Read Ninia Yali YOHANES 2 Bible Online

YOHANES 2 - Ninia Yali bible

YOHANES 2

¹Birenam noholug, o Galilea sili eke unuk Kana ap eke hwe inim sebe-enepuk mu, Yesus isinga etma inim welatsi.

²Ne, Yesus at ele wauk on inim wamag ulug, eneyonggo fousa ma, wahausareg, welatswa.

³Welatswa ma, soni nauk kwit, e anggur anggen ahalue anyo nauk men, eleg atsi mu, at Yesus isinga en Yesus hweag-utuk kwit, “Anggur ahalue anyo eleg aha,” ulug, hweag-itsi.

⁴Hweag-itsi mu, at Yesus en, “An duhuk li horog aik waharuk eleg ma, nisinga haren airoho miming-nabuk fug.”

⁵Hweag-itsi mu, at isinga en ap soni onggwareg ahun amingming angge anyo hweag-esauk kwit, “At hweag-hesamisi ale diyug,” ulug, hweag-esasi.

⁶It ap Yahudi on wene melaleg higitdoho duruk kwit, enowaruk horeheg, enenggik horeheg, duruk mu, airoho dukwag ulug, ikwag waruk helep on folfalik en etmano fousa ma, welatswa. Waruk anyo domog ebe humdeg ma, ik hwenangguruk men, ik 100 liter hag hwenang am alereg.

⁷Ne, at Yesus en ap soni onggwareg ahun amingming angge omano hweag-esauk kwit, “Waruk su, ik ele sopdoho hwenanggiek,” ulug, hweag-esasi mu, it anyo en ik ele sopdoho hwenangguswa.

⁸Hwenangguswa ma, Yesus en, “Ketia ik anyo foma ikwag eke fam hwenanggoho ap soni onggwareg ahun ai og-irik laluhup,” ulug, hweag-esasi mu, hwenanggoho og-irik lausa.

⁹Hwenanggoho og-irik lausa ma, ap soni onggwareg ahun anyo en ik hwenanggeg anyo, anggur ahalue atsi mu, unduk neg-hasi. Amingming angge etmano en hwenangguswa enelukdeg kweleg famen, at apelegdeg lit, unduk neg-hasireg, ap hwe hwelauk on hwi-disireg, wahasi mu, hweag-utuk kwit,

¹⁰“Ahwi! Anggur ahalue unduk kain on atam yohwan-enepuk men, ai mun homoroho nil lauk em halug neg de, ai en, fobik ahalue unduk seram on yohwan-enepuk famen, hat neg de, anggur ahalue unduk kain on foroho lahendeg, ketia neg de yohwan-nenepuk kahen hihi,” ulug, hweag-itsi.

¹¹At Yesus en enoluk am on enakol wereg on atam dam disi ai, o Galilea sili Kana etmano wereg lit, disi ale ai. Etma wereg lit, at leho wereg ale fagdoho unug-esasi mu, at ele wauk on anyo at demdoho bolug enenda at obam dip-debousa.

¹² Ai en, at Yesus anyo at isinga inim, autsi inim, at ele wauk on inim, o Kapernaum wahausareg etma wereg lit, nukoho biren henahan hag welatswa.

¹³ Etmano wereg ma, it ap Yahudi domba waroho soni Paskah esetuk salim anyo horog aik wahasi mu, at Yesus o Yerusalem lasi.

¹⁴Lasireg, Allah obam wirigmu kwik lalug, it ap sapi inim, domba inim, suwe yalma hag on inim, onggo hundereheg, ne, it ap homi eneuang aham-enepuk on enahan doalegma hwerieg lit, uang aham-deheg, duruk mu esasi.

¹⁵Airoho duruk mu esasireg, hekel soaleg si yeik hag yihig folug, domba sapi mundoho Allah obam wirigmen siloho muko wilibe feseheg, ne, it ap uang aham-duruk on anyo enahan doaleg enden-fenden esauk kwit, eneuang hililoho del-fol eseheg, debesi.

¹⁶Ai debesireg, it suwe yalma hag on hundutuk on anyo hweag-esauk kwit, “Suwe su mundoho walug lakiek! Hit an Nakni obam wirigmu suma, di angge su angge onggo hundutukmu debouk fug,” ulug, hweag-esasi.

¹⁷ Hweag-esasi mu, it ap Yesus ele wauk on enendaman, “Hat nakni Allah yei! Hat hobam wirig fano welam ale fahet nenda ngetdoho dil lauk fam, nahumkwe het-napuk,” ebag wene lisu baleg wereg anyo ebetswa.

¹⁸Ebetswa ma, it ap Yahudi en, “Hat su dehen anyo, sa ele fam dehen ulug, neneluk am on eke nangginduk mu heahuk?”

¹⁹ Hweag-utswa ma, at Yesus en, “Eleg. Allah obam wirig su re molukdoho fohup. Molukdoho fohup halug, an wutuk kweleg, hup birenam nohokup,” ulug, hweag-esasi.

²⁰Hweag-esasi mu, it ap Yahudi en, “A! Allah obam wirig su, wutuk kweleg, tahun 40 en debag famen, hat wutuk kweleg, hup birenam neg nohokuk, uruk kahen a? Dehen ha fug alereg!” ulug, hweag-utswa.

²¹Allah obam wirig hweag-esasi ai, at ebe ulug, hweag-esasi.

²²Ne, fobik Allah en Yesus waratlug lauk men oluk apdoho unduhuk fesi mu, at ele wauk on anyo en wene hweag-esasi su ebetswa. Ebetswareg, Allah wene lisu baleg inim, wene Yesus hweag-esasi anyo inim demdoho bousa.

²³At Yesus o Yerusalem domba waroho soni Paskah esetukmu etmano wereg lit, eneluk am on enakol wereg on dil lauk mu ap homi inil hausareg, ap homi humdoho at demdoho bolug obam dip-debousa.

²⁴It ap homi humdoho at demdoho bolug obam dip-debousa famen, at Yesus neg de, di ap homi su ap homi mundoho enobabut olukdeg ma, “It ap homi su enenda an nobam dip-nobahakesa isihi,” ulug, demdoho besi fug.

²⁵It ap homi enenda boruk ale anyo ai, Yesus olukdeg ma, ap eke en at eke duruk ale fagdoho at hweag-om fug alereg.