Read Ninia Yali YOHANES 16 Bible Online

YOHANES 16 - Ninia Yali bible

YOHANES 16

¹Hweag-esasireg, ekenim hweag-esauk kwit, “Hit wene su hweag-hesauihik fam, Nenerim, ulug, embesehep ha no ulug, hweag-hisihi.

²It ap homi Yahudi somban uruk obam en muko dagma wilibi henobahakup. Ne, it binggi henowaruhup on en, Nit Allah obahet duruk kahe, ulug, bohup salim horog aik waruhu.

³Ai henebuhup ai, an Nakni ninim enapeleg deg ma, henebuhup.

⁴Henebuhup salim horog aik waharuk halug, wene hweag-hisihi su, ebetuk kamuhup en hweag-hisihi,” ulug, hweag-esasi. “An atam hit ninim wereg latuhuk mu, wene su hweag-hesauk katihik fug famen,

⁵ketia neg de, at mon-nabik wahasi anyo akit lauk kahi men, hit eke en, Hat kema lauk kahen? ulug, hein og-nea fug angge welahep.

⁶An wene su hweag-hisihi anyo fam henenda mun hesilduk kahep famen,

⁷hit henobahet lauk kahi mu, fano. An lahuk fug halug, at henenda aho ware henobaharuk on henekit waruhu fug. Lahuk halug neg de, at henekit mondorik waruhuk, ulug, demdoho hweag-hisihi.

⁸At ai waruhureg, ap homi siag duruk ale inim, Allah il hanim fano duruk ale inim, Allah en it siag duruk on ayo wiroho siag onggo debeseruk ale inim, it ap homi kwenangma on furebahat-dausa fug ulug, fagdoho hweag-esahu.

⁹Ap homi en an demdoho bolug, enenda an nobam dip-nobaharuk eleg ma halug, it siag duruk ale furebahat-dausa fug ulug, hweag-eseheg,

¹⁰an Nakni ha lahuk angge re, hit eke neahup fug mu halug, Allah il hanim fano duruk ale furebahat-dausa fug ulug, hweag-eseheg,

¹¹ne, at o kwenangma suma hwalduk on anyo Allah en siag onggo obam mundoho fesi mu halug, Allah en it siag duruk on ayo wiroho siag onggo debeseruk ale furebahat-dausa fug ulug, hweag-eseheg, fagdoho hweag-esauk karuhu.

¹²Nori. Wene foma humdoho hweag-hesa on wereg famen, hiren ketia wehep ha fug alereg ma,

¹³Allah airoho wereg, ulug, demdoho wene fagdoho hweag-hesauk on Allah Aheime anyo waruhureg neg de, Allah airoho wereg, ulug, demdoho wene heneluk amuhup en hweag-hesauk karuhu. At endan bolug hweag-hesauk karuhu fug. Allah en hweag-utuk anyo neg hole folug hweag-heseheg, fobik duhu wene anyo aren fagdoho hweag-heseheg, duruk karuhu.

¹⁴Aren an nele oko fagdoho hweag-hesauk karuhu ai fam an leho nobaharuk karuhu.

¹⁵Di angge su angge an Nakni foroho wereg ai, an nangge deg ma, at Allah Aheime en an nele oko hweag-hesauk karuhu mu, ulug, wene ai hweag-hisihi,” ulug, hweag-esasi.

¹⁶Hweag-esasireg, “An nebe nukoho misiham hag welatlug, eleg ma neahup famen, ai en, nukoho misiham hag welatlug, neahup,” ulug, hweag-esasi.

¹⁷Hweag-esasi mu, at ele wauk on anyo hole folug, it foman eke en eke hweag-utuk kwit, “Nukoho misiham hag welatlug, eleg ma neahup, ai en, Nukoho misiham hag welatlug, neahup, ne, eke An Nakni akit lahuk mu, ulug, hweag-nesauk su, nanggoho ulug hweag-nesauk behep?

¹⁸Nukoho misiham hag, eheik ai, ke fahet bolug eheik e? At hweag-nesauk su, nit wong-nenepuk,” uswa.

¹⁹Uswa ma, at Yesus en it wene eke at hein og-ha ale duruk mu enegdeg ma esasireg, hweag-esauk kwit, “Yehei, nori. Nukoho misiham hag welatlug, eleg ma neahup, ai en, Nukoho misiham hag welatlug, neahup, hweag-hisihi ai, Ke fahet bolug eheik, ulug, ai wene boruk kahep no?

²⁰Henenda hesileheg, oba yareheg, duruk kweleg, it ap homi o kwenangma suma wereg on en enahayeg bohup. Henenda hesiluhup famen, fobik henenda hesilduk ale eleg atuk kwit, obalma henahayeg humon henepuk mu hahup.

²¹Hwe eke omalik enderuhu salim, horog aik waharuk mu il fenggenduk halug, ouk en enda hesilduk famen, endetil lauk em neg de, Nomalik endag-dihi, ulug, ahayeg boruk kwit, ouk hasi anyo apeleg atuk.

²²Anyo hag, hit ketia henenda hesiloho welahep famen, fobik an ninim seberuhuk fam neg de, henahayeg atuk mu hahup. Henahayeg hahup anyo ap homi en elehapdoho fouk fug alereg, ulug, dik-demdoho hweag-hisihi.

²³Ai salim, hiren wene eke hein og-nabuhup fug. Ai on og-nesakin, ulug, an nunuk yiko[35] Nakni fam heng-duhup halug, aren og-hesauk mu hahup.

²⁴O endam en bekit ketia hwili, nunuk yiko Nakni eke heng-duk fug angge welahep. Henahayeg humon neg hahup en heng-nabiyug. Heng-napuk halug, og-hesauk mu hahup, ulug, dik-demdoho hweag-hisihi,” ulug, hweag-esasi

²⁵“Wene hweag-hesauk kahi anyo foma hwenaroho hag hweag-hisihi famen, an Nakni abug anyo enamegma fagdoho hweag-hesahuk salim horog aik waruhu anyo fam an wene wal-heheg ekenim hweag-hesahuk fug.

²⁶Hit henobahet an Nakni hweag-uruhuk, ulug, hweag-hisihi fug. Hiren an henenda hundig nabeheg, ne, an Nakni Allah en an mon-nabik wahasi anyo demdoho beheg, duruhup fam Nakni enda hundig henepuk angge re, ai salim hiren an nunuk yiko at fam heng-duhup.

²⁸An Nakni weregman o kwenangma suma wambik waharihik. Ne, ketia re an kwenangma suman embeselug, Nakni akit lauk kahi,” ulug, hweag-esasi.

²⁹Hweag-esasi mu, at ele wauk on anyo en, “Ketia neg de, wene hwenaroho hag hweag-nesauk kahen fug, enamegdoho hweag-nesauk kahen heehe.

³⁰Ketia hat di on su on mundoho holukdeg ma, it ap homi en hein og-hea fug alereg heehe. Ai fam hat Allah weregman waharihin demdoho behe,” ulug, hweag-utswa.

³¹Hweag-utswa ma, at Yesus en, “Hit ketia demdoho boruk kahep a?

³²Yaho! Hit humdoho an lin-nealug, henobam domog longgo uluhup salim fobik famen, ketia mundoho aik wahasi. Hit lin-nealug, longgo uluhup famen, namu welatmin fug. An Nakni nimim welamul.

³³Wene su hweag-hisihi anyo, henenda an ninim hundig lit, henenda hambukdoho welamuhup en hweag-hisihi. It ap homi kwenangma suma wereg on en siahap-henebuhup famen, an mun sebeloho ferihik angge re, henenda henambong seroho fahat-dalug welamek,” ulug, hweag-esasi.