Read Ninia Yali KISAH RASUL-RASUL 7 Bible Online

KISAH RASUL-RASUL 7 - Ninia Yali bible

KISAH RASUL-RASUL 7

¹Imam Agung anyo en Stefanus hweag-utuk kwit, “Ap wene ehesa on ai demdoho ehesa a?” ulug, hein og-hasi mu,

² at Stefanus en, “Naknisi inim, nori inim, henesanggo hol-napuk kamek!” hweag-esasireg, “Nenomba Abraham o Haran la fug angge owan o Mesopotamia wereg ma, at Allah leho wereg on anyo en unug-howag ulug akit watfagdeg, Abraham hweag-utuk kwit,

³An den o amumu hat welaruhun en eke hweag-huruhuk mu, hat welahenman, howesi hautsi inim embeselug lag, hweag-etfag ma,

⁴ at anyo ap o Kasdim alukwe fil anyo embeselug, o Haran bok aik watfag. Bok aik watfagdeg, wereg ma, Abraham akni waratfag. Waratfag ma, ketia nit welahema suma, Allah en neg mondorik watfag.

⁵ Mondorik watfagdeg, wereg ma, at Allah en Abraham hwalduk kamag ulug, kwenang eke bal-ereheg, we dorangge eke og-ereheg, debag fug famen, at omaliki endag-am fug mu, abug hweag-utuk kwit, Kwenang su hat inim, haren endag-enebuhun on hombasi inim hwalduk kamuhup, ulug, abug hweag-etfag famen, eta li Abraham omalik enderuk fug angge wereg kweleg hweag-etfag.

⁶ Hweag-etfagdeg, ekenim hweag-utuk kwit, Hat hombasi re, o ap homi amu on enobam etma lahup mu, it enemingming angge hag debeselug, enowareheg neg duruk kweleg, 400 tahun aruhu.

⁷ Ne, it ap homi hat hombasi anyo enemingming angge hag enebuhup anyo, an den siahap-enepuk nealug, embesehup mu, wilibik wamuhupdeg o suma wereg lit, an mot-napuk kamuhup, ulug, Allah en Abraham hweag-etfag.

⁸ Hweag-etfagdeg, Abraham Allah inim wene katukdoho balfag wene ebereg welamuhup ulug, enahap balduk kamuhup wene hweag-etfag. Hweag-etfag fam, Ishak endag-atfag ma, hup sabiren noholug ahap balfag. Ishak en Yakub endetfagdeg ahap balfag. Ne, at Yakub en nit nenombasi nesanggoen anyo endag-enepfagdeg enahap bal-enepfag.

⁹ Nit nenombasi enaut Yusuf enerim bebagdeg, it Mesir on enemingming angge amag ulug, onggo hundutfag famen, akni Allah inim lebag ma,

¹⁰ anggin-fanggin hauk kweleg, Allah en ahap wendatuk katfag. Ne, at Yusuf anyo ap o Mesir enowe Raja Firaun aluluk lebag ma, at Allah en ahayeg Yusuf obam foruk kweleg, enda wereg lit, wenggeleg on neg dil lauk halug, at Firaun inim wereg on inim, ap Mesir on mundoho inim enowe unuk bogdeg gubernur ele holduk kamag ulug, Firaun en Yusuf anyo unduhuk febag.

¹¹ Unduhuk febag ma, wereg lit, o Mesir inim, di o su o etma inim, o Kanaan inim siburu obok humon fululung ebag ma, siburu hera-debag famen, eleg ale en,

¹²at Yakub anyo en, o Mesir gandum wereg uruk mu, holfagdeg at omaliki nenombasi anyo keram mon-enebik lebag ai.

¹³ Ai en, fobik bireneg angge lebag ma neg de, at Yusuf anyo en, Henaut nebe an, ulug, owesi mel aut mel eneluge fesebag ma, eta li at Firaun anyo en oho, It su, Yusuf owesi aut inim, ulug, oluk atfag.

¹⁴ Ne, at Yusuf anyo en ele mondotuk kwit, Nakni Yakub eyog indipkwe on inim mundoho o Mesir wamag, ulug, yonggo mondotfag ma, enebe lebag on de seberoho 75 en o Mesir lebag.

¹⁵ Yonggo mondotfag ma, at Yakub omaliki inim hondog-eneplug, o Mesir lebag. Hondog-eneplug lebagdeg etma wereg lit, at inim, nenombasi inim, warail lebag.

¹⁶ Warail lebag anyo, enowag walug, ap Sikhem on eke unuk Hemor omaliki enowik wereg ma, Abraham en onggo febag ma, etmano kwelabe feseik watfag.

¹⁷ Kwelabe fesebagdeg, etma wereg lit, ai en, Allah en Abraham abug hweag-etfag anyo duhu horog aik waharuk mu, nit nenombasi anyo o Mesir etma wereg lit, ap homi humdoho saha ebag.

¹⁸It saha il lauk kweleg, it Mesir on enowe unuk bogdeg eke, Yusuf duruk katfag on apeleg kweleg, inatfag.

¹⁹ At inatfagdeg, nenombasi lal-enepuk kwit, lal-fal eseheg, Ap endag-atuk halug waramagdoho dagma hwik-esakiyug, ulug, hweag-eseheg, debeseruk katfag.

²⁰ Airoho debeseil lauk mu, Musa endag-atfag ma, nimi anyo ebe mun fano deg ale en, isinga akni en enobam foroho kweleg, bigalem henahan enam debag.

²¹ Bigalem henahan enam debag ma, omalik anyo oko dagma wilibe febag man, hwele duhum on Firaun ahaloho en hweahabagdeg, An nomalik hagdoho kul-dahuk, ulug, hwelebag.

²²Omalik anyo sauwe atuk kwit, it Mesir on enenda wereg lit, duruk ale Musa hweag-utuk katfag ma, ele inim, duruk ale inim, omamneroho neg dil lauk katfag.

²³ At Musa endag-atfagdeg, 40 tahun ai hwili debagdeg, Nowesi nautsi Israel on nil esa lamin, bolug,

²⁴esa lebagdeg, etma wereg lit, ap Mesir on en at aut eke we hesangge watuk mu il hebagdeg, at Musa en ili oko at Mesir on anyo ebe binggi watfag.

²⁵At endaman boruk kwit, At Allah en an nori enahap wendat-enebukwag ulug, an mon-nabik wahasi ai, demdoho bohup ane? bebag famen, it airoho bouk fug angge welatfag.

²⁶Hup misig noholug, likia ap Israel on biren yeik apuk mu, il esebagdeg minggit-enepuk kwit, Yaho nautsi, hit hit nunggwelug yeik wat-wat atuk kahep? ulug, hein og-esebag man,

²⁷at are watuk katfag on anyo en Musa filig-hauk kwit, Nit duruk on nenewene bilinggukwag ulug, san unduhuk hobahasi mu, uruk kahen abi!

²⁸ebagdeg, Hat sono ap Mesir on binggi watihin anyo hag, an oho airoho nowatmin ulug, wahendeg uruk kahen au?

²⁹ Hweag-utuk on Musa esanggo holfagdeg, o Mesir embeselug o Midian etma longgo ik lebag. Etma wereg lit, omaliki biren endag-enepfag.

³⁰ Etma wereg lit, 40 tahun debagdeg, nukoho eke salim, leimu Dom Sinai fam etma wereg ma, boholma yonggo noruk on malaikat eke en e enggela fam indok ambulbul hag ulog duruk mu il fu neowag ulug enam atfag.

³¹At Musa en indok anyo hebagdeg, Yehei! Ai nunggwangge en duruk mu, hamin e, ulug, beil, horogma lebag ma, Allah ele uruk kwit,

³²Hat hombasi Abraham inim, Ishak inim, Yakub inim enakni Allah anyo re an, hweag-etfag ma, Musa holfagdeg, akol en owag elek duruk kwit, il fu hauk ale akol en bok atfag.

³³Bok atfag ma, at Allah en, Hat welahenma eta kwenang ousareg ma hasepatu fiselaroho fein!

³⁴An nomaliki o Mesir wereg anyo enowatil lauk mu, nenek dil lauk ale nil eseheg, nesanggo holeheg, duruk kwit, enahap wendat-enebuhuk ulug wambik wahi angge re, hat o Mesir mon-hapmin en ketia dia ma, ulug, hweag-etfag,” ulug, Stefanus en hweag-esasi.

³⁵ Ekenim hweag-esauk kwit, “Nit duruk kahe wene biling-nesowag ulug san unduhuk hobahasi? ulug, Nenerim, uruk katfag anyo re Musa. Ai famen, at enowe unuk bogdeg atlug enahap wendat-enebukwag ulug, it boholma yonggo noruk on malaikat eke e enggela fam indok ambulbul ulog duruk men, hweag-etfag ma, Allah en mondorik watfag anyo re Musa neg.

³⁶ At anyo nenombasi o Mesir etman og-eneplug wilibik waharuk kwit, o Mesir en ik Laut Mebon yenggeleg inggimen, leimu etman duk fug ale on deheg, enekol boruk on deheg, duruk kweleg, 40 tahun debag.

³⁷ Ap hiron eke Allah wene hweag-hesauk kamag ulug an hag Allah en[7] unduhuk fohu, ulug, it Israel on hweag-esebag de ai at Musa en neg hweag-esebag.

³⁸ At boholma yonggo noruk on malaikat Dom Sinai etma hweag-etfag anyo inim, it ap nenombasi inim, o leimu kabog-dik watfag ma inim welatfag anyo re Musa neg. Nit hweag-nesowag ulug Allah wene mundoho welaruhu on webag anyo re Musa neg.

³⁹Airoho debag famen, nenombasi anyo en, Hat hele holdul fug, ulug, ele sahale folug, enambol somban o Mesir lahuk ulug, enenda ebereg lit,

⁴⁰ at Harun hweag-utuk kwit, At Musa o Mesir en og-neneplug wahasi anyo, ebe kema lasi nenepelegdeg ma, nit hondog-neneplug lauk kamag ulug, haren kembu eke wit-nesakin, ulug, hweag-etfag.

⁴¹ Airoho hweag-etfagdeg, sapi omalik yohombuk on hag ahut wal-heheg, buhun-debelug, it enonggwareg en buhun-debag on obahet wam waroho yaleheg, mot-duruk kwit, soni esereheg, debag.

⁴² Debag ma, at Allah enda wenggeloho folug, sohwalanggen mundoho neg mot-duruk kamag ulug, embesebag. It Allah wene hweag-esauk katfag on nabi anyo en uruk kwit, Nomaliki Israel on! Hit leimu wereg kweleg, 40 tahun duruk kwit, wam ware folug lenggaroho foruk katuhup ai, an nobahet lenggaroho foruk katuhup behep? An nobahet duruhup fug!

⁴³Hit kembu Molokh obam o sabo kemah wirig inim, hit kembu Refan sohwalanggen ilirangge buhundeg anyo inim, mot-duruk kamul ulug walug lauk katuhup mu, an den muko wilibe henobahakuk mu, o Babel ambol fil etma lahup, ulug, ebag ale balfag anyo higitdoho debag.

⁴⁴ Allah ninim wereg, enenda ebereg welamag ulug, Allah obam o sabo kemah wurukwag ulug, Allah en, Unug-hitihik anyo higitdoho ahut wal-heheg wiriyug, ulug, Musa hweag-etfag anyo higitdoho wire folug, nenombasi o leimu walug lauk kwit, da wireheg, ya wireheg, dil waharuk katfag.

⁴⁵ Enaknisi waratuk kweleg, enomaliki o sabo kemah anyo enobalma hwaldil waharuk katfag ma, nit nenombasi o kemah anyo hwalduk on atfagdeg, ap Yosua inim Allah en it dagma on wilip-enepfagma etano sebele feseil kwik waharuk kwit, o kemah walug waharuk katfag. Walug watfag hwili en Daud enowe unuk bogdeg raja unduhuk febag hwili suma wereg latfag.

⁴⁶ Unduhuk febag ma, at dil noruk katfag fam, Allah en ahayeg obam foruk kweleg, at Daud en, Hat Allah Yakub en mot-hapuk katfag on[8] welaruhun hobam eke an den wit-huruhuk a? ulug, heng-debag man, Allah en, Eleg o, ebag ma,

⁴⁷ at Salomo inatfagdeg Allah obam fano on wit-etfag.

⁴⁸Allah obam witfag famen, at Allah mun leho wereg on deg ma, ap homi enenggik en wirig on fam welam fug alereg. At Allah wene hweag-esauk katfag on nabi anyo en uruk kwit,

⁴⁹ Nenakni Allah en, Bohol fam etma an nebe wereg lit, nele melaloho hweag-esauk kahi mu, ne, kwenangma suma neyog en sebeleg lahi mu, deg ma, an nobam nunggwe hag on wit-umuhuk, ulug, uruk kahep? An kel wat-dauk karuhukmu kema?

⁵⁰Di angge su angge buhundeg su, an den neg wal-dirihik anyo re? ulug, airoho ebag ale lisu baleg wereg ma, ap homi enenggik en wirig on fam welam fug alereg.

⁵¹ Hit henesugun siag, henenda maloloreg lit, henesanggo dahom on Allah wene holduk kahep fug on de hit! Henombasi Allah wene sebelduk katfag hag, Allah Aheime ele sebelduk kahep on de, hit neg.

⁵²Hit henombasi en Allah wene hweag-esauk katfag on nabi anyo siahap-biahapdoho debeseruk katfag fug on eke sa behep? It atam Allah wene hweag-esauk katfag on anyo en, At Allah amingming angge siag duruk fug, fano neg duruk on waruhu, ulug, abug uruk katfag enap omano enowatuk katfag. Ne, ketia re, hiren neg at Allah amingming angge ebe wahasi mu, onggo hundi folug watuhup!

⁵³Allah wene melaleg it boholma yonggo noruk on malaikat hweag-hesa watfag wene wauhup famen, higitdoho duruk kahep fug on de hit neg!” ulug, at Stefanus en hweag-esasi.

⁵⁴Hweag-esasi anyo, it Yahudi enewene bilingguruk on mahkamah enap anyo en enesanggo holswareg, enehumkwe het-duruk kwit, enambilik mag hambum debelug wereg kweleg,

⁵⁵at Stefanus anyo Allah Aheime endama hoporoho kwisi mu, alukwe endenoho boholma lahap-hauk men, Allah leho wereg on enggik bekit fil Yesus unduhuk wereg ma esasireg,

⁵⁶it anyo hweag-esauk kwit, “Hinil lahap-hakiek! Bohol healeheik ma, anggelegma Ap endag-atsi anyo Allah enggik bekit fil unduhuk wereg ma isihi,” ulug, hweag-esasi.

⁵⁷Hweag-esasi mu, it anyo en enele humon fam yererag-bererag uruk kwit, enesanggo lat-dalug, it mundoho mum-lang uswareg,

⁵⁸dagma lisoho wilibi folug, helep fam fuk-heheg watswa. It enele at obam dopno hausa anyo enesum dagma on nonggoloho, ap sauwe on unuk Saulus anyo foroho lamag ulug og-utswareg,

⁵⁹helep fam fuk-heheg watil lauk kweleg, at Stefanus anyo en, “Nakni Yesus, an naheime og-nabin!”

⁶⁰ulug, elenggen dimirebelug wereg lit, “It siahap-napuk on su, ebereg welam fug. Embesein, Nakni,” ulug, ele humon fam Yesus hweag-itsireg waratsi.