Read Ninia Yali KISAH RASUL-RASUL 4 Bible Online

KISAH RASUL-RASUL 4 - Ninia Yali bible

KISAH RASUL-RASUL 4

¹It Petrus Yohanes inim, it ap homi anyo owan hweag-esauk kweleg, it Allah il hanim duruk on imam inim,[5] Allah obam wirigmu foroho enap enowe inim, it Saduki on inim wahausa.

²Wahausareg, it Petrus Yohanes inim at Yesus waratsi men, oluk apdoho unduhuk fesi anyo hag, ap homi waratuk on eneluk apdoho unduhuk fesehu wene hweag-esausa ma, enelok en,

³enebe sen-eneplug wilipswa. Enebe sen-eneplug wilipswareg, o hupmu atsi mu, hubet hweag-esahuk ulug, ap mon-enepuk on rasul biren anyo sabu hetdoho kwelap-enepukmu kwelap-enepswa famen,

⁴it hweag-esauk kweleg, holswa on anyo ap homi seberoho enebe 5.000 en demdoho bousa.

⁵Noholug, it Yahudi on melale feseruk enap inim, it enowesi on inim, it Allah wene melaleg hwalduk on guru agama inim, Imam Agung Hanas anyo inim, eke Kayafas inim, Yohanes inim, Aleksander inim, Allah il hanim duruk on enowe anyo owesi autsi inim, mundoho o Yerusalem kabog-duswareg,

⁷it Petrus Yohanes inim anyo eneluluk feseik wahausareg, hein og-esauk kwit, “Hiren ap fanoap duruhup anyo keroho duruhup? Sa omamne fam duruhup?” ulug, hein og-enepswa.

⁸Hein og-enepswa ma, at Petrus anyo Allah Aheime endama hoporoho kwik wahasireg, “Hit ap homi melale feseruk on inim, enowesi on inim, naknisi yaho!

⁹Ap elenggen siag on fano atsi anyo, Nanggoho fanoap duruhup, ulug, hein og-nesauk kahep ai,

¹⁰hit inim, it ap homi Israel on mundoho inim, hit mundoho heneluk amag ulug hweag-hesak. At ap anyo, fano atsireg heneluluk unduhuk wereg su, at Yesus Kristus Nazaret on, hit e salib fam dopnoroho ware foruhup mu, at Allah en waratlug lauk men, oluk apdoho unduhuk fesi anyo unuk fam fanoap duruhuk, ulug, hweag-hesauk kahe.

¹¹Allah en, Hit helep o wutuk on su en, o wutuk kwit, helep eke embeseruhup anyo, helep oboule doal-atsi, ulug, hweag-esebag ai, at Yesus, ulug, hweag-esebag.

¹²Allah en, Hit ap homi, di o su o mundoho ap amu on unuk fam henahap wendat-henebukwag ulug hweag-hesasi fug mu, at Yesus en neg de nenahap wendat-nenebuk alereg,” ulug, hweag-esasi.

¹³Hweag-esasi mu, it wene bilingguruk on mahkamah enap kabog-duswa on anyo en, it Petrus Yohanes inim anyo sekolah duk fug angge hesangge on hag welatswa famen, enekol eleg lit, hweag-esauk mu furoho esausareg, “Yehei o!” ulug, “Yesus inim noruk katswa on it su esehe,” ulug, yande-enepswa.

¹⁴Ap fanoap duswa on anyo Petrus Yohanes inim eneluluk unduhuk wereg ma hausareg, “Wene onggo ke hweag-umul?” ulug, bok welatswa.

¹⁵Bok welatswareg, “Dagma wilibik lakiek!” hweag-esausa ma, wilibik lauk kweleg, enemu en enele matuk kwit,

¹⁶“Ap su nanggin-enepul? Duk fug ale on duswa anyo, it Yerusalem on inil hanim mundoho fag atsi mu, niren, Eleg, ehe ha fug alereg famen,

¹⁷wene ai ekenim saha uk no, Yesus unuk fam ekenim uk fug angge, we bok welamek, ulug, bet-enepul,” ulug, uswa.

¹⁸Uswareg, nikangge kwik wamag ulug hwi-enepswareg, Petrus Yohanes inim kwik wahausa ma, it hweag-esauk kwit, “At Yesus unuk ekenim eheg, at unuk fam ekenim hweag-eseheg, uruk kam fug,” ulug, bet-enepswa.

¹⁹Bet-enepswa ma, Petrus Yohanes inim anyo en it hweag-esauk kwit, “At Allah ele holdul a? Hit henele holdul a? Allah il hanim hit de wenggel-hakiek.

²⁰Nenesanggo holeheg, ninil heheg, duruhuk wene ai hweag-esa fug angge bok ahe ha fug ale nenepuk mu, hweag-esauk kamuhuk neg,” hweag-esausa ma,

²¹ap anyo fanoap duswa halug, it ap homi mundoho en Allah unuk mot-duruk katswa esalug, enakol en, “Indip ke fam dopnoroho siahap enebul?” ulug, enele omamne fam bet-enepswareg, sabu fiselaroho wilip-enepswa.

²²Ne, at ap duk fug ale on fanoap duswa anyo ebe 40 tahun hag welatsi.

²³Fiselaroho wilibi feseswa ma, Petrus Yohanes inim anyo enori weregma lausareg, it Allah il hanim duruk on imam enowesi inim, it Yahudi enowesi on inim anyo en it hweag-esausa wene anyo bilinggoho enori hweag-esausa.

²⁴ Hweag-esauk on, it enesanggo holswareg it inim sebe atlug Allah hweag-utuk kwit, “Allah nenakni, bohol inim kwenang inim, ik laut yenggeleg inim, di angge su angge mundoho haren neg waldirihin.

²⁵ Nenomba Daud, hat hamingming angge Allah Aheime endama kwik watfagdeg, hat Allah en hweag-utuk kweleg, aren uruk kwit, It dagma holduk fug on en, nunggwe ulug enolok atswa? It enunggul unuk domog en, nunggwelug wene alemaroho wenggelswa?

²⁶It di obam su obam enowesi raja en, nunggwelug nenakni Allah inim, aren eneko unduhuk febag on inim, enowatul ulug, kabog-debelug ap esan wal-hauk katswa? ebag.

²⁷ Ebag anyo, o Yerusalem bumbuk hummu suma, it Herodes inim Pontius Pilatus inim, it dagma on inim, it Israel enap inim, hat hamingming angge siag duruk fug fano neg duruk on eneko unduhuk ferihin on Yesus anyo warukoho lit, demdoho kabog-duswa.

²⁸Hat henggik omamne fam di deheg su deheg duhu ale, atam wenggeloho ferihin anyo, mundoho dukwag ulug duswa.

²⁹Nenowarukoho lit, duruk su esakin, nenakni. Nenekol eleg angge wereg lit, hat hele hweag-esauk kamuhuk en, ulug, nenenda hambuk apdoho nenobahain.

³⁰It ouk enepuk halug, eleg amag ulug henggik bal-esakin. Hat hamingming angge Yesus siag duruk fug fano neg duruk on anyo unuk fam duk fug ale on deheg, enekol boruk on deheg, duruk kamuhuk en, nenebin!” ulug, Allah hweag-utswa.

³¹Allah hweag-utswa ma, o it weregma etano elek duruk kwit Allah Aheime enendama hoporoho kwisi mu, enekol eleg lit, Allah wene hweag-esauk katswa.

³² Etma wereg lit, it wene demdoho bousa on anyo enenda misig atlug wereg lit, di angge su angge, “Su hat hangge, su an nangge,” uk fug angge, we, “Nit mundoho nenengge,” uruk katswa.

³³It Yesus en eneko mon-enepsi on rasul anyo enele omamne fam uruk kwit, enowe Yesus oluk atlug inatsi wene fagdoho hweag-esauk katswa. Airoho duruk kwit wereg ma, Allah en ahayeg enobam feseruk kwit, fanoap enepuk katsi.

³⁴It enenggwenang inim, it enobam wirig inim onggo hundi folug, it Yesus en eneko mon-enepsi on rasul anyo og-esa lauk mu, it foma enengge eleg halug, yohwan-enebeheg duruk katswa ma, it enengge eleg on eke welatswa fug.

³⁶Airoho duruk kwit wereg ma, ap eke unuk Yusuf, unggul unuk Lewi, obam Siprus on, inim wereg lit, it Yesus en eneko mon-enepsi on rasul anyo, unuk eke Barnabas uruk katswa. (Ai nit nenele fam Nenenda Aho Ware Nenobaharuk On, ulug, uruk katswa.)

³⁷Ne, at ap anyo anggwenang eke foroho welatsi angge re, onggo hundutsireg uang anyo walug it Yesus en eneko mon-enepsi on rasul og-esa wahasi.