Read Ninia Yali YOHANES 13 Bible Online

YOHANES 13 - Ninia Yali bible

YOHANES 13

¹Allah andomba soni Paskah sono eseruhuk ulug duruk kwit, at Yesus o kwenangma suma embeselug, at akni ha lahuk salim horog atsi ale olukdeg welatsi. At omaliki at inim kwenangma suma welatswa anyo mundoho enda hundig kweleg, at wararuhu salim horog aik wahasi.

²At Yesus ele wauk on inim siburu nauk mu, Iblis en Simon Iskariot amloho Yudas, Yesus senerukwag ulug onggo hwelaroho yonggo lamisi on anyo, enda mun kahalik wahasi mu,[28]

³at Yesus anyo Akni en di on su on humdoho at hwalduk kamag ulug, og-itsi anyo inim, ne, Allah weregman wahasimu ambol sombandoho ha lahuk inim, olukdeg welatsi mu,

⁴siburu nauk men, inatlug asum dag fikit wandeg anyo nonggoloho embeselug, kume sum obahare kwe wan-dasi.

⁵Wan-dalug, ik hwenanggeg on ikwag fam keraloho hwenangge folug at ele wauk on eneyog omag-enebeheg, ai en kume sum obahare kwe wandeg on anyo fam ho-enebeheg, dil lasi.

⁶Airoho dil, Simon Petrus akit horog aik lasi mu, at Petrus en, “Nowe ao. Haren an neyog ho-napmin bolug, duruk kahen a?”

⁷Hein og-hasi mu, at Yesus en, “Ahwi! An duruk kahi su anyo ketia hat hapeleg famen, fobik neg de, holuk aruhun,” ulug, hweag-itsi.

⁸Hweag-itsi mu, at Petrus en, “Haren an neyog de ho-napmihin mun eleg.” Hweag-itsi mu, at Yesus en, “An heyog ho-hapmin eleg halug, hat an nele wauk on welaruhun fug,” ulug, hweag-itsi.

⁹Hweag-itsi mu, at Simon Petrus en, “Yehei. Ai halug, nowe, neyog neg de fug. Ite, nenggik, neyog, nunggul inim ho-nabin.”

¹⁰Hweag-itsi mu, at Yesus en, “Hit eke kume wareg welahep halug, henebe abirangge mun horeg welahep ma, kume ekenim wat-da ale siag deg. Ite, heneyog neg[29] horuk ale fano. Hit su mundoho horeg welahep famen, ap misig amu neg de horeg eleg angge wereg ma hihi,” ulug, hweag-esasi. (

¹¹At yonggo lamisi on anyo olukdeg welatsi mu, “Hit mundoho horeg neg welahep fug hihi,” ulug, hweag-esasi.)

¹² At Yesus eneyog ho-debeselug, at asum nonggoleg anyo wan-dasireg, obalma huratlug, it hweag-esauk kwit, “Yaho! An henebihi su, hit fureberuk kahep a, eleg ane?

¹³Hiren, Nenowe guru ahwi, ulug, hweag-nutuk kahep ai, an deg ma, demdoho hweag-nutuk kahep.

¹⁴Henowe an hweag-hesauk kahi on en de hit heneyog ho-henebihi halug, hit airoho neg heneyog ho-ho atuk kamuhup fano.

¹⁵An henebihi su, hit higitdoho nowal-heheg duruk kamuhup ulug, henebihi.

¹⁶ Akni sebeleg kweleg, amingming angge leho wereg fug. Ne, at mondotuk on sebeleg kweleg, at mondorik waharuk on leho wereg fug neg, ulug, dik-demdoho hweag-hesauk kahi.

¹⁷An wene hweag-hisihi su anyo henolukdoho wereg lit, duruk kamuhup halug, henahayeg humon boruk kamuhup.

¹⁸ Hit mundoho su fahet ulug, hweag-hesauk kahi fug. Hit su, an den momaloho en-henepihik an nolukdeg ma, Allah en hweag-utuk kweleg, ap eke en uruk kwit, At ninim siburu nauk anyo en nowaruhup ulug wenggelsi, ebag ale Allah wene lisu balfag anyo dip-ukwag ulug, atsi mu, dip-imisi.

¹⁹Ketia wene su dip-uruk eleg kweleg, hweag-hesauk kahi ai, fobik atuk halug, hiren, At eitog mundoho wereg anyo at o, ulug, demdoho bolug, henenda nobam dip-nobahakup ulug, hweag-hesauk kahi.

²⁰ Hit eke en it an den mon-enepuk on og-enepuk halug, an neg og-nabeheg, ne, an og-napuk halug, at mon-nabik wahasi anyo neg weheg, duruk kamuhup, ulug, dik-demdoho hweag-hisihi,” ulug, hweag-esasi.

²¹Yesus en wene airoho hweag-esasireg, at enda mun humdoho hesilsi mu, fagdoho hweag-esauk kwit, “Hit henebe iya on eke en an nowaruhup en hweag-esamisi, ulug, dik-demdoho hweag-hisihi.”

²²Hweag-esasi mu, “San dimisi ulug eheik,” ulug, inil fu-fu atuk katswa.

²³Inil fu-fu atuk kwit, ap at ele wauk on eke Yesus enda hundig wereg anyo Yesus inim seberoho hwerieg wereg ma,

²⁴at Simon Petrus en, “Sa fahet eheik e, hein og-hakin,” ulug, enggik dum fam hweag-itsi.

²⁵Hweag-itsi mu, at ele wauk on eke anyo en Yesus aluluk ekenim horog aik lasireg, hein og-hauk kwit, “Nowe. Ai sa fahet ehen?”

²⁶Hein og-hasi mu, at Yesus en, “An den siburu ahalue fam dag-debelug og-itmin mu nealug, ap ai bemihin,” hweag-itsireg, siburu ahalue fam dagdoho Simon Iskariot amloho Yudas anyo og-itsi.

²⁷Og-itsi mu, wauk kweleg, Iblis Yudas endama kwisi mu, at Yesus en, “Yudas ahwi. Hat dimin behen ale folo-folo dik lakin.”

²⁸Hweag-itsi mu, it hwerieg lit, siburu nauk on anyo mundoho en, “Ai keroho ulug eheik,” ulug, it furebouk fug angge welatswa.

²⁹It foman ap Yudas enuang kabogdoho yohwareg angge foroho welatsi mu, at Yesus en soni esetuk on eke hundurik lowag ulug, hweag-utuk ane, ap enangge eleg halug, foma og-esowag ulug hweag-utuk a, ulug, hweag-utuk bousa.

³⁰Boruk kweleg, at Yudas anyo siburu anyo wasireg, folo-folo wilibik lasi. O mum deg kweleg wilibik lasi.

³¹Wilibik lauk kweleg, at Yesus en it foma anyo hweag-esauk kwit, “Yaho! Ketia Allah en an Ap endag-atihik anyo leho nobahakeg, ne, an duruk kahi ale anyo fam Allah oho leg aheg, duruk mu hit ap homi en hakoho lahep.

³²An duruk kahi ale anyo famen Allah leho foruk mu, hahup halug, at Allah duruk fam an oho leho nobaharuk mu, hahup neg. Ne, folo-folo duruk mu hahup.

³³ Yehei, nomaliki! An nukoho misiham hag hinim welamuhukdeg lahuk angge re, hit hera-nabil lahup famen, An lahukmu etmano hit lahep ha fug alereg, ulug, it ap Yahudi on hweag-esauihik anyo higitdoho, hit airoho neg hweag-hesauk kahi.

³⁴ Wene diroho diyug airoho diyug, keron hweag-hesauk kahi ai, nenenda henenda hundig duruk kamuhup ai. An den hit nenda hundig henepihik hag, hiren nenenda henenda duruk kamek.

³⁵Hit nenenda henenda hundig duruk fam, ap homi mundoho en hit an nele wauk on demdoho enoluk amuhup,” ulug, hweag-esasi.

³⁶Hweag-itsi mu, at Simon Petrus en, “Hat kema lahuk ulug, ehen e, nowe?” Hweag-itsi mu, at Yesus en, “An lahukmu etmano hat ketia ninim lahen ha fug alereg famen, fobik neg de nombolim lahun.”

³⁷Hweag-itsi mu, at Petrus en, “Nowe. An nunggwe ulug ninim lahen ha fug alereg ulug hweag-nerehen? An hat hobahet waratmin fano boruk kahi mu.”

³⁸Hweag-itsi mu, at Yesus en, “Ahwi! Hat demdoho an nobahet waratmin fano boruk kahen e? Suwe ayam ele owan uruk eleg kweleg, Yesus an napeleg, henahanam urukmu heamin, ulug, dik-demdoho hweag-hutuk kahi,” hweag-itsi.