Read Ninia Yali YOHANES 6 Bible Online

YOHANES 6 - Ninia Yali bible

YOHANES 6

¹Ai hweag-esasireg, ai en, at Yesus ik yenggeleg Galilea unuk eke Tiberias anyo foma fil nindig-aik lasi.

²Foma fil lauk mu, it ap homi humdoho at Yesus enoluk am on enakol wereg on duruk kwit, oukdeg on fano hiling-enebil lauk ale inil hausareg, Yesus mutlug lausa.

³Mutlug lauk kweleg, at Yesus dukmu lahasireg, at ele wauk on inim etma huratswa.

⁴Ne, ai salim, Allah andomba waroho soni Paskah esetuk li horog aik wahasi.

⁵Ne, Yesus anyo huratlug, il leko fu esauk kwit, ap homi humdoho at akit kabog-dik waharuk mu esasireg, Filipus hweag-utuk kwit, “Filipus ao! Ap homi su siburu nalusa on, onggo kema hundurik laul?” ulug, hein og-hasi. (

⁶Hein og-hasi ai, at dimin olukdeg lit en, Filipus abut balmin ulug, isi.)

⁷Hein og-hasi mu, at Filipus en, “It ap homi enemu domog we dorangge neg nowag ulug uang perak [12] anggen 200 fam siburu onggo hundutul men higitdoho na fug alereg, behi.”

⁸Hweag-itsi mu, at ele wauk on eke Simon Petrus aut Andreas anyo en Yesus hweag-utuk kwit,

⁹“Nowe yei! Omalik doron eke roti ebe foaben, ne, ikan doron biren foroho wereg famen, ap homi humdeg ma, higitdoho na fug alereg hihi.”

¹⁰Hweag-itsi mu, at Yesus en, “Ap homi su, hweria amag ulug, hweag-esakiek” ulug, hweag-esasi mu, ap neg enebe 5.000 enggela fam hweria atswa.

¹¹Hweria atswa ma, at Yesus en roti anyo oko, Allah dang-disireg, it ap homi hwerieg anyo yohwan-enepsi. Yohwan-enepsireg, ikan inim airoho neg yohwan-enepuk kwit, enendaman, “Ekenim nela e,” boruk halug, higitdoho yohwan-enepsi.

¹²Yohwan-enepsi anyo nausareg, homo-debesesi mu, at Yesus en at ele wauk on anyo hweag-esauk kwit, “Foma dindikdoho fehesa anyo, hesangge debesouk no, misigmu kabogdoho feik manik.”

¹³Hweag-esasi mu, it ap homi roti nauk kwit, foma dindikdoho fousa anyo kabogdoho si yihig nesanggoen fam ele sopdoho yohwaroho fousa.

¹⁴Yohwaroho fousa ma, ap homi en eneluk am on enakol wereg on hausareg, “At Allah wene hweag-esauk on o kwenangma suma waruhu nabi [13] anyo su demdoho wahasi hehe.”

¹⁵Uswa ma, at Yesus en, “It ap homi wamlusareg, enowe nunuk bogdeg welaruhuk en unduhuk nobahaukwag ulug, duruk,” ulug, enegdeg ma hasireg, dukmu etmano amu neg lahasi.

¹⁶Laharuk kweleg, o hup atsi mu, Yesus ele wauk on ik yenggeleg inggimu wambik wahausareg,

¹⁷perahu fam kuswareg, o Kapernaum ik foma fil nindig-amul ulug, wahausa. Waharuk kweleg, o hup atsi mu, Yesus enekit owan waharuk eleg kweleg,

¹⁸o hol sielu humdoho firil waharuk kwit, ik funag-lenggag angge disi.

¹⁹Funag-lenggag angge duruk kweleg, perahu iren on anyo owan walug lauk kwit, 5 kilometer ane, 6 kilometer a, bul aik lauk mu, at Yesus ik emberim fene eyog sobatil enekit horog aik waharuk mu hausa. Hausareg, enemelmel humon duswa.

²⁰Enemelmel humon duswa man, Yesus en, “Nori aho! An neg deg ma, henakol duk fug.”

²¹Hweag-esasi mu, “Perahu niren on fam kwik walep aho,” boruk kweleg, ik yenggeleg inggimu foma fil laul bousama omano re mundoho aik lauk mu hausa.

²²Likia o sekan disi mu, it ap homi en hupmu perahu misig neg wereg, ne, Yesus at ele wauk on perahu anyo fam inim eleg angge it enemu neg lauk mu esausa angge en ik inggimu etmano welatswa.

²³Wereg ma, perahu foma amu on o Tiberias en enowe somban ulug, ap homi roti yohwan-enepsi mu nausama etmano aik lausa.

²⁴Lausareg, Yesus inim, at ele wauk on inim, enebe eleg ma, hausareg, perahu iren on fam kulug, Yesus heraril o Kapernaum wahausa.

²⁵O Kapernaum watlug, Yesus ik inggimu oma fil wereg ma, hweahausareg, “Guru yei! Hat nanggoho wahen?”

²⁶Hweag-utswa ma, at Yesus en, “Heneluk am on henakol wereg on duruk mu neauhup fam hera-nabil wahep fug. Ite, hit siburu homoroho nauhup mu hera-nabil wahep hisihi, ulug, dik-demdoho hweag-hesauk kahi.

²⁷Siburu filik am on anyo fahet neg yabuk wituk kam fug. Ap endag-atihik an anyo Nakni Allah en eneko nobahasi mu, siburu mundoho welam on an den og-hesauk kahi anyo fahet yabuk wituk kamek.”

²⁸Hweag-esasi mu, iren at hein og-hauk kwit, “Allah en enda boruk ale duhuk en, nit nangginduk kamuhuk?” ulug, hein og-hausa.

²⁹Hein og-hausa ma, at Yesus en, “Eleg. Allah enda boruk ale duhup ai, at mondorik wahasi anyo demdoho bolug, henenda at obam dip-debehup ai.”

³⁰Hweag-esasi mu, “Duruk mu ninil healug, hat demdoho bolug, nenenda hat hobam dip-hobahakuk en, neneluk am on nenakol wereg on eke ke duruk mu heaul? Ne, hat nangginig on eke dimihin?

³¹ Siburu nowag ulug, boholman og-esa watfag, ulug, lisu baleg anyo higitdoho, nit[14] nenombasi o leimu wereg ma, siburu manna og-esa watfag ma, anyo nauk katfag.”

³²Hweag-utswa ma, at Yesus en, “Siburu boholma on og-hesauk ai, at Musa en[15] og-hesebag fug. Ite, an Nakni en de siburu ebe on siburu boholma on og-hesauk.

³³Siburu Allah en og-hesauk anyo re, boholman wambik wahasireg, ap homi kwenangma on enoluk enepuk, ulug, dik-demdoho hweag-hisihi,” ulug, hweag-esasi.

³⁴Hweag-esasi mu, iren, “Yehei nenowe! Siburu ai on hundig og-nesauk kamin.”

³⁵Hweag-utswa ma, Yesus en, “Siburu henoluk henepuk kahi an. Hit eke en an nakit waharuk halug, eke obok henebuhu fug. Ne, hit henenda an nobam dip-nobahalug, demdoho boruk halug, eke ik obok henebuhu fug neg.

³⁶Ne An den atam hweag-hesawihik higitdeg, hit neg de nebe hinil neauk katuhup famen, An demdoho bolug henenda nobam dipnobahakup henerim.

³⁷It an Nakni en og-nutuk anyo re, nakit wamuhup. Ne, it ap an nakit waharuk anyo re, embesehuk fug.

³⁸An nendan bolug, duruk karuhuk, ulug, boholman wambik waharihik fug. Ite, at mon-nabik wahasi enda boruk ale neg duhuk ulug waharihik.

³⁹At mon-nabik wahasi enda boruk ale ai, it an og-nitsi anyo misig eke longgo uhu fug. O ahae fotog salim it mundoho enoluk apdoho unduhuk fesehuk boruk.

⁴⁰An Nakni en enda boruk ale ai re, hit Allah amloho an hinil fu-nobahalug, demdoho boruk kwit, henenda an nobam dip-nobaharuk halug, henoluk mundoho welamuhup, boruk ai. Ne, fobik o ahae fotog salim an den enoluk apdoho unduhuk fesehuk boruk,” ulug, hweag-esasi.

⁴¹At Yesus en, “Siburu boholma on wambik waharihik on,” hweag-esasi anyo fam it ap Yahudi on en enerimdoho mul-mul ale uruk kwit,

⁴²“A! Ap su, Yusuf amloho unuk Yesus akni isinga neneluk anyo en uruk su eleg a? An boholman wambik waharihik hweag-nesauk su, keroho hweag-nesauk behep?”

⁴³Uswa ma, at Yesus en, “Henerimdoho mul-mul ale uk fug.

⁴⁴At Nakni mon-nabik wahasi anyo en henenda wenggel-henepuk eleg halug, an nakit wahep ha fug alereg. Ne, nakit wam ale henenda wenggel-henepuk halug neg de, o ahae fotog salim heneluk apdoho henobahakuk.

⁴⁵ It ap Allah wene hweag-esauk katfag on nabi anyo en lisu balduk kwit, Allah en di ap homi su ap homi mundoho wene hweag-esauk karuhu, ulug, lisu balfag ma, di ap su ap an Nakni en wene hweag-esauk anyo hole folug, hwelauk ai, an nakit waharuk.

⁴⁶Wene hweag-hesauk kahi su anyo, it ap en Nenakni ebe inil hausa ma, ulug, hweag-hesauk kahi fug. Ite, an Allah weregman waharihik on namu neg nil hauihik.

⁴⁷Hit henenda nobam dip-nobahalug, demdoho boruk kahep halug, henoluk mundoho welamuhup ulug, demdoho hweag-hesauk kahi.

⁴⁸Siburu henoluk henepuk kahi an.

⁴⁹Hit henombasi o leimu wereg lit, siburu boholman wambik watfag manna anyo nauk katfag famen, deg kweleg, warail lebag.

⁵⁰Siburu boholman wambik waharuk su nauk halug neg de, waramuhup fug.

⁵¹Siburu henoluk henepuk kahi boholman wambik waharihik an. Hit siburu su anyo nauk halug, henoluk mundoho welamuhup. Hit ap homi kwenangma welahep henoluk henebuhuk en, siburu su henobahet fohuk anyo ai re, an nebe” ulug, hweag-esasi.

⁵²Ai hweag-esasi fam it ap Yahudi on it neg suahal uruk kwit, “Yaho! Ap su, at ebe keroho og-nesahu mu, nit nahuk en uruk behep?”

⁵³Uswa ma, at Yesus en, “An ap endag-atihik nebe inim, namep inim, nauk fug halug, henoluk welam on hwela fug angge welamuhup, ulug, dik-demdoho hweag-hisihi.

⁵⁴Hit eke en an nebe inim, an namep inim, nauk halug ai, henoluk mundoho welamuhup en, o ahae fotog salim henoluk apdoho unduhuk henobahakuk.

⁵⁵An nebe ai re, siburu ebe on anyo. Ne, namep ai re, ahalue nauk on ebe on anyo.

⁵⁶Hit eke en an nebe inim, namep inim, nauk halug de, an den hit ninim hundig welaheg, ne, hiren an ninim hundig welaheg, welamuhuk.

⁵⁷Nakni oluk wereg anyo en mon-nabik wahasireg, at napuk fam an noluk welahi anyo hag, hit eke an nebe nauk halug ai, an den henepuk fam heneluk welamuhup.

⁵⁸Siburu boholma en wambik waharihik ai re, henombasi nauk katfag famen, deg kweleg, warail lauk katfag anyo hag de fug. Ite, siburu su re, hit eke nauk halug, henoluk mundoho welamuhup,” ulug, hweag-esasi.

⁵⁹Wene hweag-esasi ai re, o Kapernaum it Yahudi somban uruk obam wereg lit, hweag-esasi.

⁶⁰Hweag-esasi on it at ele wauk on foma humdoho holswareg, “Wene su mun anggindeg ma, san holuk alereg behep?”

⁶¹At Yesus wene ai hweag-esasi fam it enerimdoho mul-mul ale uruk enegdeg ma esasireg, “Wene hweag-hisihi anyo fam, Anggindeg, ulug, embesouk ale henepuk ane?

⁶²An Ap endag-atihik on welatihikmu etmano nambol sombandoho laharuk mu, hinil neahupdeg, hit nanggoho bohup?

⁶³At Allah Aheime en de ap homi enoluk enepuk. It ap homi kwenangma ondoho on en duruk kam fug alereg. At Allah Aheime en wene hweag-hisihi anyo fam heneluk henepuk famen,

⁶⁴hit foma neg de, demdoho bolug, henenda nobam dip-nobahauk fug angge welahep hisihi,” ulug, hweag-esasi. (Hweag-esasi ai re, at Yesus en atam en it ap Yesus demdoho bolug, enenda at obam dip-debehup fug on inim, ne, at onggo baluhu anyo inim, olukdeg lit en, airoho hweag-esasi.)

⁶⁵Hweag-esasireg, “An Nakni en henenda wenggel-henepuk eleg halug, an nakit wahep ha fug alereg, hweag-hisihi anyo indip ai ulug hweag-hisihi,” ulug, hweag-esasi.

⁶⁶Ai hweag-esasi mu, it at ele wauk on foma humdoho Yesus inim ekenim la fug angge embeselug, longgo uswa.

⁶⁷Longgo uswa ma, at Yesus en at ele wauk on nesanggoen anyo hweag-esauk kwit, “Hit oho an nobahalug longgo ul boruk kahep ane?”

⁶⁸ ulug, hein og-esasi mu, at Petrus en, “Yehei nowe! Nit sa akit lahe ha ale ulug ehen? Neneluk mundoho welamuhup on wene hat neg hweag-nesauk kahen anyo.

⁶⁹Niren hat demdoho bolug, nenenda hobam dip-hobaharuhukdeg, at eke siag duk fug angge fano neg duruk on Allah en mondorik wahasi anyo hat heauhuk.”

⁷⁰Hweag-itsi mu, at Yesus en, “An den hit ap nesanggoen momal-henepihik famen, hit eke Iblis omalik hihi,” ulug, hweag-esasi.

⁷¹Ai hweag-esasi anyo re, ap Simon Iskariot amloho Yudas it ap at ele wauk on nesanggo on eke famen, fobik Yesus onggo baluhu, at ulug hweag-esasi.