Read Ninia Yali KISAH RASUL-RASUL 1 Bible Online

KISAH RASUL-RASUL 1 - Ninia Yali bible

KISAH RASUL-RASUL 1

¹ Teofilus nare. At Yesus en di deheg su deheg, wene hweag-eseheg, dil lamin ulug wahasi anyo hwili en bekit at owan boholma lahamin ulug duruk kweleg, Allah Aheime endama wereg lit, at ori mon-enepuk on rasul welamag ulug eneko fesesi anyo wene melale fesesireg, boholma walug lahasi hwili duruk katsi anyo mundoho buku atam on anyo fam baldihik.

³At ebe waratsireg oluk inatlug, “It anyo en an demdoho noluk atihik enoluk amag,” ulug, ebe unug-eseheg, Allah apma fesehu wene anyo diroho ulug, hweag-eseheg, dil noruk kweleg, hup 40 en nohoruk katsi.

⁴ Nukoho eke fam at autsi inim kabogdeg[1] wereg lit, it hweag-esauk kwit, “At Yohanes en ap homi ikma belap-enepuk katsi famen, nukoho dorangge welatlug Allah Aheime henobam belabe henobahaik waruhu angge, hit o Yerusalem embeselug la fug. Ite, Nakni en, Og-hesahuk, ulug, abug hweag-hesebag on, an hweag-hesauihik ale anyo nangnoruruk kamek!” ulug, hweag-esasi.

⁶It anyo Yesus inim kabog-debelug wereg lit, “Nenowe ahwi! Atam en nit Israel nenap ap homi mundoho nenapma feselug welatuhuk anyo hag, ekenim nenapma feseik waruhun anyo su ane?” ulug, hein og-hausa.

⁷Hein og-hausa ma, at Yesus anyo en, “Di salim su salim duruk kamag ulug, Nakni Allah amu en wenggeloho febag ai, hit heneluk aruhu fug famen,

⁸ hit anyo Allah Aheime henobam wambik waharuk kwit, aren henomamneap henepuk halug, di o su o, o Yerusalem inim, o Yudea inim, o Samaria inim, di o su o ambiang kwe etma mundoho, an dil noruk mu, neauk katuhup wene anyo hweag-isil lauk kamuhup,” ulug, hweag-esasi.

⁹ Hweag-esasireg, enelukwe lahabeg kweleg, walug lahasi mu, inil famen hena anggelegma herag-atsi.

¹⁰At boholma laharuk kweleg, enelukwe lahaboho wereg ma, ap biren enesum kuron wandoho enepelegdeg ma, eneluluk inaik waharuk kwit,

¹¹“Hit Galilea henap su, yaho yei! Hit nunggwelug boholma henelukwe lahabeg lahep? At Yesus ebe anyo boholma walug laharuk mu hinil hehep ai hag, fobik airoho neg wambik waharuk mu hahup,” ulug, hweag-esausa.

¹²Hweag-esausa ma, it anyo Duk Zaitun famen sombandoho wambik wahausareg, 1 kilometer hag o Yerusalem kwik wahausa.

¹³ O Yerusalem sili hummu kuswareg, it wereg latswama ambolma etmano lahausa. It etma welatswa on anyo, Petrus Yohanes inim, Yakobus Andreas inim, Filipus Tomas inim, Bartolomeus Matius inim, Alfeus amloho Yakobus inim, Simon, “O suma nenonggwareg on neg welamuhuk,” ulug, beil noruk katsi on anyo inim, Yakobus amloho Yudas inim welatswa.

¹⁴It homi foma inim, Yesus isinga Maria inim, Yesus autsi ombolimmu on inim, etma seberoho wereg lit, enenda misig debelug, Allah hweag-ereheg neg duruk katswa.

¹⁵It etma wereg lit, fobik eke salim it ap homi at ele wauk on enebe 120 hag kabog-duswa ma, at Petrus enenggelegma inatsireg hweag-esauk kwit,

¹⁶“Nowesi, nautsi. At Yudas ninim Yesus ele oho folug, at eyabuk duruk kamag ulug unduhuk nenobahasi famen, at duhu wene Allah Aheime en, at Daud hweag-utuk kweleg ebag ale, Allah wene lisu balfag anyo dip-ukwag ulug, at Yudas en hweag-esasi mu, at Yesus ebe senetswa,” ulug, at Petrus en hweag-esasi. (

¹⁸ Ai, at Yudas siag disi fam uang onggo wasi anyo kwenang onggo fesi mu, etano alukwe belabeg wamburuk kwit, obahare dekik-duruk kwit, ilonggomangge on hilil-helal wilipsi.

¹⁹Hililoho wilipsi anyo, it Yerusalem on mundoho enesanggo holswa ma, kwenang onggo fesimu, unuk it enele fam Akeldama, ne, nit nenele fam Amep Wilipsimu soale folug uruk katswa.)

²⁰ At Petrus anyo en hweag-esasireg, eke hweag-esauk kwit, “O at welatsimu obalma ap eke welamuhup fug. We foluk amag, ulug, ebag. Ne, eke uruk kwit, At obalma ap eke duruk kamag ulug unduhuk fohup, ulug, buku Daud suni felaloho baleg anyo fam balfag ma,

²¹ ap eke Nenowe Yesus oluk apdoho unduhuk fesi ale il hasi halug, ninim wene ai fagdoho hweag-isil noruk kamuhuk en unduhuk foul. At Yohanes en Yesus ikma belabe fesi anyo hwili en[2] bekit at Yesus boholma walug lahasi hwili, it hundig-hundig Nenowe Yesus ninim noruk katuhuk anyo on halug, eke unduhuk foul,” ulug, at Petrus en hweag-esasi.

²³Hweag-esasi mu, it anyo en, “Unduhuk foul fano,” ulug, ap biren hweako feseswa. Ap ebe misig famen, unuk henahan, eke Yusuf, eke Barsabas, unuk fobik soaleg on Yustus anyo hweako feheg, ne, ap ebe eke Matias hweako feheg, duswa.

²⁴Duswareg, somban uruk kwit, “Nenakni Allah yei. Di ap homi su ap homi enenda boruk ale mun holukdeg ma, at Yudas ninim Allah eyabuk dil lauk kamuhup ulug, eneko unduhuk nenobaharihin famen, embeselug at duruk ale dil lauk kwit waratsi mu, it ap biren eneko fesehe su, at obalma haren sa unduhuk fohuk berihin anyo hweag-nesakin,” ulug,

²⁶Allah hweag-utswareg, “Ap su unduhuk foul a, at su unduhuk foul a?” ulug, enenuk eneg atuk angge lisu baloho folug, at Matias unuk baleg anyo wasi mu, it ap nanggoloben mon-enepsi on rasul anyo inim welamag ulug, at Matias eneko unduhuk fousa.