Read Ninia Yali KISAH RASUL-RASUL 12 Bible Online

KISAH RASUL-RASUL 12 - Ninia Yali bible

KISAH RASUL-RASUL 12

¹Og-esa lausareg, etma wereg ma, ap Raja Herodes[16] anyo en it Yesus omaliki foma mundoho enowatmin ulug sen-enebil lauk kwit,

²at Yohanes owe Yakobus anyo, “Karog yaron fam wariek,” ulug, hweag-esasi mu, watswa ma waratsi.

³Waratsi mu, it Yahudi enahayeg humon boruk mu esasireg, at Petrus oho enggik het-dukwag ulug, mon-enepsi. It Yahudi en roti fituk angge ragi eleg kweleg, soni esetuk mu disi.

⁴ Mon-enepsi mu, senerik lausareg, enenggik hetdoho feseruk mu kwelabe folug, domba Paskah soni osoho on nalug, enamegman bilingguhuk, boruk kwit, it ap tentara esan ohwan anyo enebe ohwan heg neg kahaleg lamag ulug eneko unduhuk fesesi.

⁵At Petrus anyo enenggik hetdoho feserukmu anyo foroho wereg kweleg, it Yesus omaliki en at fahet Allah hweag-ereheg neg duruk katswa.

⁶At Herodes en sono bilingguhuk ulug, at Petrus o hup anggo bosie manggen sabu enggik foma-foma hetdoho nohoruk kweleg, it ap tentara on ebe foma-foma kahaleg lit wereg kweleg, eke it biren sokolma kahaleg wereg kweleg,

⁷boholma on Allah ayonggo mon-enepuk on malaikat eke, it ebereg eleg ma, it weregma etma, inaik wahasireg, seleg esahe ambogbag hag fisaho fesireg, Petrus ummu elel hauk kwit, “Petrus ao. Folo-folo inamin,” ulug, owan hweag-utuk kweleg, sabu bosie manggen on anyo horoho wambisi.

⁸Horoho wambisi mu, at malaikat anyo en, “Hombahaluk uluhun wat-dalug, hasepatu wan-dakin,” hweag-itsi mu, wan-dasi. Wan-dasi mu, “Hasum dagkwe on wan-damihindeg ninim laul en nombolim ma,”

⁹hweag-itsi mu, wilibik lasireg ombolim lasi. Ne, at malaikat anyo en demdoho hweag-utuk kweleg famen, at Petrus endaman, “We na og-hauk kahi ane,” ulug, ombolim wilibik lausa.

¹⁰Atam kahalegma lausareg, ai en fobik eke kahalegma lausareg, bekit wilibik lausareg, o silimu kuruk on sok bosie manggen on laregma etano, enam aik lausa ma, amu en hut-atsi. Amu en hut-atsi mu, wilibik lausareg, kobokwe humon fam aik lausareg, at malaikat anyo etano en embeselug lasi.

¹¹Lasi mu, at Petrus anyo enda hambuk atsireg, “Yehei,” ulug, “It Yahudi on inim, Herodes anyo inim, ai nabuhup bousa anyo owan napuk eleg kweleg, at Allah en yonggo malaikat eke mondorik waha ma, anyo en nahap wendat-nabeheik, demdoho hihi,” ulug, furebesi.

¹²Airoho furebesireg, at Yohanes unuk fobik soaleg on Markus anyo isinga Maria obam ap homi humdoho kabog-debelug, Allah hweag-utuk kwit, wereg ma, enekit lasi.

¹³Lasireg, sok dag fil lareg en enggik fam kweng-disi mu, at hwele enamingming angge unuk Rode anyo en, “Sa wahareg, kweng-duruk?” ulug, ha lasi.

¹⁴Ha lasireg, Petrus ele uruk mu, hihi, ulug, ahayeg en, sok husuk fug angge, “Petrus dagma wereg,” ulug, buroho hweag-esa kwisi.

¹⁵Hweag-esa kwisi mu, it anyo en, “Hat wenenebo dehendeg uruk kahen?” ulug, hweag-utswa ma, at Rode anyo en, “Eleg. Dik-demdoho kweng-dik waha ma holihi,” ulug, hweag-eseheg neg disi mu, “Ai halug, Allah ayonggo malaikat eke at hwalduk kamag ulug mondorik waha ma, holehen ane,” ulug, hweag-utswa.

¹⁶Hweag-utuk kweleg, at Petrus anyo en sok kweng-duruk kwit neg wereg ale en, sok hususwareg, at ebe inil halug, “Yehei u,” ulug, yanderuswa.

¹⁷Yanderuswa ma, at anyo en enggik en, “Bok welamek!” ulug, Allah en sabu hetdoho feseruk men delsi ale anyo bilinggoho hweag-esasi. Hweag-esasireg, “At Yakobus inim, nenori foma inim wene ai hweag-esa lakiek,” ulug, hweag-esasireg, it embeselug o amumu lasi.

¹⁸Hubet o sekan disi mu, it tentara on omano en, “Petrus nanggin aha?” ulug, heraril-beraril lauk men,

¹⁹at Herodes en, “Furoho hera-diek,” hweag-esasi mu, hera-duswa famen, ebe eleg en we wahausa ma, at Herodes en autsi foma eke hweag-esauk kwit, “Ebe ke? ulug, hein og-esaluhup men, Mun eleg ma, hehe, ulug, uruk halug, it kahaleg latswa on ai mundoho binggi enowatluhup,” ulug, hweag-esasi mu, binggi enowatswa. Enowatswa ma, at Herodes anyo o Yudea en o Kaisarea wahasireg etma welatsi.

²⁰At Herodes anyo etma wereg lit, ahumkwe het-disi mu, it o Tirus on inim, Sidon on inim bet-enepsireg, inim minggirig wereg ma, it anyo at inim seberul ulug, kabog-dik wahausa. Kabog-dik wahausareg, at Herodes hweag-omag ulug, hun unuk Blastus, Herodes angge hwalduk ahun anyo fam, enele abiroho limiruruk kwit, “Nenobahet hakni diroho hweag-imin,” ulug, hweag-utswa. Hweag-utswa ma, “Yu o, hweag-itmin,” isi mu, “Nit o biren anyo nenesiburu hat hobam hunduko nauk kahe angge deg ma, minggirig welamul fug. Seberul ai fano,” ulug, hweag-utswa.

²¹Hweag-utswa ma, “O ai salim kabog-duhuk,” hweag-esasi anyo salim higit atsi mu, at Herodes en asum along on wan-dasireg, wene katukdoho uruk mu huraik lasireg, wene humdoho hweag-esasi.

²²Hweag-esauk mu, it ap homi anyo en, “We ap en uruk hag uruk fug. Ite, Allah en uruk hag uruk su hakiek!” ulug, “Yehei u!” ulug, yanderuswa.

²³Yanderuswa ma, aren Allah leho fesi fug mu, boholma nenakni Allah en ayonggo malaikat eke fetagdoho wahasireg watsi. Watsi mu, aroal en ilonggomangge mundoho nauk kwit waratsi.

²⁴Waratsi mu, Allah wene anyo humdoho saha uruk kwit, ap homi humdoho demdoho bolug, wauk katswa.

²⁵Ne, it Barnabas Saulus inim it Yerusalem on enobahet fousa angge walug og-esa lausareg, at Yohanes unuk fobik soaleg on Markus anyo hondoholug, o Yerusalem en enembol somban wahausa.[17]