Read Ninia Yali YOHANES 3 Bible Online

YOHANES 3 - Ninia Yali bible

YOHANES 3

¹It ap Yahudi enowe ap Farisi on eke unuk Nikodemus welatsi.

²At anyo eke salim o hup anggo Yesus akit wahasireg, “Guru yei! Allah en hat ap homi wene hweag-esauk kamag ulug mon-habik wahasi hihi. Ap homi Allah inim hundig eleg halug, neneluk am on nenakol wereg on hat dil lauk kahen anyo, iren duk fug alereg”

³ulug, hweag-itsi mu, at Yesus en, “Ap misig eke ket[5] ondoho eleg halug, at Allah omalik on aruhu fug, ulug, dik-demdoho hweag-hirihi,” ulug, hweag-itsi.

⁴Hweag-itsi mu, at Nikodemus en, “Malik omare! Ap mun log atlug en, fobik nangginoho endag-aruhu behen? At isinga ahummu kulug, ekenim ket endag-am fug alereg abi!”

⁵Ulug, hweag-itsi mu, at Yesus en, “Ap misig eke ik fam inim, Allah Aheime fam inim, ket endag-atuk eleg halug, ap ai Allah omalik on aruhu fug, ulug, dik-demdoho hweag-hirihi.

⁶It ap homi en endag-enepuk ai, ap en on. Ne, Allah Aheime en endag-enepuk ai, at on.

⁷Ket[6] endag-amuhup wene hweag-hirihi su, Yehei u! ulug, hakol bouk fug.

⁸O hol endan bolug firil waharuk kweleg, aplohok duruk mu neg holduk kahep famen, keman firil waharuk, kema firil lauk ai, hit henapeleg, we wongdoho welahep anyo hag, it ap homi Allah Aheime en endag-enepuk anyo airoho neg wereg.”

⁹Hweag-itsi mu, at Nikodemus en, “Ai ehen ai, nangginuk alereg ulug, ehen?”

¹⁰Hweag-itsi mu, at Yesus en, “Hat ap homi Israel on wene hweag-esauk on deg lahen famen, an wene hweag-hirihi su, furebouk fug angge welahen?

¹¹Neneluk deg on hweag-heseheg, ninil hauhuk anyo fag-deheg, duruk kahe famen, fagdoho hweag-hesauk kahe anyo, hit wa fug angge welahep, ulug, dik-demdoho hweag-hesehe.

¹²An kwenangma wene hweag-hesauk kahi anyo hiren demdoho bouk fug angge welahep ma, boholma wene hweag-hesauk halug, hit nangginoho demdoho bohup behep?

¹³Ap amu eke mun eleg. An boholman wambik waharihik on Ap endag-atihik anyo namu neg boholma laharihik.

¹⁴ At Musa o leimu wereg lit, kisu ahut ilit-debelug e domuk fam dopnoroho unduhuk febag anyo hag, an Ap endag-atihik anyo, it ap homi en an demdoho bolug, enenda an nobam dip-nobaharuk anyo enoluk mundoho welamuhup on hwelahup en, an airoho neg unduhuk nobahakup.

¹⁶At Allah en di ap homi su ap homi mundoho enelaheg neg bebag ma, at amloho ilahambi an og-hesa wahasi ai, hiren demdoho bolug, henenda nobam dip-nobaharuk kahep halug, elehapdoho henobahaku fug. Henoluk mundoho welamuhup on hwelahup en og-hesasi.

¹⁷At Allah en at amloho an anyo hit ap homi ayo wiroho en-henepuk kwit, siag onggo henobam henobahaukwag ulug, o kwenangma suma mon-nabik wahasi fug. Ite, hit ap homi mundoho henahap wendat-henebuhuk en, mon-nabik wahasi.

¹⁸It ap homi enenda an demdoho bolug nobam dip-nobaharuk halug, Allah en ayo wiroho ene feselug siag onggo enobam fesehu fug famen, it eke an demdoho bouk fug angge enenda an nobam dip-nobaharuk eleg esalug neg de, iren an Allah amloho ilahambi demdoho bolug, nobam dip-nobaharuk eleg on ai, mundoho ayo wiroho ene feselug, siag onggo enobam fesesi mu, wereg.

¹⁹Allah en ayo wiroho en-enepuk kwit, siag onggo enobam foruk ale indip anyo su. At selehap enepuk on anyo o kwenangma suma mundoho kwik wahasi famen, it ap homi ai siag neg duruk mu, At seleg anyo ai, nenerim, bolug, o mum neg enenda hundig boruk.

²⁰Di ap su ap siag duruk anyo en, it siag duruk ale fag am no, At seleg ai, nenerim, ulug, akit waharuk eleg famen,

²¹it ap Allah airoho wereg wene furebelug higitdoho duruk anyo neg de, Allah inim hundig lit, duruk ale fag amag ulug, at seleg anyo akit waharuk,” ulug, hweag-esasi.

²²Ai hweag-esauk katsireg, ai en, at Yesus at ele wauk on inim o Yerusalem en o Yudea wilibik lausareg, etma inim wereg lit, ap homi ikma belap-enepuk katsi.

²³ Ikma belap-enepuk kweleg, at Yohanes anyo sabu hetdoho kwelabe feserukmu owan kwelabe foruk eleg ma, at Yohanes inim o unuk Salim horogma, o Ainon ik humdoho wereg ma, eleruk fil etma, ap homi at akit waharuk halug, ikma belap-enepuk katsi.

²⁵Ikma belap-enepuk kwit wereg ma, ap Yohanes ele wauk on inim, ap Yahudi on eke[7] inim en enewene melaleg higitdoho duruk kwit, di on su on horuruk ale anyo fahet suahal uswa.

²⁶Suahal ulug, Yohanes akit wahausareg, “Guru ao! At ap hinim Ik Yordan foma fil wereg lit, abug fagdoho hweag-nesauihin anyo, ikma belap-enepuk mu, ap homi humdoho at akit lauk.”

²⁷Ulug, hweag-utswa ma, at Yohanes en, “Yaho! Ap misig eke boholman debouk fug kweleg, amu neg en enda wenggele folug dil la alereg behep? Ohu!

²⁸ Allah en eneko unduhuk febag Mesias anyo re an fug. At ebe fobik waruhu, ulug, an we elamna atam mon-nabik wahasi, ulug, fagdoho hweag-hesauihik anyo hit henesanggo holduhup.

²⁹Hwe eke ap hwelauk halug, ap ai re hwe anyo ahun at. At hwe hwelauk are anyo we inim wereg lit, at hwe hwelauk on ele holduk halug, ahayeg humon hauk anyo hag, an nenda nahayeg humon napuk.

³⁰At leg atuk kweleg, an sebe uruk karuhuk men deg,” ulug, hweag-esasi.

³¹It ap homi mundoho sebeleg kweleg, at lendi en wahasi anyo mun leho wereg. It kwenangma en ondoho wereg ai, kwenangma on deg ma, kwenangma wene neg uruk. It ap homi mundoho sebeleg kweleg, at boholman wahasi anyo mundoho leho wereg.

³²At il heheg, esanggo holeheg, disi ale fagdoho hweag-esauk famen, at fagdoho hweag-esauk anyo, ap homi en mun wa fug angge wereg.

³³Ai famen de, it ap homi en at fagdoho hweag-esauk anyo wauk fam Allah demdoho neg uruk ale ename foruk.

³⁴At Allah en mondorik wahasi ai, Allah en, Allah Aheime abirangge at anyo inim furoho wereg lit, duhu en og-utuk mu, Allah ele neg uruk.

³⁵ Akni ai, amloho enda hundig deg ma, di angge su angge mundoho at neg hwalduk kamag ulug, og-itsi.

³⁶It ap homi Allah amloho demdoho bolug, enenda at obam dip-deberuk esalug de, enoluk mundoho welamuhup on hwelausa. Ne, it foma Allah amloho ele hole folug, duk fug angge wereg esalug neg de, enoluk mundoho welamuhup on it hwelahup fug. Allah olok enobam wereg.