Read Ninia Yali KISAH RASUL-RASUL 19 Bible Online

KISAH RASUL-RASUL 19 - Ninia Yali bible

KISAH RASUL-RASUL 19

¹At Apolos o Korintus wereg kweleg, at Paulus anyo o Galatia Frigia honggolegkwe lasireg, o Efesus kwik lasi. Kwik lasireg, Yesus ele wauk on foma etma esasireg,

²“Hit Yesus wene demdoho boruhup mu, Allah Aheime og-hesasi a, eleg a?” Ulug, hein og-enepsi mu, iren, “Eleg. Allah Aheime wereg a, eleg a, nit nenepelegdoho welahe,” ulug, hweag-utswa.

³Hweag-utswa ma, “Ai halug, nunggwangge wene hole folug ikma belap-henepsi?” Ulug, hein og-enepsi mu, iren, “Eleg. At Yohanes en ikma belap-enepsi anyo hag ikma belap-nenepsi.”

⁴ Hweag-utswa ma, at Paulus en, “At Yohanes anyo, enesiag embeseruk halug, ikma belap-enepuk katsi. Aren ap homi humdoho hweag-esauk kwit, At an nombolim waruhu on ai, demdoho bolug, henenda at obam dip-deberuk kamek, ulug, hweag-esasi ai re Yesus,”

⁵ulug, wene ai hweag-esasi anyo hole folug Tuhan Yesus unuk fam ikma belap-enepsi.

⁶Ikma belap-enepsi mu, at Paulus enggik en enunggulmu sebelduk kweleg, Allah Aheime enobam wambik wahasi fam ap homi amu on enele hag oho folug, eheg, Allah wene hweag-eseheg, duswa.

⁷It ap Allah Aheime enobam wambik wahasi ai, enebe seberoho nesanggoen welatswa.

⁸Enobam wambik wahasi mu, at Paulus en it Yahudi somban uruk obam kwik lalug, akol eleg angge, ap homi Allah apma fesehu wene enenda demdoho boukwag ulug, Allah wene hweag-eseheg, duruk kweleg, bigalem henahan enam dasi.

⁹Hweag-esauk katsi famen, it foman enasugun siag atlug en, demdoho bouk fug angge wereg lit, ap homi humdoho kabog-duswa on anyo wene at Allah en Tuhan Yesus fene en ap homi enahap wendat-enebuhuk ulug wenggelfag wene anyo siahapdoho fousa ma, it etma embeselug, at Yesus omalikiap enepsi on og-eneplug, at Tiranus en di wene su wene enele matuk obam witsimu etmano kwik lasireg, hupmu hubet inim enele matuk katswa.[26]

¹⁰Inim enele matuk kweleg 2 tahun duswa ma, o propinsi Asia etma, it Yahudi on inim, it Yunani on inim mundoho, nenowe Tuhan Yesus wene holduk katswa.

¹¹Allah en deberuk kweleg, at Paulus en ap homi en duk fug alereg on mun along on duruk katsi.

¹²Along on disi ai, at asum lisag horuruk on inim, asum wan-duruk on inim walug lalug, it ap homi oukdeg on anyo enobam di ale debeseruk kweleg, ouk eleg aheg, mungguat enendama kuruk on anyo lisoho wilibi feseheg, duruk katswa.

¹³Duruk kweleg, it ap Yahudi hwal hiling-enepuk on anyo en, ap homi mungguat enendama kuruk on anyo Tuhan Yesus unuk yiko, “Paulus hweag-esauk anyo Yesus unuk fam, wilibik lag,” ulug, wilibi fesoul ulug, duswa.

¹⁴Duswa ai, it ap Yahudi on enowe imam eke inim Skewa anyo omaliki enebe sabiren inim en airoho duswa.

¹⁵Airoho duswa man, mungguat anyo en, “Yesus de noluk, ne, at Paulus noluk famen, hit su neg de sa mel?” ulug, hweag-esasi.

¹⁶Hweag-esasireg, ap mungguat olok on endama welatsi anyo en feyagdoho enobam sahali isireg, sebele feselug enowatsi mu, it anyo olma etman enesum dilipdeg angge, enemep deik-deik longgo uswa.

¹⁷Duswa anyo, it ap homi Efesus on mundoho, it Yahudi on inim, Yunani on inim, enesanggo hole folug enekol atswareg, Tuhan Yesus unuk leho fousa.

¹⁸Ap homi humdoho demdoho bolug watlug, “Nit diroho duruk katuhuk,” ulug, enamegdoho fag-duruk katswa.

¹⁹It ap hwal hiling-enepuk on foma inim, hiling-enepul ulug buku baleg kumu heheg, duruk katswa anyo, ap homi mundoho inil hanim enembuku anyo indok yalswa. Ne, enembuku yalswa anyo, onggo eneuang owag perak [27] wenako 50.000 hag hausa.

²⁰Tuhan Yesus awene[28] oho folug, airoho duruk katswa ma, saha il lauk kwit, mundoho hum atsi.

²¹It ap Efesus on anyo airoho duswa ma, at Paulus anyo o Makedonia, o Akhaya inim, da kweheg, ya kweheg, dil, o Yerusalem lahuk ulug enda wenggelduk kwit, “O etma lahukdeg, o Roma inim lahuk,” isireg,[29]

²²let-dil lauk on biren Timotius, Erastus inim, it dam o Makedonia mon-enepsireg, at o Asia welatlug lahuk ulug, bok atsi.

²³Eta li em, o Efesus etmano nenowe Yesus en, “Airoho dil noruk kamuhup,” isi wene anyo fahet enele sahalduk kwit, anggin humon atsi.

²⁴Ap bosie perak buhun-duruk on unuk Demetrius en ap homi en apne wauk on dewa hwe on eke unuk Artemis obam wirig anyo bosie perak fam ahut ilitdoho kembu buhun-duruk mu, onggo hun-damin ulug, autsi humdoho eneyonggo foruk mu, buhun-duruk halug, onggo humon og-eseheg, duruk katsi.

²⁵It at autsi anyo inim, it ap foma yabuk ai on duruk on inim, kabog-debeselug hweag-esauk kwit, “Nori neg. Nit duruk kahe su fam onggo humon hwelauk kahe henelukdeg famen,

²⁶at Paulus anyo en, Kembu ap homi en buhun-duruk ai demdoho on de fug, ulug, o Efesus suman neg de fug. Ite, o propinsi Asia, di o su o etma mundoho inim ap homi hweag-isil lauk katsi fam, ap homi humdoho demdoho boruk mu, hinil heheg, henesanggo holeheg, duruk kahep ai.

²⁷Aireg ma, nit onggo hwelakoho lit duruk kahe su on neg eleg aruhu fug famen, nit o Asia suma welahe on mundoho inim, di o su o wereg on humdoho inim, nenisinga unuk bogdeg Artemis nit mundoho en at unuk mot-duruk kahe on anyo, at obam wirig mabendeg boruk kwit, at anggilug eleg, sebel aha ma hehe, ulug, uk no, nakol behi, nautsi,” ulug, hweag-esasi.

²⁸Hweag-esasi anyo enesanggo hole folug, enehumkwe het-duruk kwit, “O Efesus suma nenisinga Artemis anyo unuk bogdeg welaruhu!” ulug, enemitmit duswa.

²⁹Enemitmit duswa anyo o sili domog etma lit-lit wilipswareg, eke en eheg, eke en eheg, uruk kwit, it ap o Makedonia on Paulus inim lauk on Gayus inim, Aristarkhus inim sen-eneplug hummu ap homi humdoho kabog-duruk mu, o wirigmu buroho feseik kuswa.

³⁰Feseik kuswareg wereg ma, at Paulus oho enombolim kwik lamin ulug duruk men, it Yesus ele wauk on anyo en, “Bok amin,” ulug, seneg lit wereg ma,

³¹it o propinsi Asia on enowesi foma at Paulus inim hundig on anyo en, o wirigmu etma orohole enam aik kuk no hweag-omag ulug enautsi mon-enebik wahausa.

³²Hweag-utuk kweleg, it kabog-duswa on foma humdoho en nunggwelug kabog-dehe enepeleg ma, eke en eheg, eke en eheg, duruk kwit, naleg-haleg uruk katswa.

³³It airoho duruk kweleg, it Yahudi en de ap unuk Aleksander ap homi inil hanim unduhuk feik wahausa ma, it lohwaleg on omano en, “Wene indip de at hehe,” ulug, ai bousa. Famen de at Aleksander en, “An wene nobam wereg fug,” ulug ap homi omano hweag-esamin ulug enggik en, “Bok welamek,” ulug, hweag-esasireg duruk men,

³⁴at ap Yahudi on enegdeg ma hausareg, “O Efesus suma nenisinga Artemis ai neg unuk bogdeg welaruhu!” ulug, enemitmit uruk men wauk men, 2 jam lasi.

³⁵Airoho duruk men, 2 jam lasi mu, it ap o Efesus on wene uruk mu, lisu balduk ahun anyo en, enele elehap-debesi mu, enele eleg angge wereg kweleg hweag-esauk kwit, “Hit ap Efesus on eke hweag-hesa,” hweag-esasireg, “At nenisinga unuk bogdeg Artemis obam wirig hwalduk on de nit deg ma, anggembu helep on wirig boholman wambik wahasi on foroho welahe anyo re nit Efesus on deg ma, di ap homi su ap homi enepeleg ma ulug, uruk kahep a?

³⁶Eleg. Wene su re, ap en seiale neg uk fug alereg ma, hit henenda eleg on hag folo-folo di deheg, su deheg, duk fug. Henobabut sakoreg lit, bok welamek.

³⁷It ap su nit nenisinga Artemis obam wirigmen yoholi angge weheg, at awene sebele feheg, dehesa fug men, og-eneplug wahep ma,

³⁸it unggum bilingguruk on inim, it nenowesi o Roma on inim wereg ma, at Demetrius at autsi inim, Wene enobam dopno esaul, boruk halug, it enekit hweag-esa lowag.

³⁹Wene ai, iren wenggelusa famen, duk fug alereg halug, fobik nit mundoho kabog-debelug nenele bekitdoho matul.

⁴⁰Nit yoho debehe su fahet, it nenowesi o Roma on en, Hit naleg-haleg debehep, hweag-nesalug, het-nenebuk alereg. Ne, nenemitmit ehe su fahet niren, Indip airoho, ulug, wene onggo hweag-esehe ha fug alereg ma, henele eleg amek,” ulug, hweag-esasireg,

⁴¹at wene uruk mu lisu balduk ahun anyo en ap homi kabogdeg anyo, “Buhuliek!” ulug, hweag-esasi.