Read Ninia Yali KISAH RASUL-RASUL 26 Bible Online

KISAH RASUL-RASUL 26 - Ninia Yali bible

KISAH RASUL-RASUL 26

¹Hweag-esasi mu, at Agripa en Paulus hein og-hauk kwit, “Hat dirihin wene ai honggwareg en furoho hweag-nimin,” ulug, hein og-hasi mu at Paulus en imin ulug, enggik fam dang-duruk kwit,

²“Yehei Agripa nakni. It Yahudi on en, Diroho disi, airoho disi, ulug, nobam dopno neausa ai, yoho su fam hat hil hanim bilinggoho hweag-hitmin ai, nahayeg aha.

³Nit Yahudi on duruk kahe ale inim, suahal uruk kahe ale inim, hat mun holukdeg ma, hat henda fureberuk kweleg, hweag-hirik.

⁴O endam nimi dotdeg li en nowesi nautsi ninim o Yerusalem wereg lit, duruk katihik anyo it Yahudi on mundoho eneluk.

⁵ An nebe endam en ap Farisi on anyo ninim wereg lit, Wene diroho diyug, airoho diyug, hweag-nesebag on anyo furoho wauk katihik anyo, it enelukdeg ma, hweag-humlusa behesa halug, iren hweag-homag.

⁶Ne, ketia Allah en nenombasi wene abug hweag-esebag anyo nenda dipdeg lahi ai fam og-naplug wene bilinggul ulug nobahaik wahep hisihi.

⁷Nit Yahudi nenunggul unuk nesanggoen momal-nenepfag on anyo en, Og-nesahu, ulug, nukoho inim, hupmu inim, Allah unuk mot-duruk kahe anyo nenda dipdeg lit, welahi ai fam it Yahudi on en nowatul ulug nobam dopno neausa man, nakni.

⁸Nowesi. Hit nunggwelug at Allah en ap homi waratuk on enelugapdoho unduhuk fesouk fug alereg boruk kahep?

⁹ An oho at Yesus Nazaret on ai, at unuk siahapdoho femin berihikdeg,

¹⁰o Yerusalem wereg lit, airoho duruk katihik. Duruk kwit, it Allah il hanim duruk on imam enowesi anyo en hweag-nutswa fam it Yesus omaliki humdoho enenggik hetdoho kwelap-enepukmu kwelabe feseruk katihik. Ai neg dirihik fug. Ite, iren, Enowatul a, eleg a? uswa halug, an den, Enowatul fano, ulug, hweag-esauk katihik.

¹¹It Yahudi somban uruk obam domog, it demdoho boruk on embesoukwag ulug enowatil lauk katihik. Nolokdoho lauihik halug, ap homi amu on enobam o yatma etma enowatmin ulug, mug-eneplug lauk katihik,” ulug, hweag-esasi.

¹²Hweag-esasireg, ekenim hweag-esauk kwit, “Airoho dil lauk mu, nukoho eke fam, Allah il hanim duruk on imam enowesi en, Diroho diyug, ulug, unduhuk nobahausa ma, o Damsyik kwema lauk kwit,

¹³o nukoho hag lauk men, mo seleg ai dotdeg hag famen, boholman seleg humon nori ninim lauk katuhuk anyo ninim nenobam helag-felag angge dik waharuk mu, hauihikdeg,

¹⁴nit mundoho nenorohole belabeg ying-atuhuk mu, Ibrani enele fam hweag-nutuk kwit, Saulus yei, Saulus yei! Hat nunggwelug an hirik-herimdoho nowatuk kahen? Wam sapi domuk ambiang wereleg on fam silduk men, erim en domuk ambiangma dungdoho wat-dauk anyo hag, hat airoho wat-dowag ulug duruk kahen a? ulug, uruk mu nesanggo holdihikdeg,

¹⁵Yehei, nowe! Hat sa? ulug, hweag-itihik mu, aren, Eleg. Haren an hirik-herimdoho nowatuk kahen anyo re an Yesus.

¹⁶An namingming angge atlug, hat ketia an[35] hil neehen inim, fobik hil neahun inim, ai wene hweag-isil lauk karuhun ulug eneko hobahamin ulug, hea wahi mu, inamin.

¹⁷It ap Yahudi su inim, it ap dagma on holduk eleg on inim, enekit mon-habuhuk mu, etman an den hahap wendat-hapuk karuhuk.

¹⁸It anyo enenda mum hag wereg ma, seleg apdoho feseheg, at Iblis apma fesesi anyo Allah apma feseheg, duhun en mon-habuhuk. It anyo enenda an nobam dip-debelug demdoho boruk halug enesiag Allah en elehapdoho feselug, at omaliki momaloho eneko fesesimu etma inim seberoho fesoukwag ulug mon-habuhuk, ulug, hweag-nitsi.”

¹⁹“Ai halug, Agripa nakni, boholman an na fam hweag-nutuk mu hauihik anyo an duk fug angge welahi fug.

²⁰ Hweag-nitsi ale anyo atam o Damsyik inim, o Yerusalem inim, ai en o Yudea ambol fil alukwe fil inim, it dagma on holduk eleg on inim hweag-esauk kwit, Hit Allah wene neg wauk kwit henenda wenggele folug henesiag fagdoho embeseruk kamek. Di deheg su deheg, duruk kwit, Allah wene wauk kwit enesiag demdoho embeseswa ulug hesahup en, duruk kamek, ulug, hweag-esauk katihik.

²¹Airoho hweag-isil lauk katihik ai fam it Yahudi on en Allah obam wirigmu etman sen-naplug nowatul ulug duswa man,

²²Allah en let-napsi mu, bekit ketia su noluk wereg lit, hit ap humon inim, enapma on inim, hweag-hesauk kahi. Hweag-hesauk kahi su wene amu on hweag-hesauk kahi fug. Ite, it Allah wene uruk katfag on nabi anyo inim, at Musa inim, it mundoho en, Diroho duhu, ulug, abug hweag-esebag wene anyo fagdoho hweag-hesauk kahi.

²³ At Allah en eneko unduhuk febag anyo it Yahudi on inim, it dagma holduk eleg on inim, o seleg apdoho feseruk kamag ulug, nenekdoho wararuhureg, waratlug laukmen, atam on at oluk inaruhu, ulug, ebag wene anyo hweag-hesauk kahi,” ulug, hweag-esasi.

²⁴At Paulus en wene ai mundoho hweag-esasi mu, at Festus ele humon uruk kwit, “Paulus ao! Hat wenenebo dehendeg uruk kahen a? Hat di wene su wene wauk katihin fam wenenebo hendama kwisi ane?”

²⁵Hweag-itsi mu, at Paulus en, “Festus nakni. An wenenebo re fug. An nenda wereg lit demdoho hweag-hesauk kahi.

²⁶Agripa nakni. Wene hweag-hesauk kahi su, heraho ale fug. Wene ihi anyo hat mundoho holuk hiihi. Wene ai mundoho holukdeg ma, nakol eleg lit hweag-hesauk kahi.

²⁷Agripa nakni. It nenombasi Allah wene hweag-esauk katfag wene demdoho boruk kahen ane? Demdoho boruk kahen noluk.”

²⁸Hweag-itsi mu, at Agripa en, “Haren neg dorangge ehen eta fam Kristus awene wauk on Kristen apdoho nobahamin ulug behen a? Airoho duk fug alereg.”

²⁹Ulug, hweag-itsi mu, at Paulus en, “Nakni, hat neg wamihin ulug uruk kahi fug. Hat inim, it ketia enesanggo hol-napuk on mundoho inim, an nenggik het-napswa hag het-heneplusa fug famen de, an Kristus awene wauihik hag ketia halug, ketia weheg, ne, fobik halug, fobik weheg, duhup ulug, an Allah hweag-utuk kahi,” ulug, hweag-itsi.

³⁰Hweag-itsi mu, at enowe unuk bogdeg raja anyo inim, enowe gubernur anyo inim, hwe Bernike inim, it ap homi hwerieg latswa on anyo inim, it mundoho inatlug,

³¹wilibik lausareg, “Ap ai siag duruk halug o sabu hetdoho kwelabe feserukmu kwelabe feseheg, enowareheg, duruk on airoho eke disi fug famen,” ulug, eke en eheg, eke en eheg, duruk katswareg,

³²at Agripa en Festus anyo hweag-utuk kwit, “At ap ai, nenowe Kaisar an nobahet biling-nabukwag, elep fug men, ketia enggik hetdeg anyo fiselaroho fela,” ulug, hweag-itsi.