Read Ninia Yali YOHANES 19 Bible Online

YOHANES 19 - Ninia Yali bible

YOHANES 19

¹Wene ai uswa ma, Yesus yeik warukwag ulug, Pilatus en it ap sehen foroho enap anyo og-esasi.

²Og-esasi mu, yeik watswareg, alok kware-kware hag henaho folug, Yesus unggulmu bug-debeheg, sum orohole bolu wareg on wan-debeheg, debelug,

³eke en hweag-ereheg, eke en hweag-ereheg neg, duruk kwit, “Ap homi Yahudi enowe raja, dang-hapuk kahe!” ulug, enenggik dagdoho watuk katswa.

⁴Watswa ma, at Pilatus anyo en ekenim dagma it ap Yahudi on enekit wilipsireg, “Yaho! At siag disi on mum eleg hihi mu, hit heneluk amluhup en, walug wahi su,”

⁵Hweag-esasi mu, at Yesus unggulmu alok henaho on bugdeg angge, sum bolu wareg on wandeg angge wilibik wahasi. Wilibik wahasi mu, at Pilatus en, “Ap anyo su furiek!”

⁶Hweag-esasi mu, it imam inim, Allah obam wirigmu kahalduk enap inim en Yesus inil hausareg, enele amitmit uruk kwit, “E salib fam dopnoroho ware fein! E salib fam dopnoroho fein!” Uswa ma, Pilatus en, “Eleg. At siag disi on mun eleg ma hihi mu, hit henonggwareg en oko e salib fam dopnoroho feik lakiek,” ulug, hweag-esasi.

⁷Hweag-esasi mu, it ap Yahudi on en, “Eleg. Nit Allah wene melaleg hweag-nesebag on lisu baleg higitdoho dil lauk kahe ma, ap su, An Allah amloho, isi halug, at warukwag behe.”

⁸Uruk on at Pilatus esanggo holsireg, akol humon atsi.

⁹Akol atsireg, ekenim olma etmano kwik lalug, Yesus hein og-hauk kwit, “Hat hobam indip kema en waharihin?” Hein og-hasi men, at Yesus ele eleg angge we bok welatsi mu,

¹⁰at Pilatus en, “Hat onggo an hweag-nom ale bouk fug angge welahen ane? Loloho hobaukwag ulug a, e salib fam dopnoroho ware hobahaukwag ulug ane, an nonggwareg hweag-isihi halereg anyo hat hapeleg welahen a?”

¹¹Hweag-itsi mu, at Yesus en, “At boholma on en hat an nabukwag ulug haplep fug men, haren an nabuk fug alereg welalen ma, hat duruk kahen ai, siag dotdeg hag, ne, at an nebe og-naplug og-hirik waha anyo neg de, siag along humon deheik,” ulug, hweag-itsi.

¹²Wene ai hweag-itsi anyo, at Pilatus anyo holsireg, ebenaheg Yesus sabu loloho embesemin ulug disi men, it Yahudi kabogdeg on enele amitmit uruk kwit, “Ap eke en, Enowe raja an, uruk halug, ap ai Kaisar inim minggit-dauk mu, hat ap su loloho embeseruk halug, hat Kaisar inim hundig eleg bohup,” ulug, hweag-utswa.

¹³Uruk on anyo at Pilatus esanggo hole folug. Yesus walug wilibik lasireg, enewene ayo wiroho en-enepukmu unuk Helep Doaleg urukmu etmano huratsi. (Helep doaleg, urukmu etmano ai, it Ibrani enele fam Gabata uruk.)

¹⁴Huratsi ai, sono Allah andomba waroho soni Paskah eseruhuk ulug fik-fouk duruk kweleg, nukoho jam 12 fam huratsi. Huratsireg, Pilatus en it ap Yahudi on hweag-esauk kwit, “Yaho! Henowe raja su furiek!”

¹⁵Hweag-esasi mu, “Eleg. Warin! Warin! At e salib fam dopnoroho ware feik lakin!” Enele humon fam uswa ma, at Pilatus anyo en, “An den henakni raja e salib fam dopnoroho foukwag behep a?” Hweag-esasi mu, it ap Allah il hanim duruk on imam enowesi en, “Nit nenakni raja ai, Kaisar amu neg!”

¹⁶Hweag-utswa ma, at Pilatus en e salib fam dopnoroho ware foukwag ulug, og-esasi. Og-esasi mu, Yesus senetlug lausa.

¹⁷Senetlug lauk kweleg, Yesus en at ahan salib anyo um fam harulug, duk eke unuk Unggulowagma anyo fam feik lahasi. (Duk unuk ai, it Ibrani enele fam, Golgota, uruk.)

¹⁸Feik lahasi mu, etma Yesus bulmu wereg kweleg, ap biren eke foma eke foma, inim e salib fam dopnoroho feseswa.

¹⁹Feseswa ma, at Pilatus en, “Yesus Nazaret on it ap Yahudi enowe raja su,” ulug, lisu baloho e salib anyo fam dopnorisi.

²⁰Lisu baloho e fam dopnorisi mu, Yesus ebe e salib fam dopnoroho ware fousama etmano, o Yerusalem horogma welatsi mu, ap homi Yahudi on humdoho lisu baleg anyo inil kumu hausa. Wene balsi ai, Ibrani enele fam inim, o Roma enele uruk on unuk Latin fam inim, ne, Yunani enele fam inim, balswa.

²¹Inil kumu hausa ma, it imam anyo en Pilatus hweag-utuk kwit, “It ap Yahudi on enowe raja su, ulug, lisu baluk fug. Ite, It ap Yahudi enowe raja an, isi ulug, balin.”

²²Hweag-utswa ma, at Pilatus en, “An lisu balihi ai, mundoho balihi angge re, welamag,” ulug, hweag-esasi.

²³Hweag-esasi mu, it ap tentara en Yesus e salib fam dopnoroho ware folug, asum nonggoleg anyo, ap enebe ohwan en, sum anyo enengge higitdoho yohwandoho hwelausa. Hwelausareg, Yesus asum dag fil on sum ebere selebendeg ale il enameg fug, ite, we bekit song yihig on anyo oko,

²⁴ it it enele mag-mag atuk kwit, “Yaho! Asum au yeik benaloho re hwelaul fug. Ite, san hwelamisi, ulug, helep anggen wal-hakohon,” uswa. Ai uswa ai, Allah uruk kweleg, ap eke en uruk kwit, Nasum nonggoleg yohwandoho hweleheg, ne, nasum eke anyo neg de hwelaul en helep anggen wal-heheg, duswa, ulug, Allah wene lisu balfag anyo dip-ukwag ulug, ai duswa.

²⁵Duruk kweleg, at Yesus isinga inim, at isinga aut inim, hwe Maria ap Klopas ohwe anyo inim, ne, Maria obam Magdalena on anyo inim, Yesus e salib aluluk eta welatswa.

²⁶At Yesus en at isinga inim, at ele wauk on enda hundig welatsi on anyo inim, eta wereg ma il esasireg, at isinga hweag-utuk kwit, “Nisinga yei. Hamloho re ai.”

²⁷Hweag-itsireg, at ele wauk on anyo hweag-utuk kwit, “Nare ahwi! Hisinga re ai,” ulug, hweag-itsi mu, wene ai hweag-itsi anyo salim at Yesus ele wauk on anyo en Yesus isinga at eyog indipmu welamag ulug, hondoholug lasi.

²⁸ Ai hweag-esasireg, at Yesus en “Mundoho debihi,” boruk kwit, Allah wene lisu baleg eke dip-ukwag ulug, “An ik obok nabeheik,” isi.

²⁹Isi mu, etma ikwag eke e anggur anggen ahalue asig on hwenanggeg welatsi mu, ahalue nerahum hag fam yuhul-halug, osonggwat fam doungdoho Yesus ambilikmu lahap-utswa.

³⁰Lahap-utswa anyo nasireg, “Mundoho debihi,” ulug, unggul wambo isireg, waratsi.

³¹Allah andomba waroho soni Paskah eseruhuk ulug fik-fouk duruk kweleg, sono it Yahudi on kel wat-dauk salim ousa alongdoho eneko wereg ma, somban salim fam enebe e salib fam welam no, enowag somboroho enebe og-eneplug lowag ulug, it ap Yahudi on en Pilatus heng-dik wahausa.

³²Heng-dik wahausa ma, it sehen foroho on anyo, lausareg, it ap Yesus inim dopnoroho feseswa anyo eke foma wereg anyo owag somboreheg, ne, foma wereg anyo owag somboreheg, duruk kwit,

³³Yesus kumu ha lausa man, mun waratsi mu, owag somboruswa fug.

³⁴Owag somboruswa fug famen, ap sehen foroho on eke en neg de, fit fam ombandu daloho watsi mu, amep ik inim wilipsi. (

³⁵Airoho duruk kweleg, at eke il hasi anyo en fag-disi mu, at il halug fag-disi ai demdoho. Ne, hit oho, demdoho bohup en[38] fag-disi ai, demdoho olukdeg lit, fag-disi.)

³⁶ Ai disi anyo Allah en uruk kweleg, ap eke en uruk kwit, “At owag eke somboruhup fug,”

³⁷ ne, amu on eke en uruk kwit, “At ebe daloho watswa anyo inil kumu hahup,” ulug, Allah wene lisu balfag anyo dip-ukwag ulug, disi.

³⁸Ai debousa ma, ap unuk Yusuf obam Arimatea on en Yesus ebe wamin ulug, Pilatus fam heng-dik wahasi. At Yusuf ai, Yesus ele wauk katsi famen, ap homi Yahudi on akol en, herako hag wauk katsi. Yesus ebe wamin ulug, Pilatus fam heng-disireg, at Pilatus en, “Fano,” isi mu, Yusuf lasireg, Yesus ebe walug lasi.

³⁹ Walug lauk mu, at Nikodemus atam o hup anggo Yesus akit lasi anyo en ahalue amben fano on eke e mur ahalue mel, ne, eke e gaharu ahalue mel, anggeleg-hanggelegdoho 30 kilo hag walug Yusuf inim lasi.

⁴⁰Inim lasireg, Yesus ebe walug, it ap Yahudi on en ap waratuk halug, duruk ale higitdoho, sum kuron fam ahalue anyo inim, hwililipdoho het-debousa.

⁴¹At Yesus e fam dopnoroho fousama etano yabuk yahoma welatsi. Etmano owik eke ap homi kwelabe foruk eleg owan ket buhundeg wereg ma,

⁴²sono Allah andomba waroho soni Paskah eseruhuk ulug fik-foukdoho wereg ma, Yesus ebe etmano neg kwelabe fousa.