Read Ninia Yali KISAH RASUL-RASUL 25 Bible Online

KISAH RASUL-RASUL 25 - Ninia Yali bible

KISAH RASUL-RASUL 25

¹At Festus anyo unduhuk fousa ma wahasireg, hup henahan noholug Kaisarea en o Yerusalem lasi.

²Yerusalem lasireg wereg ma, it Allah il hanim duruk on imam enowesi anyo inim, it Yahudi enowesi inim, anyo en at Paulus obam dopno-hausa wene fagdoho hweag-utswa. Kwe fam waharuk mu kahale folug, Paulus watul ulug wenggelswareg at Festus, “Yu o,” ukwag ulug, lalduk kwit, “Nenakni, at Paulus o Yerusalem wamag ulug hweag-imin,” ulug, hweag-utswa.

⁴Hweag-utswa ma, aren, “Eleg. At Paulus anyo o Kaisarea sabu hetdoho foroho wereg ma, an den nukoho dorangge welatlug etma lahuk mu,

⁵ap henowesi foma wene wenggelduk on foma ninim lahukdeg demdoho at siag disi halug, iren etman neg hweag-omag, ulug, ninim lahuk,” ulug, hweag-esasi.

⁶It inim wereg lit, hup liginen hag ane, numen hag ane noholug o Kaisarea wahasireg, hubet wene enetukmu hweriatsireg, at Paulus walug wamag ulug yonggo mon-enepsi.

⁷Yonggo mon-enepsi mu, walug wahausa ma, at ebe bul wereg kweleg, it Yahudi Yerusalem en wahausa on omano inatlug, maserebelug wereg lit, at Paulus disi ale indip eleg kweleg, “Diroho disi, airoho disi,” ulug, alongdoho obam dopno-hausa.

⁸Obam dopno-hausa ma, at Paulus anyo en along bal-dauk kwit, “Eleg, nori. Allah Wene Melaleg nit Yahudi duruk kahe on anyo sebele feheg, Allah obam wirigmu siahap deheg, nenowe kain on Kaisar awene sahaleheg, duruk katihik de fug,” ulug, hweag-esasi.

⁹Hweag-esasi mu, at Festus anyo en it Yahudi on at neg enahayeg boukwag ulug, at Paulus anyo hweag-utuk kwit, “Hat diroho dirihin uruk su, o Yerusalem lahundeg an nil hanim etman bilinggik lahun fano a?” ulug, hein og-hasi.

¹⁰Hein og-hasi mu, at Paulus en, “At nenowe Kaisar apma on en wene bilinggurukmu suma oho unduhuk welahi mu, an nobam dopno-neausa ale su, suman wene bilinggul fano. An den it Yahudi on siahap enebuk fug angge welatihik, hat holukdeg ma,

¹¹siag duruk halug enowatuk anyo on eke demdoho dirihik halug ai, nowatluhup fano famen, nobam eleg kweleg, uruk mu, it enenda fanoroho nowarukwag ulug nebe og-esehen ha fug alereg. At Kaisar en nobahet wene biling-nabukwag,” ulug, hweag-itsi.

¹²Hweag-itsi mu, at Festus anyo en, at autsi wene bilingguruk on anyo inim enemumen enele matswareg, “Kaisar en nobahet wene biling-nabukwag, ulug, hweag-nerehen ma, Kaisar weregma mon-habuhuk,” ulug, at Paulus anyo hweag-itsi.

¹³Ai en fobik, it Yahudi enowe unuk bogdeg Raja Agripa anyo inim, erek Bernike inim, o Kaisarea kwik lausareg, at Festus dang-dul ulug, ha lausa.

¹⁴Ha lausa ma, etma hup humdoho noholug, at Festus anyo en, “At eke Feliks en sabu hetdoho fesi on suma wereg,” ulug, at Paulus awene it Yahudi enowe unuk bogdeg Agripa anyo fagdoho hweag-itsi.

¹⁵Hweag-utuk kwit, “An o Yerusalem wereg ma, it Allah il hanim duruk on imam enowesi anyo inim, it Yahudi enowesi inim anyo en, Airoho disi mu, obam dopno-halug, haren fagdoho enggali wariyug, ulug, hweag-nutswa ma,

¹⁶an den, it hweag-esauk kwit, Nit ap o Roma on ai en, it foman wene ap eke obam dopno-hauk halug, at ap onggwareg ebe eleg kweleg, awene bilingge folug, ebe warukwag ulug og-esauk kahe fug. Ite, at onggwareg ili along bal-damin ulug, duruk kweleg, awene bilingge folug neg de, warukwag ulug og-esauk kahe, ulug, hweag-esauihik men,

¹⁷it mundoho suma kabog-debelug wereg ma, an anunuroho fug, hup misig noholug, hubet an wene enetukmu hweriatlug, ebe wag lowag ulug mon-enepihik.

¹⁸Mon-enepihik mu, wag lalug feik wahausa ma, it anyo en wene obam dopno-hausa on anyo inatlug, Siag diroho disi, ulug, ulusa berihik famen, wene eke hweag-utswa fug.

¹⁹We it Yahudi enewene duruk ale inim, eke ap unuk Yesus mundoho waratsi famen, Paulus en, Eleg o, at mundoho oluk wereg, uruk wene inim, uruk kwit suahal uswa ma,

²⁰wene ai on ai fureberuk kahi fug mu, nangginoho indip hera-dimin berihikdeg, Hat hobam dopno-heausa ai, o Yerusalem en hobahet wene bilinggukwag ulug mon-habuhuk fano a? ulug, hein og-hauihik.

²¹Hein og-hauihik mu, at Paulus anyo en, Kaisar nobahet wene biling-nabukwag ulug, sabu hetdoho kwelap-enepukmu suma welatmin, hweag-nitsi mu, an den nautsi hweag-esauk kwit, Fobik Kaisar akit mondoruhuk en hit furoho foroho welamek, ulug, hweag-esauihik,” ulug, bilinggoho hweag-itsi.

²²Bilinggoho hweag-itsi mu, at Agripa anyo en, “At Paulus ele an nesanggo holuhuk nenda,” Hweag-itsi mu, at Festus anyo en, “Hubet at ele hesanggo holuhun,” ulug, hweag-itsi.

²³Hweag-itsi mu, hubet Agripa erek Bernike inim, it sehen foroho on enowesi inim, it o etma on enowesi inim, enenggilug bolug enele eleg kweleg, o enele matukmu etma kuswareg, at Festus anyo en, “At Paulus walug, feik manik,” hweag-esasi mu, feik wahausa.

²⁴Feik wahausa ma, at Festus anyo en, “Nenakni Agripa inim, hit ninim kabog-dehe on suma, hit mundoho wene eke hweag-hesa. It Yahudi o Yerusalem on en o suman enele yererag-bererag uruk kwit, Ap su oluk welaruhu fug, mundoho wariek, ulug, hweag-nutuk anyo hun ebe su hakiek.

²⁵Wariek, hweag-nutuk men, siag duruk mu halug, enowatuk on eke higitdoho disi fug mu hauihik men, at anyo en, Kaisar nobahet wene biling-nabuhu en lahuk, ulug, hweag-nitsi mu, mondoruhuk ulug berihik.

²⁶Airoho berihik famen, at disi on eke an lisu baloho nenowe kain on Kaisar obahet mondotuk on eleg en, at disi on eke furoho uruk halug neg de, lisu Kaisar obahet baloho mondoruhuk en, at ebe walug, hit mundoho henekit wahi. Ebe indip ai, hat nenakni Agripa en indip hweahamihin en hakit walug wahi.

²⁷Wene obam dopno-hausa anyo fagdoho hweag-nutuk fug mu, enggik sabu hetdeg mondorihi ha ale siag deg ma hauk kahi,” ulug, hweag-esasi.