Read Ninia Yali KISAH RASUL-RASUL 21 Bible Online

KISAH RASUL-RASUL 21 - Ninia Yali bible

KISAH RASUL-RASUL 21

¹Dang-dang atuhukdeg, it etmano feselug, kapal fam kuruhukdeg, etman bekit o pulau Kos nindig-atuhukdeg, likia ik anggenma o pulau Rodos waharuhukdeg etman dil dil o Patara kwik waharuhuk.

²O Patara etma wereg ma kapal amu on eke o Fenisia nindig-amul ulug duruk mu, ninim kuruhukdeg waharuhuk.

³Waharuhukdeg, ik anggenma o pulau Siprus nenenggik hware fil nindihip hil lauk kwit, o Siria laul ulug, o Tirus kwik waharuhukdeg, di angge su angge kapal fam yonggwareg on anyo wilibi foukwag ulug bousa ma, etma wilibik waharuhuk.

⁴Etma wilipuhukdeg Yesus omaliki kumu isil lauk kwit, minggu misig welatuhuk. It etma on en Allah Aheime en hweag-esauk kweleg, Paulus anyo hweag-utuk kwit, “Hat Yerusalem la fug,” ulug, hweag-utswa.

⁵Etma welatlug, nit laul ulug duruk mu, it enohwesi inim, enomaliki inim, it mundoho o silimen hondog-neneplug, ik inggimu lauhukdeg, nenelenggen dimirebelug Allah hweag-utuhuk.

⁶Allah hweag-utlug, dang-dang atuhukdeg, it enobam lauk kweleg, niren kapal fam kuruhuk.

⁷Kuruhukdeg, o Tirus etman lauhukdeg, o Ptolemais kuruhukdeg, etma Yesus omaliki dang-debeselug, ninim hup misig nohoruhuk.

⁸ Noholug, likia o Kaisarea lauhuk. Lauhukdeg, it ap sabiren o Yerusalem en en-enepswa on anyo eke at Fano Wene etman hweag-isil lauk on Filipus anyo obam kuruhukdeg, ninim welatuhuk.

⁹At ahwelani duhum on enebe ohwan aben og-enebuk fug angge wereg lit, Allah wene hweag-esauk katswa.

¹⁰ Ninim wereg lit, nukoho dorangge hag welatuhuk mu, at Allah wene nigon hweag-esauk on nabi unuk Agabus anyo o Yudea en nenesa wahasi.

¹¹Nenesa wahasireg, at Paulus ombahaluk loloho wasireg, at enggik eyog sabu het-dauk kwit, “An Paulus ombahaluk fam nenggik neyog het-dihi su hag, it Yahudi o Yerusalem wereg on omano en at ombahaluk su onggwareg on o Yerusalem lahu mu, airoho het-duhupdeg it dagma on og-esahup, ulug, Allah Aheime en hweag-nutuk halug, hweag-hesauk kahi,” ulug, hweag-nesasi.

¹²Hweag-nesasi mu, nenesanggo hole folug, it nenori o Kaisarea etma wereg on inim, nit inim en Paulus elaheg en alele wauk kwit, “O Yerusalem etma la fug, nenowe,” ulug, alele wauhuk men,

¹³at Paulus en uruk kwit, “Hit an nobahet oba yag-napuk kahep ma, nenenda anggin amag ulug uruk kahep a? Eleg. An o Yerusalem lahuk mu, Tuhan Yesus obahet sabu het-nabeheg, nowareheg, ai nabuhup ulug, mundoho wenggeleg ma, hit nunggwelug uruk kahep?” ulug, hweag-nesasi.

¹⁴Hweag-nesasi mu, hweag-ereheg neg duruhuk men, holduk katsi fug mu, “Allah en enda boruk ale dip-ukwag,” ulug, nenele eleg atuhuk.

¹⁵Etma nukoho dorangge welatuhukdeg, nenesum enggan dug-dalug o Yerusalem lauhuk.

¹⁶At Manason,[33] o Siprus on atam Yesus wene wasi on anyo, ketia o Yerusalem wereg ma obam elamna ninim welamag ulug, it Kaisarea on Yesus ele wausa on en hondog-neneplug nenobahaik lausa.

¹⁷O Yerusalem kwik lauhuk mu, it Yesus omaliki etmano en enahayegdoho og-nenepswa.

¹⁸Og-nenepswa ma, noholug, likia at Paulus ninim Yakobus ha lauk men, it Yesus omaliki hwal-enepuk on inim wereg ma esa lauhukdeg,

¹⁹at Paulus anyo en dang-eneplug, Allah en duruk kweleg, it dagma on debeseil lauk katuhuk ale anyo bilinggoho hweag-esasi.

²⁰Bilinggoho hweag-esauk mu, enesanggo holswareg, it mundoho en Allah unuk mot-duswa. Allah unuk mot-duswareg, iren uruk kwit, “Paulus nenere. It Yahudi on di ap su ap deng humdoho Yesus wene demdoho bousa famen, it mundoho Allah Wene Melaleg anyo enenda ai fam neg dipdeg lit, dil lauk su esauk kahen a?

²¹Hat hweag-esauk kahen ale anyo it mundoho holswa. Haren it Yahudi on ap homi dagma on enenggelegma inim wereg on hweag-esauk kwit, At Musa en melalfag wene embeseiyek, uruk kwit, Hit henomaliki enahap baleheg, nit Yahudi nenap duruk kahe ale deheg, duk fug, ulug, hweag-esauk kahen ai enesanggo holswa.

²²Aireg ma, hat waharihindeg suma welahen ale enesanggo holusa ma, ketia nit nangginoho dehe halereg?

²³ Eleg. Nit ketia hweag-hutuk kahe wene anyo neg dimihin halug, fano. Ap enebe ohwan en Allah abug baloho, Nit diroho duhuk, ulug uswa on suma ninim welahe ai,

²⁴ketia hat inim og-eneplug lamihindeg, Allah il hanim henobam eneko fahat-dalug, it enoruk balukwag ulug[34] onggo haren feik lakiyug. Onggo feik lamihin ai fam, Allah Wene Melaleg hat inim duruk mu healug, Paulus inim duruk mu hehe ma, indip eleg ma hehe, bolusa.

²⁵ Ne, it dagma on en Yesus awene demdoho bousa on ai re, Kembu fahet foruk on na fug. Mep na fug. Di angge su angge waratuk on mep wilipuk eleg halug na fug. Hambena duk fug, ulug, nenenda wenggele folug, lisu baloho mon-enepuhuk,” ulug, hweag-utswa.

²⁶Hweag-utswa ma, at Paulus en ap enebe ohwan anyo og-eneplug lasi. Og-eneplug lasireg, noholug, likia at inim Allah il hanim enobam eneko fahat-dalug, Allah obam wirigmu kuswareg, it Allah il hanim enobam eneko fahat-dalug wereg lit, “Nukoho ai salim nenemu hundomog Allah obahet waroho fohuk,” ulug, sali hweag-esasi.

²⁷Hup sabiren nohoul ulug duruk men, it Yahudi o propinsi Asia on en at Paulus ebe Allah obam wirigmu kuruk mu inil hausareg, it ap homi humdoho kabogdeg on enenda kwelap-enepuk kwit, ebe bekit sene folug, “Israel on yaho! Ap su, di o su o hweag-isil lauk kwit, nit Israel nenap duruk kahe ale inim, Allah en Melaleg Wene inim sebele feheg, o wirig su eleg aruhu eheg, duruk on anyo ebe su sen-nesakiek! At anyo ap Yunani on og-eneplug Allah obam wirigmu kwik watlug ousama siahapdoho feheik,” ulug, enele bag ulug, hweag-esausa. (

²⁹ At Trofimus o Efesus on anyo Paulus inim o Yerusalem lauk mu esausareg, Paulus en walug Allah obam wirigmu kwehesa bolug, uswa.)

³⁰Hweag-esausa ma, o etma ap homi humdoho kabog-dik wahausareg, at Paulus enenggik sene folug, Allah obam wirigmen lisoho wilibi folug, sok latswa.

³¹Sok lare folug, warukoho lit duruk kweleg, “O Yerusalem mundoho sel-kwel duruk,” ulug, it sehen foroho on enowe komandan Roma on anyo hweag-irik lausa ma,

³²at anyo en autsi it sehen foroho on inim, it enowesi wereg on anyo inim hondog-eneplug buroho eneluluk waharuk mu inil esausareg, it Paulus watul ulug duruk katswa on embeseswa.

³³Embeseswa ma, enowe anyo wahasireg, Paulus enggik seneko, “Bosie sabu biren fam het-diek,” ulug, hweag-esasireg, “Ap su sa? Ne, at nangginoho deheik ma, watul ulug duruk kahep? Hiren furoho iek,” ulug, hein og-enepsi.

³⁴Hein og-enepsi mu, it ap homi humdoho kabogdeg on anyo eke en eheg, eke en eheg, uruk kwit, enele sel-kwel uruk kweleg, indip heraruk fug ale atsi mu, “Walug, nenobam olma lakiek,” ulug, hweag-esasi.

³⁵Hweag-esasi mu, walug yal helep fam belaregma aik lausa ma, it ap homi humdoho kabogdeg on anyo enolok en, “Watul,” ulug, kibik-dil lauk en, it sehen foroho enap en Paulus ebe hamboko olma kwelabe fousa.

³⁶It ap homi humdoho kabogdeg on anyo en mutlug enele yererag-bererag il lauk kwit, “Mundoho wariek aho,” il enemitmit sup-dil lausa.

³⁷Olma kwelapul ulug duruk kweleg, at Paulus en it sehen foroho on enowe komandan anyo hweag-utuk kwit, “Nowe, wene an eke hweag-hirik?” Ulug, hein og-hasi mu, aren de, “Hat Yunani enele holukdeg lahen hihi.

³⁸Ai halug, at ap Mesir on eke en, Nenowe fahat-nenesug laruhu nerim, ulug, ap homi enenda minggit-enepsireg, ap homi humdoho 4.000 hag og-eneplug leimu ap homi elegma feseik lasi anyo re hat de fug hiihi,” ulug, hweag-itsi.

³⁹Hweag-itsi mu, at Paulus en, “Ai an fug. An Yahudi on, o propinsi Kilikia o sili humon Tarsus en endag-atihik. It ap homi an wene eke hweag-esamin fano a?” ulug, hein og-hasi.

⁴⁰Hein og-hasi mu, “Yu o. Hweag-esakin,” hweag-itsi mu, at Paulus yal anyo fam lehoma lahasireg, enggik en, “Bok welamek,” hweag-esasi mu, enele eleg atswa ma, Ibrani enele fam hweag-esauk kwit,