Read Ninia Yali KISAH RASUL-RASUL 15 Bible Online

KISAH RASUL-RASUL 15 - Ninia Yali bible

KISAH RASUL-RASUL 15

¹ Etma wereg ma, it Yudea on foma o Antiokhia wahausareg, enori Yesus omaliki hweag-esauk kwit, “At Musa en, Ap enahap baluhup, hweag-nesebag anyo higitdoho neg bal-henepuk fug halug, henahap wendat-henebuhu fug,” ulug, hweag-esauk katswa ma,

²it Paulus Barnabas inim, it anyo inim suahal humon ulug, minggirig hag wereg ma, it inim, it Antiokhia on foma anyo inim, “Hit Yerusalem lahupdeg, it Yesus en mon-enepsi on rasul anyo inim, Yesus omaliki hwal-enepuk on anyo inim, wene su fahet henele marik lakiek,” ulug, hweag-esausa.

³Hweag-esausareg, it Yesus omaliki etma on en mon-enepswa on o Fenisia inim, o Samaria inim da kweheg, ya kweheg, dil lauk kwit, it dagma on en enenda ahamdoho Allah obam dip-debousa ale bilinggoho hweag-isil lauk mu, it Yesus omaliki anyo en enendaman enahayeg humon atsi.

⁴O Yerusalem kwik lausareg, it Yesus omaliki inim, it Yesus mon-enepsi on rasul inim, it Yesus omaliki hwal-enepuk on inim en dang-enepswa ma, “At Allah ninim diroho duruhuk, airoho duruhuk,” ulug, bilinggoho hweag-esausa.

⁵Bilinggoho hweag-esausa man, it Farisi on wene demdoho bousa on foma anyo en inatswareg, “Eleg. It enahap bale folug, Allah Wene Melaleg Musa en balfag anyo higitdoho neg duruk kamuhup en hweag-esahup fano,” uswa.

⁶Uswa ma, it Yesus en mon-enepsi on rasul inim, it Yesus omaliki hwal-enepuk on inim, wene ai on fahet nenele matul ulug kabog-duswa.

⁷ Wene anyo anunuroho wenggelswareg, at Petrus inatsireg, “Nori, o endam at Allah en it dagma on Fano Wene hole folug demdoho bohup en, hweag-isil lauk kamag ulug, henesahalimen eneko unduhuk nobahasi on de an, henelukdeg.

⁸ At Allah en ap homi enenda mundoho olukdeg ma, nit Allah Aheime og-nesasi hag, it dagma on oho re at omalikiap enepsi boukwag ulug, it oho Allah Aheime og-esasi.

⁹It og-esa fug angge, nit neg og-nesasi re fug. Ite, nit misig on deg ma, enenda demdoho bousa fam enesiag elehapdoho fesesi.

¹⁰Aireg ma, nit inim, it nenombasi inim, nenobam hohougdoho nenobahausa ma, anggin humon hauk katuhuk anyo, hiren ketia nunggwelug it enobam hohougdoho fesoul mu, Allah en anggindoho debeseruk mu, hahuk, ulug, abut baldul ulug, uruk kahep?

¹¹Eleg. Nenowe Yesus nenelaheg en fanoap nenepuk mu, nenahap wendat-nenepuk hag, it airoho enahap wendat-enepuk, ulug, demdoho boruk kahe,” ulug, hweag-esasi.

¹²Hweag-esasi mu, it ap kabog-duswa on anyo mundoho enele eleg angge we welatswa ma, it Barnabas Paulus inim it dagma on enenggelegma Allah inim en, eneluk amag ulug enekol boruk on deheg, duk fug alereg on deheg, duswa wene bilinggoho hweag-esauk mu, enesanggo holswa.

¹³It hweag-esalug, hweriatuk kweleg, at Yakobus en inatsireg, hweag-esauk kwit, “Yaho, nori. Bok! bok! An den eke ik,” ulug, hweag-esasireg,

¹⁴“Atam at Allah en it dagma on anyo at unuk leho foruk kamag ulug, enelaheg en hweako at omaliki welamag ulug momal-enepsi wene at Petrus en bilinggoho hweag-neseheik.

¹⁵Wene ai, Allah wene hweag-esauk katfag on nabi en lisu balfag anyo higitdoho hweag-nesauk.

¹⁶ It ap homi dagma on An nomaliki, hweag-esauihik ai, ap homi foma mundoho inim enakni an neg mug-naplug lauk kamag ulug, an fobik waruhukdeg at Daud welatsimu meiyaloho wambisi anyo obalma buhundoho wuruhuk en,

¹⁸heneluk amag ulug, o endam en hweag-hesauihik anyo an henakni Tuhan en hweag-hisihi, ebag wene lisu balfag.

¹⁹Airoho lisu balfag ma, an den diroho boruk kahi. It dagma on enenda wenggele folug, Allah apma sebe uruk anyo, di deheg su deheg, duruk kwit, enenda firi fesehuk fug.

²⁰ We di angge su angge kembu fahet foruk on ousa ulug na fug. Hambena duk fug. Mep wilibig eleg angge wareg on na fug. Mep na fug, ulug, surat lisu bale folug og-esahuk fano, boruk kahi.

²¹Ne, Musa wene melaleg anyo o endam et di o su o it Yahudi enap somban uruk obam domog, kel wat-dauk kwit, Allah mot-duruk salim fam kumu heheg neg hweag-esauk ale enelukdeg ma, lisu airoho baloho folug og-esahuk fano behi,” ulug, Yakobus en hweag-esasi.

²²Hweag-esasi mu, it Yesus en mon-enepsi on rasul anyo inim, it Yesus omaliki inim, it hwal-enepuk on mundoho inim en, “Paulus Barnabas inim, nit suma on inim eneko, o Antiokhia mon-enepul,” ulug, Yesus omaliki enowesi eke Yudas unuk fobik soaleg on Barnabas inim, ap Silas inim en-enepswa.

²³Mon-enepul ulug, surat lisu balduk kwit, “Nenori, nit henori Yesus omaliki, aren eneko mon-nenepsi on rasul inim, Yesus omaliki hwal-enepuk kahe on inim en, nenori hit dagma on Yesus omalikiap henepsi on o Antiokhia on inim, o Siria on inim, o Kilikia on inim etma welahep on dang-henebehe.

²⁴Nit nenesanggo holduk kwit, it foma niron henekit wahausareg, hinim wereg lit, hweag-hesauk ai re, niren mon-enebik waharuhuk fug famen, henekit wahausareg, Diroho diyug, ulug, hweag-hesauk mu henenda nong-hong uruk ale holduhukdeg,

²⁵ketia neg de, niren kabog-dehereg nit ninim welahe on ap foma henekit wamag ulug eneko fesehereg, nenori nenenda hundig on mel, Paulus Barnabas mel, mon-enebik wahe ai.

²⁶It ai re enenda Tuhan Yesus Kristus mundoho og-utswareg, Waramuhuk fano, ulug, enenda hambukdeg lit, wene hweag-isil noruk enap.

²⁷Yudas Silas mel mon-enebik wahe anyo lisu balehe su higitdoho enele fam inim bilinggoho hweag-hesa waharuk ai.

²⁸Allah Aheime ninim en anggin on eke henobam henobahakuk fug, we duk on halug neg duruk kamuhup boruhuk ale su.

²⁹We di angge su angge kembu fahet foruk on mel, mep mel, mep wilibig eleg angge wareg on mel, na fug. Hambena duk fug. Hiren ai on ahaye duruk halug, mun fano welamuhup. Mundoho hweag-hesehe, nori,” ulug, lisu baloho folug, mon-enepswa.

³⁰Mon-enepswa ma, o Antiokhia kwik wahausareg, it Yesus omaliki anyo kabog-debeselug surat baleg ai og-esausa.

³¹Surat baleg anyo og-esausa ma, it anyo en kumu hausareg enenda aho waroho bilingguswareg, enahayeg humon atsi.

³²It Yudas Silas inim Allah wene hweag-esauk on welatswa ma, it enori Yesus omaliki etma on di wene su wene humdoho hweag-esauk kwit, enenda aho ware feseheg, enenda wirik-ap debeseheg, enepuk katswa.

³³Silas Yudas inim o etma anunuroho welatswareg, enambol somban it mon-enepswama etmano lakoho ma, dangdoho monde feseruk kwit, “Yesus omaliki omano en airoho dang-henepswa, ulug, hweag-esa lakiek,” ulug, mon-enepswa ma, enobam lausa. [

³⁴Mon-enepswa famen, at Silas neg de, “Bok atmin,” bolug, etma bok atsi.]

³⁵It Paulus Barnabas inim, ap foma humdoho inim o Antiokhia wereg lit, nenowe Tuhan Yesus awene fagdoho hweag-eseheg, komoroho hweag-eseheg, duruk katswa.

³⁶Etma welatswareg, ai en fobik at Paulus en, “Di o su o Tuhan Yesus wene hweag-isil lauk katuhuk kwe etmano Yesus omaliki atswa on omano, Nangginoho wereg ma esahuk e? ulug, kumu isil lahuk,” ulug, at Barnabas hweag-itsi.

³⁷Hweag-itsi mu, at Barnabas en, “At Yohanes unuk fobik soaleg on Markus anyo ninim lahuk,” hweag-itsi men,

³⁸ at Paulus en ele omamneroho uruk kwit, “Nit o Pamfilia wereg lit, wene hweag-esa laul uruhuk famen, at, An nerim, ulug, nenobahalug longgo isi mu, ketia ninim lahuk fug,” ulug, hweag-itsi.

³⁹Hweag-itsi mu, it suahal humdoho ulug, enemu minggit-atswareg, at Barnabas anyo en Markus walug, kapal fam kulug, o Siprus nindig-atsi.

⁴⁰Ne, at Paulus anyo neg de Silas momalsi mu, it Yesus omaliki en, “Nenakni Allah fahat-henesug laruhu,” ulug, hweag-esausa ma, lausareg,

⁴¹o propinsi Siria inim, o propinsi Kilikia inim, di obam su obam etma da kweheg ya kweheg dil lauk kwit, at Paulus anyo en, it Yesus omaliki kabogdeg on etma enenda hambukdoho welamag ulug hweag-isil lauk katsi.