Read Ninia Yali YOHANES 4 Bible Online

YOHANES 4 - Ninia Yali bible

YOHANES 4

¹Yesus en at ele wauk on humdoho ikma belap-enebeheg, ne, Yohanes at neg de, at ele wauk on dorangge neg ikma belap-enebeheg, duruk ale, it ap Farisi on enesanggo holswa. (

²Ai it holswa ai, at Yesus en ap homi ikma belap-enepsi fug famen, at ele wauk on en neg, ikma belap-enepuk kweleg, uruk ale enesanggo holswa.)

³Enesanggo holswa ale at Yesus oluk atsireg, at o Yudea embeselug, o Galilea wahasi.

⁴Waharuk kwit, kwe eke fam wahasi fug. Kwe o Samaria fam neg wam ale atsi mu,

⁵ waharuk kwit, ap Yakub en at amloho Yusuf kwenang og-etfagma etmano horogdeg kweleg, o sili eke unuk Sikhar aik wahasi.

⁶Ap Yakub en ik hwenangguruk kamag ulug, kwenang habulfagma etmano wahasi. Ne, at Yesus waharuk kwit o nukoho jam 12 hag atuk kweleg, owag eleg atsi mu, ik hwenanggurukmu etano neg at huraik wahasi.

⁷Etma wereg ma, it Yesus ele wauk on en siburu onggo hundutul ulug, o sili etmano kwik lauk kweleg, at amu wereg ma, hwe Samaria on eke ik hwenanggimin ulug, wahasi. Wahasi mu, Yesus en, “Hwele! Ik eke hwenang-nimin,” ulug, heng-disi.

⁸

⁹ Heng-disi mu, hwe Samaria on en, “Yehei! Hat ap Yahudi hahun deg ma, an hwe Samaria on en ik keroho hwenang-hitmin ulug, hweag-nerehen?” ulug, hweag-itsi. (Ai hweag-itsi ai, ap homi Yahudi on mel, ap homi Samaria on[8] mel inim minggirig lit, ikwag misig fam nauk fug mu, ulug, hweag-itsi.)

¹⁰Hweag-itsi mu, at Yesus en, “Allah en onggoleg we og-esauk inim, ne, ap en, Ik hwenang-nimin, hweag-hutuk anyo ebe inim, hat holukdeg lit, Ik ap homi enoluk enepuk on og-nimin, ulug, heng-naplen man, ik ai on og-hetle.”

¹¹Hweag-itsi mu, hwe anyo en, “Nowe. Ik yenggeleg su habuligmu oholuk yatdeg, ne, hat hahaikwag eleg angge en, ik ap homi enoluk enepuk on ai, keman hwenang-nitmin ulug ehen e?

¹²At nenomba[9] Yakub en ik hwenangguruk kamag ulug, kwenang habuloho nenobahabag anyo inim, omaliki inim, owam inim, nauk katfag famen, at sebeleg, ne, hat halong deg ulug, ehen a?”

¹³Hweag-itsi mu, at Yesus en, “It ap homi ik su on nauk halug, obok enebuhu famen,

¹⁴ik an den og-esauk mu nauk halug neg de, obok enebuhu fug. Ik an den og-esahuk ai, ik eleruk enendaman fulohomdoho laharuk kwit, mundoho enoluk welamuhup en debesehu.”

¹⁵Hweag-itsi mu, hwe anyo en, “Yehei nowe. Ik ai on og-nimin abi! Og-nutuk halug, an den ik obok nabeheg, ne, suma hwenanggik waheg, duruk karuhuk fug.”

¹⁶Hweag-itsi mu, at Yesus en, “Hahun hweag-irik lamihindeg hinim suma manu.”

¹⁷Hweag-itsi mu, at hwe anyo en, “An nahun eleg,” ulug, hweag-itsi. Hweag-itsi mu, at Yesus en, “Nahun eleg ehen ai, demdoho ehen.

¹⁸Hat hahunsi foaben og-enepihin anyo. Ne, ketia ap hinim welahep on ai, hat hahun eleg ma, ehen ai demdoho neg ehen.”

¹⁹Hweag-itsi mu, hwe anyo en, “Yehei nowe! Hat Allah wene hweag-esauk on nabi anyo eke welahen hihi.

²⁰Nit nenombasi en duk su fam Allah mot-duruk katfag famen, hit Yahudi on en, o Yerusalem neg Allah mot-duruk kamuhup, uruk kahep.”

²¹Hweag-itsi mu, at Yesus en, “Hwe su yei! Hit duk su fam inim, o Yerusalem inim, Nenakni mot-duruk eleg salim horog aik waruhu, ulug, hweag-hirihi su, demdoho boruk kamin.

²²Hit Samaria on mot-duruk kahep ebe henapeleg deg lit, mot-duruk kahep famen, at nenahap wendat-nenepuk on nit ap Yahudi nenenggelegman inaruhu mu, nit mot-duruk kahe anyo neg de, nenelukdeg lit, mot-duruk kahe.

²³It ap homi Nenakni demdoho mot-duruk ai, at Allah Aheime omamne en debeseheg, ne, Allah airoho wereg, ulug, iren demdoho furebeheg, duruk kwit, mot-duruk salim fobik famen, ketia mundoho wahasi. At Nenakni en it ap homi airoho mot-napuk kamag, boruk.

²⁴Allah ai, heime deg ma, it ap at mot-duruk kamul boruk anyo, at Allah Aheime omamne en debeseheg, ne, Allah airoho wereg, ulug, iren demdoho furebeheg, duruk halug neg de, Allah mot-duruk kamuhup,” ulug hweag-itsi.

²⁵Hweag-itsi mu, at hwe anyo en, “At Allah eneko unduhuk febag on Mesias unuk Kristus uruk anyo at waruhu an nolukdeg. At anyo waruhureg, di wene su wene mundoho hweag-nesauk karuhu.”

²⁶Hweag-itsi mu, at Yesus en, “At anyo hat ninim nenele matuk kahe an welahi” ulug, hweag-itsi.

²⁷Hweag-utuk kwit, wereg ma, Yesus ele wauk on anyo wahausa. Wahausareg, at Yesus hwe inim enele matuk mu, hausareg, “Yaho hwi!” ulug, yanderuswa. “Yaho hwi!” ulug, hwe anyo fam, “Hat nunggwe fahet wahen?” eheg, ne, Yesus fam, “Hat hwe su hinim nunggwelug henele matuk kahep?” eheg, ul, bousa famen, we enele uk fug angge welatswa.

²⁸Uk fug angge wereg kweleg, hwe anyo en ahaikwag embeselug, obam lasireg, ap homi hweag-isil lauk kwit,

²⁹“Ap eke en an di deheg, su deheg, duruk katihik ale mundoho fagdoho hweag-nereheik ma, haluhup en manik. Allah en eneko unduhuk febag Mesias anyo at ane?”

³⁰ulug, hweag-esasi mu, enobam en wilipswareg Yesus akit wahausa.

³¹Owan akit waharuk kweleg, it Yesus ele wauk on en at Yesus hweag-utuk kwit, “Guru ao! Siburu su nakin, di.”

³²Hweag-utswa man, at Yesus en, “An nasiburu ai, hit henapeleg on nauk kahi.”

³³Hweag-esasi mu, at ele wauk on it neg hein og-og atuk kwit, “At siburu nowag ulug eke og-irik wahesa ane?”

³⁴Uswa ma, Yesus en, “At mon-nabik wahasi boruk ale inim, ne, at an duhuk boruk ale an den o fotogdoho duhuk inim, ai an nasiburu at.

³⁵Hiren, Dugwi ohwaneg eke enam dauk mu, anggen yihig wirik atuk salim higit aruhu mu baluhuk, uruk kahep anyo eleg a? Uruk kahep famen, an den ketia neg de yabuk yahoma hinil kumu hakiyug, ulug, hweag-hesauk kahi. Ebe wirik atuk kwit, eri mun yat atsi mu baluk hag atsi.

³⁶Ap eke a yareheg, eke anggen baleheg, duruk anyo inim enahayeg ambine boukwag ulug, at anggen balduk anyo onggo hwelauk. At onggo hwelauk ai, it ap homi enoluk mundoho welamuhup en anggen baleg kabogdoho foruk anyo.

³⁷Ap eke a yareheg, ne, eke anggen yihig baleheg, duruk, ulug, uruk wene ai demdoho.

³⁸An den hit yabuk yatuhupmu, anggen yihig wirik atsi mu, baluhup en mon-henepihik fug. Ite, ap enemu en yatswama etma neg de mon-henepihik mu, anggen yihig balduk kahep,” ulug, hweag-esasi.

³⁹Ne, at hwe anyo, “Ap eke en an di deheg, su deheg, duruk katihik ale mundoho fagdoho hweag-nereheik,” ulug, hweag-isil lasi anyo fam, ap homi Samaria on o sili etmano on humdoho en Yesus demdoho bolug, enenda obam dip-debousa.

⁴⁰It ap homi o Samaria on en Yesus demdoho bolug enenda obam dip-debousareg, it Yesus akit wahausareg, alele wauk kwit, “Ninim welamul,” ulug hweag-utswa ma, at Yesus nukoho birenam inim welatswa.

⁴¹Inim wereg lit, Yesus wene hweag-esasi fam, ap homi humdoho eke at Yesus demdoho bolug enenda at obam dip-debousa.

⁴²Dip-debousareg, iren hwe anyo hweag-utuk kwit, “Hwe su yei! Ketia hat hweag-nesauihin anyo fam neg de fug. Niren de at ele nenesanggo holduhukdeg, ap homi mundoho enahap wendat-enepuk on demdoho nenoluk atsi mu, at demdoho bolug, nenenda at fam dip-deberuk kahe,” ulug, hweag-utswa.

⁴³ Hweag-esausa ma, at Yesus en, “It ap enowe enaut enenggelegma wereg lit, Allah wene hweag-esauk halug, enesanggo furoho holduk fug,” isi mu, inim nukoho birenam welatlug, o etma en o Galilea wahasi.

⁴⁴

⁴⁵ It ap Galilea on en o Yerusalem soni osohoma wambik lausareg, etmano wereg lit, Yesus soni osohoma dil lauk ale mundoho inil hausa ma, Yesus o Galilea kwik wahasi mu, dangdoho wausa.

⁴⁶ Wausa ma, at Yesus en o Galilea sili Kana atam ik anggur anggen ahalue debesimu omano wahasi. Wahasireg, wereg ma, ap leho on pemerintah on eke amloho o Kapernaum ouk deg ma,

⁴⁷ap anyo Yesus o Yudea en o Galilea wahasi esanggo holsireg, Yesus akit lasireg, at amloho ouk mun waram hag disi mu, fano hilinggik lowag ulug, hweag-itsi.

⁴⁸Hweag-itsi mu, at Yesus en, “Hit henoluk am on henakol wereg on deheg, ap homi en duk fug on deheg, an duruk mu neahup fug halug, an demdoho bolug, henenda an nobam dip-nobahakup fug hisihi.”

⁴⁹Hweag-esasi mu, at ap pemerintah on anyo en, “Yehei nowe! An namloho owan waraikoho duruk kweleg, ninim lakohon.”

⁵⁰Hweag-itsi mu, at Yesus en, “Hamloho oluk atmisi mu, henda seroho hobam lakin.” Hweag-itsi mu, ap anyo en Yesus wene hweag-itsi on demdoho besireg, wahasi.

⁵¹Owan kwe fam waharuk kweleg, at amingming angge kwema lauk mu inim ambi atuk kwit, “Hamloho anyo mun oluk atsi,” ulug, hweag-utswa.

⁵²Hweag-utswa ma, aren, “Mo ke hwili lauk kweleg, oluk atsi?” Hweag-esasi mu, iren, “Sono nukoho jam 1 hwili, ebe ahanhan angge duruk katsi anyo eleg atsi,” uswa.

⁵³Uswa anyo, omalik akni anyo en, “Sono nukoho at Yesus en, Hamloho oluk atmisi, hweag-nitsi li anyo higitdoho oluk atsi hihi,” ulug, ebetsireg, at inim, eyog indip kwe wereg on inim, mundoho Yesus demdoho bolug enenda at obam dip-debousa.

⁵⁴At Yesus o Yudea en o Galilea kwik wahasireg, omano wereg lit, ap homi enoluk am on enakol wereg on fobik bireneg on disi ai.