Read Ninia Yali KISAH RASUL-RASUL 16 Bible Online

KISAH RASUL-RASUL 16 - Ninia Yali bible

KISAH RASUL-RASUL 16

¹Hweag-isil lauk kwit, o Derbe, Listra kwik lasireg, ap eke Yesus ele wasi on unuk Timotius il hasi. At isinga, Yahudi on famen, Yesus ele demdoho besi on, ne, at akni Yunani on.

²It Yesus omaliki o Listra, Ikonium on inim en Timotius anyo ap fano hausa ma,

³at Paulus en, “Timotius ninim lauk kamuhuk,” besireg, it Yahudi o etma wereg on mundoho en Timotius akni ap Yunani on enelukdeg ma, at Paulus en Timotius ahap balsi.

⁴It Paulus, Timotius inim, di o su o, o sili domog lauk kwit, it eneko mon-enepsi on rasul inim, Yesus omaliki hwal-enepuk on inim en o Yerusalem wereg lit, wene lebegdoho matswa on anyo, it duruk kamag ulug hweag-isil lauk katswa.

⁵Airoho hweag-isil lauk katswa fam, it Yesus omaliki atswa on etmano enenda hambuk atswa ma, hupmu hubet eke dopno eheg, eke dopno eheg, duruk kwit, Yesus omaliki hum atuk katswa.

⁶Ai en, at Allah Aheime en, “O propinsi Asia etma hweag-esa la fug,” ulug, hweag-esasi mu, o Frigia en, o Galatia anyo lausareg,

⁷o Misia kobokwe handohwalma aik lausareg, o Bitinia kwik laul ulug duswa famen, at Yesus aheime en kwik lowag ulug hweag-esasi fug mu,

⁸o Misia kuswareg,[22] bekit o Troas kwik lausa.

⁹O Troas kwik lausareg, etma nohoruk kwit, at Paulus en a og-hauk hag hauk men, ap o Makedonia on eke unduhuk wereg lit, “Ahwi, nit let-nenepmihin en o Makedonia suma nindig-aik ma,” ulug, ele abiroho wol-duruk mu, hasi.

¹⁰Hasireg, niren de, “Allah en nit Fano Wene ap homi Makedonia on hweag-esa lowag ulug neneyonggo feheik ma, hehe,” ulug, folo-folo nindig-aik laul ulug fik-fouk duruhuk.

¹¹O Troas en kapal fam kuruhukdeg, bekit o Samotrake nindig-atuhukdeg, hubet o Neapolis aik lauhuk.

¹²Aik lauhukdeg, etman de o propinsi Makedonia[23] en o sili atam wutswama Filipi etma, it ap o Roma on en enapma fahat-enesug wereg lit, wirig latswama etmano kwik lauhukdeg, etma wereg lit, hup biren hag nohoruhuk.

¹³Hup biren hag noholug, it Yahudi kel wat-dauk kwit Allah mot-duruk salim o silimen wilibik lauhukdeg, “Ik aegma Allah hweag-utukmu etma wereg,” bolug lauhukdeg, it homi neg kabogdeg lit, wereg ma, ninim huratuhukdeg, wene hweag-esauhuk.

¹⁴Hweag-esauhuk anyo holswa on eke hwe Tiatira on sum bolu wareg on neg hundutuk on, unuk Lidia anyo en, Allah unuk mot-duruk mu, Paulus en hweag-itsi wene wowag ulug, Tuhan en enda wenggel-itsi.

¹⁵Wenggel-itsi fam wene wasi mu, hwe anyo at obam wereg on inim ikma belap-enepsi. Ikma belap-enepsi mu, at hwe anyo en, “Hiren an Yesus demdoho boruk mu neehep halug de, an nobam ninim welamuhup en manik,” ulug, ele abiroho isi mu, “Yu o,” ulug, obam kwik lauhuk.

¹⁶Nukoho eke fam Allah hweag-utukmu laul ulug lauk mu, hwele ap enamingming angge eke mungguat endama kwisi mu, “Fobik airoho aruhu, diroho aruhu,” ulug, wene eneluk apdoho hweag-esauk katsi fam uang humdoho aknisi anyo og-esauk katsi on anyo kwema ninim sal-kwal uruhuk.

¹⁷Sal-kwal ulug, at hwele anyo en, “At Allah leho wereg anyo amingming angge henahap wendat-henebuhu wene hweag-hesa waharuk su esakiek!” ulug, ngaril, Paulus ninim nenombolim mug-neneplug wahasi.

¹⁸Airoho neg ngaril lauk kweleg, hup humdoho nohosi mu, at Paulus erim besireg, alukwe endenoho hwele anyo fu hauk kwit, mungguat anyo hweag-utuk kwit, “Yesus Kristus unuk fam wilibik lag!” ulug, owan hweag-utuk kweleg, mungguat anyo lisoho wilipsi.

¹⁹Wilipsi mu, hwele anyo aknisi en, “Uang og-nesauk kam on famen, eleg aha e,” bousareg, at Paulus, Silas inim sen-eneplug, lit-enebil, wene bilinggurukmu enowesi eneluluk feseik lausa.

²⁰It enowesi pemerintah Roma on enekit feseik lausareg, “It ap Yahudi on su, nit ap o Roma on it duruk ale nit duruk kahe fug on hweag-nesauk mu, o suma nong-hong esauk mu esehe,”

²²ulug, hweag-esausareg, it ap homi humdoho kabogdeg on inim enele hum atuk kwit, enowatul ulug duswa ma, enowesi anyo en Paulus, Silas enesum dilip-delapdoho hwik-esalug, “Lal-fisog enowariek,” hweag-esausa ma,

²³lal-fisog fuk-fagdoho enowatlug, lisoho o sabu hetdoho kwelap-enepukmu kwelabe feseswareg, ap kahal-enesug on anyo, “Furoho kahal-enesug nu,” ulug, komo-duswa.

²⁴Hweag-utswa on hole folug, o ambe baleg ilonggoma kwelap-enepsireg, eneyog e humon fam sebeloho het-enepsi.

²⁵Kwelabe fesesimu etma wereg kweleg, hup andundu, it foma sabu hetdeg on omano enesanggo holeg kweleg, it Paulus, Silas inim, Allah hweag-ereheg, Allah unuk mot-duruk kwit suni eheg, duruk katswa.

²⁶Airoho duruk kweleg, o meik humon lang-fang hauk kwit, o wirig enenggik hetdoho kwelap-enepukmu olma o anduli mundoho elek duruk kwit, sok huseheg, bosie manggen sabu hetdeg on anyo loloho wambeheg, disi.

²⁷At ap enenggik hetdeg on kahal-enesug welatsi ahun anyo en youk hemeg uruk kwit, inatsireg enenggik hetdoho kwelap-enepukmu sok hut-ail lasi mu il hasireg, “It sabu hetdeg on longgo ehesa hihi,” bolug, karog yaron lisoho wat-damin ulug disi famen,

²⁸at Paulus en, “Ahwi, wat-da fug! Nit mundoho welahe,” ulug, ele humon fam hweag-itsi.

²⁹Hweag-itsi mu, at sabu hetdeg on kahal-enesug on anyo en, “Lampu walug manik!” isireg, akol en owag elek duruk kwit, buroho it Paulus, Silas inim eneluluk ying-aik lasi.

³⁰Ying-aik lasireg, inim og-eneplug dagma wilibi fesesireg, “Yaho yei, naknisi! An nahap wendat-nabukwag ulug nangginmin?”

³¹Hein og-esasi mu, it anyo en, “Eleg. Henda nenowe Yesus obam dip-debelug demdoho boruk halug, hat inim, hat hahainelekwe inim henahap wendat-henebuhu,” ulug, hweag-utswa.

³²Hweag-utswareg, at inim, it ap homi at obam wereg on inim, Allah wene hweag-eseheg, duswa.

³³Airoho hweag-esausa ma, o hup anggo ai salim, it anyo og-eneplug, enahap bal-enepsi on ho-enepsi mu, at inim, at ahainelekwe inim, abirangge ikma belap-enepswa.

³⁴Ikma belap-enepswa ma, og-eneplug obam kulug, siburu og-esasireg at inim, at ahainelekwe inim, Allah demdoho bolug, enenda obam dip-debousa ma, enahayeg humon hausa.

³⁵O sekan disi mu, it ap homi Filipi on enowesi Roma on en, ap polisi mon-enepuk kwit, “Ap enenggik hetdeg on kahal-enesug on anyo en ap biren enenggik hetdeg on etano sabu fiselaroho wilibi fesoukwag ulug, hweag-irik lakiek.”

³⁶Ulug, ap kahal-enesug on anyo hweag-irik wahausa ma, ap anyo en Paulus hweag-utuk kwit, “Nowesi en, Sabu fiselaroho wilibi feseiyug! ulug, hweag-nesehesa ma, wilibik laluhupdeg fanoroho lakiyug,” ulug, hweag-itsi.

³⁷Hweag-itsi mu, at Paulus en it polisi anyo hweag-esauk kwit, “Eleg, nit o Roma on famen, indip heraruk fug angge ap inil hanim lal-fisog nenowatlug, enenggik hetdoho kwelap-enepukmu kwelap-nenepswa ma, nit ketia ling-long angge wilip-amlusa, ulug, ehesa a? Eleg! Nenerim. It enonggwareg wamlusareg nit wilip-nenebik wamag.”

³⁸Ulug, hweag-esasi anyo, it polisi anyo en it Filipi on enowesi hweag-esa lausa ma enesanggo hole folug, “Paulus Silas inim Roma on famen, debeseruhuk mu, yehei e!” uswareg, enekol atswa.

³⁹Enekol atswareg, it enebe enekit lausareg, “Yehei, nori. Nenapeleg fam airoho siahap-henepuhuk,” uswareg, og-eneplug enenggik hetdoho kwelap-enepukmen wiliplug, “O suma welamuhup fug. Lakiek,” ulug, hweag-esausa ma,

⁴⁰etman wilibik lausareg, hwe Lidia obam kwik lausa. Kwik lausareg, etma enori Yesus omaliki foma inim seberuswareg, enenda aho ware feselug lausa.