Read Ninia Yali KISAH RASUL-RASUL 11 Bible Online

KISAH RASUL-RASUL 11 - Ninia Yali bible

KISAH RASUL-RASUL 11

¹It Yesus en eneko mon-enepsi on rasul inim, enori o Yudea etma on inim, it anyo en, “It ap dagma on anyo inim, Allah wene wauk,” uruk on enesanggo holswareg,

²at Petrus o Yerusalem lasi mu, it Yahudi on foman at Petrus hein wauk kwit,

³“Hat nunggwelug it enahap baleg eleg on enekit lauihindeg, hinim siburu seberoho nauk katihin?” ulug, inim suahal uswa.

⁴Suahal uswa ma, at Petrus anyo en wene indip bilinggoho hweag-esasi.

⁵Hweag-esauk kwit, “An o sili eke Yope etma Allah hweag-utuk kwit wereg ma, na og-hauk hag hauihik. Hauk kwit, sum anggwe on boholman unggut foma-foma seneko an naluluk belabik waharuk mu, nil hauihik.

⁶Nil furoho kumu hauk men, eyog enggik wereg angge mel, eleg angge bol-duruk on mel, suwe bohol kwe daruruk on mel, di on su on mundoho yohwareg ma, hauihik.

⁷Hauihik mu, ele hweag-nutuk kwit, Petrus ahwi! Inatlug, su eke waroho nakin! ulug, ele hweag-nutuk mu, nesanggo holdihik.

⁸Hweag-nutuk mu, holdihik famen, an den, A! eleg, Nakni! An saliog angge nauk kahi fug mu nerim,

⁹hweag-itihik men, at boholman fobik ele hweag-nutuk kwit, At Allah en hesangge nauk kamag ulug isi anyo haren, Saliog angge namin nerim, uk fug.

¹⁰Ulug, ele henahanam airoho hweag-nitsireg, di angge su angge anyo boholma lisoho walug lahasi.

¹¹Walug laharuk kweleg, an[14] olma wereg ma, ap henahan an hera-nabil o Kaisarea en mon-enebik wahasi on dagma wereg kweleg,

¹²Allah Aheime en hweag-nutuk kwit, Henda sug-sagdoho boruk kwit duk fug. Hat hinim folo-folo lag, hweag-nitsi mu, nori folfaligen su ninim lauhukdeg ap Kornelius obam kuruhuk.

¹³Kwik lauk men, at anyo en wene bilinggoho hweag-nesauk kwit, Ap boholma yonggo noruk on malaikat eke an nobam kwisireg wereg ma nil hauihik. Hauihik mu, hweag-nutuk kwit, Ap Simon, unuk fobik soaleg on Petrus wamag ulug heraril o Yope mon-enebin. Mon-enepuk on hweag-irik lauk halug, waruhureg,

¹⁴hat homaliki hinim henahap wendat-henebukwag ulug wene hweag-hesa waruhu, ulug, malaikat en hweag-itsi wene anyo an bilinggoho hweag-nitsi.

¹⁵Hweag-nitsi mu, hweag-esamin ulug duruk kweleg, atam Allah Aheime nit nenobam belabik wambisi anyo hag, it inim enobam belabik wambisi mu,

¹⁶ Nenowe Tuhan Yesus en uruk kwit, At Yohanes en ikma belap-enepuk katsi famen, fobik an den Allah Aheime henobam belap-hesa waruhuk, isi wene, nenda ebetihik.

¹⁷Nit nenowe Tuhan Yesus Kristus demdoho bolug, nenenda at obam dip-deberuhuk mu, we og-nesasi anyo hag, it anyo og-esasi esalug, Allah en duhuk wenggelfag halug, deg kweleg, Og-esauk ousa, ulug, keroho ele behep?” ulug, Petrus en hweag-esasi.

¹⁸Hweag-esauk mu, enesanggo hole folug, enele eleg angge bok atswareg, “Ai halug, Allah en it dagma on inim it siag duruk anyo enenda wenggele folug embeseruk halug, eneluk welamuhup, ulug, wenggeloho febag hehe,” ulug, Allah unuk mot-duswa.

¹⁹ At Stefanus helep fam watswa ma, it foma enowatul ulug muko del-fol isil lauk mu, it longgo uswareg o yatma etma da kwil, ya kwil, lauk kwit, o Fenisia inim, o Siprus inim, o Antiokhia inim, it Yahudi on neg wene holukwag ulug wene hweag-isil lauk katswa famen

²⁰it foma o Siprus on inim, o Kirene on inim, o Antiokhia kuswareg, it ap dagma on[15] inim holukwag ulug, nenowe Tuhan Yesus awene Fano Wene hweag-esauk katswa.

²¹Anyo Tuhan omamne fam hweag-esausa ma, ap homi humdoho enenda wenggele folug demdoho bousareg, nenakni Yesus apma sebe uswa.

²²It Yesus omaliki o Yerusalem kabogdeg on anyo en duruk ale holswareg, ap Barnabas o Antiokhia mondorik wahausa.

²³Ne, at Barnabas fano ahun deg ma, endaman demdoho boruk kwit, ik am heg am duk fug angge, Allah Aheime endama hoporoho wereg ma, mondorik wahausa ma, wahasireg, at Allah en fano debeseruk mu il hasireg, ahayeg boruk kwit, “Hit henenda hambukdoho wereg lit, nenowe Tuhan obam dip-deberuk kamek,” ulug, komo-enepsi. Komo-enepsi mu, inim wereg lit, eke dopno ik kweheg, duruk kwit, Yesus omaliki hum atswa.

²⁵Ai en, fobik, at Barnabas anyo en at Saulus hweahamin ulug o Tarsus lasireg,

²⁶hweaho folug hondoholug o Antiokhia wahasi. Hondoholug wahasireg, Yesus omaliki inim kabog-deheg, ap homi humdoho wene hweag-eseheg, duruk kweleg, tahun misig disi. It Yesus wene wausa on, Kristus omaliki ulug, “Kristen,” uruk ai, atam it o Antiokhia on en soal-enepswa.

²⁷Etma hweag-esauk kweleg, it Allah wene nik on hweag-esauk on nabi foman o Yerusalem en o Antiokhia wahausa.

²⁸ Wahausareg, ap eke unuk Agabus inatlug, “Di obam su obam siburu obok hum aruhu,” ulug, Allah Aheime en hweag-utuk kweleg, hweag-esasi. (Ne, ai isi ai, at Klaudius it ap homi o Roma on enowe unuk bogdeg wereg kweleg, dip-isi.)

²⁹“Di obam su obam siburu obok hum aruhu,” isi halug, it wene wausa on anyo enenda wenggelduk kwit, “Nit nenemu domog, nenengge wereg halug, kabog-debelug nenori Yesus omaliki o Yudea wereg on anyo enobahet mondoruhuk,” ulug,

³⁰kabog-debelug, Barnabas Saulus inim mon-enepswa ma, it walug Yesus omaliki o Yerusalem fahat-enesug wereg on og-esa lausa.