Read Ninia Yali YOHANES 8 Bible Online

YOHANES 8 - Ninia Yali bible

YOHANES 8

¹it enobam lauk kweleg, at Yesus neg de Duk Zaitun fam lahasi.

²Ai en, likia hubetdoho, ambol sombandoho wahasireg, Allah obam wirigmu kwik wahasi. Kwik wahasireg, wereg ma, ap homi humdoho at akit wahausa ma, hweria atlug, wene hweag-esauk katsi.

³Hweag-esauk kwit, wereg ma, it ap Allah wene melaleg hwalduk on guru agama inim, it ap Farisi on inim en hwe eke hambena duruk mu, hweahausareg, walug Yesus akit wahausareg, hwe anyo bulmu ine feik wahausa.

⁴Ine fousareg, Yesus hweag-utuk kwit, “Guru ao! Hwe su hambena duruk mu, hweahake.

⁵ At Musa en Allah wene melaleg fam hweag-nesauk kwit, Hwe eke airoho duruk halug, helep fam fukdoho binggi wariyug, ulug, hweag-nesebag famen, haren neg de, nanggoho hweag-nesamihin?” ulug, hein og-hausa.

⁶Wene ai hein og-hausa anyo re, Yesus ke fam hekip halug, enggali watul, ulug, abut balduk kwit, hweag-utswa. Hweag-utswa ma, at Yesus en wene onggo hweag-esa fug angge, ebe konu-debelug enggik dum en kwenangma lisu balsi.

⁷Lisu balduk mu, iren wene anyo hein og-heheg neg duruk mu, at inatlug, it hweag-esauk kwit, “Ap henenggelegma suma eke siag disi fug halug, aren atam hwe su helep fam fukdoho warukwag,” ulug, hweag-esasi.

⁸Hweag-esasireg, ekenim konu-debelug, kwenangma enggik dum en lisu balsi.

⁹Wene hweag-esasi anyo hole fousareg, hwe anyo amu neg eta embeselug, enowesi it atam lit-lit laheg, enautsi fobik airoho neg, laheg, duswa ma,

¹⁰at Yesus anyo, ebe bekit inatsireg, hwe anyo hweag-utuk kwit, “Hweli! Ap omano kema lahesa? Iren hat siag dirihin onggo anggin on hobam fehesa a, eleg ane?”

¹¹Hweag-itsi mu, hwe anyo en, “Eke wereg fug, nowe.” Hweag-itsi mu, at Yesus en, “An den oho anggin on eke hobam hobahamin fug mu, hangge lakin. Ketia su hwili en siag ekenim duruk kam fug,” ulug, hweag-itsi.][20]

¹² Hwe anyo airoho hweag-itsireg, ai en, at Yesus en ap homi ekenim hweag-esauk kwit, “Ap homi o kwenangma wereg on selehap enepuk kahi an. Hit an ninim lauk halug, seleg enoluk enepuk kahi an anyo en hit henenda selehap henebuhuk mu, o mum fam lauk kamuhup fug,” ulug, hweag-esasi.

¹³ Hweag-esasi mu, it Farisi on en, “Nimi! Haren neg habug fag-dil noruk kahen ma, hele ai seiale uruk kahen heehe.”

¹⁴Hweag-utswa ma, at Yesus en, “An den nabug fag-dil lauk kahi famen, an keman waharihik, ne, kema lahuk anyo, hit henapeleg.

¹⁵Hiren ap homi duruk hag, siag nobam dopno-neauk kahep famen, an den siag henobam dopno-hesauk kahi fug.

¹⁶An den siag henobam dopno-hesele man, namu en neg at mon-nabik wahasi ninim en duruk kahe ma, hit demdoho duruk hesalug, siag henobam dopno-hesela.

¹⁷Allah en wene melaloho hweag-hesauk kwit, Ap enebe biren en enolukdeg lit, fagdoho uruk halug ai, enele demdoho uruk, ulug, lisu baleg wereg.

¹⁸An duruk kahi nabug fagdoho hweag-hesauk ai, eke an den hweag-heseheg, ne, eke ai, an mon-nabik wahasi anyo en hweag-heseheg, duruk kahe.”

¹⁹Hweag-esasi mu, iren at hweag-utuk kwit, “Hakni ebe ke?” Hweag-utswa ma, aren, “Eleg. An inim, Nakni inim, henepeleg welahep. An nebe henoluk alep man, an Nakni oho henoluk alep” ulug, hweag-esasi.

²⁰Ai hweag-esasi ai re, Allah obam wirigmu uang forukmu etma wereg lit, hweag-esauk katsi famen, at waruhup li owan higit aik waharuk eleg ma, Yesus seneruk fug angge welatswa.

²¹Fobik, at Yesus en ekenim it hweag-esauk kwit, “An lahuk. Hiren an hera-nabil lauk kamuhup famen, an lahukmu etmano hit lahep ha fug alereg ma, siag henendama wereg lit, waramuhup,” ulug, hweag-esasi.

²²Hweag-esasi mu, it Yahudi on en, “Aren, An lahukmu etmano lahep ha fug alereg, hweag-neseheik ai, aren wat-dahuk ulug uruk ane?”

²³Uswa ma, aren, “Hit de suma on, ne, an neg de lendi on. Hit de kwenangma on famen, an neg de kwenangma on fug.

²⁴Hit siag henendama wereg kweleg, waramuhup, hweag-hisihi ai, An neitog welahi,[21] uruk anyo ebe an, demdoho boruk kahep fug halug, siag henendama wereg kweleg, demdoho waramuhup,” ulug, hweag-esasi.

²⁵Hweag-esasi mu, iren, “Hat de sa no?” Hweag-utswa ma, aren, “An airoho, ulug, atam en[22] hweag-hesauk katihik anyo an.

²⁶Hit dil lauk fam siag henobam dopno-hesauk kwit, di wene su wene humdoho hweag-hesamin ulug welahi. At mon-nabik wahasi anyo demdoho uruk mu, an den at ele hole folug neg, hit kwenangma on hweag-hesauk kahi,” ulug, hweag-esasi.

²⁷It wene hweag-esasi ai re, “At Akni abug hweag-nesauk hehe,” ulug, furebouk fug angge welatswa.

²⁸Furebouk fug angge wereg ma, at Yesus en, “Hiren an Ap endag-atihik anyo unduhuk nobahakup halug, An neitog welahi, uruk anyo ebe an heneluk aheg, ne, an nendan bolug duruk kahi fug, Nakni hweag-nesauk anyo neg de hweag-hesauk kahi henoluk aheg, duhup.

²⁹At mon-nabik wahasi anyo ninim wereg. At ahayeg boruk ale neg duruk kahi mu, o fotog-neauk fug,” ulug, hweag-esasi.

³⁰Wene airoho hweag-esauk kweleg, ap homi humdoho en Yesus demdoho bolug, enenda at obam dip-debousa.

³¹Ai en, Yesus en it Yahudi on en at demdoho bolug, enenda at obam dip-debousa anyo hweag-esauk kwit, “Hiren an nele mundoho hole folug higitdoho dil lauk kamuhup halug, an nele wauk on demdoho welamuhup.

³²Ne, Allah airoho wereg wene anyo henoluk amuhup. Ne, henoluk amuhup fam, fiselaroho wundet apdoho henobahakuk.”

³³ Hweag-esasi mu, it anyo en, “A! Nit Abraham ombasi welahe angge re, at ap eke en apma mundoho sebeloho nenobaharuk eleg ma, Fiselaroho wundet apdoho henobahakuk, hweag-nesehen ai, keroho hweag-nesauk kahen?”

³⁴Hweag-utswa ma, Yesus en, “Amingming angge eke akni apma wereg lit, esanggo holoho neg duruk hag, hit siag duruk kahep halug, siag duk ale neg henepuk mu hahup.

³⁵Ap amingming angge anyo en akni obahet duruk anyo inim mundoho welaruhu fug. At amloho halug neg de akni inim mundoho wereg.

³⁶Allah amloho an neg en fiselaroho wundet apdoho henobahakuk halug, hit mundoho demdoho wundetdoho welamuhup.

³⁷Hit Abraham ombasi re, an nolukdeg famen, an nele henendama wa fug angge welahep ma, an mundoho nowaruhup ulug duruk kahep ma, hisihi.

³⁸An nakni ninim wereg lit, nil hauihik anyo hweag-hesauk kahi hag, hit henakni en hweag-hesasi ale holduhup anyo duruk kahep hisihi, ulug, dik-demdoho hweag-hisihi,” ulug, hweag-esasi.

³⁹Hweag-esasi mu, iren, “Nit nenomba ai re, Abraham at famen, uruk kahen!” Hweag-utswa ma, Yesus en, “Hit Abraham ombasi demdoho welalep man, at duruk katfag anyo hit higitdoho duruk kalep.[23]

⁴⁰Allah en, An airoho welahi, ulug hweag-nitsi anyo neg hweag-hesauk kahi famen, hit an binggi nowarukoho duruk kahep. At Abraham airoho mundoho debag fug famen,

⁴¹hit neg de, henakni eke duruk ale higitdoho neg duruk kahep ma hisihi,” ulug, hweag-esasi. Hweag-esasi mu, iren, “A! Nit hesangge ondoho on de fug. Nenakni misig de Allah neg.”

⁴²Hweag-utswa ma, at Yesus en, “Hit henakni Allah demdoho welalep man, an Allah weregman waharihikdeg, suma welahi mu, an ninim henenda hundig welalep. An nendan bolug waharihik fug. Ite, aren mon-nabik wahasi famen,

⁴³an den hweag-hesauk kahi ai, hit nunggwelug furebouk fug angge welahep? Hiren an nele wehep ha fug alereg en, furebouk fug angge welahep.

⁴⁴Hit su, henakni Iblis deg ma, at boruk ale anyo neg, Dul, boruk kahep. At o atam en bekit ketia hwili ap binggi enowatuk at wereg. Allah airoho wereg wene anyo at endama wereg eleg ma, Allah en uruk anyo at mundoho duruk fug. At seiale re eitogdoho uruk mu, seiale indip at wereg lit, at endaman wene hesangge wenggelug, seiale neg il lauk.

⁴⁵Allah airoho wereg, ulug, wene hweag-hesauk kahi ai fam, hit an nele demdoho boruk kahep fug.

⁴⁶Hit su eke en an siag duruk mu, neehep ha no iek! An den, Allah airoho wereg, ulug, wene hweag-hesauk kahi halug, hit nunggwelug, an nele demdoho boruk kahep fug?

⁴⁷It Allah omaliki ai re, Allah wene holduk. Ne, Allah omaliki welahep fug mu, an nele holduk kahep fug,” ulug, hweag-esasi.

⁴⁸Hweag-esasi mu, it Yahudi on en, “Eleg. Hat ap Samaria on mungguat hendama kwisi, uruk kahe anyo ai demdoho anyo a, eleg a?”

⁴⁹Hweag-utswa ma, Yesus en it hweag-esauk kwit, “Eleg. An nendama mungguat kwisi fug. An den Nakni leho foruk kahi famen, hiren sebeloho nobaharuk kahep halug, hweag-hisihi.

⁵⁰An leho fahat-damin ulug duruk kahi fug. At eke neg de leho nobaharuk mu, aren nawene bekitdoho bilingge folug fano hweag-nutuk.

⁵¹Hit an nele mundoho hole folug, dil lauk halug, waramuhup fug, ulug, dik demdoho hweag-hisihi,” ulug, hweag-esasi.

⁵²Hweag-esasi mu, it Yahudi on en, “Wene ehen ai fam mungguat hendama kwisi demdoho wereg ma heehe. At Abraham inim, Allah wene hweag-esauk katfag on nabi anyo inim, waratfag deg kweleg, haren uruk kwit, Hit an nele mundoho hole folug dil lauk halug, waramuhup fug, ehen ai.

⁵³Nit nenomba Abraham waratfag anyo at sebeleg, ne, hat along deg ma, ulug, ehen a? It ap Allah wene hweag-nesauk katfag on nabi anyo oho waratfag famen, hat sa mel, ulug, uruk kahen?” ulug, hein og-hausa.

⁵⁴Hein og-hausa ma, at Yesus en, “An nonggwareg leho fahat-dauk kale man de, ai re we alemaroho duruk kale. Hiren, Nenakni Allah, uruk kahep ai, an Nakni deg ma, aren neg leho nobaharuk.

⁵⁵Hit at ebe henapeleg famen, an neg de, at ebe noluk. At ebe napeleg ele man, hit seiale uruk kahep hag, an airoho neg seiale ele. At ebe noluk deg ma, at ele higitdoho duruk kahi.

⁵⁶At henomba Abraham anyo en an dil waruhuk ale neahuk ulug, ahayeg bebag ma, fobik neebag deg ahayeg at bebag,” ulug, hweag-esasi.

⁵⁷Hweag-esasi mu, it Yahudi on en, “A! Hat holuk wereg lit, tahun 50 en owan duruk kahen fug famen, at Abraham hil hauihin[24] ulug ehen a?”

⁵⁸Uswa ma, at Yesus en, “Abraham endag-am fug mu an neitog welahi, ulug, dik-demdoho hweag-hisihi”

⁵⁹ulug, hweag-esasi mu, it helep oko Yesus watul ulug duswa famen, at Yesus anyo, Allah obam wirigmen it inil ha fug men, wilibik lasi.