Read Ninia Yali KISAH RASUL-RASUL 23 Bible Online

KISAH RASUL-RASUL 23 - Ninia Yali bible

KISAH RASUL-RASUL 23

¹At Paulus anyo walug, bul unduhuk feik lasi mu, it wene bilingguruk on anyo il fu esauk kwit, “Nori, an Allah apma wereg lit, endam et angge ketia inim nakol boruk kwit, dil noruk kwit, fano neg duruk kahi mu nenda seroho welahi,” ulug, hweag-esasi.

²Hweag-esasi mu, Imam Agung Ananias anyo en, it Paulus aluluk unduhuk wereg on anyo hweag-esauk kwit, “Ambilik sahaloho wariek.”

³ Hweag-esasi mu, at Paulus anyo en, “O owag siagdeg famen, orohole fanoroho ulug, ahalue kuron watuk anyo hag hahap fam neg fano welahen ma, Allah en mundoho howaruhu. An Allah Wene Melaleg higitdoho dirihik a, eleg a? ulug, nawene bilinggimin ulug duruk kahi famen, hat nowarukwag ulug ap hautsi hweag-esehen ai fam, haren neg Wene Melaleg anyo sahalmin ulug, duruk kahen hihi,” ulug, hweag-itsi.

⁴Hweag-itsi mu, it ap eke eta wereg lit, “Hat imam agung anyo enggali watmin ulug uruk kahen a?”

⁵ Hweag-utswa ma, at Paulus en, “Yehei e, nori! At Allah il hanim duruk on leho de ai fahet, napelegdeg lit ihi, nori. At Allah en, Henowe apma henobaharihik anyo henele siag on obam uk fug, ulug, lisu balfag wene an nolukdeg kweleg, ihi,” ulug, hweag-esasi.

⁶ Hweag-esasireg, at Paulus anyo en, it wene bilingguruk on foma ap Saduki on, it foma Farisi on wereg ale enegdeg ma esasireg, hweag-esauk kwit, “Nori. An de Farisi on, nombasi inim Farisi on neg deg ma, nit waratlug, neneluk apdoho inamuhuk ale ai fam nenda dipdeg halug, nawene bilinggukwag ulug wereg ma hisihi,” ulug, ele humon fam hweag-esasi.

⁷ It Saduki on anyo en de, “Ap homi waratlug eneluk apdoho inamuhup fug. Boholma yonggo noruk on inim, ap homi eneheime inim, ai oho wereg on mundoho eleg,” uruk famen, it Farisi on anyo en neg de, “Ai mundoho wereg,” uruk mu, it Farisi on inim, it Saduki on inim suahal uruk kwit, it kabogdeg on anyo minggit-atswa.

⁹Minggit-atswareg, enele yererag-bererag uruk kwit, it Farisi on Allah wene melaleg hwalduk on guru agama anyo foman, “At su siag duruk eleg on hehe. Ap homi eneheime eke en hweag-itsi fam uruk ane? Ite, it boholma yonggo noruk on eke en hweag-itsi fam uruk a?” ulug, enele humon fam suahal uswa.

¹⁰It suahal humon uruk mu, it sehen foroho on enowe komandan anyo en, at Paulus eke en liseheg, eke en liseheg, duruk kwit, waruk nolug, autsi hweag-esauk kwit, “It kabogdeg wereg on enenggelegma kwik laluhupdeg Paulus senetlug walug henobam kwelabik lakiek,” ulug, hweag-esasi.

¹¹Kwelabik lausa ma, o hup atsi mu, etma wereg ma Tuhan Yesus at Paulus aluluk wahasireg unduhuk lit, “An nele o Yerusalem furoho fagdoho hweag-esauk kahen higitdoho, fobik o Roma etma hweag-esa lahun angge re, henda hambukdoho welamin,” ulug, hweag-itsi.

¹²O sekan disi mu, it Yahudi on foma kabog-debelug enele ling-long matuk kwit, “At Paulus waruk fug angge en, nit siburu inim, ik inim ai na fug angge welamul,” ulug, Allah unuk yiko yeng balswa.

¹³It enebe 40 foma inim kabog-debelug ebe waruhuk ulug, wenggelswa.

¹⁴Wenggele folug, it Allah il hanim duruk on imam enowesi omano inim, it Yahudi enowesi inim, it wereg ma enekit lausareg, “At Paulus waruk fug angge en di angge su angge nauk kamul fug, ulug, Allah unuk yiko yeng balehe ma,

¹⁵ketia hit inim, it wene bilingguruk on inim, Paulus ekenim hein waul en mondorik ma, ulug, at sehen foroho on enowe komandan anyo we seiale yonggo mondoriek. Ne, nit kwema kahale folug wereg ma at waharuk halug waruhuk,” ulug, hweag-esausa.

¹⁶At Paulus waruhuk ulug kwe ai fam kahalik lahuk, wenggelswa ale, at Paulus erek amloho holsireg, at Paulus it sehen foroho enap enobam wereg ma kwisireg husumbi hweag-itsi.

¹⁷Hweag-itsi mu, at Paulus anyo en at komandan apma wereg on eke, “Ma,” hweag-itsireg, wahasi mu, hweag-utuk kwit, “Nowe. At nimi su henowe komandan wene eke hweag-irik lowag ulug, hondoholug lag,” hweag-itsi.

¹⁸Hweag-itsi mu, at anyo hondoholug enowe aluluk feik lasireg, “Paulus enggik hetdoho wereg lit, Ma, hweag-nereheik ma, lahi men, Nimi su eke henowe hweag-omag ulug walug lag, hweag-nereheik ma, walug wahi,” ulug, hweag-itsi.

¹⁹Hweag-itsi mu, enowe komandan anyo en, nimi anyo enggik sene folug, amumu walug lasireg, dohwen hein og-hauk kwit, “Hat wene hweag-nitmin ulug wahen halug furoho in,” ulug, hein og-hasi.

²⁰Hein og-hasi mu, nimi anyo en, “It ap Yahudi on anyo en seiale sono hat Paulus walug, it wene bilingguruk on wereg ma ekenim furoho hein waul en wamag, ulug, hweag-hirik wamuhup ulug, wenggelehesa ma,

²¹hweag-hirik waharuk halug enele holuk fug. It Yahudi on enebe 40 en foma inim at Paulus waruk fug angge wereg lit, siburu inim ik inim na fug angge welamuhuk, ulug, Allah unuk yiko yeng balswareg, hat nangginoho imisi, ulug, kwema kahalduk kwit, wereg,” ulug, hweag-itsi.

²²Hweag-itsi mu, komandan anyo en, “An hweag-nerehen ale ai ap amu on eke hweag-esa fug,” ulug, obam lowag ulug, monde fesi.

²³Hweag-itsireg, it sehen foroho on at apma wereg on biren anyo, “Manik,” wol-enepsireg, wahausa ma, hweag-esauk kwit, “Hup anggo jam 9 fam Kaisarea lowag ulug ap sehen foroho on enebe 200 inim, kuda fam hweriako lauk on enebe 70 inim, ap enebit foroho on enebe 200 inim, mundoho fik-fouk duruk kamek.

²⁴Duruk kamluhupdeg, at Paulus anyo fahet kuda eke wag laluhupdeg, anyo fam hwerie folug, aben Paulus waruk nolug, ebe hwililipdoho, ap nenowe Gubernur Feliks akit feik lowag ulug, hweag-esaluhup,” ulug, hweag-esasi.

²⁵Hweag-esasi mu, fik-fouk duruk kweleg, at komandan en lisu balduk kwit, diroho balsi.

²⁶“Nakni gubernur hanggilug wereg on, Feliks. An hamloho Klaudius Lisias en dang-hapuk kwit wene eke hweag-hirik.

²⁷Ap mondorik waharuk kahi on su re, it Yahudi on en sene folug mundoho watul ulug duswa man, An o Roma on, uruk mu nesanggo holdihikdeg, nautsi ninim ahap wendatuhukdeg,

²⁸Indip ke fam watul uruk mu esaul, ulug, walug it Yahudi enewene bilingguruk on enekit feik lauihik.

²⁹At anyo it Yahudi enewene melaleg diroho diyug, airoho diyug, wene sebelsi ulug, enele obam dopno-hausareg, iren, Mundoho watul, eheg Enenggik hetdoho kwelap-enepukmu enggik hetdoho kwelapul, eheg, uswa ai, indip eleg kweleg uruk mu esauihik.

³⁰Esauihik men, watul ulug wenggelswa ale yonggo hweag-nerehesa ma, nesanggo holihireg, hat hakit mondorik waheg, ne, it enele obam dopno-hausa anyo inim fagdoho hweag-homag ulug, Hweag-irik lakiek, ulug, hweag-eseheg, dihi ulug, an Klaudius Lisias en hweag-hirihi, nakni,” ulug, lisu balsi.

³¹Lisu balsireg, “Walug lakiek,” ulug, hweag-esasi higitdoho, autsi omano en o hup anggo Paulus hondoholug o Antipatris etma wahausa.

³²Hondoholug monde feik wahausareg, noholug, likia, it kuda fam lauk on anyo Paulus feik lowag ulug mondorik wahausareg, enembol somban enobam lausa.

³³Lausa ma, it anyo o Kaisarea kwik wahausareg, lisu baleg anyo enowe unuk bogdeg gubernur og-irik wahausareg, “Paulus ebe su walug wahe,” ulug, at aluluk feik wahausa.

³⁴Ne, at ap gubernur anyo en, lisu baleg kumu hasireg, Paulus hein og-hauk kwit, “Hat hobam kema on?” ulug, hein og-hasi mu, aren, “An nobam Kilikia on,” ulug, hweag-itsi.

³⁵Airoho hweag-itsi mu, at gubernur anyo en, “Wene hobam dopno-heauk on etma wamuhup halug, indip hera-duhuk,” ulug, Paulus hweag-itsireg, “Herodes o witsimu etmano walug laluhupdeg, furoho foroho welamluhup,” ulug, omaliki anyo hweag-esasi.