Read Ninia Yali YOHANES 20 Bible Online

YOHANES 20 - Ninia Yali bible

YOHANES 20

¹Hari Minggu o sekan dimin ulug, mum deg kweleg, at hwe Maria obam Magdalena on owikmu lasireg, helep sok lareg anyo imbiloho elanma wereg ma, hasi.

²Hasireg, buroho Simon Petrus inim, ap Yesus ele wauk on enda hundig welatsi inim, enekit wahasireg, “Yehei! Nenowe owikmen oko kema feik lahesa e, nit nenapeleg.”

³Hweag-esasi mu, at Petrus ap Yesus ele wauk on anyo inim wilibik lausareg, owikmu kumu ha lausa.

⁴Inim buroho lauk kwit, at Yesus ele wauk on anyo en Petrus busan halug, at atam buroho owikmu etmano lasi.

⁵At atam owikmu lasireg, alukwe konuroho il kumu hasireg, sum kuron anyo neg nonggoleg ma hasireg, kuk fug angge dagma bok atsi.

⁶Bok atuk kwit, wereg ma, Petrus at ombolim bekit owikmu kwik lasireg, sum kuron nonggoleg anyo inim, ne, eke sum at unggulmu hwililipdeg latsi anyo inim, il hasi.

⁷Sum at unggulmu hwililipdeg welatsi ai, sum kuron sum nonggoleg anyo inim eleg, amumu eta hwililipdeg wereg ma hasi.

⁸Ai il halug wereg ma, at Yesus ele wauk on eke owikmu atam lasi anyo en kwik lalug, il hasireg, demdoho besi. (

⁹Allah en, “Yesus waratlug, laukmu etmano en oluk atlug inaruhu,” ulug, ebag lisu baleg welatsi famen, at ele wauk on anyo owan furebouk fug angge wongdoho wereg kweleg, at eke anyo en neg de, il hasireg, demdoho besi.)

¹⁰It anyo inim inil hausareg, enambol somban enobam wahausa.

¹¹Enobam waharuk kweleg, at hwe Maria anyo owik ambilikmu eta oba yatuk katsi. Oba yatuk kwit, alukwe konuroho il kumu hasireg, boholma yonggo noruk on malaikat biren sum kuron wandeg Yesus ebe waroho fousama etmano eke unggul welatsimu, ne, eke eyog welatsimu, inim hwerieg wereg ma, esasi.

¹³Esasi mu, it yonggo anyo en, “Hwe su yei. Hat nunggwe ulug oba yatuk kahen?” Hein og-hausa ma, at Maria en, “Eleg. It ap homi en an nowe walug lahesa. Ne, at ebe kema feik lahesa an napeleg ma oba yatuk kahi.”

¹⁴Hweag-esasireg, alukwe endenoho fu hasireg, at Yesus eta unduhuk wereg ma hasi famen, “Su re at,” bouk fug angge wongdeg welatsi.

¹⁵Wongdeg welatsi mu, at Yesus en, “Hwe su yei. Hat nunggwe ulug oba yatuk kahen? Ap sa heraruruk kahen?” Hein og-hasi mu, at Maria anyo en, “Ap su yabuk yahoma hwalduk on ane,” boruk kwit, “Yehei nowe. At ebe hat walug lahen halug, kema feik lahen? An wag lamin en, hweag-nimin.”

¹⁶Hweag-itsi mu, at Yesus en, “Maria yei!” ulug, hweag-itsi mu, at alukwe endenoho fu hasireg, Ibrani enele fam, “Rabuni,” hweag-itsi. (“Rabuni” hweag-itsi ai, nit nenele fam “Hweag-esauk on guru,” ulug, hweag-itsi.)

¹⁷Hweag-itsi mu, at Yesus en, “An nakni weregma owan ha laharuk kahi fug mu, sen-nabuk fug. An hit ninim nenakni Allah misig wereg anyo ha laharuk kahi mu, nautsi enoluk amag ulug hweag-esa lakin.”

¹⁸Hweag-itsi mu, at Maria obam Magdalena on en Yesus ele wauk on esa wahasireg, “Yaho! Nenowe an nil hihireg wahi,” ulug, Yesus en at hweag-itsi on bilinggoho hweag-esasi.

¹⁹Hari Minggu ai fam o mum atuk kweleg, it Yesus ele wauk on anyo en ap homi Yahudi on enakol en olma sok kelogdoho lare folug, kabogdeg wereg ma, Yesus enenggelegma inaik kwik lasireg, “Nori neg. Henenda hambuk debeiyek.”

²⁰Hweag-esasireg, at enggik inim, obal wareg inim, unug-esasi. Unug-esasi mu, it Yesus ele wauk on en enowe at hausareg, enahayeg humon bousa.

²¹Enahayeg humon boruk kweleg, Yesus en ekenim hweag-esauk kwit, “Nautsi. Henenda hambuk debeiyek. An nakni mon-nabik wahasi anyo hag, an den hit mon-henepuk kahi.”

²²Hweag-esasireg, ambilik ahe enobam furoho foruk kwit, “Hit Allah Aheime anyo hwelakiek.

²³ Hiren ap homi enesiag elehapdoho embesehup halug, eleg at amuhup. Ne, it enesiag elehapdoho embesehup fug halug ai, mundoho deg laruhu,” ulug, hweag-esasi.

²⁴Yesus wahasireg, wene hweag-esasi ai, at ele wauk on eke unuk Tomas (unuk eke Biren Omalik anyo), ebe eleg kweleg wahasi mu,

²⁵it Yesus ele wauk on foma anyo Tomas hweag-utuk kwit, “Tomas yei! Nenowe mundoho ninil hehe.” Hweag-utswa ma, at Tomas en, “Yaho! An at enggik bosie manggen wareg yebil abog nil heheg, ne, enggik bosie manggen waregma inim, ombandu waregma inim, nenggik kwelabeheg, duruk eleg kweleg, an demdoho bemin fug,” ulug, hweag-esasi.

²⁶Hweag-esasi mu, hup sabiren noholug, ligin salim fam it ap Yesus ele wauk on Tomas inim, olma sok kelogdoho lareg kweleg, wereg ma, at Yesus enenggelegma inaik kwik lasireg, “Nori neg. Henenda hambuk debeiyek”

²⁷ulug, hweag-esasireg, Tomas anyo hweag-utuk kwit, “Tomas ao! Henggik dum an nenggik su, sen-napuk kwit, nayebil abog kumu heheg, ne, nombandu waregma henggik kwelabeheg, napuk katmihindeg, henda sug-sagdoho uruk kwit, demdoho bouk fug angge welam fug. Ite, henda nobam dip-nobahalug, demdoho boruk kamin,” ulug, hweag-itsi.

²⁸Hweag-itsi mu, at Tomas en, “Yehei, nowe. Hebe Allah at hiihi.”

²⁹Hweag-itsi mu, at Yesus en, “Tomas ao! Hat hil neehendeg an demdoho bolug, henda nobam dip-nobahaken famen, it ap homi inil nea fug angge en, an demdoho bolug, enenda nobam dip-nobaharuk halug neg de, enahayeg humon hauk kamuhup,” ulug, hweag-itsi.

³⁰At Yesus en at ele wauk on inil hanim enoluk am on enakol wereg on foma humdoho duruk katsi famen, buku su fam lisu baleg eleg.

³¹Duruk katsi lisu baleg su re, at Yesus ai, Allah en at amloho eneko unduhuk febag on Kristus hit demdoho beheg, ne, demdoho boruk[39] halug, at henebuhu fam henoluk mundoho welamuhup on hweleheg, duruk kamuhup en, wene su bal-hesauihik.