Read Ninia Yali ROMA 1 Bible Online

ROMA 1 - Ninia Yali bible

ROMA 1

¹Nori nerekwi. Hit abirangge o Roma on Allah en enda hundig henepuk on mel, Allah en mundoho at Yesus omaliki welamag ulug, wol-henepsi on mel, hweag-hesa. At Allah en an Paulus anyo, Kristus Yesus amingming angge mon-enepuk on rasul atlug, at ele Fano Wene hweag-isil lauk kamag ulug, eneko unduhuk nobahasi mu, wene eke hweag-hesa.

²Fano Wene ai, ebe o endam Allah en, “Fobik fano wene holduk kamuhup,” ulug, it Allah wene hweag-esauk katfag on nabi etmano, hweag-esauk kweleg, it etmano en ap homi hweag-eseheg, ai en, Allah wene ebag ale, lisu balduk kwit, wene fano wene anyo inim baleheg, duruk katfag.

³Wene Fano Wene ai, Allah amloho Tuhan Yesus Kristus disi wene anyo at. At ebe ai, ap homi endag-atuk hag de Daud ambiangma ondoho fene en demdoho ap on endag-atsi famen, Yesus ebe waratlug lauk men, Allah omamne nigon fam oluk apdoho unduhuk fesi ai fam, Allah amloho ulug eneg atsi.

⁵Yesus Kristus disi fam, Allah nenelaheg en nenepuk kwit, di ap homi su ap homi enunggul unuk domog Fano Wene demdoho bolug Allah boruk ale higitdoho duruk kamag ulug, hweag-eseheg, an den Yesus Kristus unuk leho feil laheg, duruk kamag ulug, an neyabuk mon-enepuk on rasul unduhuk nobahasi.

⁶Nobahasi mu, hit o Roma on di ap su ap oho airoho at Yesus Kristus omaliki amuhup ulug, momaloho henobahasi.

⁷Ai halug, hit Roma on mundoho hit demdoho bolug, at omaliki amuhup ulug, at Allah en henebe enda hundig deg lit, momaloho henobahasi mu, ulug, hweag-hesauk kahi. Nenakni Allah, Tuhan Yesus Kristus inim enenda hundig en og-heseheg, henenda fano seroho welamuhup ulug, henebeheg, duruk kamag.

⁸Wene atam dam imin ai, hit mundoho henenda demdoho boruhup anyo, henebug di o su o saharil lauk halug, Yesus Kristus disi fam, Nenakni Allah dang-duruk kahi.

⁹An somban uruk kahi mu, uruk kwit, henobahet napeleg am fug angge hundig-hundig uruk kahi ai, Allah olukdeg. Nebe abirangge lebegdoho Allah og-utlug, mutlug lauk kwit, Fano Wene at amloho disi wene anyo hweag-isil lauk kahi.

¹⁰An henesa waruhuk boruk kahi mu, ketia henesa waruhuk ulug Allah enda bolug kwe hwaloho nobahaukwag ulug, heng-deheg neg duruk kwit, somban uruk kahi.

¹¹Henenda wirik amag ulug, Allah Aheime en karunia og-nesauk ale ai hit eke og-hesowag ulug, Henesa wale aho! boruk kahi.

¹²Henesa wale, boruk kahi anyo re, waruhukdeg, hit ninim etma wereg lit, hit inim, an ninim, nenenda demdoho boruhuk anyo, nenenda aho wat-wat amuhuk en henesa wale boruk kahi.

¹³ An endam en it dagma holduk eleg on foma di obam su obam etma hweag-isil lauihik mu, wausa hag, hit airoho wahup ulug, hweag-hesa waruhuk ulug, wenggelduk katihik famen, eke kwe bal-atsi halug, “Bok atsi hehe,” bohup ulug, hweag-hisihi, nori, nerekwi.

¹⁴It ap homi fureberuk on nim, it fureberuk eleg on nim, ne, it di duruk su duruk eneluk on nim, enapeleg on nim, mundoho Fano Wene hweag-isil noruk karuhuk en anggin nobam wereg ma, hweag-isil noruk karuhuk.

¹⁵Aireg ma, an nendan Wene Fano Wene walug, hit o Roma on hweag-hesa waruhuk boruk kahi.

¹⁶ Fano Wene ai Allah omamne deg ma, hweag-isil noruk fam, Allah en atam it Yahudi on inim, ai en it ap homi mundoho inim, demdoho boruk halug, enahap wendat-enebuk alereg ma, Wene Fano Wene ai, an nakol eleg lit, hweag-esauk kahi.

¹⁷ Allah wene fam uruk kwit, “Ap eke Allah demdoho boruk halug, Allah en at il hanim fanoapdoho foruk mu, oluk welaruhu,” ulug, ebag ale lisu baleg ai, Allah en nangginoho ap homi enenda hwaloho at il hanim fanoap enepuk anyo, Wene Fano Wene ai fam neg neneluk atuk kahe. Allah en ap homi fano apdoho feseruk ai, indipmen bekit ahae fotogdoho ap homi en Allah demdoho boruk fam[1] neg.

¹⁸It ap homi enenda siag en siag neg dil noruk kwit, Allah airoho wereg wene ap homi wa no ulug, kwe bale feseruk mu, Allah boholman olok en siag onggo enobam belabik waharuk fam enoluk atuk.

¹⁹At Allah wereg ale ap homi en enegdeg ma howag ulug, at Allah en mun ename febag famen, ap homi en fureberuk eleg ma, Allah olok enobam feseruk ai.

²⁰Allah ebe omamne humon, mun eitog eme wereg ale ninil en hehe ha fug alereg famen, endam Allah en di angge su angge wal-debag fam, enameg ma furebehe halereg kweleg, furebouk fug angge wereg lit, it ap homi en, Nenalong bal-daul, ulug, wene onggo uk fug alereg.

²¹ It Allah enelukdeg lit en, “Ai at Allah,” ulug, leho feheg, “Allah Nakni,” ulug, dang-deheg, duruk eleg fam, enenda eleg on hag we hesangge wenggeldil lauk mu, it enenda o mum hag enapelegdoho wereg.

²²It anyo en, “Nit mundoho nenelukdeg,” ulug, leho fahat-dil noruk famen, enapeleg morue hag wereg lit, il noruk.

²³ At Allah oluk eitog mundoho wereg on mot-duruk ale anyo embeselug, obalma ap homi inim, suwe bak inim, marea kisu inim enorohole ilit-debelug mot-duruk.

²⁴Airoho duruk mu, it enendan momal-dalug, mun siag dil lauk kwit, it it enebe siahap-dauk kamag ulug, Allah en fotog-esasi.

²⁵Allah ebe demdoho wereg wene anyo embeselug, seiale, “Allah airoho wereg,” ulug, oho folug, wal-duruk on Allah anyo embeselug, di angge su angge waldeg on anyo neg motdoho leho foruk famen, at Allah di angge su angge wal-debag on neg, “Mun leho,” ulug, hundig-hundig mot-duruk kalep man fano deg ma, mot-duruk kamag. Amin.

²⁶Airoho duruk mu, enenda nauk anyo mutlug lauk fam, enenggali howag ulug, Allah en fotog-esasi. Fotog-esauk kwit, it ap en airoho homi sen-enepuk famen, it ap ap neg ahanhan enepuk halug, enenggali eleg lit, sen-sen aheg, ne, it ap wereg kweleg, homi neg sen-sen aheg, duruk ai, duk on wereg kweleg, amu on duruk mu, Allah en onggo siahap-enepuk.

²⁸Ne, iren Allah ai demdoho wereg uruk ale enerim boruk fam, enenda eleg on hag atlug, duk fug on famen, Allah en airoho dauk kamag ulug fotog-esasi.

²⁹Ai duruk kwit, di siag su siag amu amu neg humdoho duruk. Duruk kwit, siag neg dil laheg, nenda-nenda beheg, enobabut siag wereg lit, il laheg, nerim-herim eheg, ap binggi enowareheg, yeik yabeheg, lal-enebeheg, enolok enebeheg, seiale wene eheg, duruk.

³⁰Ne, iren nabug-habug eheg, Allah inim minggirig welaheg, enobabut hapi-haperoho noruk kwit, “Ap humon da,” ulug, winik-wonog eheg, siag duhuk ulug enenda mun wenggeldil laheg, enisingasi enaknisi enele sahaleheg,[2]

³¹enenda eleg lit, wene hweag-esauk on furoho duk fug angge embeseheg, enelaheg bouk fug angge welaheg, ai duruk.

³²Dil noruk ai, Allah en, “Diroho duk fug, airoho duk fug,” ebag anyo siahap duruk halug, “Mundoho enowaruhuk,” ebag wene anyo, enelukdeg lit en, dil noruk kwit, “Nit neg duruk kamul fug. Ite, it foma ninim duruk kamul halug, fano,” ulug, dil noruk mu, Allah en mundoho enowaruhu.