Read Ninia Yali YOHANES 18 Bible Online

YOHANES 18 - Ninia Yali bible

YOHANES 18

¹At Yesus en somban airoho isireg, at ele wauk on inim Ik Kidron foma fil nindig-aik lausareg, etma yabuk yahoma eke kwik lausa.

²At Yesus at ele wauk on inim yabuk yahoma etmano hundig neg lauk katswa ma, at Yesus senerukwag ulug yonggo lasi on Yudas anyo oho yahoma etma olukdeg latsi.

³Olukdeg wereg ma, it ap Allah il hanim duruk on imam enowesi inim, ap Farisi on inim, anyo en enautsi Allah obam wirigmu kahalduk enap foma inim, sehen foroho enap tentara Roma on eke lohwaleg inim, mon-enepswa ma, sehen weheg, lampu esahe inim fisaho weheg, wausa ma, Yudas en hondog-eneplug yahoma etmano lasi.

⁴Lasi mu, Yesus en naplusa ale mundoho olukdeg latsi mu, it anyo en Yesus akit lausa ma, Yesus enekit lasireg, “Hit sa heraril wahep?” ulug, hein og-esasi.

⁵Hein og-esasi mu, iren, “Eleg. Yesus o Nazaret on heraril wahe,” ulug, hweag-utswa. Hweag-utswa ma, Yesus en, “Ai re an,” ulug, ap Yudas Yesus senerukwag ulug yonggo lasi on anyo inim wereg kweleg, hweag-esasi.

⁶“Ai re an,” hweag-esasi men, enambolhan hekip-hekip lauk kwit, kwenangma ying-aik lausa.

⁷Ying-aik lausa ma, at Yesus ekenim hein og-esauk kwit, “Hit sa heraril wahep ahi?” Hein og-esasi mu, iren “Eleg. Yesus Nazaret on heraril wahe.”

⁸Hweag-utswa ma, Yesus en, “Fahe, Ai re an o, ulug, hweag-hisihi anyo! Hit an hera-nabil wahep halug, it nori su lowag ulug embeseiyek,” ulug, hweag-esasi. (

⁹Airoho hweag-esasi ai re, owan am fug mu atam at Yesus en Allah hweag-utuk kwit, “Allah nakni. Haren og-nitihin on omano eke longgo isi fug,” ulug, hweag-itsi on anyo dip-ukwag ulug hweag-esasi.)

¹⁰Airoho hweag-esasi mu, Simon Petrus en karog yaron foroho wereg ma, ahunggwa famen lisoho ap imam agung anyo amingming angge unuk Malkus anyo esanggo bekit fil fiyogdoho bo fesi.

¹¹ Esanggo bo fesi mu, at Yesus en, “Petrus ahwi. Henggarog ahunggwa obalma yohwarin. Nakni en, Anggin-fanggin habuhu, ulug, hweag-nitsi ale ik hwenanggeg hag wereg anyo na fug angge embesemin behen a? Eleg. Namin,” ulug, hweag-itsi.

¹²Wene airoho ulug hweag-itsi mu, it ap tentara enowe komandan inim, ne, it Allah obam wirigmu kahalduk enap inim en Yesus seneko sabu het-debousa.

¹³Sabu het-debousareg, atam at Hanas akit walug lausa. Ap Hanas ai, ap imam agung anyo tahun ai fam duruk on unuk Kayafas eyamal de at.

¹⁴ Ap atam it ap Yahudi on hweag-esauk kwit, “Ap misig nit ap homi nenobahet wararuhu neg de fano,” hweag-esasi ai, Kayafas en hweag-esasi.

¹⁵Ap Hanas akit walug lausa ma, Simon Petrus inim ap Yesus ele wauk on eke inim, Yesus ombolim lausa. Ombolim lausareg, at Yesus ele wauk on eke Petrus inim lasi omano, ap imam agung olukdeg ma, at Petrus de dag fikit sok bakopma bok atuk kweleg, Yesus inim ap imam agung obam o bumbukmu kwik lausa. Kwik lausareg, ai en Yesus ele wauk on eke, ap imam agung olukdeg latsi mu, hwele sok kahaleg latsi on anyo inim enele maho folug, Fano, isi mu, wilibik wahasireg, Petrus hondoholug o bumbukmu kwik lasi.

¹⁷Hondoholug kwik lauk kweleg, hwele sok kahaleg latsi anyo en Petrus hweag-utuk kwit, “Nimi! Hat oho at ele wauk on anyo welahen ane?” ulug, hein og-hasi. Hein og-hasi mu, Petrus en, “An de fug o,” ulug, hweag-itsi.

¹⁸Hweag-itsi mu, o etma hol humdeg latsi mu, ap imam agung amingming angge inim, ap Allah obam wirigmu kahalduk enap inim, indok anggen nonggwale folug, unduhuk lit iring-dauk katswa ma, at Petrus inim inaik lasireg iring-dauk katsi.

¹⁹Iring-dauk kweleg, at imam agung anyo en Yesus elma hein og-hauk kwit, “Hele wauk on it sa mel? Ne, wene hweag-esauk katihin wene nangginig on hweag-esauk katihin?” ulug, hein og-hasi.

²⁰Hein og-hasi mu, at Yesus en, “An den it ap homi o kwenangma suma wereg anyo wene hweag-esauk kwit, herako hweag-esauk katihik fug. An den enamegman neg hweag-esauk katihik. An den ap homi somban uruk obam inim, Allah obam wirigmu inim, ap homi Yahudi kabog-dik kurukmu etmano inim en neg hweag-esauk katihik famen,

²¹hat nunggwe ulug, an hein og-neauk kahen? An wene ke on hweag-esauihik anyo, it holduk katswa on enolukdeg ma, hweag-homag ulug, it hein og-enebiyug,” ulug, hweag-itsi.

²²Wene ai hweag-itsi mu, ap Allah obam wirigmu kahalduk enap eke eta unduhuk welatsi on en enggik fam Yesus dagdoho watuk kwit, “Nenakni imam agung en wene hweag-hutuk mu, airoho hweag-om ale fano behen?”

²³Hein og-hasi mu, at Yesus en, “An siag uruk mu neehen halug, Siagdoho ehen on ebe su, ulug, hweag-nimin abi. Ne, an nele ihi on ai demdoho deg halug, nunggwelug yeik nowarehen?”

²⁴Hweag-itsi mu, at Hanas en Yesus sabu hetdeg kweleg, ap Imam Agung Kayafas anyo akit mondotsi.

²⁵Akit mondotsi mu, lauk kweleg, at Simon Petrus anyo indok iring-dauk mu, it ap anyo en at hein og-hauk kwit, “Hat oho at ele wauk on welahen ane?” Hein og-hausa ma, aren awea wauk kwit, “An fug abi!”

²⁶Hweag-esasi mu, ap imam agung amingming angge eke ap Petrus en esanggo fiogdoho bo fesi anyo are eke en Petrus hein og-hauk kwit, “Hat hinim yabuk yahoma etma hiihi hat no?”

²⁷Hein og-hasi mu, at Petrus en ekenim ilik-eleg owan uruk kweleg, suwe ayam ele isi.

²⁸Ayam ele isi mu, ai en, o owan sekan duruk kweleg, it ap anyo en Yesus seneko ap Kayafas obam en ap fahat-enesug wereg on gubernur weregma walug lausa. Walug lausareg, it Yahudi on en Allah andomba waroho soni Paskah osoho hesangge nauk mu, “Siahap dehe ha no,” bolug, gubernur obam anyo kwik la fug angge, dagma bok atswa.

²⁹Dagma bok wereg ma, at Pilatus anyo enesa wilibik lasireg, “Yaho! Ap su re, nangginsi halug, uruk kahep?”

³⁰Hein og-esasi mu, iren, “Eleg. Ap su siag duruk kalep fug men, nit walug, hat hakit og-hirik wala fug.”

³¹Hweag-utswa ma, at Pilatus en, “Hiren ap su walug, Allah en wene melaloho hweag-hesebag on lisu baleg anyo higitdoho ayo wiroho enerik lakiyug.” Hweag-esasi mu, it ap Yahudi on en, “Eleg. Niren ap homi waruk ale ousa, hweag-nesauk kahep ma, niren dehe ha fug alereg,” ulug, hweag-utswa. (

³² Wene hweag-utswa ai, Yesus en nangginoho nowatuk halug, wararuhuk, hweag-esasi anyo dip-ukwag ulug, hweag-utswa.)

³³Airoho hweag-utswa ma, at Pilatus anyo en olma ekenim kwik lalug, Yesus akit wamag ulug hwi-disireg, wahasi mu, hweag-utuk kwit, “Ap homi Yahudi on enowe raja hat su ane?”

³⁴Hein og-hasi mu, at Yesus anyo en, “Hat hein og-neehen ai, hat hamu hendan bolug hein og-neehen ane? It ap foman an nabug hweag-hutswa fam hein og-neehen a?”

³⁵Hein og-hasi mu, at Pilatus anyo en, “Hat an ap Yahudi on behen a? Hat howe haut inim, it imam inim en hebe oko og-nerehesa angge re, hat nanggindihin?”

³⁶Hweag-itsi mu, at Yesus en, “An enowe wereg lit, napma feserukmu ai, o kwenangma suma fug. Napma feserukmu o kwenangma suma welalep man, an nebe oko it ap Yahudi og-esa no, an nautsi inim dog apuk kalep. An napma feserukmu ai, o suma on fug.”

³⁷Hweag-itsi mu, at Pilatus en, “Ai halug, hat ap enowe raja ane?” Hein og-hasi mu, at Yesus en, “An enowe raja ai, haren ehen. An airoho welaruhuk en endag-atihik. Ne, Allah airoho wereg, ulug, demdoho wene fagdoho hweag-hesauk karuhuk ulug, o kwenangma suma wambik waharihik anyo. It ap homi demdoho wene su waul boruk halug, an nele holduk.”

³⁸Hweag-itsi mu, at Pilatus en, “Demdoho wene ehen ai ke fahet ehen?” ulug, hein og-hasi. Hweag-utlug, ap Yahudi on dagma enekit wilibik lasireg, “Yaho! Ap su siag disi on mun eleg hihi.

³⁹Allah andomba waroho soni Paskah esetuk kwit, ap eke loloho foukwag ulug hweag-nutuk kahep ma, hit ap Yahudi on henowe raja su loloho og-hesamin boruk kahep ane, eleg a?”

⁴⁰Hein og-esasi mu, it enele hum fam hweag-utuk kwit, “Ap su fug. Ap Barabas neg de, loloho og-nesakin,” ulug, hweag-utswa. At Barabas ai re at yoholi angge on famen, uswa.