Read Ninia Yali KISAH RASUL-RASUL 27 Bible Online

KISAH RASUL-RASUL 27 - Ninia Yali bible

KISAH RASUL-RASUL 27

¹O Italia og-neneplug kapal fam lahuk ulug enele maho folug, at Paulus inim, ap foma sabu hetdoho on inim, at Yulius, Kaisar apma wereg on, sehen foroho on lohwaleg enowe anyo en og-neneplug lowag ulug hweag-utswa.

²Hweag-utswa ma, kapal o Adramitium en walug wahausareg etma wereg ma, o propinsi Asia foma fil ik laut aegma o sili humdeg ma etma da kwil, ya kwil, lahuk ulug duruk mu, ha kuruhuk. Ap Aristarkhus Makedonia on o Tesalonika en wahasi on anyo ninim ha kuruhukdeg lauk kwit,

³hup misig noholug hubet o Siron aik lauhuk. Aik lauhukdeg at Yulius anyo en Paulus elaheg en, “Hori di angge su angge og-homag ulug kumu isil lamihindeg watmihin fano,” ulug, hweag-itsi.

⁴Etman kapal fam ik foma fil nindig-amuhuk ulug kuruhukdeg hol nenalukwe fil en firil waharuk kwit, kapal ambiang domag-hauk men, Siprus nindihip hil alulukwe o hol eleg ma etma lauhuk.

⁵Lauhukdeg, o propinsi Kilikia inim, o propinsi Pamfilia inim, nenelukwe nindihip hil lauk kwit, o propinsi Likia o sili unuk Mira etma nindig-aik lauhuk.

⁶Etma nindig-aik lauhukdeg, etman ap sehen foroho on enowe anyo en kapal etma Aleksandria en walug wahausareg, Italia laroho duruk mu hasireg, kapal ai fam kwelabe nenobahasi mu, lauhuk.

⁷Lauk kwit, kapal anyo hol en domahalug waheg duruk kwit, la fug ale nenepuk kweleg, hup humdoho nohweil, dohwen o unuk Knidus horog aik lauhuk. O hol anyo airoho neg duruk kweleg kwaniroho lauk kwit, ik yenggeleg hukdegma pulau Kreta alulukwe etman o aloanggenma Salmone nindihip hil lauhuk.

⁸Lauhukdeg, la fug ale nenobam siik-siagdoho lauhukdeg, o sili Lasea horogma etma o bumbuk eke unuk Kapal Fano Feik Waharukmu urukmu ai lauhuk.

⁹Etma anunuroho wereg lit, siburu na fug angge enambilik hweang hag debelug wereg ai salim[36] mundoho eleg atsi mu, o sielu duruk mu, nit siahap-nenebuk no la fug hag atsi mu, at Paulus en enelukdoho komo-enepuk kwit,

¹⁰“Nori, nit lauk kamuhuk halug mun siahap-nenebuhu hihi. Nenengge inim, kapal inim anyo neg eleg aruhu ai fug. Ite, nenebe inim siahap-nenebuhu hihi,” ulug, hweag-esasi men,

¹¹at sehen foroho on enowe anyo en, “At Paulus apeleg. It at kapal hwalduk ahun inim, at kapal onggwareg on anyo inim enelukdeg,” besireg, it uruk on neg mutlug lasi.

¹²O sielu watuk li kapal etma het-debelug welam ale siag deg en, it ap kapal fam yabuk duruk on foma en de, “Nit o Feniks lahuk halug de, o sielu watuk li etma fano nangno-hauk kahe halereg,” uswa. Ne, o Feniks ai, o pulau Kreta en ik unggut deg ma, kapal kwik waharukmu etma alukwe mo obuk uruk higitdoho selatan fil inim, utara fil inim etma wereg en bousa.[37]

¹³Bousareg wereg ma, selatan fil en hol sakoroho firil wahasi mu, “Nit wenggelduhuk anyo su aha ma, lakohon,” ulug, kapal la no ulug bosie manggen sabu ililig anyo lisoho yohware folug, lauk katuhukdeg, o Kreta horogma inggimu etma nenelukwe nindihip hil lauhuk.

¹⁴Lauk mu, ebereg eleg ma, ik yenggeleg kwenang hukdegma mo wilibik waharukmu utara fil en sielu firil waharuk kweleg,

¹⁵laul ulug duruhuk men, kapal anyo hol en ambiang kwaniroho og-neneplug lasi mu, kapal anyo ambiang hwaloho bekit la fug alereg en, “Hol en og-neneplug lowag,” ulug, hesangge lowag ulug embeseruhuk.

¹⁶Og-neneplug, ik yenggeleg kwenang hukdegma pulau unuk Kauda kabogdeg dorangge enamegma alulukwe hol eleg kwe lauhuk. Lauhukdeg, sielu en siahap-nenepuk kweleg, perahu doron anyo kapal anyo en sabu lit-halug lauk kahe ma amu am nolug,

¹⁷bearoho kapal humon fam kwelapuhuk. Kwelapuhukdeg, kapal ebe erap-duk nolug sabu omamneroho het-debelug, o Libia ik inggi fil horogdeg ma o Sirtis alulukwe etma, ik ahum horogdeg ma, ik inggimu kapal ambiang kweik-duk no ulug, sum suknig on hol en firil waharuk kwit, kapal walug lauk on anyo belaboho hwale foruhuk mu, sielu en og-neneplug lasi.

¹⁸Sielu en neg kapal anyo mundoho dalo-falo nenebil lauk katsi mu, hup misig noholug, hubet di angge su angge yohwareg on hwenanggoho ikma hwik-eseheg, ai en, hup eke noholug,

¹⁹di angge su angge kapal buhun-duruk on anyo enenggik fam hwenanggoho ikma hwik-eseheg duswa.

²⁰Hup humdoho nohoruk kwit, mo inim, sohwalanggen inim wilibik waharuk eleg kweleg, sielu neg firuruk katsi mu, “Nit ik en sebel-nenepmisi hehe,” ulug, boruhuk.

²¹Nit mundoho siburu na fug angge, hup humdoho nohweil lauhuk mu, at Paulus bul inatsireg, “Nori, o Kreta en laul fug irihik anyo holep man neg de, nenengge eleg aheg, siahap-nenebeheg, airoho neneplep fug. Fanoroho welala famen,

²²henebe eke waramluhup fug. Kapal neg de siag aruhu mu, henenda hambukdoho welamluhup ulug hweag-hesauk kahi.

²³An at Allah amloho deg ma, apma wereg lit, mot-duruk kahi mu, at anyo en yonggo mondotuk on malaikat eke hupmu hup anggo nea watlug,

²⁴Paulus yei! Hat hakol bouk fug. Hat Kaisar aluluk inaruhun. Ne, at Allah helaheg en hat hinim kapal fam wereg on su mundoho henahap wendat-henebuhu, ulug, hweag-nereheik ma,

²⁵kwenang hukdegma eke ik inggimu kapal ambiang kweik-dik lahu famen, at Allah hweag-nereheik ale dip-uhu demdoho boruk kahi mu, henenda hambukdoho welamek, nori,” ulug, hweag-esasi.

²⁶

²⁷Ik laut yenggeleg unuk Adria o sielu en dalo-falo nisil lauk kweleg, hup 13 en nohweil lauhuk mu, ne, 14 fam hup andundu it kapal hwalduk on anyo enendaman, “Ik inggimu horog aik wahe,” ulug, bousareg,

²⁸helep humon ililoho, “Ik ahum yatdeg ma haul a, eleg a?” ulug, ilirangge anyo belabe fousa man, 40 meter fam atsi mu hausa. Ai en, fobik wal-hauk men, 30 meter atsi mu hausa.

²⁹Hausareg helep fam kweik-duruk kwit ambiang erap-duk nolug, enekol en kapal bok amag ulug bosie manggen anggin on ohwan sabu ililoho kapal anggulumen ik ahummu belabe fousareg, o folo-folo sekan dukwag ulug Allah hweag-utuk katswa famen,

³⁰it kapal hwalduk on foma anyo en longgo ul boruk kwit, perahu doron anyo ik ahummu belabe fousareg, seiale uruk kwit, “Nit kapal ambiangman etman bosie manggen anggin on eke ililoho belabe foul en duruk kahe,” uswa famen,

³¹at Paulus en, “Kapal hwalduk on anyo kapal ilonggoma wereg fug halug ai, nenahap wendat-daul fug,” ulug, it sehen foroho on owe autsi inim hweag-esasi.

³²Hweag-esasi mu, it anyo en perahu doron anyo sabu dekikdoho belabe fousareg, ik en harulug lowag ulug embeseswa.

³³O sekan dimin ulug duruk kweleg, at Paulus en it anyo siburu nowag ulug enenda aho ware feseruk kwit, “Siburu na fug angge henenda firig lit, hup 14 fam nohoruhup mu, siburu nakiek.

³⁴Hit henebe eke ikma laheg, dot lohon siag aheg aruhu fug angge, fano henahap wendat-dahup en siburu nakiek”

³⁵ulug, hweag-esasireg, at Paulus en siburu eke oko it inil hanim Allah dang-debelug, kuroho nasi mu,

³⁶it anyo enenda hambuk atswareg, it mundoho inim siburu nausa.

³⁷Nit ap homi kapal fam lauhuk on anyo nenebe seberoho 276 en[38] deg ma,

³⁸siburu homoroho nauhukdeg, kapal se amag ulug, gandum inim hwenanggoho ikma belabe fousa.

³⁹O sekan disi mu re, it ap kapal fam yabuk duruk katswa on omano en, unggutmu ik inggi doalegma inil fu hausareg, o ebe deta ulug enapeleg lit en, “Kapal ebe orokum yaho feik lahe ha ale nangginig ahi?” bousa.

⁴⁰Airoho bousareg, kapal anggulumen bosie manggen anggin on sabu ililig anyo dekikdoho feheg, kapal ambiang hwalduk angge ililig anyo fisela-deheg, debelug, sielu en og-neneplug ik inggi doalegma laul ulug, sum suknoho ambiangma lahabe fousareg lauhuk men,

⁴¹ik anyo omamne en kapal anyo omamneroho ik inggimu kweik-dik lasi mu, ik en anggulumu mem-hauk kwit erapdoho fesi.

⁴²Duruk kweleg, it sehen foroho on anyo en, “It enenggik sabu hetdoho on anyo ik sapuk lalug, longgo uk nolug mundoho enowatul,” bousa man,

⁴³enowe anyo en, “Paulus fanoroho walug lamin,” besireg, “Enowaruk fug,” ulug, komo-enepsireg, “Hit sapuk heneluk on halug, hit dam ik ahummu kwik lalug ik inggimu wilibik lakiek.

⁴⁴Ne, hit foma sapuk henepeleg halug ai, e kahaleg inim, e kapal on meiyaleg inim, oma fam henenggik sene folug, enombolim lakiek,” ulug, hweag-nesasi mu, nit mundoho ik inggimu fanoroho wilibik lauhuk.