Read Ninia Yali KISAH RASUL-RASUL 18 Bible Online

KISAH RASUL-RASUL 18 - Ninia Yali bible

KISAH RASUL-RASUL 18

¹Ai disireg, at Paulus anyo o Atena embeselug o Korintus lasi.

²O Korintus lasireg etma wereg lit, ap Yahudi on eke unuk Akwila, ebe o Pontus endag-atsi on anyo, ohwe unuk Priskila inim, ap Roma on enowe kain on Kaisar Klaudius en, “It Yahudi humdoho o Roma suma welamuhup fug,” ulug, wene melaloho hweag-esasi fam, owan keram o Italia embeselug o Korintus wahausareg etma wereg lit,

³o sabo sum on kemah anyo seleben-duruk on Paulus enekit lasireg, at oho sum kemah seleben-duruk on deg ma, inim wereg lit, seleben-duruk katswa.

⁴Duruk kwit, at Paulus anyo hundig-hundig hari Sabat it Yahudi kel wat-dauk kwit Allah mot-duruk salim, it somban uruk obam kulug, it Yahudi enap inim, it Yunani on inim, it enenda demdoho boukwag ulug Allah wene hweag-esauk katsi.

⁵Duruk mu, Timotius inim, Silas inim, Makedonia en lausareg inim wereg lit, at Paulus en, “Allah en eneko unduhuk febag anyo re Yesus,” ulug, it Yahudi anyo Allah wene neg fagdoho hweag-esauk katsi.

⁶Hweag-esauk mu, it anyo inim minggiroho wereg lit siahapdoho fousa ma, “Hit elehapdoho henobahaku ai, an nonggwareg de fug. Hit henonggwareg dauk kahep fam elehapdoho henobahaku. An ketian it ap dagma on hweag-isil lauk karuhuk,” ulug, enobam waroho, asum ololoreg on anyo liloho enobam fesi.

⁷O etma embeselug, ap dagma on Allah akol boruk on unuk Titius Yustus obam, it Yahudi enap somban uruk obam horogma, akit lasi.

⁸It Yahudi somban uruk obam hwalduk on Krispus anyo inim, at inim wereg on anyo inim, enenda Tuhan Yesus obam dip-debelug demdoho bousa. Ne, it o Korintus on humdoho at Paulus en hweag-esasi on hole folug, demdoho bousa ma, ikma belap-enepswa.

⁹Duruk kwit wereg ma, nukoho eke fam hup andundu nenowe Tuhan en at Paulus a fam hweag-utuk kwit, “An ninim welahen ma, ap homi en howaruhup fug. Suma an nomaliki humdoho wereg ma, hakol en embesouk fug. Hweag-esauk kamin,” ulug, hweag-itsi.

¹¹Airoho hweag-itsi mu, 18 bulan enam dauk kweleg, Allah wene hweag-esauk katsi.

¹²Hweag-esauk katsi mu, at Galio ap homi o Akhaya etma on enowe unuk bogdeg gubernur unduhuk wereg kweleg, it Yahudi humdoho inim inatswareg, Paulus ebe walug, wene unggum bilinggurukmu feik lausa.

¹³Feik lausareg, “At ap su Allah mot-duruk ale Allah wene melaleg higitdoho re fug, amu on duruk kamag ulug, ap homi enendama kwelap-enebil lauk,” ulug, hweag-utswa.

¹⁴Hweag-utswa ma, at Paulus anyo, hweag-esamin ulug duruk men, at Galio en it Yahudi on hweag-esauk kwit, “At siag naleg-haleg delep man, hit ap Yahudi uruk kahep anyo nesanggo holmin ulug dele famen,

¹⁵hit henewene melaleg duruk kahep on neg nangginoho deheg, nangginoho eheg, ulug, suahal uruk kahep ma, an den wene katukdoho hweag-hesamin nerim. Hit henemu neg wenggeluhup,” ulug,

¹⁶“Wilibik lakiek,” ulug, wene unggum bilinggurukmen muko wilibi fesesi.

¹⁷Wilibi fesesi mu, iren, it Yahudi somban uruk obam hwalduk on at Sostenes anyo seneko, wene bilinggurukmu etano en yeik watuk kweleg, at Galio en, “Enemu,” bolug, bok atsi.

¹⁸ At Paulus etma wereg lit, noho humdoho nohosi. Ai en at ori Yesus omaliki etmano dang-debeselug, at Akwila, ohwe Priskila inim o Siria kapal fam owan nindig-am fug mu, inim o Kengkrea wereg lit at Paulus en, “Eke duhuk,”[25] ulug, Allah il hanim abug hweag-itsi mu, oruk baluk fug angge welatsi anyo, ai salim oruk balsi.

¹⁹Oruk balsireg, o Efesus nindig-aik wahausa. At Paulus en Priskila Akwila inim etma feselug, at amu it Yahudi enap somban uruk obam kwik lasireg, Allah wene hweag-esasi.

²⁰Hweag-esasi mu, “Ninim suma ekenim welamuhuk,” ulug, alele wausa famen, Paulus en, “Eleg,” isireg,

²¹“At Allah en, Waruhu, boruk halug, fobik henesa waruhuk,” ulug, dang-debeselug, o Efesus etman kapal fam lasi.

²²O Kaisarea lasireg etman at Paulus o Yerusalem lasireg, it Yesus omaliki kabogdeg on Paulus en dang-debesesireg, o Antiokhia wahasi.

²³Etma welatsireg, ai en, fobik etma embeselug, di o su o, o Galatia inim, o Frigia inim, da kwil, ya kwil, lauk kwit, Yesus ele wauk on enenda hambukdoho welamag ulug, hweag-isil lauk katsi.

²⁴Ap Yahudi on eke unuk Apolos, obam indipmu Aleksandria on anyo, at Allah wene indip onggombi mundoho olukdeg lit, ele anggilugdoho hweag-esauk on o Efesus lasi.

²⁵Lasireg, nenowe Yesus en, “Dil noruk kamuhup,” isi wene hweag-utswa ma, furoho wasi mu, Yesus duruk katsi wene furoho hweag-eseheg, enda ahanhandoho hweag-eseheg, duruk katsi famen, we Yohanes en ikma belap-enepuk katsi wene anyo neg olukdeg ma hweag-esauk katsi.

²⁶At akol eleg lit, it Yahudi enap somban uruk obam etma wene hweag-esauk katsi. Airoho hweag-esauk mu, it Priskila Akwila inim enesanggo holswareg, hondoholug enobam lausareg, Allah en, “Dil noruk kamuhup,” bebag ale furoho bilinggoho hweag-utswa.

²⁷At anyo en, o Akhaya nindig-atmin ulug duruk mu, it Yesus omaliki o Efesus on en it Yesus wene wausa on o Akhaya on enobahet lisu balduk kwit, “Apolos henekit waharuk ai, fanoroho wakiyug,” ulug, lisu baloho monde fousa. Monde fousa ma, walug ik foma fil nindig-aik lasireg, Allah enelaheg en debesesi fam demdoho bousa on anyo inim wereg lit, mun alongdoho let-enepuk katsi.

²⁸Let-esauk kwit, it Yahudi inim hummen suahal uruk kwit, at Apolos en Allah wene baleg fam, “Allah en henahap wendatuk on eneko unduhuk febag on Kristus anyo re Yesus neg,” ulug, enele foma onggo uk fug aleroho wene katukdoho hweag-esauk katsi.