Read Ninia Yali KISAH RASUL-RASUL 10 Bible Online

KISAH RASUL-RASUL 10 - Ninia Yali bible

KISAH RASUL-RASUL 10

¹Ap eke o Kaisarea on ap weim wene melalduk ahun Italia on, ap sehen foroho on pasukan esan seratus enowe, unuk Kornelius welatsi.

²Ap anyo eyog indip kwe wereg on inim at Allah akol boruk kwit, Allah wene melaleg furebelug duruk katsi. Ap anyo enda fano en, it Yahudi on enengge eleg halug angge yohwan-enebeheg, ne, Allah unuk mot-deheg, duruk katsi mu,

³nukoho misiham, o hupmu jam 3 aik lauk kweleg, a og-hauk kwit boholma on Allah en yonggo mon-enepuk on malaikat eke akit kwisireg, “Kornelius ahwi!” hweag-itsi mu,

⁴at Kornelius en youk lasireg akol en il fu hauk kwit, “Nakni e! Hat nunggwangge hweag-nitmin ulug uruk kahen?” Hein og-hasi mu, “Eleg. Ap homi enengge eleg halug, hangge yohwan-enebeheg, Allah hweag-ereheg, duruk kahen ai Allah en il fu hobahasi mu, enda hobam ebereg lit wereg.

⁵Hobam ebereg ma, ketia ap eke unuk Simon, unuk fobik soaleg on Petrus anyo, ap Simon wam ahap funggulduk on obam ik laut aegma wirig anyo, inim etma wereg ma, herarukwag ulug, hautsi yonggo o Yope mon-enebin!” ulug, a fam hweag-utuk mu hasi.

⁶

⁷Ne, at malaikat anyo en at hweag-utlug lauk kweleg, at Kornelius amingming angge biren inim, at aut ap pasukan Allah akol boruk on inim, “Wamag,” ulug, hwi-enepsireg wahausa ma,

⁸a fam hweag-utuk mu hasi wene mundoho bilinggoho hweag-esasireg, o Yope mon-enepsi.

⁹It mon-enepsi on anyo hup misig noholug hubet lauk kwit, o Yope horogma aik lausa ma, at Petrus anyo o nukoho jam 12 fam Allah hweag-itmin ulug helep o wirigmu emberimmu etma lahasi.

¹⁰Etman Allah hweag-utuk kwit, siburu obok disi mu, “Nunggwangge na?” ulug, siburu weratuk kweleg, a og-hauk hag hasi.

¹¹A og-hauk kwit, bohol heale folug sum anggwe on, unggut foma-foma seneko, eyog enggik wereg angge mel, eleg angge kwenangkwe bol-duruk angge mel, suwe bohol kwe daruruk angge mel mundoho sum doaleg anyo fam belabik waharuk mu hasi.

¹²

¹³Hasi mu, “Petrus ahwi! Inatlug su eke waroho nakin,” ulug, ele uruk mu holsi.

¹⁴Esanggo holsireg, “A! eleg, Nakni! An saliog angge nauk kahi fug mu, nerim.”

¹⁵Hweag-itsi mu, ai en ekenim hweag-utuk kwit, “Eleg. At Allah en we hesangge nauk kamag ulug febag ma, haren, Saliog angge, ulug, embesouk fug,”

¹⁶ulug, henahanam hweag-itsireg, sum anyo lisoho walug boholma laharuk mu hasi.

¹⁷Ne, at Petrus a og-hasireg, “Nangginoho hweag-nereheik?” ulug, endama apeleg atlug wereg ma, it Kornelius en mon-enepsi on anyo wahausareg, “Simon obam ke?” ulug, hein og-enebil sok fam aik wahausareg,

¹⁸“Yaho yei! Ap bohon unuk Simon, unuk fobik soaleg on Petrus, suma wahasireg, wereg a, eleg a?”

¹⁹Ulug, hein og-enepswa ma, at Petrus a og-hasi on, “Nunggwelug hweag-nereheik?” ulug, endama owan wenggelduk kwit wereg ma, at Allah Aheime en hweag-utuk kwit, “Ap henahan[12] hera-habil wahesareg dagma wereg ma,

²⁰hat inatlug, wambimihindeg, ap su an den mon-enebik wahi mu, hendama sug-sagdoho bouk fug. Hinim folo-folo lakin.”

²¹Hweag-itsi mu, it eneluluk wambisireg, “Hit hera-nabil wahep ai re an deg ma, nangginukwag ulug, an hera-nabil wahep?” ulug, hein og-enepsi.

²²Hein og-enepsi mu, it anyo en, “Eleg. At Kornelius ap pasukan enowe anyo en mon-nenebik wahasi. At anyo enda wenggeleg, Allah akol boruk mu, halug, it Yahudi on mundoho anggilug boruk mu, Allah en malaikat eke boholman yonggo mon-enebik wahasi on eke en at Kornelius hweag-utuk kwit, Ap Petrus hobam waruhureg wene hweag-hutuk mu hesanggo holuhun en yonggo herarik lowag ulug mon-enebin, ulug, hweag-itsi mu, mon-nenebik wahasi mu, hera-habil wahe, nowe,” ulug, hweag-utswa.

²³Hweag-utswa ma, “Ai halug, kwik manik,” ulug, hweag-esasi mu, kuswareg inim nohousa. Noholug, hubet at Petrus en, “Lakohon,” hweag-esasireg at ori o Yope on inim, it wahausa on anyo inim, lausa.

²⁴Lausareg, kwema hup misig noholug, o Kaisarea kwik lausa. At Kornelius anyo at owesi autsi inim, ombalisi inim, it Petrus mel waharuk kam nolug, kabog-debelug, kahal-enesug mu,

²⁵at Petrus oluluk kwik wahasi mu, at Kornelius anyo apma sebe isireg mot-disi mu,

²⁶at Petrus anyo en, “An inim we ap on deg ma, inamin!” ulug, enggik seneko unduhuk fesi.

²⁷Unduhuk fesireg, inim enele matil kwik lausareg, at Petrus anyo en, ap homi humdoho kabogdeg ma esasireg, hweag-esauk kwit,

²⁸“Nit Yahudi on hit dagma on anyo ninim sebereheg, henekit laheg, Duruk ale ousa, uruk kahe anyo heneluk famen, at Allah en, Hat it ap homi foma siag on halug, seberuhuk fug boruk kahen ai bouk fug, ulug, komo-napsi mu,

²⁹an hera-nabil lausa ma, Nerim, uk fug angge, bekit henekit wahi. It hera-nabil lausa on su nunggwelug mon-enepihin? Hat hweag-nimin!” ulug, hein og-hasi.

³⁰Hein og-hasi mu, at Kornelius anyo en, “Eleg. Atam malog noholug owa anyo fam, hupmu jam 3 fam higitdeg kweleg, olma Allah hweag-utuk mu,[13] ap eke asum kuron wandeg on an naluluk inaik wahasireg,

³¹Kornelius ahwi! Hat Allah hweag-erehen anyo Allah en mundoho holeheg, ne, hat ap homi enengge eleg on hat hangge og-esauk kahen anyo Allah il fu hobahakeg, debelug, hobam ebereg lit wereg ma,

³²ap Simon unuk fobik soaleg on Petrus, o Yope wereg ma, wamag ulug, herarik lowag ulug, yonggo mon-enebin. At anyo en ap Simon wam ahap funggulduk on anyo obam ik laut aegma wirig on anyo inim wereg, ulug,

³³hweag-nitsi mu, hat wamag ulug hayonggo mon-enepihik mu nea wahen, nowe. Hat wahen ma, ketia howe en, Airoho hweag-esakiyug, ulug, hweag-hitsi anyo mundoho hweag-nesamihin en, Allah il hanim kabog-dehe su,” ulug, hweag-itsi.

³⁴ Hweag-itsi mu, at Petrus anyo en, “An demdoho hweag-hesa,” hweag-esasireg, “At Allah en, ap eke enda, ne, eke erim, boruk fug ai, demdoho behi.

³⁵Nit di ap homi su ap homi mundoho en at ele nenekol boruk kwit, fano on neg duruk nesalug, at Allah en fanoroho og-nenepuk.

³⁶Di ap homi su ap homi mundoho enowe Tuhan anyo Yesus Kristus deg ma, at disi fam at Allah ninim sebe-nenebukwag ulug at Wene Fano Wene it Yahudi enoluk amag ulug mondorik wahasi anyo heneluk.

³⁷At Yohanes ikma belap-enepmin ulug, wene anyo hweag-isil lasi hwili en, o Galilea en o Yudea di obam su obam along dil lauk mu, ap homi inil hauk katswa anyo oho, hit henelukdeg.

³⁸At Allah en Yesus Nazaret on Allah Aheime obam belabe feik wambisireg, eneko unduhuk feheg, omamne og-ereheg, debesi fam fano debeseheg, it ap homi Iblis apma sebeleg on fanoe feseheg, Allah inim wereg lit, dil lauk katsi anyo heneluk.

³⁹Ne, at ap Yahudi enobam etma inim, o Yerusalem inim, ninil hanim enebil lauk katsi ninil hauk katuhuk ale hweag-hesauk kahe. At Yesus anyo e salib fam dopnoroho ware fousa ma, waratsi famen,

⁴⁰hup biren noholug, Allah en oluk apdoho unduhuk fesireg ebe ninil howag ulug unug-nesa waharuk katsi.

⁴¹It ap homi hesangge on mundoho inil howag ulug unug-esasi fug. Ite, at oluk atlug, nit atam awene hweag-esauk kamag ulug eneko nenobahasi anyo, ninim wereg lit, siburu nenggeg, ik nenggeg, disi on ai neg ninil howag ulug unug-nesa waharuk katsi.

⁴²Oluk apdoho unduhuk fesi mu, at Yesus anyo en, It eneluk wereg on inim, waratswa on inim, ayo wiroho en-enebukwag ulug, Allah en eneko unduhuk nobahasi on Yesus, ulug, furoho fagdoho hweag-isil noruk kamek, ulug, hweag-nesasi.

⁴³It Allah wene hweag-esauk katfag on nabi omano humdoho en at abug neg fag-duruk kwit, At demdoho bolug henenda obam dip-deberuk halug, at unuk fam henesiag elehapdoho henobahaku, ulug, hweag-esauk katfag,” ulug, at Petrus anyo en hweag-esasi.

⁴⁴At Petrus anyo owan airoho hweag-esauk kweleg, it holswa on anyo mundoho enobam Allah Aheime belabik wahasi.

⁴⁵Allah Aheime enobam belabik waharuk kwit, Allah en it dagma on anyo inim, Allah Aheime inim higitdoho og-esauk mu, inil halug, it ap Yahudi on demdoho bousa on o Yope en Petrus inim wahausa on omano en, “Yehei u,” ulug, yanderuswa.

⁴⁶It enele amu on nik on fam eheg, Allah mot-deheg, duruk mu enesanggo hole folug, “Yehei u,” ulug, yanderuswa. Yanderuswareg, at Petrus anyo en hweag-esauk kwit,

⁴⁷“Allah en Aheime nit og-nesasi anyo hag it og-eseheik ma, ikma belap-enepul ai, siag behep?”

⁴⁸Hweag-esasireg, “Eleg. Yesus Kristus unuk yiko ikma belap-enebiek!” ulug, hweag-esasi mu, iren, “Ninim nukoho dorangge welatlug lahun,” ulug, alele wausa.