Read Ninia Yali KISAH RASUL-RASUL 5 Bible Online

KISAH RASUL-RASUL 5 - Ninia Yali bible

KISAH RASUL-RASUL 5

¹At Barnabas anyo uang walug it Yesus en mon-enepsi on rasul anyo og-esa wahasi famen, ap eke unuk Ananias at ohwe Safira inim enenggwenang eke welatsi mu, at anyo en kwenang anyo onggo hundutsi.

²At onggo hundutsi on uang anyo at ohwe olukdeg kweleg, ahun anyo en foma minggiroho at fahat-dalug, foma neg minggiroho it Yesus en mon-enepsi rasul anyo og-esa lasi.

³Airoho disi mu, at Petrus en, “Ananias ahwi. Kwenang onggo og-herehesa on foma fahat-dehen anyo ai, hat nunggwelug Iblis hendama kweheik ma, seiale uruk kwit, Allah Aheime lalmin ulug, dehen?

⁴Onggo og-hum fug mu neg de hat hangge welatsi famen, onggo og-herehesa ma oho hat hauang famen, nunggwelug hendaman, Airoho dimin, behen? Nit ap homi lal-nenebehen fug. Ite, Allah neg de lalmin ulug dehen!”

⁵Hweag-itsi anyo Ananias esanggo holsireg, daloroho kwenangma ying-atuk kwit, waratsi mu, it ap homi enesanggo holswareg, it mundoho en, “Yehei!” ulug, enekol atsi.

⁶It ap sauwe on anyo wahausareg, ap anyo ebe sum fam hwilip-debelug, walug wilibik lausareg, kwenang habuloho sale fousa.

⁷Walug wilipswareg, 3 jam hag welatlug, ohwe anyo ahun waraha ale apelegdeg lit, kwik wahasi.

⁸Kwik wahasi mu, at Petrus en hwe anyo hweag-utuk kwit, “Safira nerek. Hit henenggwenang anyo onggo diroho og-hesehesa a? Furoho in!” Hweag-itsi mu, “Yu o! We eta neg og-nesehesa,” ulug, hweag-itsi.

⁹Airoho hweag-itsi mu, at Petrus en, “Hahun hinim henele marehepdeg nunggwelug seiale uruk kwit, Allah Aheime laldul ulug, dehep? Airoho dehep ma, it ap hat hahun kwenang habuloho sale feik lahesa on en ketia hat hinim og-haplug lakoho lit, sokolma kwik waharuk su esauk kahen?” ulug,

¹⁰owan hweag-utuk kweleg, hwe anyo Petrus aluluk etano daloroho ying-atuk kwit, waratsi. Waratsi mu, it ap sauwe on anyo en kwik wahausareg, waratsi halug, walug ahun sale fousama etano sale feik lausa.

¹¹It Yesus omaliki inim, it duruk ale enesanggo holswa on inim, it mundoho en, “Yehei!” ulug, enekol humon atswa.

¹²It Yesus en mon-enepsi on rasul anyo en ap homi humdoho wereg kweleg, enekol boruk on inim, duk fug on inim, dil lauk katswa. It demdoho bousa on inim Allah obam ilonggoma ambe eke unuk Sokolma Salomo uruk katswama etma kabog-dik lauk kwit, enenda misig welatswa.

¹³It ap homi foma hesangge on anyo en inim seberuruk ale enekol boruk katswa famen, it ap homi mundoho en mot-enepuk kwit,

¹⁴it ap inim, homi inim, Tuhan Yesus demdoho bousa on anyo, eke dopno ik kweheg neg duruk kwit enebe humdoho atswa.

¹⁵Ne, Petrus lauk kwit, apumag bal-esowag ulug, ap homi ouk enepuk on og-eneplug kobokwe humon fam bearoho kwe fam feseik waheg, ilit doaloho feseik waheg, duruk katswa.

¹⁶Duruk kwit wereg ma, it o Yerusalem alukwe fil ambol fil o sili domog etma ap homi humdoho en kabog-dik waharuk kwit, it ouk enepuk on inim, mungguat enendama wereg on inim feseik waharuk mu, mundoho fano atuk katswa.

¹⁷Airoho enepuk mu, at Imam Agung at autsi ap Saduki on mundoho inim, enelok humon atswareg, enele maho folug,

¹⁸it rasul anyo sen-eneplug enenggik hetdoho feserukmu kwelap-enepswa.

¹⁹Kwelap-enepswa ma, o hup andundu etma wereg ma, boholma Allah ayonggo mon-enepuk on malaikat eke wahasireg, sok husoho wilibi feselug, it hweag-esauk kwit,

²⁰“Hit Allah obam wirigmu etma laluhupdeg ket enelugap enepuk wene abug mundoho hweag-esakiyug,” ulug, komo-enepsi mu,

²¹it anyo enesanggo hole fousareg, o hubetdoho Allah obam wirigmu kuswareg, wene hweag-esauk katswa. Hweag-esauk mu, at Imam Agung it at autsi inim anyo en, it Israel on enowesi on wene katukdoho enele matuk on mundoho kabog-dik wamag ulug, yonggo mon-enepswa on anyo wahausa ma, it rasul sabu hetdoho feserukmu wereg on anyo wamag ulug, “Hondog-enebik lakiek,” ulug, hweag-esausa.

²²Hweag-esausa ma, it ap sabu het-enepuk on anyo, sabu hetdoho wereg ma enesa lausa man, it rasul biren anyo enebe eleg ma, wahausareg hweag-esauk kwit,

²³“Sok omamneroho lareg, ne, ap kahaleg on anyo inim wereg ma esehe famen, sok husoho kumu esauk men, enebe esehe fug,” ulug, it wene katukdoho enele matuk on anyo hweag-esausa.

²⁴Wene anyo holswareg, at Allah obam wirig foroho on enowe inim, it Allah il hanim duruk on imam enowesi anyo en, “Nangginoho aha behep?” ulug, uruk mu,

²⁵ap eke wahasireg, “Yaho yei! It ap sabu hetdoho kwelabe feseruhup anyo, Allah obam wirigmu wene hweag-esauk kweleg, an wahi,” ulug, it anyo hweag-esasi.

²⁶Hweag-esasi mu, ap Allah obam wirig foroho on autsi inim en it rasul etano og-enebik lausareg, ap homi anyo en helep fam nenowaruk no ulug enelok fam fug, aldoroho og-eneplug wahausa.

²⁷Og-eneplug, it wene katukdoho enele matuk on it enowesi eneluluk feseik wahausa ma, at imam agung anyo en it hein og-enepuk kwit,

²⁸ “Ap ai unuk yiko hweag-esahup fug, ulug, bet-henepuhuk famen, hit hweag-esauhup fam o Yerusalem mundoho holswa. Ap ai unggulmu nit nenowarukwag ulug uruk kahep a?” ulug, hein og-enepsi.

²⁹Hein og-enepsi mu, at Petrus inim ori rasul foma anyo inim en wene onggo hweag-esauk kwit, “Ap homi en hweag-nesauk ai nit holdul fug. Ite, Allah en hweag-nesauk halug neg holdul.

³⁰Hit Yesus e salib fam dopnoroho ware foruhup mu, nenombasi enakni Allah en waratukmen oluk apdoho unduhuk fesi anyo,

³¹at hit Henowe unuk bogdeg wereg lit, henahap wendat-henepuk on at Allah en inim welamag ulug unduhuk fesi ai Yesus. Hit ap Israel on siag duruk kahep anyo, henenda wenggele folug henesiag embeseruk halug, henesiag apelehapdoho foukwag ulug unduhuk fesi.

³²Nit Allah ele furoho duruk halug, Allah Aheime og-nesauk anyo ninim wereg lit, di ale su ale duruk mu, ninil halug, mundoho fagdoho hweag-hesauk kahe,” ulug, hweag-esausa.

³³It anyo wene ai holswareg enehumkwe het-duruk kwit, it rasul anyo mundoho enowatul boruk mu,

³⁴ap Farisi on eke Musa wene melaleg hweag-esauk katsi halug, ap homi mundoho en anggilug boruk katswa anyo unuk Gamaliel anyo en, it ap wene katukdoho enele matuk on inil hanim inatlug, it hweag-esauk kwit, “It dorangge welatlug kwik wamag ulug, dagma wilibik lowag,” hweag-esasi mu, wilibik lausa.

³⁵It wene katukdoho enele matuk on hweag-esauk kwit, “Hit Israel henap su, wene eke hweag-hesa. It ap su debeseruk ale anyo furoho wenggelduk kamek!

³⁶Endam en ap unuk Teudas anyo inatlug, An along on deg ma, an nele holduk kamek, il waharuk mu, ap enebe 400 en at ele waul ulug mutlug lausa famen, at anyo wareheg, at mutlug lausa anyo del-fol eseheg, duswa ma, ele eleg atsi.

³⁷Fobik en, ap homi mundoho enunuk lisu balukwag ulug duruk mu, ap eke unuk Yudas, Galilea on eke wahasireg, ap foma at ele holukwag ulug hondog-enepsi famen, at watswa ma, it at ele wausa anyo del-fol uswa.

³⁸Aireg ma, ketia ap su embeseluhup, ulug, an hweag-hisihi. It enenda wenggeloho dil lauk halug ai, we ap homi enenda boruk on duruk mu, ai mundoho eleg aruhu.

³⁹Ne, Allah en boruk ale duruk halug neg de, it enele sebelehep ha fug alereg ma, hit Allah hinim minggirig wereg lit, duruk kahep bouk no, embeseiyek” ulug, hweag-esasi. Hweag-esasi mu, it wene katukdoho enele matuk on en, “Demdoho uruk,” ulug,

⁴⁰it rasul biren anyo hwi-enepswareg, kwik wahausa ma, hweag-esauk kwit, “Yesus unuk fam ekenim hweag-isil noruk kam fug,” ulug, yeik enowaroho wilibi feseswa.

⁴¹It wene katukdoho enele matuk on anyo en wilibi feseswa ma, lauk kwit, “Allah en nit airoho enepuk kamag, besi ale higitdoho, nit Yesus ili wauk men, nenenggali wat-nenebehesa ma, iyale!” ulug, enahayeg dil lausa.

⁴²Ne, lausareg Allah obam wirigmu inim, enobam olekwe inim, mundoho hupmu hubet, “Allah en eneko unduhuk febag ai, at Yesus neg,” ulug, Wene Fano Wene hweag-eseheg, dil lauk katswa.