Read Ninia Yali YOHANES 21 Bible Online

YOHANES 21 - Ninia Yali bible

YOHANES 21

¹Ai disireg, fobik Yesus en at ele wauk on ik yenggeleg unuk Tiberias fam wereg ma, at ebe ekenim unug-esa wahasi. Unug-esa waharuk kwit, disi ale su.

²At Simon Petrus mel, Tomas unuk eke Biren Omalik soaleg anyo mel, Natanael o Galilea obam Kana on anyo mel, Zebedeus omaliki mel, ap Yesus ele wauk on biren inim ekema kabogdoho wereg lit,

³ at Simon Petrus en, “Yaho! An ikan wag la.” Hweag-esasi mu, “Ninim laul,” hweag-utswareg, wilibik lalug, perahu fam kwik lausareg, o hup misig fam enesum belapuk men, ikan yohwat-am fug angge welatswa.

⁴Enasum belabeheg neg duruk kweleg, o sekan disi mu, at Yesus anyo ik inggimu unduhuk wereg kweleg, at ele wauk on en, “Ai Yesus,” bouk fug angge wongdoho wereg ma,

⁵at Yesus en, “Nautsi yaho! Hit ikan eke wehep ane, eleg a?” Hweag-esasi mu, “Mundoho wa fug angge welahe.”

⁶ Hweag-utswa ma, at Yesus en, “Sum ai, perahu ombandu foma henenggik bekit fil etma belabiek. Belapuk halug, ikan humdoho waluhup.” Hweag-esasi mu, belapswareg, ikan humdoho yohwat-aik kwisi mu lisoho perahu fam lahabeik wam fug ale atsi.

⁷Lahabeik wam fug ale atsi mu, at ele wauk on Yesus enda hundig welatsi anyo en Petrus hweag-utuk kwit, “Ahwi. Ap ai nenowe at hihi,” isi mu, at Petrus esanggo hole folug, asum dagma on nonggoleg anyo wan-dalug, perahu anyo embeselug hweik-sombo ikma wambisi.

⁸Wambisireg, lauk kweleg, ik inggimu horogdeg we 100 meter hag welatsi mu, Yesus ele wauk on foma anyo en sum ikan ele sopdoho yohwareg anyo perahu fam lisulug ik inggimu wilibik lausa.

⁹Ik inggimu wilibik lausareg, indok nonggwaleg anggen fam ikan inim, roti inim, weratuk mu inil hausa.

¹⁰Inil hausa ma, at Yesus en, “Yaho! Ikan wehep anyo foma walug manik.”

¹¹Hweag-esasi mu, at Simon Petrus perahu fam kwik lalug, ikan enebe 153 en sum ele sopdoho yohwareg anyo, lisoho ik inggimu feik wilipsi. Ikan humdoho yohwareg welatsi famen, sum dilipdeg eleg angge welatsi.

¹²Sum anyo ik inggimu feik wilipsi mu, ai en, at “Hit siburu na manik,” hweag-esasi mu, “Nenowe re su,” enegdeg ma hausa man, it eke en, “Hat sa?” hein og-ha ale enakol en we bok welatswa.

¹³Enakol en we bok welatswa ma, at Yesus en roti wag lasireg yohwan-enepsi. Yohwan-enepsireg, ikan airoho neg wasireg yohwan-enepsi.

¹⁴Ai disi anyo re, Yesus waratlug lauk men oluk atlug inatsireg, at ele wauk on at ebe unug-esasi ai, henahanam unug-esasi.

¹⁵Siburu nausa ma, at Yesus en Simon Petrus anyo hein og-hauk kwit, “Simon, Yona amloho yei. Hat hori su enenda hundig dorangge hag napuk kweleg, hat henda hundig humon napuk kahen ane, eleg a?” Hein og-hasi mu, at Petrus en, “Yu o, nowe. An nenda hundig hapuk kahi anyo, hat holuk.” Hweag-itsi mu, at Yesus en, “An nandomba doron fahat-enesug lit, endag-enepuk kamin.”

¹⁶Hweag-itsireg, ai en, birenam hein og-hauk kwit, “Simon Yona amloho yei! Hat an henda hundig napuk kahen ane, eleg a?” Hein og-hasi mu, at Petrus en, “Yu o, nowe. An nenda hundig hapuk kahi anyo hat holuk.” Hweag-itsi mu, at Yesus en, “An nandomba furoho fahat-enesug lamin.”

¹⁷Birenam hein og-hasireg, ai en, henahanam hein og-hauk kwit, “Simon Yona amloho yei. Hat an henda hundig napuk kahen ane, eleg a?” Hein og-hasi mu, at Yesus henahanam, “Hat an henda hundig napuk kahen ane, eleg a?” hein og-hasi fam at Petrus enda siag atsireg, “Nowe. Hat di abut su abut holukdeg ma, an nenda hundig hapuk kahi anyo hat holukdeg.” Hweag-itsi mu, at Yesus en, “Nandomba fahat-enesug lit, endag-enepuk kamin.

¹⁸Hat sauwereg lit, hat hasum wan-dalug ekema la borukmu etmano neg lauk katihin famen, fobik sobal aruhundeg, henggik fatil lauk kweleg, hasum wan-hobahalug, hat lamin nerim borukmu etmano neg hobahaik lauk kamuhup, ulug, demdoho hweag-hirihi,” ulug, hweag-itsi.

¹⁹Ai hweag-itsi anyo, at Petrus nanggin-deberuk halug wararuhu anyo fam Allah leho fohu ulug, hweag-itsi. Petrus anyo hweag-itsireg, “Nombolim ma,” ulug, hweag-itsi.

²⁰ Hweag-itsi mu, lauk kwit, at Petrus alukwe endenoho fu hauk men, at Yesus ele wauk on at enda hundig on anyo, atam siburu nauk mu, Yesus aluluk horogdoho hwerieg lit, “Nowe. San honggo balmisi?” hweag-itsi on anyo ombolim waharuk mu, il hasireg,

²¹Yesus hweag-utuk kwit, “Nowe. Ne, ap su neg de, nangginuhu behen?”

²²Hweag-itsi mu, at Yesus en, “An nendaman ap ai ebe oluk wereg ma, an fobik waruhuk berihik halug ai re, haren dukwag ulug wereg fug. An nonggwareg neg famen, hat neg de an ninim noruk kamul,” ulug, hweag-itsi.

²³Airoho hweag-itsi anyo fam, “Yesus ele wauk on su wararuhu fug eheik,” ulug, ori en abug saha debeswa famen, at Yesus en, “Ap ai wararuhu fug,” ulug, hweag-itsi men de fug. Ite, aren, “At ebe oluk wereg ma, an fobik waruhuk berihik halug ai re, haren dukwag ulug wereg fug. An nonggwareg neg,” ulug, hweag-itsi on fahet uswa.

²⁴Wene Yesus aut eke hweag-itsi ai, nebe an at. An nil hauihik on neg fagdoho hweag-esauk hag lisu baloho ferihik su. Wene ai an nil hauihik ale neg fagdoho hweag-hisihi demdoho, ulug, nit mundoho en nenoluk.

²⁵At Yesus ekenim humdoho duruk katsi mu, at duruk katsi ale mundoho biling-balangdoho buku fam balep man, o kwenangma su hopo uruk kwit kema fouk ale alep, behi.