Read Ninia Yali YOHANES 9 Bible Online

YOHANES 9 - Ninia Yali bible

YOHANES 9

¹Ai en, fobik en at Yesus kwema lauk kwit, ap eke il siag angge endag-atsi anyo il hasi.

²Il hasireg, lauk mu, at ele wauk on en, “Guru ao! Ap su anyo, at siag disi fam il siag angge endag-atsi a, at akni isinga en siag duswa fam airoho endag-atsi a?”

³Ulug, hweag-utswa ma, at Yesus en, “Eleg. Aren siag disi fam inim, ne, akni isinga en siag duswa fam inim, il siag angge endag-atsi ai fug. Ite, at Allah duruk ale at fam fag amag ulug, il siag angge endag-atsi.

⁴O hup anggo yabuk duk fug alereg ma, o hup aikoho duruk famen, owan deg kweleg, at mon-nabik wahasi duruk ale o seleg fam folo-folo duruk kamuk.

⁵ An kwenangma suma wereg lit, ap homi mundoho selehap enepuk kahi,” ulug, hweag-esasi.

⁶Ai hweag-esasireg, at owasup kwenangma supdoho folug, sabelep debesireg, oko ap anyo ilmu are debesi.

⁷Are debesireg, “Ao! Hat hil ik yenggeleg Siloam etano omarik lakin.” ulug, hweag-itsi mu, omarik lasireg, il fano atlug wahasi. (Ik yenggeleg Siloam isi ai, nit nenele fam de, Mondotsi, uruk kahe.)

⁸Ap anyo wahasireg, at ori inim, it foma at atam ele heng-enepuk mu, hauk katswa anyo inim, uruk kwit, “Nimi su hwerieg lit, ele heng-nenepuk katsi anyo su eleg a?”

⁹Uruk kwit, it foman, “Anyo re su,” eheg, ne, it foman, “Eleg. At anyo orohole higit famen, amu on,” eheg, uswa ma, at anyo onggwareg en, “Hauk kahep anyo an,” ulug, hweag-esasi.

¹⁰Hweag-esasi mu, iren, “Ao! Hat hil keroho fano aha?”

¹¹ulug, hein og-hausa ma, aren, “Ap eke unuk Yesus en kwenang sabelep debelug, nilmu are nobahakeikdeg, ik yenggeleg Siloam etmano omarik lakin, hweag-nereheik ma, omarik lahi men fano aha.”

¹²Hweag-esasi mu, iren, “At ebe ke?” ulug, hein og-hausa. Hein og-hausa ma, aren, “An napeleg,” ulug, hweag-esasi.

¹³Hweag-esasi mu, it ap homi en ap il siag welatsi anyo hondoholug, it ap Farisi on enekit lausa.

¹⁴At Yesus en kwenang sabelep debelug ap il fano debesi ai, it Yahudi kel wat-dauk salim anyo fam disi.

¹⁵Kel wat-dauk salim disi mu, it ap Farisi on en ap anyo hein og-hauk kwit, “Hil keroho fano aha?” ekenim hein og-hausa ma, ap anyo en, “Kwenang sabelep debelug, nilmu are nobahakeik ma, ikma omarik lahi men, ketia nil fano aha,” ulug, hweag-esasi.

¹⁶Hweag-esasi mu, it ap Farisi on foman, “Ap su kel wat-dauk kahe salim ousa uruk kweleg, duruk mu, at Allah weregman wahasi fug.” Uruk kweleg, it foman neg de, “Ap siag duruk on en neneluk am on nenakol wereg on diroho duk alereg behep?” Uruk kwit, it suahal uruk kwit, minggit-dausa.

¹⁷Minggit-dausareg, at il siag deg latsi anyo ekenim hein og-hauk kwit, “Ao! At ap hat hil fano hiling-habeheik anyo abug nanggoho imihin?” Hein og-hausa ma, aren, “At Allah wene hweag-esauk on nabi anyo eke”

¹⁸ulug, hweag-esasi mu, it ap Yahudi on anyo en ap atam il siag welatsireg, fobik fano atsi anyo demdoho bouk fug angge welatswa. Demdoho bouk fug angge wereg lit, akni isinga wamag ulug hwi-enepswareg, wahausa ma, hein og-esauk kwit,

¹⁹“Hit henomalik il siag angge endag-atsi uruhup anyo, su ane? Ne, il siag angge endag-atsi angge re, ketia nangginoho il fano aha?”

²⁰ulug, hein og-esausa ma, akni isinga anyo en, “Eleg. Ap su, nit nenomalik. Ne, at il siag angge endag-atsi ai nenelukdeg famen,

²¹ketia re nangginoho il fano aha inim, ne, ap san at il fano hilinggisi inim, nit oho nenapeleg. At ap sauwe deg ma, aren hweag-hesowag ulug, hweag-emek,” ulug, hweag-esausa.

²²Hweag-esausa ai, it ap Yahudi on wenggeloho foruk kwit, “Ap en, Ap su, Allah en eneko unduhuk febag on Mesias anyo, ulug, fag-duruk halug, nit Yahudi somban uruk kahe obam en wilibi fohuk,” ulug, wenggeloho fousa ma, ap anyo akni isinga ap Yahudi on enakol en,

²³“Nit nenapeleg. At ap sauwe deg ma, hweag-emek,” ulug, hweag-esausa.

²⁴Airoho hweag-esausa ma, it Yahudi on en ap il siag angge welatsi anyo ekenim hwi-duswareg, wahasi mu, hweag-utuk kwit, “Ao! Ap anyo siag duruk on nit neneluk deg ma, Allah il hanim hele bekitdoho in.”

²⁵Ulug, hweag-utswa ma, aren, “At ap siag duruk on a, eleg ane? Ai an napeleg famen, atam nil siag angge welatihik. Ne, ketia neg de nil hauk kahi su neg de noluk,” ulug, hweag-esasi.

²⁶Hweag-esasi mu, iren, “At nanggin-habeheik? At nanggin-hapuk kwit, hil fano hiling-habeheik?”

²⁷ulug, hein og-hausa ma, aren, “Mundoho hweag-hisihi famen, holdul henerim boruk kwit, Ekenim hweag-nesakin, ai neg hweag-nutuk kahep ai, nunggwe ulug, hweag-nutuk kahep? Hit mel at ele wauk on amul ulug uruk kahep ane?”

²⁸Hweag-esasi mu, iren ap ele anyo mun siagdoho bulip-duruk kwit, “Hat at ele wauk on welahen heehe. Nit neg de, Musa wene wauk on welahe.

²⁹At Allah en Musa wene hweag-utuk katfag ai, nenoluk famen, ap su neg de, keman wahasi ai, nit nenapeleg,” ulug, hweag-utswa.

³⁰Hweag-utswa ma, aren, “Malik omare! Hit uruk kahep su re, yande-henebihi. Ap su keman wahasi henapeleg famen, an nil fano hiling-nabeheik ai!

³¹It ap siag duruk on enele Allah esanggo holduk fug ai nenoluk. Ap homi Allah anggilug bolug, at enda boruk ale anyo duruk halug, enele Allah esanggo holduk.

³²O walhilmen bekit ketia su hwili ap eke en ap il siag angge endag-atsi on eke il airoho fano hilingguruk mu ulug, mun holduhuk fug mu,

³³ap su, Allah en mondorik walep fug men, di deheg su deheg, abirangge mundoho duk fug alereg welalep,” ulug, hweag-esasi.

³⁴Hweag-esasi mu, iren onggo hweag-utuk kwit, “Hat mundoho heitog siag neg endag-atihindeg lit, ketia wene nit hweag-nesamin ulug duruk kahen a?” ulug, ebe muko it Yahudi somban uruk obam en dagma wilibi fousa.

³⁵Ap homi en, “Ap anyo wilibi fehesa,” ulug, uruk on at Yesus esanggo holsireg, ai en, fobik ebe hweahasireg, “Ao! At Ap endag-atsi anyo demdoho bolug, henda at obam dip-deberuk kahen a?”

³⁶Hweag-itsi mu, ap anyo en, “Nowe. An den demdoho bolug, at obam dip-debemin en at ebe ke? Hweag-nimin.”

³⁷Hweag-itsi mu, at Yesus en, “Hil mundoho neauihindeg, ninim nenele matuk kahe nebe su,” ulug, hweag-itsi.

³⁸Hweag-itsi mu, at anyo en, “Yehei nowe. An den hat demdoho bolug, nenda hobam dip-hobaharuk kahi,” ulug, apma sebe uruk kwit, mot-disi.

³⁹Mot-disi mu, at Yesus en, “It inil siag on halug, inil fano aheg, inil fano halug, inil siag aheg, duruk kwit, ayo wiroho en-henebuhuk en, an o kwenangma suma wambik waharihik,” ulug, hweag-esasi.

⁴⁰Hweag-esasi anyo, it Farisi on inim welatswa anyo enesanggo holswareg, “A! Nit oho ninil siag ulug behen a?” ulug, hein og-hausa.

⁴¹Hein og-hausa ma, at Yesus en, “Hit hinil siag deg welalep man, siag henobam dopnoreg lalep fug famen, hiren, Nit ninil fano, uruk kahep ma, siag henobam wereg,” ulug, hweag-esasi.