Read Ninia Yali KISAH RASUL-RASUL 2 Bible Online

KISAH RASUL-RASUL 2 - Ninia Yali bible

KISAH RASUL-RASUL 2

¹ It Yahudi Pentakosta esetuk salim, Yesus demdoho boruk on mundoho misigmu kabog-debelug, it olma etmano wereg ma,

²sielu aplohok firil lauk hag, fetagdoho boholman o hopo ik kwisi.

³Kwisireg, indok ambulbul enambilik anggen hag melelang-dil it mundoho enobam dag uruk mu hausa.

⁴Dag isireg, it mundoho Allah Aheime enendama hoporoho kwisireg, eta li em ap homi amu on enele uk ale enepuk kweleg, uruk katswa.

⁵Anyo, it Yahudi on Allah enekol boruk on neg, di o su o en o Yerusalem wahausareg wereg ma,

⁶enele amusundoho uruk mu, enesanggo holswareg, ap homi humdoho kabog-debelug enele domog uruk mu, holduk kwit, “Yehei u! Nangginoho uruk e?” ulug, enenda fit atswa.

⁷It mundoho enekol en, “Yehei!” ulug, yanderuruk kwit, “It wene uruk su, it Galilea enap neg famen,

⁸nit nenele domog fam neg uruk mu, holduk kahe su re! Nangginoho uruk behep?

⁹Nit Partia on inim, Media on inim, Elam on inim, Mesopotamia welahe on inim, Yudea en, Kapadokia en, Pontus Asia en,

¹⁰Frigia Pamfilia inim en, Mesir en inim, o Libia sili eke Kirene horogkwe on inim, it o Roma en nenesa wahausa on inim,

¹¹it Yahudi on inim, it dagma on Yahudi nenewene wausa on inim, it Kreta on inim, ap Arab on inim, nit mundoho Allah en duk fug ale on along disi anyo nenele domog fam bilinggoho hweag-nesauk anyo mundoho nenesanggo holduk kahe,” ulug, uswa.

¹²Uswareg, enekol en, “Su keroho fahet uruk ahi?”

¹³Ulug, at eke hweag-ereheg, at eke hweag-ereheg uruk katswa man, it foman neg de, “Eleg. It ahalue siag on homoroho nenggesareg wenenebo hag dil noruk oma re!” ulug, unda yag-enepswa.

¹⁴Airoho unda yag-enepswa ma, at Petrus autsi nanggoloben inim inatlug, ele humon fam hweag-esauk kwit, “Yaho! Nori Yahudi on inim, hit o Yerusalem welahep on inim, wene eke hweag-hesamin mu, henesanggo holduk kwit, fureberuk kamek!”

¹⁵Hweag-esasireg, “Mo kwelabik waharuk kweleg, owan jam 9 fam, it ahalue siag on homoroho nalug, wenenebo hag dil lauk behep ai re fug.

¹⁶At Allah wene hweag-esauk katfag on Nabi Yoel en ebag ale anyo dil waharuk su. At Yoel en diroho ebag.

¹⁷ Allah en uruk kwit, Fobik o ahae fotog fam di ap homi su ap homi naheime enobam hilili feseik waruhuk. Henomaliki, henahwelani inim en Allah wene hweag-eseheg, it henomaliki sauwe on anyo ena og-hauk hag heheg, henombasi sobalon anyo ena og-heheg, duruk kamuhup.

¹⁸Fobik ai salim, it an namingming angge homi inim, ap inim, naheime enobam hilili feseik waruhuk fam, nawene hweag-esauk kamuhup.

¹⁹An fobik boholma lendi en duk fug ale on deheg, kwenangma suman duk fug ale on deheg, duruk kwit, enemep inim, indok inim, hobu inim, ahe inim, duhuk.

²⁰An Tuhan yande-napuk kweleg, nalili angge lik-louk debelug, waruhuk salim horog aik waharuk kweleg, mo il mum aheg, bigalem mep aheg, duhuk.

²¹Duruk mu, neahupdeg it ap en, Yehei nakni e! ulug, hweag-numuhup halug, ai fam enahap wendaruhuk, ulug, Yoel en hweag-esebag ale anyo dil waharuk su re.

²²Hit nori Israel on su, an hweag-hesauk kahi on su, holduk kamek! Allah en at Yesus Nazaret on eneko mondorik wahasi on, hiren, Su demdoho, ulug, furebahat-dahup, ulug, at hinim wereg lit, duk fug ale on deheg, enekol wereg on deheg, along on deheg, Allah en omamneap deberuk kweleg, duruk katsi anyo heneluk.

²³ At Allah en fobik duhu ale mundoho olukdeg lit, Yesus anyo seneko og-esowag ulug wenggeloho febag ma, hiren it siag duruk on en warukwag ulug og-esauhuk boruhup mu, e salib fam dopnoroho ware fousa ai re, hiren neg watuhup.

²⁴ Watuhup mu, nenekdoho waratsi famen, at waratukmu etma sebeleg welam ale siagdeg ma, Allah en oluk apdoho lisoho wilibi feik wahasi.

²⁵ Ne, at Daud en wene eke uruk kwit, An Tuhan hundig-hundig nalukwe fil wereg ma, hauihik. Nowe ninim wereg ma nenda firuhuk fug.

²⁶Ai halug, nahayeg humon boruk kwit, nele nahayegdoho uruk kahi. An wararuhuk famen, an naheime waratlug laukmu etma wereg kweleg, haren fotog-neahun fug mu, nenda hobam dip-debelug, nenda hambukdoho bok welahi. Hamingming angge fano on neg duruk kahi mu, an nebe wararuhukdeg filik atuk kweleg, fotog-neahun fug.

²⁷

²⁸Noluk welaruhuk kwe hweag-nitihin mu, hat ninim wereg lit de, hahayeg humdoho napuk karuhun, ulug, at Daud en hweag-etfag wene ai, Yesus en duhu ulug, ebag.

²⁹Nowesi, nautsi, nit nenomba Daud duruk katfag wene an fagdoho hweag-hesa. At anyo waratfag ma, owikmu kwelabe febag angge re, owag de ketia wereg.

³⁰ At Daud anyo, Allah wene hweag-esauk katfag on nabi deg ma, Allah en wene abug hweag-utuk kwit, Daud ahwi! Hat enowe raja welahen ai hag, hat homba on eke hobalma unduhuk fohuk, ulug, hweag-etfag wene anyo, olukdoho welatfag ma,

³¹at Daud en, Aheime waratlug lauk mu wereg kweleg, fotog-esahun fug. At ebe wararuhureg, filik atuk kweleg oho, fotog-esahun fug neg. Ulug, ebag ai, at Allah en eneko febag on anyo waratlug, oluk inaruhu, olukdeg lit, ebag.

³²Ai, Yesus waratsi mu, Allah en oluk apdoho unduhuk fesi wene anyo, nit mundoho ninil hauhuk mu, nenolukdeg lahe.

³³Allah inim welamag ulug enggik bekit fil leho fesi mu, akni en, Naheime og-hesahuk, ebag anyo oko belap-nesa waha ma, nit duruk kahe ale neseheg, holeheg, duruk kahep ai.

³⁴ At Daud anyo boholma lahasi fug famen, aren uruk kwit, At Nenakni Tuhan en at Nakni Tuhan hweag-utuk kwit, It hinim seleion minggirig welahep anyo, al bereloho hapma owan fesouk fug mu, ninim welamuhuk en, nenggik bekit fil[3] huraik ma, ulug, hweag-etfag.

³⁵

³⁶Daud en airoho ebag ma, hit Israel henap mundoho, at Yesus e salib fam dopnoroho ware foruhup anyo, at Allah en at eneko febag ma, henowe Tuhan Kristus amag ulug unduhuk fesi anyo, fureboukwag ulug, hweag-hesauk kahi,” ulug, hweag-esasi.

³⁷Hweag-esasi anyo hole folug, enenda wat-dausareg, Petrus inim it eneko mon-enepsi on rasul foma inim hein og-esauk kwit, “Yehei, nori! Nit nanggindul?”

³⁸Ulug, hein og-esausa ma, at Petrus en hweag-esauk kwit, “Henesiag elehapdoho foukwag ulug, hit henemu domog siag duruk kahep anyo, henenda wenggele folug embeseiyek. Embeseruk halug, Yesus Kristus unuk fam, ikma belap-henepul. Ai duruk halug, Allah en Aheime anyo onggoleg og-hesahu mu, hwelahup.

³⁹At Allah en, Og-hesahuk, ulug, abug hweag-hesebag ai, hit hinim, hit henomaliki inim, it ap yatma wereg on inim, Nenakni Allah en ap hwi-enebuhu on anyo, mundoho henobahet hweag-hesebag,” ulug, hweag-esasi.

⁴⁰Hweag-esasireg, wene foma humdoho hweag-esauk kwit, “It ap o ketia siag duruk ai, hinim siahap-henebuk no, henahap wendat-dahup ulug, hinim mundoho minggirig welamek!” ulug, komoroho hweag-esasi.

⁴¹Komoroho hweag-esasi mu, ap homi at ele demdoho bousa ma, ikma belap-enepswa. Nukoho ai salim, humdoho inim dopno uswa ma, ikma belap-enepswa ai, ap homi enebe seberoho 3.000 en Yesus omaliki atswa.

⁴²Yesus omaliki atswa anyo en, enenda misig atlug, seberoho wereg lit de, it eneko mon-enepsi on rasul en wene hweag-esauk katswa on furoho weheg, siburu seberoho kuroho nenggeg, Allah hweag-ereheg, airoho neg duruk katswa.

⁴³It Yesus en mon-enepsi on rasul anyo en duk fug ale on deheg, enekol boruk on deheg, duruk katswa ma esalug, it mundoho en, “Nenekol e!” ulug, yande-enepuk katswa.

⁴⁴ It Yesus demdoho bousa on anyo mundoho enenda misig sebereg lit, di angge su angge anyo, “Nit mundoho nenengge,” ulug,

⁴⁵it onggo hundi folug, eke enengge eleg halug, yohwan-enepuk katswa.

⁴⁶It anyo, enenda misig atlug, hupmu hubet Allah obam wirigmu kabog-dik kweheg, enenda sebele fahat-dalug, wereg lit, enahayeg fam enobam wereg lit, siburu kuroho folug nenggeg, duruk katswa.

⁴⁷It anyo Allah mot-duruk kweleg, it Yesus omaliki anyo ap homi humdoho en enenda hundig enepuk katswa. Ne, Tuhan anyo en hupmu hubet it ap homi enahap wendaroho eke dopno eheg kabog-debeseruk katsi.