Read Ninia Yali YOHANES 17 Bible Online

YOHANES 17 - Ninia Yali bible

YOHANES 17

¹Wene ai hweag-esasireg, at Yesus il boholma lahap-hasireg, “Yehei, Nakni! An naplusa salim horog aik waha. An hamloho en hat leho hobahamin en, hamloho an leho nobahayug.

²An hamloho, di ap homi su ap homi mundoho fahat-enesug lit, ap homi og-nitihin anyo enoluk mundoho welamag ulug enebuhuk en, unduhuk nobaharihin.

³It ap homi enoluk mundoho welam ale ai, hat Allah demdoho hamu neg welahen inim, ne, Yesus Kristus haren mon-nabik waharihin inim, enoluk atuk de ai.

⁴Duruk karuhuk ale hweag-nitihin anyo mun ahae fotogdoho dirihik mu, an kwenangma suma wereg lit, leho hobaharihik.

⁵Ne, ketia Nakni! O owan wal-duk fug mu, hat ninim wereg lit, leho welatihik anyo higitdoho, ketia hat welahenma etma leho nobahayug.

⁶It ap homi o kwenangma suma wereg on foma eneko og-nitihin anyo, hat Allah duruk kahen ale mundoho fagdoho hweag-esauihik. It ap homi su anyo re, hat homaliki halug neg og-nitihin mu, hat hele hole folug, duswa.

⁷Haren di angge su angge mundoho og-nitihin anyo, at Allah en neg og-utuk ulug, enoluk atsi.

⁸Hat wene hweag-nitihin mundoho neg hweag-esauihik mu, wausareg, an hat welahenman demdoho waharihik enoluk atsireg, haren an mon-nabik waharihin it demdoho bousa.

⁹An den it enobahet somban uruk kahi. It ap homi o kwenangma suma wereg on enobahet somban uruk kahi fug. Ite, it hat og-nitihin anyo re, hat homaliki deg ma, enobahet somban uruk kahi.

¹⁰An nomaliki ai, hat homaliki, ne, hat homaliki ai, an nomaliki neg. It duruk anyo fam an leho nobaharuk.

¹¹Ketia an hakit waharuk kahi, o kwenangma suma ekenim welaruhuk fug famen, it hat homaliki su neg de, o suma welamuhup. Yehei, Nakni! Hat siag duruk kahen fug, mun fano eneg deg lahen. Hat ninim nenenda misig welahe anyo higitdoho, it haren og-nitihin anyo enenda misig welamag ulug, hat hunuk humdeg lit, homamne nendama hilil-nitihin anyo fam homaliki su, fahat-enesug lamin.[36]

¹² It og-nitihin anyo an ninim wereg lit, hat homamne nendama hililig anyo fam fahat-enesug latihik.[37] Fahat-enesug kweleg, eke longgo isi fug famen, at eke eleg amag ulug endag-atsi anyo neg de, Allah wene lisu balfag anyo dip-ukwag ulug, longgo isi.

¹³Ketia neg de, an hakit waharuk kahi. It ap su, nahayeg humon enendama humdoho howag ulug, an o kwenangma suma owan wereg lit, wene su hweag-hutuk kahi.

¹⁴Hat hawene anyo an mundoho hweag-esauihik. An de it ap homi kwenangma on eleg anyo hag, it oho kwenangma on eleg neg deg ma, it kwenangma on en enerim enepuk.

¹⁵It ap homi kwenangma on suma wereg kweleg, hat homaliki neg eneko og-enebuhun en, hweag-hutuk kahi fug. Ite, at siag duruk on anyo en siahap enebik wam no ulug, furoho fahat-enesug latmihin en hweag-hirihi.

¹⁶An de it ap homi kwenangma on eleg anyo hag, it oho kwenangma on fug.

¹⁷Hat hele uruk kahen anyo hat nanggoho welahen demdoho enoluk atuk mu, An airoho welahi, ulug, demdoho wene hweag-esauk kwit, it homaliki su re, eneko fahat-dakin.

¹⁸Haren ap homi o kwenangma suma wereg on enekit mon-nabik waharihin anyo hag, it homaliki su, airoho neg it ap homi kwenangma on enekit mon-enepihik.

¹⁹Haren, An airoho welahi, ulug, demdoho wene fagdoho hweag-esauk kahen anyo fam, it homaliki su demdoho hat hobahet enegdeg welamag ulug, enobahet an nebe eneko fahat-dauk kahi.

²⁰It enemu neg enobahet somban uruk kahi fug. Ite, iren wene hweag-esahup fam enenda an nobam dip-nobahalug, demdoho bohup on anyo inim enobahet somban uruk kahi.

²¹It mundoho inim enenda misig welamag ulug enobahet somban uruk kahi. Yehei, Nakni! Haren an henda hundig, ne, an den hat nenda hundig welahe hag, it nit ninim nenenda misig hundig welahe nesalug, it ap homi o kwenangma suma wereg anyo en hat mon-nabik waharihin anyo demdoho bohup en, it homaliki su enobahet somban uruk kahi.

²²Hat ninim nenenda misig welahe anyo hag, it airoho neg it enenda misig neg welamag ulug, haren an leho nobaharihin anyo hag, an den it leho feserihik.

²³It enenda mun misig neg amag ulug, it an enenda hundig, ne, hat an henda hundig wereg nesalug, it ap homi o kwenangma suma wereg on en, hat demdoho mon-nabik waharihin inim, ne, hat henda hundig napuk kahen hag, it airoho henda hundig enepuk kahen anyo inim enoluk amuhup.

²⁴Yehei, Nakni! It ap su og-nitihin anyo en hat bohol kwenang su owan wal-duk fug mu, henda hundig napuk kwit, leho nobaharihin anyo, neowag ulug, an welahimu etma ninim welalep aho, boruk kahi.

²⁵Yehei, Nakni! Hat henda mun wenggeleg fam fano neg duruk kahen. It ap homi o kwenangma suma wereg on anyo en hat Allah enapeleg famen, an neg de, hat nolukdeg. Ne, hat demdoho mon-nabik waharihin anyo it ap su mun enoluk atsi.

²⁶Hat habug anyo it ap su hweag-esauk katihik mu, hat an henda hundig napuk kahen anyo hag, it airoho neg nenenda henenda hundig duruk kwit, it an enenda hundig mundoho welamag ulug, hat habug ekenim hweag-esauk karuhuk,” ulug, hweag-itsi.