Read Ninia Yali KISAH RASUL-RASUL 9 Bible Online

KISAH RASUL-RASUL 9 - Ninia Yali bible

KISAH RASUL-RASUL 9

¹At Saulus en it nenowe Tuhan Yesus demdoho bousa on anyo enowatmin ulug, olok atsireg, Imam Agung anyo akit lasireg,

²“Nakni! It Yahudi o Damsyik somban uruk obam domog wereg on inil howag ulug, haren surat bal-nutuk halug og-esahukdeg, it ap homi Yesus wene neg mutlug lauk on hweag-eneplug, enenggik hetdoho og-eneplug o Yerusalem waruhuk en haren surat bal-nimin.”

³Ulug, heng-disi anyo og-itsi mu, lauk kwit, o Damsyik horog aik lasi mu, fetagdoho boholman seleg ambogbag humon duruk kwit, seleg humon at obam belabe feik wahasi.

⁴Belabe feik wahasi mu, at Saulus anyo kwenangma orohole belabeg ying-atsi mu, “Saulus ahwi! Saulus ahwi! Hat nunggwelug hirik-herimdoho nowatuk kahen?” Uruk mu esanggo holsireg,

⁵“Yehei Nowe, hat de sa?” Ulug, hein wasi mu, “Eleg, hat hirik-herimdoho nowatuk kahen anyo re, an Yesus,”

⁶ulug, hweag-itsireg, “Inamin. O bumbuk hummu etma kwik lamihin halug, duhun ale hweag-huruhu angge re, etma lakin,” ulug, komo-disi.

⁷At ori inim wahausa on anyo en ap ebe ha fug angge, we ele neg uruk mu enesanggo holswareg, enele eleg angge bok atswa ma,

⁸at Saulus anyo inatsireg il fenggen hamin ulug disi men, il ha fug alereg ma, enggik seneko walug o Damsyik feik lausa.

⁹Walug feik lausa ma, etma wereg lit, il ha fug alereg lit, siburu inim, ik inim na fug angge hup biren nohosi.

¹⁰Ne, o Damsyik etma, ap Yesus demdoho besi on eke unuk Ananias anyo a og-hauk kwit, at Tuhan Yesus en, “Ananias ahwi!” hweag-utuk mu hasi. Hasireg, “Nowe! An suma welahi.”

¹¹Hweag-itsi mu, at Tuhan Yesus anyo en, “Inatlug, kwe unuk Bekit soaleg ai fam lakin. At ap Yudas obam lamihindeg, at Saulus obam Tarsus on anyo etma Allah hweag-utuk kwit wereg ma, Suma Saulus wereg uruk mu, holihi mu, ha wahi, ulug, hweag-esa lakin.

¹²At Saulus anyo somban uruk kwit, hat Ananias en at aluluk kwimihindeg unggulmu henggik sebele folug, il ha fug angge wereg ma, fanoap duruk mu, a og-hasi.”

¹³Ulug, hweag-itsi mu, at Ananias anyo en, “Nowe, at ap anyo it demdoho bousa on hat homaliki o Yerusalem wereg on etmano siahap enepsi ale ap humdoho en uruk mu, holdihik.

¹⁴Ne, ketia hat hunuk fam dip-hobaharuk on mundoho hetdoho og-eneplug lamin ulug, Allah il hanim duruk on imam enowesi en wene hweag-utswa ma, wahasi su.”

¹⁵Hweag-itsi mu, at Yesus anyo en, “Ap ai, it dagma enap holduk eleg on inim, it enunuk bogdeg on inim, it Israel enap inim, mundoho an duruk kahi ale eneluk apdoho hweag-esauk kamag ulug, namingming angge momaloho ferihik mu, hweag-irik lag!

¹⁶Ne, at Saulus anyo, an nobahet nili og-napuk kweleg, anggin-fanggin hauk karuhu ale an den hweag-utuk karuhuk,” ulug, a fam hweag-utuk mu, hasi.

¹⁷Hweag-utuk mu, hasireg Ananias anyo lasi. Lasireg olma etma kwisireg, enggik Saulus unggulmu sebele folug, “Nare Saulus ahwi! Hat kwema waharuk mu, eta at Tuhan Yesus hil hauihin anyo en hat hil fanoap habeheg, Allah Aheime hendama hoporoho kweheg, dukwag ulug mon-nabik waha,” ulug, hweag-itsi.

¹⁸Owan hweag-utuk kweleg, ilmen ikan abelal hag angge lekandoho wambisireg il fenggensi. Il fenggensireg, inatsi mu, ikma belabe fesi.

¹⁹Ikma belabe fesi mu, siburu nasireg omamne atsi. Nukoho dorangge it Damsyik on Yesus demdoho bousa on inim welatsireg,

²⁰ai en, it ap Yahudi somban uruk obam bekit lasireg, “Yesus ai re Allah amloho,” ulug, wene hweag-isil lauk katsi.

²¹Hweag-esasi mu, enesanggo holswareg, “Yaho! O Yerusalem it Yesus unuk fam demdoho boruk on halug, enowatmin ulug duruk katsi anyo su a? Ketia it suma enenggik sabu hetdoho og-eneplug it Allah il hanim duruk on imam enowesi og-esa lamin ulug wahasi anyo su no?” ulug, enekol en yanderuswa.

²²Enekol en yanderuswa famen, at Saulus anyo en wene hweag-esauk kwit, “Allah en eneko febag on ai re Yesus,” ulug, demdoho boukwag ulug, Yesus dil lauk katsi ale hweag-isil lauk ale neg leg atuk kwit, it Yahudi Damsyik on enele sebele fesi.

²³ Ai en, fobik en it Yahudi anyo en, “Saulus watul,” ulug, wenggelswa famen,

²⁴it wenggelswa anyo, at Saulus esanggo holsireg, wereg kweleg, it Yahudi nukoho hup anggo Saulus watul ulug o kota Damsyik ilonggoma kwik lauk on sokolma kahaleg latswa.

²⁵Kahaleg welatswa famen, at Saulus omalikiap enepsi on omano en o hup anggo si yihig fam yonggwaroho helep lehet yendeg ele kwe en dag fil sabu ililoho belabe fousa.

²⁶Belabe fousa ma, at Saulus o Yerusalem lasireg, it Yesus demdoho boruk on inim seberul ulug duruk men, it anyo en, “At su Yesus ele wauk eleg on ane?” ulug, enekol en we bok atswa.

²⁷Bok atswa man, at Barnabas en hondoholug, it Yesus mon-enepsi on rasul enekit lasireg, at anyo kwe fam lauk kwit, nenowe Tuhan Yesus il hasi wene inim, at Yesus en hweag-itsi wene inim, o Damsyik etma akol eleg angge wereg lit, Yesus unuk fam hweag-esauk katsi ale inim bilinggoho hweag-esasi mu,

²⁸it inim seberoho o Yerusalem laheg waheg, duruk katswa. Laheg waheg duruk kwit, at Saulus anyo akol eleg angge wereg lit, Yesus ele fagdoho hweag-eseheg,

²⁹it ap Yahudi on famen, Yunani enele uruk on anyo inim, enele mareheg, suahal eheg, disi men, it anyo en at Saulus watul ulug, wenggelswa famen,

³⁰Watul, uruk on it Yesus omaliki holswareg, ebe walug, Kaisarea lausareg, etman o Tarsus monde fousa.

³¹Monde fousareg, etma wereg lit, it Yesus omaliki anyo o Yudea en, Galilea en, Samaria en, Yesus omaliki anyo siahap enebuk fug angge wereg ma, enenda hambukdoho wereg lit, enenda wirik aheg, Allah Aheime en hwal-enepuk kweleg, enakni Allah enekol boruk kwit, enebe humdoho dopno uruk katswa.

³²Enebe humdoho dopno uruk katswa ma, at Petrus anyo di o su o etma kumu isil lauk kwit, it demdoho bousa on Yesus omaliki Lida wereg on anyo esa lasi.

³³Etma wereg lit ap unuk Eneas enggik eyog dopnoreg on yinggig kweleg, tahun liginen disi mu, il hasi.

³⁴Il hasireg, “Eneas ao! Hat Yesus Kristus en fanoap hapuk mu hiihi. Inatmihindeg, doaloho nohoruk kahen on si-dakin,” ulug, owan hweag-utuk kweleg, inatsi

³⁵Inatsi mu, it o Lida on inim, o Saron on inim, it mundoho at inatsi ale inil hausareg enenda wenggele folug, enowe Yesus demdoho bousa.

³⁶Ne, hwe Yesus demdoho besi on eke o Yope wereg on anyo unuk Tabita welatsi. (Hwe unuk ai, Yunani enele fam de Dorkas.) At hwe anyo ap homi fanoap debeseil laheg, enengge eleg on halug angge yohwan-enebeheg, duruk katsi.

³⁷Duruk kwit, wereg ma, ebe ouk disireg waratsi. Waratsi mu, ebe kume waroho olma ambe baleg ambolma yinggi fousa.

³⁸O Lida en, Yope horog deg ma, Petrus o Lida wahareg wereg, uruk mu, holswareg, it Yesus demdoho bousa on anyo en at Petrus folo-folo wamag ulug ap biren yonggo mon-enepswa.

³⁹Mon-enepswa on anyo hweag-irik lausa ma, at Petrus anyo en, “Lakohon,” ulug, inim wahausa. Wahausareg, hondoholug olma kulug, ambolma lahausareg, it homi sohwe on anyo en, “Hwe su oluk wereg lit sum ilonggoma on inim sum dagma on inim yihiruk katsi anyo, su hakiek!” ulug, unug hauk kwit, oba yatswa.

⁴⁰At Petrus anyo en, “Hit wilibik lakiek,” hweag-esasireg, elenggen dimirebelug, Allah hweag-itsi. Allah hweag-utlug, at waratsi on anyo alukwe endenoho fu hauk kwit, “Tabita hweli! Inamin!” hweag-itsi mu, il hupnig welatsi anyo fenggen atsireg, Petrus il fu hasireg inatsi.

⁴¹Inatsi mu, at Petrus anyo en enggik seneko unduhuk fesireg, it homi sohwe on omano inim, it Yesus omaliki demdoho bousa anyo inim, “Manik,” ulug, wol-enepsi mu, wahausa ma, “Hwe anyo oluk aha su hakiek,” ulug, hweag-esasi.

⁴²At Petrus en hwe oluk apdoho unduhuk fesi wene o Yope etma mundoho saha isi mu, ap homi humdoho enenda nenowe Yesus demdoho bolug, enenda at obam dip-debousa.

⁴³Ne, at Petrus anyo o Yope etma ap wam ahap funggulduk on unuk Simon inim wereg lit, hup humdoho nohosi.