Read Ninia Yali KISAH RASUL-RASUL 20 Bible Online

KISAH RASUL-RASUL 20 - Ninia Yali bible

KISAH RASUL-RASUL 20

¹Enele naleg-haleg uruk on eleg atswa ma, at Paulus en, Yesus ele wauk on omano kabog-dik wamag ulug, eneyonggo fesesi mu, wahausa ma, enenda aho ware fesesireg, “An o Makedonia la,” ulug, hweag-esalug lasi.

²Lasireg, di o su o da kweheg, ya kweheg, dil lauk kwit, Yesus omaliki etma wereg on enenda aho ware feseil, ap homi Yunani weregma lasi.

³Lasireg etma wereg kweleg, bigalem henahan enam dasi mu, ai en, fobik o Siria kapal fam nindig-atmin ulug duruk men, it Yahudi on en watul uruk mu holsireg, “Nambol somban o Makedonia kwe lamin,” besi.

⁴At inim lausa on anyo Pirus amloho Sopater obam Berea on inim, o Tesalonika en Aristarkhus inim, Sekundus inim, at Gayus o Derbe on inim, Timotius inim, o Asia on en Tikhikus inim, Trofimus inim, at inim wahausa.

⁵It ai, it dam o Troas wahausareg nangno-nenepswa.

⁶Ne, nit de roti fituk angge ragi eleg kweleg, soni anyo osoho nalug, o Filipi en kapal fam kulug waharuk kwit, hup foaben noholug, o Troas kwik waharuhukdeg etma minggu misig welatuhuk.

⁷Likia hari Minggu Allah unuk mot-duruk salim siburu kuroho seberoho naul ulug hupmu[30] kabog-duruhuk mu, at Paulus sono lahuk ulug duruk kwit, wene hweag-esauk kweleg hup andundu atsi.

⁸Ne, nit kabog-duruhukmu o ambolma anyo ambe baleg etma lampu humdoho fisaho wereg man, hweag-esauk kweleg,

⁹nimi sauwe on unuk Eutikhus jendela yendegma hwerieg lit, wereg man, at Paulus ele yatdoho hweag-esauk mu, noho kungguk duruk kwit, ambolma hwili bireneg on etlemano en unggul belabeg bule wambisi. Unggul belabeg bule wambisi mu, “Waraha,” ulug, wausa man,

¹⁰at Paulus anyo wambisireg nimi anyo emberimmu sahaun-disireg, mako bugdoho wauk kwit, “Yaho! Ebe oluk wereg angge re, Henenda firuk fug,” ulug, hweag-esasi.

¹¹Hweag-esalug, lahasireg, roti kuroho nalug, at inim enele matuk kweleg, o sekan disi mu, lasi.

¹²Lauk kweleg, at nimi anyo oluk angge walug lausareg, enenda aho waroho se atsi.

¹³At Paulus en, “Kwenang kwe o Asos lamin,” bolug, “Hit atam o Asos etma lauk kamek. An fobik henesa waruhuk,” ulug, hweag-nesasi mu, nit dam kapal fam o Asos waharuhuk.

¹⁴Waharuhukdeg wereg ma, at o Asos etma ninim sal-kwal uruhukdeg, kapal fam ninim kulug, o Metilene waharuhuk.

¹⁵Etman waharuhukdeg, hubet ik laut yenggeleg bul hukdegma pulau Khios higitdoho aik waharuhukdeg, hau hag o Samos waharuhuk, ne, owa hag o Miletus waharuhuk.

¹⁶Ne, at Paulus en, “Soni Pentakosta o Yerusalem an etma wereg kweleg, eseruhup fano,” besi mu, “O Asia fam neg anunuroho wereg man horog am no, o Efesus kuk fug angge bekit lahuk,” ulug, wenggelsi.

¹⁷O Miletus kwik waharuhukdeg, etman at Paulus anyo it Yesus omaliki hwal-enepuk on wamag ulug o Efesus eneyonggo mon-enepsi mu,

¹⁸at akit wahausa ma, hweag-esauk kwit, “An keram o Asia suma henesa waharihikdeg ninim wereg lit, welatihik ale heneluk anyo.

¹⁹An de Tuhan Yesus amingming angge atlug, nenda sebe ulug, oba yag-henepuk kwit, let-henepuk katihik famen, it Yahudi on en an nowarukoho lit, wenggele folug wereg lit, anggin on nobam foruk katswa anyo heneluk neg.

²⁰An den wene fanoap henebuhu wene anyo foma herako sebele feheg, foma hweag-heseheg, dirihik fug. Hummen inim, henobam domog en inim, hweag-hisil lauk katihik ale heneluk anyo.

²¹Hweag-hesauk katihik anyo, hit Yahudi on inim, hit Yunani on inim, hit Yesus omaliki amuhup ulug, hit siag duruk kahep anyo henenda wenggele folug, embeseheg, Tuhan Yesus Kristus demdoho bolug, henenda at obam dip-debeheg, duhup, ulug, furoho hweag-hesauk katihik mu,

²²ketia neg de, Allah Aheime en hweag-nutuk ale higitdoho o Yerusalem lauk kahi famen, etman nabuhup ale napelegdeg lit en lauk kahi.

²³Nukoho eke salim ekeman hweag-nereheg, nukoho eke salim ekeman hweag-nereheg, dil lauk mu, Allah Aheime en, Sabu het-habeheg, anggin-fanggin hobam feheg, habuhup, ulug, fagdoho hweag-nutuk on anyo neg de nolukdeg famen,

²⁴ an nebe noluk welaruhuk ai along eleg. Ite, Allah nenelaheg en we og-nesauk wene Fano Wene fagdoho hweag-esauk kamag ulug, Yesus en eyabuk hwalduk kamag ulug og-nitsi anyo embesouk fug angge o fotogdoho duhuk ai neg de along on.

²⁵Ne, nautsi, an anyo Allah apma nenobahaku wene henenggelegma hweag-hisil lauk mu neauk katuhup anyo, ketia su hwili en fobik hit mundoho ekenim hinil neahup fug ai an noluk.

²⁶Ai halug, an den Allah en wenggeloho febag wene foma eke sebele ferihik fug. Abirangge hweag-hesauk katihik mu, hit eke elehapdoho henobahaku halug ai re, henemu en. An siag en de fug, nautsi. Ite, hit henonggwareg en dauk fam elehapdoho henobahaku ulug, nukoho yoho su fam de demdoho hweag-hesauk kahi.

²⁸At Allah amloho Yesus waratsi[31] fam Allah omaliki apdoho enonggo fesi anyo, at andomba deg ma, it hwal-enepuk kamuhup ulug, Allah Aheime en unduhuk henobahasi mu, hit henonggwareg henenda kahaleg lit, it inim jemaat Allah[32] en on nim furoho hwal-enepuk nu.

²⁹An henobahalug lauk kweleg, olomene olok on hit Allah andomba hwal-enepuk kahep anyo enenggelegma kwik wamuhupdeg embesehup fug. Senggel-enebuhup ai an noluk.

³⁰It foma hiron henenggelegman inatlug, Yesus omaliki hwal-enepuk kahep on omano, “Nit neg mug-neneplug lauk kamag,” ulug, lal-enebukoho lit, Fano Wene anyo endenoho seiale hweag-esauk kamuhup.

³¹Aireg ma, 3 tahun duruk kweleg, nukoho inim, hupmu inim, we welam fug angge oba yatuk kwit, henemu domog komoroho hweag-hesauk katihik anyo ebetuk kwit, henenda enggatdoho welamek.

³²Ne, ketia re, at Allah nenelaheg en fanoap nenepsi wene ai fam, hit at omaliki henenda wirik apdoho henobahakeg, ne, An nomaliki diroho fanoap henepuk karuhuk, ulug, wene abug wene hweag-nesasi higitdoho henebeheg, duruk kamag ulug, Allah enggikmu henobaharuk kahi.

³³Hit heneuang inim henesum inim, “An og-netlep ahi,” boruk katihik fug.

³⁴An nonggwareg fahet inim, it ninim noruk katuhuk on enobahet inim, ai an nenggik omamne fam neg duruk kwit, hwelauk katuhuk ai henelukdeg anyo.

³⁵At Tuhan Yesus en uruk kwit, Og-esauk mu hwelauk ai mabendeg hag. Ne, og-esauk anyo neg de ahayeg humon, ulug, isi anyo ebetuk kwit, an duruk katihik hag hiren ap homi maben on airoho enepuk kamuhup ulug, heneluk apdoho henobaharihik,” ulug, Paulus en hweag-esasi.

³⁶Wene airoho hweag-esasireg, it enelenggen dimirebelug, it mundoho inim Allah hweag-utswa.

³⁷Allah hweag-utswareg, it oba yatuk kwit, at Paulus ebe mako bug-deheg, dop-deheg, duswa.

³⁸At Paulus en, “An fobik neahup fug,” ulug, hweag-esasi ai fam neg de, enenda mun sebe isi mu, oba yareheg, dop-deheg, duswareg, hondoholug, kapal ik inggimu wereg ma etano lahabe feik lausa.