Read Ninia Yali YOHANES 5 Bible Online

YOHANES 5 - Ninia Yali bible

YOHANES 5

¹Ai disireg, ai en, it Yahudi on soni eke esetuk mu, Yesus o Yerusalem lasi.

²O Yerusalem etma sokole eke unuk Pintu domba [10] og-enepil kwik laukmu eta ik eke yenggeleg wereg. Ik yenggeleg ai, Ibrani enele fam Betesda[11] uruk. Ik yenggeleg elanma maseroho o ambe baleg serambi foaben mundoho baleg wereg.

³Etma ap homi ouk deg on humdoho, it inil bug on inim, it enelenggen siag on inim, it enenggik eneyog wareg ma, leberuruk eleg on inim, etma neg yinggig welatswa. [

⁴Yinggig wereg lit, ik sene yenggeleg anyo hundig-hundig aplohok duruk on fahet nangno-hauk katswa. Airoho wereg ma, malaikat Allah en yonggo mon-enebik waharuk on eke watlug, ik anyo aplohok deberuk mu, it ap homi enobam ouk on etmano at eke atam ik sene anyo fam wamburuk halug, di ouk su ouk eleg atuk katsi ai en nangno-hauk katswa.]

⁵Nangno-hauk kwit wereg ma, ap eke ouk deg kweleg 38 tahun disi anyo inim etma welatsi.

⁶At anyo, o endam en airoho neg yinggig welatsi. Yesus enegdeg ma hasireg, hweag-utuk kwit, “Ao! Hat an fano ale e, boruk kahen ane?”

⁷Hweag-itsi mu, ap ouk deg on anyo en, “Yehei nowe. Ik aplohok duruk halug, an og-napil ikma belabe nobahaik la on de nori eke eleg ma, an owan wamburuk kweleg, it foma neg an fileg niil atam wamburuk abi!”

⁸Hweag-itsi mu, at Yesus en, “Ahwi! Inatlug, halit doaleg anyo hwelalug lauk kamin.”

⁹Owan hweag-utuk kweleg, ap anyo ebe fano atsireg, alit doaleg anyo hwelalug lauk katsi. At Yesus en disi ai, it Yahudi enap kel wat-dauk salim hari Sabat anyo fam disi.

¹⁰ Aireg ma, it Yahudi on en ap fano atsi anyo fam “Ao! O yoho kel wat-dauk salim hari Sabat deg ma, hat halit anyo walug lauk kahen ai ousa abi!”

¹¹Hweag-utswa man, at ap anyo en, “At ap an fano hiling-nabeheik anyo en, Halit doaleg anyo hwelalug lauk kamin, ulug, hweag-nereheik ma, walug lauk kahi,” ulug, hweag-esasi.

¹²Hweag-esasi mu, iren, “Sa en, Halit doaleg anyo walug lakin, hweag-hereheik?” ulug, hein og-hausa.

¹³Hein og-hausa famen, Yesus ap homi humdoho kabogdeg enenggalegma hesangge lasi mu, ap ebe fano hilinggisi anyo en, “San fano hiling-nabeheik,” ulug, wongdoho welatsi.

¹⁴Fobik de, ap anyo Allah obam wirigmu wereg ma Yesus il hasireg, “Ao! Hat hebe fano ahen ma, ouk ekenim hobam loukdoho habuk no, siag ekenim duruk kam fug,” ulug, hweag-itsi.

¹⁵Hweag-itsi mu, ap anyo wilibik lasireg, “Eleg. Ap fano hiling-nabeheik ai Yesus,” ulug, ap Yahudi on fagdoho hweag-esa lasi.

¹⁶Hweag-esasi mu, at Yesus en it ap Yahudi kel wat-dauk salim fam disi mu, it Yahudi on en Yesus siahap-biahapdoho feil lausa.

¹⁷Feil lauk kweleg, at Yesus en it hweag-esauk kwit, “An Nakni en o ketia su hwili fam duruk mu, an oho airoho neg duruk kahi,” ulug, hweag-esasi.

¹⁸At Yesus en kel wat-dauk salim fam duk fug ulug, ousa wereg kweleg, disi fam neg de fug. Ite, “Allah ai re, an Nakni,” uruk kwit, Allah inim higirap dauk katsi ai fam, it ap Yahudi on en mun humdoho watul ulug, duruk katswa.

¹⁹Duruk mu, at Yesus en, “Allah amloho namu neg nenda wenggele folug en dihi ha fug alereg. An Nakni duruk mu nil halug neg duruk kahi. Nakni en di ale su ale duruk ai, at amloho an higitdoho neg duruk kahi.

²⁰An Nakni ai at amloho an enda hundig nabeheg, ne, at di ale su ale duruk mundoho at amloho an fagdoho hweag-nereheg, duruk. Duruk mu, neauhup ai, dotdeg hag, ne, fobik hit, Yaho hwi! ulug yande-duhup en, mun along on, Din, ulug, hweag-nutuk halug, duruk mu, neahup.

²¹Nakni en ap homi waratswa on anyo enoluk apdoho feseruk anyo hag, at amloho an nendaman ap eke oluk apdoho fohuk, bohuk halug, oluk apdoho fohuk neg.

²²Nakni en ap homi ayo wiroho en-enepuk kwit, siag onggo debeseruk fug. Ap homi mundoho ayo wiroho en-enepuk kam ale ai, an Nakni en amloho an neg duhuk en unduhuk nobahasi.

²³Ap homi en Allah leho foruk hag, amloho an oho higitdoho leho nobahaukwag ulug, unduhuk nobahasi. It ap en Allah amloho an leho nobaharuk eleg halug ai, Nakni mon-nabik wahasi anyo leho foruk fug, ulug, dik-demdoho hweag-hisihi,” ulug, hweag-esasi.

²⁴Hweag-esasireg, ekenim uruk kwit, “It ap an nele hole folug, enenda at mon-nabik wahasi anyo demdoho bolug obam dip-deberuk ai, enoluk mundoho welamuhup on hwelahup. Ne, it ap anyo waratlug lauk men, mundoho enoluk welamuhupmu kwik wahausa ma, Allah en ayo wiroho ene fesehu fug, ulug, dik-demdoho hweag-hisihi.

²⁵It ap waratuk on en Allah amloho an nele holuhup salim fobik famen, ketia mundoho aik wahasi mu, it ap homi en an nele holduk esalug, enoluk mundoho welamuhup.

²⁶An Nakni ap homi enoluk enepuk indip foroho wereg hag, amloho an airoho neg eneluk enepuk kamag ulug, indip an foroho welaruhuk en unduhuk nobahasi.

²⁷Nakni en amloho an Ap endag-atihik mu, ap homi ayo wiroho en-enepuk kamag ulug, an nonggwareg unduhuk nobahasi, ulug, dik-demdoho hweag-hisihi,” ulug, hweag-esasi.

²⁸ Hweag-esasireg, ekenim uruk kwit, “It ap homi waratswa on ap wareg feserukmu wereg anyo mundoho an nele hole folug, inamuhup. Inamuhup mu, it fano neg dil lausa anyo, enoluk mundoho welamuhup on hwelowag ulug, unduhuk feseheg, ne, it siag duruk katswa anyo, ayo wiroho ene feselug, siag onggo debesoukwag ulug, unduhuk feseheg, duhu salim horog aik wahasi mu, hiren, Yehei u, uk fug,” ulug, hweag-esasi.

²⁹

³⁰“An den neg nenda wenggele folug eke dihi ha fug alereg. Ite, Allah ele hole folug neg, ayo wiroho ene feseruk kahi. An nendan bolug duruk kahi fug. Nakni mon-nabik wahasi enda boruk ale neg duruk kahi mu, an ap homi ayo wiroho en-enepuk kahi ai, fik-furebeselug neg debeseruk kahi.

³¹An den neg nabug fagdoho hweag-hesauk kahi halug ai, seiale uruk, boluhup famen,

³²at eke amu on en nabug fagdoho hweag-hesauk. Ne, at hweag-hesauk ai, demdoho neg hweag-hesauk an noluk.

³³ Hit yonggo Yohanes akit mon-enepuhup anyo, lausa ma, wene dik-demdoho fagdoho hweag-hesasi.

³⁴An nabug it ap homi en fagdoho hweag-hesahup an boruk kahi fug famen, hit henahap wendaruhuk en, wene su hweag-hesauk kahi.

³⁵At Yohanes ai, eral fisaho on ambogbag humon duruk hag welatsi mu, selehap henepuk hag, hweag-hesauk katsi fam, we misiham henahayeg boruk katuhup famen,

³⁶at Yohanes en nabug fagdoho hweag-hesauk ai, maben hag. An Nakni en an duruk karuhuk en hweag-nitsi on duruk kahi ale anyo fam, Nakni en mon-nabik wahasi nabug fag duruk ai, mun along neg.

³⁷ An Nakni mon-nabik wahasi oho nabug fagdoho hweag-hesasi famen, hit at ele henesanggo mun holuk fug angge, ne, orohole inim ha fug angge welahep.

³⁸At mon-nabik wahasi an anyo, demdoho bolug, henenda nobam dip-nobahauk fug angge welahep ma, at ele ai, henendama mundoho wereg fug.

³⁹Hit Allah wene lisu baleg fam, “Mundoho neneluk nenebuhu,” bolug, furoho kumu hauk kahep. Allah wene lisu baleg ai, an nabug fagdeg anyo lisu baleg wereg famen,

⁴⁰hit henoluk henebuhuk en, an nakit wam ale fano famen, nenerim boruk kahep.

⁴¹An ap homi en mot-nabukwag, ulug, boruk kahi fug.

⁴²Hit neg de, Allah hinim henenda hundig boruk kahep fug ai, an mundoho nolukdeg.

⁴³Nakni en mon-nabik wahasi on anyo, hit og-nabuk fug angge welahep famen, ap amu on eke at endan bolug waharuk halug neg de, deg kweleg wahup hisihi.

⁴⁴Yaho yei! It henori en mot-henepuk halug ai, henahayeg boruk kahep famen, Allah amu neg wereg on mot-neneplep aho, boruk kahep fug mu, hit nangginoho an demdoho bolug, henenda an nobam dip-nobahakup?

⁴⁵An den Nakni il hanim henenggali waroho hweag-hesahuk bouk fug. At henenggali hweag-hesauk ai, hit henenda hundig welahep ahun Musa anyo at henenggali waroho hweag-hesauk.

⁴⁶Hit henenda Musa demdoho bolug, obam dip-debelep man, aren an nabug fagdoho lisu balfag ma, hit an demdoho bolug, henendama mundoho an nobam dip-nobahalep.

⁴⁷At Musa wene lisu balfag anyo hit demdoho boruk kahep fug halug, an nele hweag-hisihi ai, nangginoho demdoho bohup?” ulug, hweag-esasi.