Read Ninia Yali KISAH RASUL-RASUL 3 Bible Online

KISAH RASUL-RASUL 3 - Ninia Yali bible

KISAH RASUL-RASUL 3

¹Nukoho eke salim, o hupmu hag jam 3 fam Allah hweag-utuk mu, Allah hweag-umul ulug, it Petrus, Yohanes nim, Allah obam wirigmu lausa.

²O kurukmu, unuk Sok Fano soalswama etma, ap eke elenggen siag angge endag-atsi anyo en, it ap homi Allah obam wirigmu kuruk on anyo fam heng-enepuk halug, di angge su angge og-utuk kamag ulug, bearoho hupmu hubet feik laheg neg duruk katswa anyo, mundoho feik lausa ma etma wereg ma,

³it Petrus, Yohanes inim, it Allah obam wirigmu kuruk mu esasireg, “Eke og-nemek,” ulug, heng-enepsi mu,

⁴ap anyo inil kumu hauk, kwit, at Petrus en, “Hat hil fu nesakin!” ulug, hweag-itsi.

⁵Airoho hweag-itsi mu, ap anyo en, “Yehe. Nunggwangge og-numlusa e?” ulug, il fu esasi.

⁶Il fu esasi mu, at Petrus anyo en, “Uang emas inim perak inim mun eleg famen, an foroho lahi on neg de eke wereg ma, og-hirik,” hweag-itsireg, “Yesus Kristus Nazaret on unuk fam, inatlug lauk kamin!”

⁷Hweag-itsireg, at Petrus anyo en enggik bekit fil seneko unduhuk foruk kweleg, ap anyo eyog inim elenggen inim omamne atsireg,

⁸feiyaloho inatsireg etma lag wag uruk katsi. Lag wag uruk kwit, hweik-sombo lahakeg duruk kwit, Allah unuk mot-dil, Petrus Yohanes inim Allah obam wirigmu kuswa.

⁹Allah unuk mot-dil lag wag uruk mu, ap homi inim inil hausareg,

¹⁰“Allah obam wirigmu Sok Fano soalswama etano di angge su angge heng-nenepuk on anyo fano aha su re. Yehei u!” ulug, yanderuswa.

¹¹At ap anyo en, Petrus Yohanes inim sen-enesug lit wereg ma, it ap homi mundoho Allah obam ilonggoma etma ambe eke unuk Sokolma Salomo urukmu etma buroho kabog-dik waharuk kwit, “Yehei u!” ulug, yanderuswa.

¹²Kabog-dik waharuk on at Petrus il esasireg, it anyo hweag-esauk kwit, “Hit Israel henap su, yaho yei! Ap fano aha su, nunggwelug yanderuruk kahep? Nit fano duruk kahe ma, nenomamne fam ap su fanoap dehesa, ulug, hinil fu nesauk kahep a?

¹³ Abraham, Ishak inim, Yakub inim, nenombasi enakni Allah amingming angge Yesus anyo, at Pilatus en embesemin boruk kweleg, hiren, Niron ai fug, ulug, warukwag ulug, og-utuhup famen, Allah en mun leho fesi.

¹⁴ At ap siag duruk fug on, enda mun wenggeleg on anyo, At niron fug, ulug, at obalma ap enowatuk on eke foul, ulug, uruhup anyo, hit neg.

¹⁵At nenelugap nenepuk indip anyo watuhup famen, Allah en waratukmen oluk apdoho unduhuk fesi anyo ninil hauhuk mu, fagdoho hweag-hesauk kahe.

¹⁶Nit nenenda Yesus obam dip-debelug, demdoho boruhuk fam, ap heneluk on su anyo fanoapdoho omamne debeheik ma, wereg su. Nenendaman Yesus ai demdoho boruhuk fam neg fano aha ma, hinim wereg su, hit mundoho hinil hehep ai, nori,” ulug, hweag-esasi.

¹⁷Hweag-esasireg, “Yehei nori! Henowesi hinim duruhup ai, henepelegdeg lit, duruhup ai an noluk.

¹⁸Endam, Allah en, An namloho eneko unduhuk ferihik on Kristus ouk anggin-fanggin hauk karuhu, ulug, it Allah wene hweag-esauk katfag on nabi hweag-esauk kweleg, fagdoho hweag-esebag anyo dip-isi mu,

¹⁹Tuhan Allah en hit siag duruk kahep anyo ho-henepuk karuhureg, henahayeg henebukwag ulug, henenda wenggele folug, henesiag embeseiyek. Ai duruk halug, henobahet eneko febag on nenahap wendatuk on Yesus anyo mondorik waruhu.

²¹At Allah en, Airoho duhuk, ulug, o endam it at ele hweag-esauk katfag on nabi anyo hweag-esauk kweleg, ebag anyo dip-ukwag ulug, di angge su angge mundoho owan kerap duk fug kweleg, at Yesus boholma welaruhu.

²² At Musa en uruk kwit, Henakni Tuhan Allah en an mon-nabik wahasi hag,[4] at ele hweag-hesowag ulug ap nabi hiron eke henobahet mondorik waruhu. At waruhureg di wene su wene hweag-hesauk halug, holduk kamuhup.

²³ At Allah en hweag-utuk kweleg, hweag-hesauk anyo, hit sa mel sa mel holuk fug angge welamuhup halug, eneko henobahalug, siahap-henebuhu, ulug, at Musa en airoho ebag.

²⁴Ap Allah wene hweag-esauk katfag on Nabi Samuel hweag-esauk katfag hwili en, at ombolim wene hweag-esauk katfag omano mundoho, nit ketia duruk mu, hauk kahe wene su il wilibik watfag.

²⁵ It Allah wene hweag-esauk katfag anyo enombasi hit. At Allah en at Abraham hweag-utuk kwit, Hat endag-enebuhun fam, di o su o, di ap homi su ap homi mundoho fanoap enebuhuk, ulug, abug wene henombasi hweag-esebag anyo, hit henobahet ebag.

²⁶Ai halug, at Allah en at amingming angge oluk apdoho unduhuk fesireg, siag duruk kahep anyo embeseruk halug, fanoap henebukwag ulug, atam hit heneluluk mondorik wahasi,” ulug, at Petrus anyo en hweag-esasi.