Sowabuk a kwenangma yaho folug, asinahap filik atuk eleg kweleg, we misig neg wereg famen, waratuk hag, asinahap filik ail lauk em fehelduk halug neg de, anggen humdoho yihiruk.

²⁵ Hit eke en henebe henoluk welamuhuk ulug, henahayeg boruk kahep halug, henebe eleg amuhup. Ne, o kwenangma suma wereg lit, henebe heneluk welamuhuk henerim boruk kahep halug, henoluk mundoho on henepuk mu hahup.

²⁶Hit eke en an nobahet dul boruk kahep halug, an welaruhukmu etmano namingming angge oho ninim etma welamuhuk en mundoho mug-naplug neg waharuk kamuhup. Ne, an nobahet duruk halug, Nakni en leho fohu, ulug, dik-demdoho hweag-hisihi,” ulug, hweag-esasi.

²⁷Hweag-esasireg, aren uruk kwit, “Nakni en di anggin su anggin hahuk on ai fahet nenda mun fit atuk mu, Haren nahap wendat-nabin o, ulug, hweag-hom ale fano famen, Airoho nabukwag ulug waharihik mu deg ma, airoho imin fug.

²⁸Nakni, hat hunuk neg leho fahat-dakin,” ulug, hweag-itsi. Hweag-itsi mu, boholman ele uruk kwit, “Nunuk mun leho fahat-dauihik mu, ekenim leho fahat-dahuk.”

²⁹Ulug, boholman ele uruk anyo, it ap homi humdoho etma welatswa on en enesanggo holswareg de, “Yaho! Ai boholman ululu deheik,” eheg, ne, it foman, “Eleg. Boholma yonggo noruk on malaikat en wene eke hweag-ereheik,” eheg, uswa.

³⁰Uswa ma, at Yesus en, “Yaho. Ele uruk mu holehep ai, an nobahet ale fahet eheik fug. Ite, henobahet eheik.

³¹It ap homi o kwenangma suma wereg on ayo wiroho ene feselug, siag onggo enobam feseheg, at o kwenangma suma hwalduk on anyo sebeloho feheg, duhu salim anyo ketia neg.

³²Ne, ap homi kwenangma on en an unduhuk nobahakup halug, an den di ap homi su ap homi nakit wamag ulug, enenda wenggel-enebuhuk,” ulug, hweag-esasi.

³³Wene hweag-esasi ai, ap homi en nangginoho nobaharuk halug, wararuhuk, eneluk amag ulug, hweag-esasi.

³⁴ Hweag-esasi mu, it ap homi anyo en, “At Allah en, An eneko unduhuk ferihik on Mesias anyo oluk mundoho welaruhu, ulug, ebag wene lisu balfag on anyo, nit de holduk kahe famen, haren at Ap endag-atsi fobik unduhuk fohup ehen ai re, sa fahet ehen e? Ap endag-atsi on ai re ebe sa?”

³⁵Hweag-utswa ma, at Yesus en, “Hit eke en o mum fam lauk kahep halug, Kwe su la, ulug, henapeleg kweleg, lauk kahep ma, o seleg anyo we dorangge welaruhu mu, henenda mum henebuk no, seleg henepuk kweleg, iya at lauk kamek.

³⁶At seleg henepuk anyo hinim wereg li iya, at omaliki hag amuhup en, henenda at obam dip-debelug, demdoho beiyek,” ulug, hweag-esasi. Wene anyo hweag-esasireg, at Yesus anyo ap homi embeselug, hweag-nabuk no, herag-aik lasi.

³⁷It ap homi eneluk am on enakol wereg on mundoho inil hanim duruk katsi famen, enenda at obam dip-debelug, demdoho bouk fug angge welatswa.

³⁸ Demdoho bouk fug angge welatswa ai re, ap Nabi Yesaya anyo en uruk kwit, diroho isi. “Nenakni Allah yei. Nenele hweag-esauk katuhuk anyo, sa mel en demdoho bousa? Ne, henggik omamne fam duruk katihin anyo, sa mel en inil heausa? Eleg o,” ulug, wene ebag on lisu balfag anyo higit amag ulug ebag.

³⁹ “At Allah en uruk kwit, An den fano hiling-enebuhuk en, enenda wenggele fahat-dalug, inil enegdeg ma heheg, enenda furebeheg, duk no, inil hupne feseheg, enenda mum apdoho feseheg, dirihik,” ulug, at Yesaya en ebag ale lisu baleg anyo higitdoho enenda mum apdoho fesesi mu, iren Yesus demdoho bolug, enenda at obam dip-debouk fug ale atsi.

⁴⁰

⁴¹At Yesaya en wene hweag-esebag ai, Yesus mun leho wereg ma hebag ma, ulug, hweag-esebag.

⁴²At Yesaya airoho hweag-esebag famen, deg kweleg, ap homi Yahudi on enowesi humdoho en Yesus demdoho bolug, enenda at obam dip-debousa. Dip-debousa famen, it Farisi on en it Yahudi somban uruk obam en wilip-nenebuk no, enakol en, “Nit at ele wauk nenap,” ulug, fag-duk fug angge welatswa.

⁴³It ap fag-duk fug angge welatswa ai, “Allah en nit fano boukwag,” ulug, bousa fug. Ite, “Ap homi en nit fano boukwag,” ulug, boruk katswa.

⁴⁴Airoho boruk kweleg, at Yesus ele humon fam it hweag-esauk kwit, “Hit eke en an demdoho bolug, henenda an nobam dip-nobaharuk kahep halug, an nobam neg dip-deberuk kahep fug. Ite, at mon-nabik wahasi anyo demdoho bolug, henenda at obam dip-deberuk kahep.

⁴⁵Hit eke en hinil an neauk kahep halug, at mon-nabik wahasi anyo hauk kahep.

⁴⁶Ne, hit eke en an demdoho bolug, henenda an nobam dip-nobaharuk kahep halug, o mum fam welahep ha no, an o seleg hag o kwenangma suma seleg dik waharihik.

⁴⁷Hit ap homi mundoho kwenangma welahep anyo siag henobam henobahaukwag ulug, waharihik fug. Ite, henahap wendat-henepmin ulug waharihik mu, hit eke en an nawene hole folug, duruk eleg halug, an den siag henobam fesehuk fug.

⁴⁸Hit eke en an henerim napuk kwit, an nawene wauk eleg halug, siag henobam henobahaukwag ulug eke wereg. An nenda wenggele folug wene hweag-hesauk katihik fug. Ite, an Nakni mon-nabik wahasi on anyo en, Diroho in, airoho in, ulug, melaloho hweag-nutuk kweleg, hweag-hesauk kahi mu, o ahae fotog salim an wene hweag-hesauk katihik fam, siag henobam henobahaku.

⁴⁹

⁵⁰Ne, at wene, Diroho diyug, airoho diyug, uruk mu, holduk kahep halug, aren mundoho henoluk apdoho henobahaku an noluk. An hweag-hesauk kahi ai, an Nakni en hweag-nutuk higitdoho neg uruk kahi,” ulug, hweag-esasi.