Read Ninia Yali KISAH RASUL-RASUL 13 Bible Online

KISAH RASUL-RASUL 13 - Ninia Yali bible

KISAH RASUL-RASUL 13

¹O Antiokhia etma it Yesus omaliki kabog-duruk on foman Allah wene nik on hweag-eseheg, it foman Allah wene komoroho hweag-eseheg, duruk katswa on ai enunuk eke Barnabas, eke Simeon unuk fobik soaleg on Singahun anyo inim, eke Lukius obam Kirene on anyo inim, eke at enowe Raja Herodes[18] en kulsi on Menahem anyo inim, Saulus inim, etma welatswa.

²It anyo enambilik hweang hag wereg lit, nenowe Tuhan mot-duruk kweleg, at Allah Aheime en, it hweag-esauk kwit, “It Barnabas Saulus inim neyabuk duruk kamag ulug eneyonggo ferihik angge re, eneko unduhuk feseiyek,” ulug, hweag-esasi.

³Hweag-esasi mu, it anyo enambilik hweang hag wereg lit, enunggulmu enenggik sebeloho Allah hweag-utswareg mon-enepswa.

⁴Allah Aheime en mon-enepsi mu, it Barnabas Saulus inim o Seleukia wambuswareg, etman o Siprus ik anggenma hukmu etma nindig-amuhuk ulug kapal fam kulug,

⁵nindig-atswareg, o Salamis etma kwik lausa. Etma it Yahudi enap somban uruk obam domog Allah wene hweag-isil lauk katswa. Hweag-isil lauk mu, at Yohanes unuk eke Markus anyo inim let-enebil noruk katsi.

⁶Ik yenggeleg bul hukdegma lausa lausa ambiangma o Pafos kwik lausa. Kwik lausareg, ap Yahudi on ap hwal on eke unuk Bar Yesus lal-enepuk kwit enekol wereg on deheg, “Su Allah wene,” ulug, seiale wene hweag-eseheg, duruk katsi on anyo welatsi.

⁷At anyo ombali enda wereg on o ik yenggeleg bul hukdegma etma enowe at ele holduk on gubernur unuk Sergius Paulus anyo en Barnabas Saulus inim Allah wene hweag-nesowag ulug, eneyonggo fesi famen,

⁸at lal-enepuk on Bar Yesus anyo, unuk it Yunani enele fam Elimas anyo en endama kwelapuk kwit, “Yesus wene demdoho bouk fug,” ulug, enowe hweag-itsi.

⁹Hweag-itsi mu, at Saulus unuk fobik soaleg on Paulus anyo en Allah Aheime endama hoporoho kwisi mu, Elimas ebe il kumururuk kwit,

¹⁰“Hat Iblis amloho deg ma, siag duruk kwit, Fano Wene herim boruk kahen on de hat. Seiale humdoho uruk kahen ma, lal-enepmin ulug neg duruk kahen on de hat. Allah en wene demdoho on neg uruk on ahamdoho seiale uruk katmin, bolug, uruk kahen a?

¹¹Ketia at Tuhan Allah en hobam siahap-hapuk halug, hil bug atlug o seleg hil hamihin fug,” ulug, owan hweag-utuk kweleg, il bug atsireg mum atsi. Il mum atsireg, enggik senerukwag ulug douk-fouk angge duruk katsi.

¹²Enowe gubernur anyo en il bug atsi anyo hasireg, “Enowe Yesus wene hweag-nesauk su demdoho hihi,” bolug, “Yehei u,” ulug, yanderisi.

¹³Ai debelug, at Paulus ori inim o Pafos embeselug kapal fam kulug ik foma fil o propinsi Pamfilia nindig-atswa. O Pamfilia nindig-atswareg o Perga kwik lausareg etma wereg lit, at Yohanes unuk eke Markus anyo en it Paulus Barnabas anyo embeselug, o Yerusalem ambol somban lasi.

¹⁴O Perga etman lausa o Pisidia sili eke Antiokhia kwik lausareg, it Yahudi kel wat-dauk kwit Allah mot-duruk salim, Yahudi enap somban uruk obam huraik kuswa.

¹⁵Huraik kuswa ma, it somban uruk obam hwalduk enap anyo en at Allah awene Melaleg Wene anyo inim, it Allah wene hweag-esauk katfag on nabi en balfag wene anyo inim, lisu baleg anyo kumu heheg hweag-esausareg, “Nit nenenda aho ware nenobaharuk on eke hweag-esela, boruk kahep halug, hweag-nesowag ulug, nenori ai hein og-esa lag,” ulug, hein og-esausa ma,

¹⁶at Paulus anyo inatsireg enggik en, “Bok welamek,” hweag-esasi. Hweag-esasireg, “Hit Israel henap inim, Allah henekol boruk kahep on inim, henesanggo holduk kamek, nori.”

¹⁷ Hweag-esasireg, “At Allah en nit Israel nenap nenombasi momal-enepfagdeg nenunggul unuk hum amag ulug, o Mesir etma bohon hag wereg ma, hwal-enepuk katfagdeg, omamne humon fam o etman og-eneplug wilibik watfag.

¹⁸ O leimu ap homi elegma etma wereg lit, 40 tahun duruk kwit, enobabut siag dil laheg duruk kweleg, enda sakoreg fam[19] fahat-enesug welatfag.

¹⁹ It ap homi o Kanaan on enunggul unuk sabiren elehapdoho feselug, it enobalma nenombasi at omaliki anyo hwalduk kamag ulug enanggwenang yohwan-enepuk[20] kweleg,

²⁰ 450 tahun debag. Duruk katfag ma, ai en, enele katukdoho matuk kamag ulug, hakim eke on eneko unduhuk feheg, eke on eneko unduhuk feheg, duruk katfagdeg, hwili fam fobik at Samuel Allah wene hweag-esauk kamag ulug unduhuk febag.

²¹ Unduhuk febag ma, ai en, iren, raja ele holduk kamag ulug eke unduhuk nenobahain, ulug, heng-duruk kwit, hweag-etfag ma, at Allah en Kis amloho Saul unggul unuk Benyamin on anyo unduhuk febag ma, unduhuk kweleg, 40 tahun debag.

²² Ai en, at anyo sebele folug, at obalma, At Daud Isai amloho an nenda hundig deg ma, an nenda boruk ale neg duruk karuhu hihi, ulug, ebagdeg, Daud raja welamag ulug unduhuk febag.

²³At Allah en, At Daud en enderuhu on omba eke Israel enap enahap wendat-enebuhu on welaruhu, ulug, abug fagdoho ebag anyo higitdoho at Yesus neg de endag-atsi.

²⁴ Ne, at owan waruhuk ulug duruk kweleg, at Yohanes atam wahasireg, it Israel enap mundoho hweag-esauk kwit, Hit henesiag henenda wenggele folug embeseruk halug, ikma belap-henepmin, ulug, hweag-esauk katsi.

²⁵ Hweag-esasireg, ai en, at duruk katsi anyo mundoho ambiangma o fotog uk hag atsi mu, An sa boruk kahep? At wamag ulug nangnoreg lahep anyo, an fug. At an nombolim waruhu anyo ap humon deg ma, an den asepatu fisela-dihi ha fug alereg, hweag-esasi,” ulug, at Paulus en hweag-esasi.

²⁶Hweag-esasireg, “Nori, nit Abraham ombasi ninim, hit dagma on Allah fahet henekol boruk kahep on ninim, hit ninim nenahap wendat-nenebukwag ulug, nenobahet wene su mondorik wahasi.

²⁷Nenahap wendat-nenebukwag ulug mondorik wahasi famen, it Yerusalem on enowesi inim anyo en, at ebe furebouk fug angge welatswa. Hundig-hundig nit Yahudi kel wat-dauk kwit Allah mot-duruk salim, it Allah wene hweag-esauk katfag on nabi enewene balfag anyo kumu halug hweag-esauk katswa famen, indip furebouk fug angge welatswa ma, iren Yesus watswa fam, at Allah wene ebag anyo higitdoho dip-isi.

²⁸ At nunggwangge disi fam watul? ulug, indip heraruswa famen, eleg ale en, Haren ware fein! ulug, at Pilatus hweag-utswa.

²⁹ Hweag-utswareg, At anyo airoho debehup, ulug, hweag-esauk katfag Allah wene lisu baleg anyo higitdoho deberuk kwit, e salib fam dopnoroho ware fousa. Dopnoroho ware fousa man, ebe loloho owikmu kwelabe fousa.

³⁰Owikmu kwelabe fousa famen, at Allah en waratlug laukmen oluk apdoho unduhuk fesi.

³¹ Unduhuk fesi mu, it at inim Galilea en o Yerusalem lausa anyo ebe inil howag ulug unug-esauk kwit, hup humdoho nohosi. Ne, it inil hausa anyo en ketia Israel enap fagdoho hweag-isil lauk.

³² Ne, Allah en, Yoho su fam endag-habihi mu, An namloho re hat, ulug, Mazmur suni baleg bireneg on fam lisu balfag higitdoho, Allah en Yesus waratlug laukmen oluk apdoho unduhuk fesi ai fam, at Allah en nenombasi abug fagdoho hweag-esebag anyo enombasi nit nenobahet dip-isi mu, Fano Wene su hweag-hesauk kahe.

³³

³⁴ At Allah en, Fobik mundoho filik aruhu fug, ulug, waratlug laukmen oluk apdoho unduhuk fesi ai, aren uruk kwit, An fano hobahakuk, ulug, wene amu on mundoho demdoho bohun on, Daud hweag-itihik anyo, hit ai henobahakuk, ulug, hweag-etfag.

³⁵ Ne, eke Hamingming angge fano neg duruk kahi su, nebe waratlug filik amag ulug, fotog-neahun fug ulug, Mazmur suni baleg fam hweag-etfag.

³⁶Ne, at Allah en Daud dukwag ulug wenggeloho melalfag anyo, at welatfag ai salim debebagdeg waratfag. Waratfag ma, ombasi waratfag on inim misigmu salfag ma, ebe filik atfag famen,

³⁷oluk apdoho unduhuk fesi anyo neg de filik atsi fug deg, oluk wereg.

³⁸Filik atsi fug deg, oluk wereg ma, hit siag duruk kahep anyo, at Yesus disi fam Allah en elehapdoho henobahaku ale heneluk amluhup en hweag-hisihi, nori.

³⁹Allah Wene Melaleg Musa en hweag-hesebag anyo fam wundetdoho henobahauk fug alereg. Ite, Yesus demdoho bolug, at obam dip-deberuk fam neg de, Allah en wundetdoho henobahaku, ulug, hweag-hesauk kahi.

⁴⁰ It Allah wene hweag-esauk katfag on nabi anyo uruk kwit, Hit wereg kweleg, an duruk kahi on eke bilinggoho hweag-hesauk kahi famen, demdoho bouk fug angge wereg lit, hit Allah siahapdoho foruk kahep ma, Yehei, boruk kwit, mundoho waramuhup, ulug, ebag anyo, hit airoho henebuk no,[21] henenda kahaleg lamek!” ulug, at Paulus anyo en hweag-esasi.

⁴¹

⁴²Hweag-esasi mu, it Paulus Barnabas inim, Yahudi enap somban uruk obam etman wilibik lauk kweleg, “Wene hweag-nesehep anyo foma fobik kel wat-dauk salim atlug on fam ekenim hweag-nesahup,” ulug, hweag-esausa ma, wilipswa.

⁴³Yahudi somban uruk obam etman wilipuk kwit, it Yahudi inim, it dagma on Yahudi wene wausa on anyo inim, Paulus Barnabas inim lausareg, “Allah en henelaheg en og-hesauk anyo, henenda furebelug wauk kamek,” ulug, Paulus Barnabas inim en komo-enepswa.

⁴⁴Fobik kel wat-dauk kwit, Allah mot-duruk salim eke fam, o bumbuk etma on anyo ap homi humdoho Allah wene holdul ulug kabog-dik wahausa.

⁴⁵Kabog-dik waharuk mu, it Yahudi on en inil esausareg, enelok en at Paulus hweag-esauk katsi anyo sebeloho feheg, enggali wareheg, duswa man,

⁴⁶it Paulus Barnabas enekol eleg angge wereg lit, “Allah wene hit dam hweag-hesahuk ulug duruhuk famen, hit wene waul nenerim ehep fam, Neneluk welamuhuk fug, waramuhuk, ulug, momal-dehep ma, hit embeselug, it dagma on anyo hweag-esa lauk mu, nesahup.

⁴⁷ Nenakni Allah en hweag-nesauk kwit, It ap homi di o su o ambiangkwe wereg on enahap wendat-enebuhu wene hweag-isil noruk kamuhup, ulug, mon-henebihi. It dagma on enenda seleg enebil lauk kamuhup ulug, hweako henobahaki, ulug, melal-nenepsi fam, it dagma on anyo hweag-esa lauk mu, nesahup,” ulug, hweag-esasi.

⁴⁸Hweag-esasi mu, it dagma on anyo enesanggo hole folug enahayeg humon boruk kwit, “Allah wene alongdeg,” ulug, leho fousa. It eneluk mundoho welamuhup ulug momaloho fesebag anyo en wene su fam enendaman demdoho bousa.

⁴⁹Wene enendaman demdoho bousareg, Tuhan Yesus awene anyo o etma mundoho saha isi famen,

⁵⁰it Yahudi on anyo en, it homi enowesi leho on Yahudi wene wausa on omano inim, it o sili etma on enowesi inim, “Paulus Barnabas inim enowatul,” ulug, enendama kwelabil lausa ma, o etman muko wilibi feseswa.

⁵¹ Muko wilibi feseswa ma, it anyo en, “Henemu,” ulug, eneyog fam ololo horoho embeselug o Ikonium lausa.

⁵²Lausa ma, o Antiokhia etma Yesus awene wausa on anyo Allah Aheime enendama hoporoho kwisi mu, enahayeg humon bousa.