Read Ninia Yali YOHANES 15 Bible Online

YOHANES 15 - Ninia Yali bible

YOHANES 15

¹At Yesus en ekenim hweag-esauk kwit, “E anggur indip ebe on ai, an. Ne, anggur ebe hwalduk on de, an Nakni.

²E enggik eke an ninim hundig lit, anggen yihiruk eleg halug, Nakni en kisiloho embeseheg, ne, e enggik anggen yihiruk halug, ekenim yihiruk kamag ulug hilinggoho kong-deheg, duruk.

³An wene hweag-hesauk katihik anyo fam mun hilinggoho henobaharihik.

⁴Hit de an ninim hundig welamek. Diroho welamuhup halug, an hinim hundig welamuhuk. E enggik ebe fam hundig eleg lit, amu neg en anggen yihuk fug alereg anyo hag, hit de an ninim hundig eleg halug, anggen yihikep ha fug alereg.

⁵E anggur indip de an. Ne, enggik de hit. Hit an ninim hundig, ne, an hit ninim hundig lit, anggen humdoho yihiruk kamuhup. An eleg kweleg, hit eke dehep ha fug alereg.

⁶E enggik kisiloho embeseruk on bug atuk halug, indok menggalegma yaloho embeseruk halug indok nauk ai hag, hit an ninim hundig eleg halug, airoho neg henebuhu.

⁷Hit an ninim hundig lit, an nawene henendama wereg halug, Nit ai on og-nesowag, bolug, heng-napuk halug, anyo neg og-hesauk mu neahup.

⁸Hit anggen humdoho yihiruk kamuhup fam an Nakni leho feheg, ne, hit demdoho an nele wauk on aheg, duhup.

⁹Nakni en enda hundig napuk hag, an oho airoho neg nenda hundig henepuk kahi. Ne, an nenda hundig henepuk kahi mu, hit ninim hundig welamek.

¹⁰Nakni en, Diroho diyug, airoho diyug, hweag-nitsi anyo an furoho duruk katihik mu, enda hundig napuk hag, an nawene, Diroho diyug, airoho diyug, hweag-hesauk kahi anyo furoho duruk kahep halug, nenda hundig henepuk karuhuk mu, ninim hundig welamuhup.

¹¹Wene su hweag-hesauk kahi ai, nenda nahayeg boruk kahi anyo hag, hit ebenaheg henenda henahayeg humon hahup en, hweag-hisihi.

¹² An nenda hundig henepihik anyo hag, hit nenenda-henenda hundig boruk kamek, ulug, wene misig ai melale henobahaki.

¹³Ap homi en enori we enenda enepuk ai, maben hag famen, ap eke en ori enahap wendaroho enobahet waratuk halug ai neg de, ori mundoho enda hundig humon boruk kwit, duruk mu, ai along beiyug.

¹⁴Hiren de an nawene, Diroho diyug, airoho diyug, melal-henebihi anyo furoho duruk halug ai, hit an nori neg welahep beiyug.

¹⁵Akni duruk anyo amingming angge apelegdeg famen, an di wene su wene mundoho Nakni en hweag-nitsi anyo hweag-hesauihik mu, ketia su hwili famen, Namingming angge, ulug, hweag-hesauk karuhuk fug. Ite, Nori neg, ulug, hweag-hesauk karuhuk.

¹⁶Hiren an momal-napuhup fug. An den neg hit momal-henepihikdeg, hit anggen mundoho welam on humdoho yihiruk kamuhup en eneko henobaharihik. Eneko henobaharihik mu, Ai on og-nesakin, ulug, an nunuk yiko Nakni heng-duruk halug, aren og-hesahu.

¹⁷Nenenda henenda hundig duruk kamuhup ulug, wene misig su melal-henebihi,” ulug, hweag-esasi.

¹⁸Hweag-esasireg, ekenim hweag-esauk kwit, “It o kwenangma suma wereg on anyo en enerim henepuk halug, an dam enerim napuk katswa anyo henendama ebetuk nu.

¹⁹Hiren it ap homi kwenangma suma wereg anyo on welalep man it mundoho enenda hundig heneplep famen, hit iron eleg ma, ne, it anyo wereg kweleg, an eneko henobaharihik mu, enerim henepuk.

²⁰ Akni sebeleg kweleg, amingming angge leho wereg fug, ulug, hweag-hesauihik anyo, eberiyug. Iren an siahap-napswa halug, hit airoho siahap-henepuk kamuhup. Ne, iren an nawene furoho wausa halug, hit airoho henewene furoho wauk kamuhup.

²¹At mon-nabik wahasi anyo it enepeleg deg ma, ai henepuk kamuhup ai, indip an fam neg henepuk kamuhup.

²²An enekit waharihik deg, wene hweag-esauk kale fug men, it siag enapeleg angge hesangge welalep famen, ketia it siag duruk ai, Nenepeleg deg lit duruk kahe, ulug, uk fug alereg.

²³It ap homi en an enerim napuk halug ai, an Nakni oho enerim boruk neg.

²⁴An it enenggalegma wereg lit, duk fug on duruk kale fug men, it siag enapeleg angge hesangge welalep famen, ketia neg de, an duruk katihik anyo it mundoho inil neausareg, an Nakni ninim at enerim nenepuk.

²⁵ Enerim nenepuk ai, Allah en wene melaleg hweag-esauk kwit, Indip eleg kweleg, enerim napswa, ulug, lisu baleg anyo dip-ukwag ulug, enerim nenepuk.

²⁶At henenda aho ware henobaharuk on, Allah airoho wereg, ulug, demdoho wene hweag-hesauk on Allah Aheime anyo, an Nakni weregman mondorik waruhuk mu, waruhureg, an nabug fagdoho hweag-hesauk karuhu.

²⁷Hit o atam en ninim wereg latuhuk mu, hit oho an nabug fagdoho hweag-esauk kamuhup,” ulug, hweag-esasi.