Read Ninia Yali KISAH RASUL-RASUL 14 Bible Online

KISAH RASUL-RASUL 14 - Ninia Yali bible

KISAH RASUL-RASUL 14

¹O Ikonium etma, o Antiokhia duswa ale higitdoho duswa. It Paulus Barnabas inim ap Yahudi somban uruk obam kuswareg wene ebe furoho hweag-esausa fam ap homi humdoho Yahudi on inim, Yunani on inim, Yesus demdoho bousa.

²Demdoho bousa ma, it Yahudi foma, “Wene nenerim,” ulug, wausa fug on anyo en it Yesus omaliki inim minggitul ulug, it dagma on anyo enenda kahalik lausa ma,

³at Paulus Barnabas inim etma anunuroho wereg lit, enenda hambukdoho enekol eleg angge wereg lit, Tuhan Yesus awene hweag-esausa. Ne, hweag-esauk kwit, Allah enelaheg en fanoap enepuk wene demdoho boukwag ulug, Paulus Barnabas inim en Allah omamne og-esasi fam, it anyo en enekol boruk on deheg, duk fug alereg on deheg, duruk katswa.

⁴It o bumbuk etma wereg on inim minggirig wereg lit, it foman Yahudi enebil aheg, it foman Yesus en mon-enepsi on rasul enebil aheg, duswa.

⁵Duruk kwit, it dagma on anyo inim, it ap Yahudi on inim, it enowesi anyo inim en Paulus Barnabas inim siahap-enepuk kwit, helep fam fuk-heg enowatul ulug duswa.

⁶Enowatul ulug duruk mu, enesanggo hole folug, longgo ulug, o Likaonia lausareg o sili Listra inim, o sili eke Derbe inim, di obam su obam etma ekema kweheg, dil lausareg,

⁷Wene Fano Wene etma hweag-isil lauk katswa.

⁸O Listra etma ap eke isinga ahummen endag-atuk kwit, elenggen siagdoho endag-atsi on kwe la fug angge eyog sireg lit neg wereg on anyo,

⁹at Paulus wene hweag-esauk mu esanggo holduk kwit, wereg ma, at Paulus en il fu hauk kwit, ap su, “Fano ale e,” ulug, enda Allah demdoho boruk kwit, obam dip-deberuk mu hasireg,

¹⁰“Heyog biloho inamin!” ulug, ele hum on fam hweag-itsi mu, at anyo en feiyaloho inatlug lauk katsi.

¹¹Inatlug, lauk kweleg, it ap homi humdoho en at Paulus disi anyo inil halug, it Likaonia enele fam, “It mungguat dewa ap homi hag atlug nenesa wambik wahesa,” ulug, enemitmit duswa.

¹²Enemitmit duswareg at Barnabas unuk Zeus soaleheg, at Paulus de wene hweag-esasi halug, unuk Hermes soaleheg, duswa.

¹³Duswa ma, mungguat Dewa Zeus obam wirig o sili dag fil welatsi on, hwalduk katsi ahun anyo inim it ap homi etma on inim en, “It ap su enobahet o sili kwe kurukmu etano sapi waroho og-esaul,” ulug, sapi inim owil angge inim walug wahausareg, og-esaul ulug duruk mu,

¹⁴it Barnabas Paulus inim enesanggo holswareg, enerimdoho enesum dagkwe on dilipdoho folug, buroho ap humdoho kabogdegma enenggelegma kwik lausareg,

¹⁵ “Yaho yei! Nit hit hag, ap homi on deg ma, hit nunggwelug airoho duruk kahep? Hit di deheg, su deheg alemaroho duruk kahep su embeselug, at Allah oluk wereg on anyo, bohol inim, kwenang inim, ik laut yenggeleg inim, di angge su angge mundoho wal-debag on anyo, awene wahup en, ulug, Fano Wene hweag-hesaul ulug wahe famen, duruk kahep.

¹⁶O endam en di ap homi su ap homi enendaman bolug dil lauk kweleg, Allah en embeseruk katsi famen,

¹⁷at anyo ebe enegdeg ma hahup ulug, henepsi ai fug. Henelaheg en fanoap henepuk kwit, di angge su angge wirik amag ulug, boholman osit og-heseheg, henahayeg howag ulug siburu di salim su salim higitdoho og-heseheg, duruk,” ulug, at Paulus Barnabas inim enele omamne fam hweag-esausa.

¹⁸Hweag-esausa man, deg kweleg, sapi enobahet watul ulug duswa man, “Watluhup fug,” ulug, enele omamne fam hweag-esausa ma, lisoho embeseswa.

¹⁹Embeseswa ma, it ap Yahudi on Antiokhia Pisidia on en inim, o Ikonium inim etman wahausareg, it inim amag ulug, ap homi enendama kwelap-enepswa ma, it ap homi anyo en Paulus helep fam fuk-heheg watswareg, “Mundoho waraha,” ulug, enggik lisoho o sili dag fikit wilibi fousa.

²⁰Wilibi fousa ma, it Yesus ele wausa on anyo en at ebe bul wereg kweleg, hwililipdoho maserebelug wereg ma, inatsireg o silimu kwik lasi. Kwisireg noholug, hubet Barnabas inim o Derbe lausa.

²¹It Fano Wene hweag-esausa fam, ap homi etma on humdoho Yesus omaliki atswa. Ai debeselug, it lausa kwe en enambol somban waharuk kwit, o Listra kweheg, Ikonium kweheg, dil o Antiokhia Pisidia kwik wahausa.

²²O etma da kweheg, ya kweheg, dil lauk kwit, “At Allah apma kwik lahuk anyo re, anggin-fanggin nenobam nenobaharuk kweleg, kwik lahuk mu, hit Yesus demdoho boruhup on, henenda elek duk fug angge hambuk debelug welamek,” ulug, it enenda aho ware feseil waharuk katswa.

²³Hweag-isil waharuk kwit, Yesus omaliki kabogdeg on jemaat domog, hwal-enepuk kamag ulug, eneko unduhuk feselug, it enambilik hweang hag debelug, wereg lit, “Nenowe Tuhan o. It ap su hat demdoho bolug, enenda hobam dip-hobahausa ma, dil lauk kweleg, furoho fahat-enesug lamin,” ulug, enobahet somban yihig feselug, wahausa.

²⁴Dil wahausareg, o Pisidia kwe en enambol somban o Pamfilia kwik wahausa.

²⁵O Perga etma wene hweag-esausareg, o Atalia kwik wahausareg,

²⁶etman kapal fam kulug, o Antiokhia nindig-aik wahausa. “Allah eyabuk dik lowag ulug Allah hinim lahup,” ulug, mon-enepswa ma, dil lausareg mun o fotogdoho debelug, mon-enepswama etmano wahausa.

²⁷O Antiokhia kwik wahausareg, it Yesus omaliki anyo kabog-debeselug, at Allah en debeseil lauk kweleg dil lauk katswa anyo inim, it dagma on nenowe Yesus wene demdoho boukwag ulug sok husoho fesesi anyo inim, wene bilinggoho hweag-esausareg,

²⁸it o etma Yesus ele wausa on anyo inim wereg lit, nukoho anunuroho welatswa.