Read Ninia Yali KISAH RASUL-RASUL 17 Bible Online

KISAH RASUL-RASUL 17 - Ninia Yali bible

KISAH RASUL-RASUL 17

¹At Paulus inim Silas inim en lausareg, o Amfipolis inim, Apolonia inim, da kweheg ya kweheg, dil, o Tesalonika kwik lausa. Kwik lausareg, Yahudi enap somban uruk obam etma wereg ma,

²at Paulus it Yahudi somban uruk obam lalug duruk katsi aleroho, enekit kwik lasireg, kel wat-dauk salim hari Sabat enggik henahanam inim duruk kwit, Allah wene lisu baleg wereg anyo fam wene hweag-eseheg, iren at hweag-ereheg, duruk katswa.

³At Paulus anyo it hweag-esauk kwit, “At Allah en eneko unduhuk febag on Kristus anyo ouk nenek debelug, waratlug laukmen oluk inaruhu wenggeleg wereg ma, dip-ukwag ulug oluk inatsi,” ulug, wene onggo hweag-om fug aleroho furoho hweag-esauk katsireg, “At Allah en eneko unduhuk febag on nenahap wendatuk on Kristus anyo re Yesus, ulug, fagdoho hweag-hesauk kahi,” ulug, hweag-esasi.

⁴Hweag-esasi mu, it foman demdoho bousareg, it inim, it Yunani on Allah enekol boruk on foma inim, homi enowesi leho on inim, Paulus, Silas inim seberuswa.

⁵Inim seberuswa man, it ap Yahudi on enerim enepswareg, it ap siag on ko-ko ale duruk on anyo humdoho kabog-debeselug, melal-enepuk kwit, “Hit o suma henele saling-kwaling uruk kamek,” ulug, melal-enepswa. Melal-enepswa on higitdoho duruk kwit, Paulus, Silas inim, og-eneplug hummu feseik laul ulug, hera-enebil, at Yason obam falik kuswa.

⁶It Paulus Silas inim enebe eleg en, at Yason inim, ori Yesus omaliki foma inim lit-eneplug enowesi o etma fahat-enesug on enekit feseik lausa. Feseik lausareg, enele yererag-bererag uruk kwit, “It ap su re, di o su o siahap dil lauk katswa anyo ketia nit nenobam suma kwik wahausa su o.

⁷Wahausa ma, at Yason en obam kwelap-enepsi. It ap ai en, fahat-nenesug on raja Yesus neg, ulug, at nenakni kain on Kaisar en melalduk wene anyo sebelduk,” uruk katswa.

⁸Airoho uswa ma, it anyo enowesi inim, it ap homi kabog-duswa on anyo inim, enesanggo holswareg, enehumkwe het-duruk kwit, enele saling-kwaling uswa.

⁹Ai uswareg, it ap homi enowesi anyo en, it Yason, ori foma inim, enenggik hetdeg anyo onggo foukwag ulug, heng-enepswa ma, onggo feil lauk em, loloho wilip-enepswa.

¹⁰O hup atsi mu, it enori etman Paulus Silas inim, “O Berea lakiek,” ulug, monde feseswa ma, o hupmu lausareg, it Yahudi somban uruk obam kwik lausa.

¹¹It ap homi Tesalonika on enesugun siag famen de, it Berea on neg enenda mun fano deg ma, Allah wene hweag-esausa anyo enenda enahayegdoho hwelausareg, “Wene hweag-nesauk su demdoho ane?” ulug, hupmu hubet Allah wene baleg fam kumu hauk katswa.

¹²Kumu hauk kwit, it ap etma on humdoho en Yesus demdoho bousa. It Yunani on homi enowesi leho on inim, ap inim, inim demdoho bousa.

¹³Demdoho bousa man, it ap Yahudi o Tesalonika welatswa on anyo at Paulus en o Berea Allah wene hweag-esauk mu holswareg, it inim etma lausareg, ap homi etma on enehumkwe het-deheg, enelok beheg, dukwag ulug, enendama kwelap-enepuk kweleg,

¹⁴it Yesus omaliki o Berea on en, it Silas, Timotius inim o Berea etma wereg kweleg, at Paulus ik laut inggimu feik lowag ulug folo-folo monde fousa.

¹⁵Monde fousa man, it ap homi Paulus hondoholug o Atena feik lausareg, enambol sombandoho wamul ulug duruk mu, Paulus en, “Timotius, Silas inim folo-folo nakit wamuhup en, mon-enebik manu,” ulug, hweag-esasi.

¹⁶Ne, at Paulus en, it Timotius Silas inim waharuk kam nolug, o Atena nangno-enepuk kwit, o etma kembu wirig dagma olma hoporoho wereg ma hasireg endama mun erim besi.

¹⁷Mundoho erim besireg, it Yahudi on mel, it ap homi dagma on Allah enekol boruk on mel, it Yahudi enap somban uruk obam inim, hupmu hubet siburu hundutukmu ap homi inim sal-kwal ulug, etma inim, Allah wene hweag-eseheg, enele mareheg, duruk katsi.

¹⁸Duruk mu, it ap Epikuros wene inim, Stoa wene inim, hweag-esauk on anyo en inim suahal uruk kwit, “At su at wene uruk mu esauk on halug neg, il noruk su, nanggoho bolug, il noruk behep?” eheg, ne, at Paulus en Yesus wene inim, at oluk atlug inatsi wene[24] inim hweag-esauk mu halug, it foman, “Eleg, at mungguat wene amu on nikdoho uruk mu hehe,” eheg, duruk mu, inim suahal uruk katswa.

¹⁹Suahal uruk katswareg, Paulus hondoholug, duk Areopagus enele matukmu enekit lausareg, “Hat wene amu keron hweag-esauk kahen ai, nit neneluk amag ulug hweag-nesakin.

²⁰Hat wene amu on hag il lauk kahen ale holehe ma, wene ebe ai fahet eheik boul en, furoho hweag-nesakin,” ulug, hweag-utswa. (

²¹Ai it enonggwareg Atena on inim, ap bohon enesa wahausa on inim, it anyo en wene amu keron anyo neg enahayeg en holduk kwit, di deheg, su deheg, duk fug angge wereg latswa ma. ulug, uswa.)

²²“Hweag-nesakin,” hweag-utswa ma, at Paulus anyo en duk Areopagus etma it enele matuk on enenggelegma inatlug hweag-esauk kwit, “Hit nori Atena on yei! Hit kembu wiri folug, henenda ai fam dip-debelug mutlug lauk mu hisihi.

²³An hit henobam oluluk, hit kembu witil lauk kahepma etano, nil kumu hil lauk kwit, kembu mot-duruk kahep on eke, Nenakni unuk nenepeleg on obahet su, ulug, lisu baleg ma, nil hauihik. Hit henepelegdeg lit, mot-duruk kahep anyo an den hweag-hesauk kahi ai furoho hweag-hesa,” ulug, hweag-esasi.

²⁴ Hweag-esasireg, “At Allah en kwenang inim, di angge su angge kwenangma wereg on mundoho wal-debag halug, bohol kwenang hwalduk on at neg deg ma, at kembu obam ap homi en wirigmu welam fug alereg.

²⁵Aren neg di ap homi su ap homi eneluk enebeheg, di angge su angge og-eseheg, duruk mu, at angge eleg halug ap homi en eke at og-om fug alereg.

²⁶Di ap su ap enunggul unuk domog, di obam su obam saha ukwag ulug, indip ap misig wal-debag. Wal-duk fug mu, aren di o su o mundoho o hwaldil lauk kamag ulug, hwili minggiroho feheg, ai en, di salim su salim dil lauk kamag ulug, wenggeloho feheg, debag.

²⁷Allah en airoho debag ai re, it ap homi inil hupnig on en di angge su angge enenggik fag-fag angge hera-dauk anyo hag, ap homi enunggul unuk domog en at Allah ebe hera-deheg, neneluk aheg, dukwag ulug debag. Aireg famen, at ebe yatma wereg fug, we horogma ninim wereg.

²⁸Airoho ulug, ap eke en diroho isi, At omamne fam nenepuk kweleg, ebe ninim hundig lit, neneluk welaheg, kwe laheg, di angge su angge deheg, duruk kwit, welahe, Ne, airoho ulug neg, ap hiron eke en suni felalduk kwit, Nit mundoho oho at omaliki welahe, ulug, isi anyo.

²⁹Ai halug, nit Allah omaliki welahe ma, at ebe indip ai, ap homi enenda wenggele folug, bosie emas inim, bosie perak inim, helep inim, kembu ahut wal-heheg wituk ai hag bouk fug.

³⁰Endam en, ai nenapeleg wereg lit duruk kweleg, Allah en fu nenobahauk fug angge welatsi famen, ketia neg de, nit di ap homi su ap homi nenesiag mundoho embesoukwag ulug, hweag-nesauk kwit wereg.

³¹Ap eke eneko unduhuk febag on en ap homi mundoho duruk ale higitdoho ayo wiroho en-enebuhu ulug nukoho misig eke wenggeloho febag anyo, nit mundoho neneluk amag ulug at anyo re waratlug laukmen oluk apdoho unduhuk fesi mu, hweag-hesauk kahi,” ulug, hweag-esasi.

³²At Paulus en waratlug laukmen oluk apdoho unduhuk foruk wene uruk mu holswareg, it foma anyo en bilipdoho unda yako belapswa famen, it foman neg de, “Wene ai ekenim uruk mu heaul,” ulug, uswa ma,

³³at Paulus anyo it enenggelegman wilipsi. Wilipsi mu, at Dionisius duk Areopagus fam etmano enele matuk on eke inim, hwe Damaris inim, it foma inim, at Paulus inim seberuswareg Yesus demdoho bousa.