Read Ninia Yali YOHANES 7 Bible Online

YOHANES 7 - Ninia Yali bible

YOHANES 7

¹Ai hweag-esasireg, it Yahudi on en Yesus binggi waruhuk ulug duswa ma, “O Yudea suma dil lauk katmin nerim,” ulug, o Galilea etma dil lauk karuhuk ulug, noruk katsi.

² Noruk kwit wereg ma, it Yahudi o sabo witfag ale ebetuk kwit, soni esetuk salim horog aik wahasi mu,

³Yesus autsi en at hweag-utuk kwit, “Ap eke at unuk hum amag ulug, duruk ai, herako duruk fug mu, hat duruk kahen anyo it hat hele wauk on anyo en inil heowag ulug, o su embeselug, o Yudea inim dik lakin. Hat duruk kahen anyo duruk mu halug, it ap homi mundoho re inil heowag ulug enamegma dil lauk kamin,” ulug, hweag-utswa. (

⁴

⁵Hweag-utswa ai, at autsi anyo oho Yesus demdoho bolug, enenda obam dip-debouk fug angge en hweag-utswa.)

⁶Hweag-utswa ma, at Yesus en, “Hit duk ale ai, di salim su salim hesangge dehep halereg famen, an duhuk li re owan aik waharuk eleg.

⁷It ap homi en hit enerim henebuk fug alereg famen, an neg de, it ap homi duruk ai, Siag duruk kahep, ulug, fagdoho hweag-esauk kahi mu, enerim napuk.

⁸An duhuk li owan aik waharuk eleg ma, soni esetuk mu etma lamin fug.[16] Hit henemu neg laluhup,” ulug, hweag-esasi.

⁹Ai hweag-esasireg at o Galilea bok atsi.

¹⁰Bok atsi famen, ai en, at autsi anyo soni esetukmu o Yerusalem lausa ma, at oho kwe humon fam lasi fug. Herag-herag lasi.

¹¹Lasireg wereg ma, it Yahudi on en soni esetukmu Yesus welam no inil fururuk kwit, “At ebe suma wereg eleg ane?” ulug, heraril lausa.

¹²It ap homi ling-long wene fam Yesus abug humdoho uruk kwit, it foman, “At ap fano,” eheg, ne, it foma en, “Eleg. Aren ap homi lal-enepuk,” eheg, uruk katswa famen,

¹³it ap homi anyo ap Yahudi on enakol en, Yesus abug halug, enamegma uswa fug. Ite, ling-long wene fam neg de abug uruk katswa.

¹⁴Soni esetuk kwit, nukoho foma duruk katswareg, owan bul etmano duruk kweleg, at Yesus Allah obam wirigmu kwik lasireg, wene hweag-esasi.

¹⁵Hweag-esauk kweleg, it ap Yahudi en, “Yehei u,” ulug, yanderuruk kwit, “Ap su sekolah disi fug famen, di wene su wene indip nangginoho oluk atsireg, uruk, behep?”

¹⁶Uswa ma, at Yesus en, “Wene an den hweag-hesauk kahi ai, an nenda boruk kahi fam hweag-hesauk kahi fug. Ite, at mon-nabik wahasi anyo en hweag-nutuk kweleg, hweag-hesauk kahi.

¹⁷Hiren Allah en enda boruk ale anyo, Dul, boruk kahep halug, an den wene hweag-hesauk kahi ai re, Allah en hweag-nutuk kweleg, hweag-hesauk kahi a, an nendan bolug hweag-hesauk kahi a, anyo re, henoluk amuhup.

¹⁸It ap homi en it enenda boruk fam wene hweag-hesauk ai, leho fahat-daul ulug, hweag-hesauk famen, at mon-nabik wahasi leho foukwag ulug, wene hweag-hesauk ai, mun demdoho halug neg de uruk mu, siag eke endama mundoho wereg fug.

¹⁹Allah wene melaleg anyo at Musa en lisu bal-hesebag anyo eleg a? Bal-hesebag famen, wene anyo hit mundoho en duk fug angge welahep. Hit nunggwe ulug an nowarukoho lit, duruk kahep?”

²⁰Hweag-esasi mu, it ap homi anyo en, “Eleg. Hat mungguat hendama wereg lit ehen a? Sa mel en howarukoho duruk mu esalug uruk kahen?”

²¹Hweag-utswa ma, at Yesus en, “An kel wat-dauk salim we misiham duruk mu neauhup fam hit mundoho en, Yehei u, ulug, yande-napuk kahep a?

²² Musa en hweag-hesebag fug, henombasi en hweag-hesebag famen, deg kweleg, Musa en airoho hweag-nesebag, ulug, hit hesangge somban uruk salim henomaliki enahap bal-enepuk kahep.

²³ Hit de, Musa wene hweag-nesebag dahandoho dehe ha no, bolug, kel wat-dauk salim henomaliki enahap bal-enepuk kahep famen, an kel wat-dauk salim ap eke ebe fano hilinggirihik fam nunggwe fahet bet-napuk kahep?

²⁴Indip furebouk fug angge hesangge wereg lit, we ebe hauk fam neg siag enobam fesouk fug. Ite, indip fik-furebelug, duswa onggo higitdoho enobam fesehup fano,” ulug, hweag-esasi.

²⁵Ai hweag-esasi mu, it ap Yerusalem on foman, “Ap binggi warukoho duruk anyo su ane?

²⁶At wene hummu hweag-nesauk famen, ousa uruk eleg ai furiek. It ap nenowesi anyo en ousa uruk eleg su. Allah en eneko unduhuk febag on Mesias anyo at, demdoho bolug, bok wereg ane?

²⁷At Kristus waharuk halug, keman waruhu nit mundoho nenapeleg famen, ap su re keman wahasi ai, nenolukdeg,” ulug, uswa.

²⁸Uswa ma, at Yesus Allah obam wirigmu etmano en ele hum fam hweag-esauk kwit, “An nebe inim, ne, an keman waharihik inim, hit mundoho nenoluk uruk kahep a? An nendan bolug waharihik fug. Ite, at ebe on wereg anyo en an mon-nabik wahasi. Ne, at henapeleg famen,

²⁹an anyo, an mon-nabik wahasi weregman waharihik mu, an neg de at ebe an noluk.”

³⁰Hweag-esasi mu, at senetul ulug, duswa famen, at waruhup li owan aik waharuk eleg ma, enenggik senetswa fug.

³¹Ai duswa famen, deg kweleg, it ap homi humdoho en at demdoho bolug, enenda at obam dip-debousa. Obam dip-debousareg, uruk kwit, “Ap su nenoluk am on nenakol wereg on dil lauk mu hauhuk anyo, we dorangge dil lauk, ne, Allah en eneko unduhuk febag on anyo fobik waruhureg, at mun humdoho dil lauk mu hahuk behep? Ai fug,” uswa.

³²Ap homi ling-long wene fam Yesus abug uruk mu, it Farisi enap holswareg, it inim, it ap Allah il hanim ap homi enobahet duruk on imam enowesi inim en Yesus senetul ulug, enautsi Allah obam wirigmu kahalduk enap mon-enepswa.

³³Mon-enepswa on, Yesus akit lausa ma, at Yesus en, “An il misiham ninim welamuhuk. Ninim welamuhukdeg, at mon-nabik wahasi anyo akit lahuk.

³⁴Akit lahuk mu, hiren an hera-nabil lahup men, an lahukmu etma hit lahep ha fug alereg ma, hweag-nabuhup fug.”

³⁵Hweag-esasi mu, it Yahudi on inim enele matuk kwit, “At kema lahu mu, nit hweahake ha fug alereg, bolug, uruk behep? It Yahudi on ap Yunani enenggelegma o oko wereg anyo enekit lahureg, inim wereg lit, it ap Yunani on hweag-esauk karuhuk, bolug uruk behep?

³⁶Hit hera-nabil lahup famen, an lahukmu etma hit lahep ha fug alereg ma, hweag-nabuhup fug, hweag-neseheik anyo, nanggoho bolug hweag-neseheik behep?” uswa.

³⁷ Uswa ma, ai en, nukoho ahae fotogdoho soni mun humon esetuk salim, at Yesus inatsireg, ele hum fam hweag-esauk kwit, “Yaho yei! Hit eke ik obok henepuk halug, an nakit na manu.

³⁸ Hiren an demdoho bolug, henenda an nobam dip-nobaharuk kahep halug, ik henoluk henepuk on henendaman ik eleruk wilibik waharuk karuhu, ulug, Allah wene lisu balfag anyo higitdoho henendaman wilibik waharuk karuhu,”[17] ulug, hweag-esasi. (

³⁹Ai hweag-esasi anyo, it ap homi en Yesus demdoho bolug, obam dip-deberuk halug, Allah Aheime og-esahu mu, ulug, hweag-esasi. Yesus owan leho foruk eleg kweleg, at Allah Aheime og-esa fug mu, ulug, hweag-esasi.)

⁴⁰It ap homi wene hweag-esasi anyo enesanggo hole fousareg, it foman, “Ap Allah wene hweag-esauk on nabi [18] hweag-nesa waruhu anyo ebe su hehe,” eheg,

⁴¹ne, it foman uruk kwit, “Allah en eneko unduhuk febag on Mesias anyo su hehe,” eheg, uruk kweleg, it foman neg de, “At Allah en eneko unduhuk febag on Mesias anyo o Galilea en waruhu behep? Eleg.

⁴² Ap eke en, Allah en eneko unduhuk febag on Mesias ai, at omba Daud obam etma o Betlehem endag-aruhu, ulug, Allah wene lisu balfag anyo eleg a?”

⁴³Uswa ma, it ap homi en Yesus awene fahet suahal uruk kwit, minggit-manggat dausa.

⁴⁴Minggit-manggat dauk kwit, enenggik en seneruk fug angge welatswa.

⁴⁵It Allah obam wirigmu kahalduk enap enambol sombandoho ap Allah il hanim duruk on enowesi inim, it ap Farisi on inim, enekit lausa ma, “Hit nunggwelug, at walug wahep fug?”

⁴⁶ulug, hein og-esausa ma, it kahalduk enap en, “Eleg. Ap homi eke, ap su en de hweag-nesauk hag, uruk mu hauk kahe fug.”

⁴⁷Hweag-esausa ma, it enowesi nim it Farisi on nim en, “Hit oho laloho henobahakeik e?

⁴⁸Nit henowesi nim, Farisi on nim, at demdoho bolug, nenenda at obam dip-deberuk mu, eke hauhup a?

⁴⁹It ap homi humdoho ai Musa wene uruk anyo enapeleg ma, Allah en wipdoho fesesi mu wereg,” ulug, hweag-esausa.

⁵⁰ Hweag-esausa ma, ap iron eke unuk Nikodemus atam Yesus akit lasi anyo en it hweag-esauk kwit,

⁵¹“Yaho! Ap Allah wene melaleg wene duruk kwit, ap eke dil lasi anyo at ele nenesanggo hole folug, indip neneluk atuk eleg kweleg, siag onggo fesouk ai fano behep?”

⁵²ulug, hein og-esasi mu, iren, “Yaho hwi! Ap ai, hinim o Galilea en waharuhup mu, uruk kahen hehe. Allah wene lisu baleg kumu hauk kamin ahi! Kumu hamihin deg, it ap nabi o Galilea en[19] waruhu ulug baleg eleg ma hamihin,” ulug, hweag-utswa. [

⁵³Hweag-utswareg, enobam domog lausa famen,