Read Ninia Yali ROMA 10 Bible Online

ROMA 10 - Ninia Yali bible

ROMA 10

¹Nori nerekwi. “Allah en nowe naut Yahudi on enahap wendat-eneplep e!” boruk kwit, enobahet Allah hweag-ereheg neg duruk kahi.

²Iren Allah wene enenda ahanhandoho duruk famen, wene ebe furebouk fug angge duruk en hweag-hesauk kahi.

³Allah en ap homi at il hanim fanoapdoho feseruk wene fureberuk eleg lit, “Nit nenemu en fanoap-dahuk,” bolug, Allah fanoapdoho fesouk wene anyo wa fug angge welatswa.

⁴At Allah en Musa hweag-etfag wene anyo at Kristus en higit apdoho fesi mu, nit ap homi mundoho Kristus demdoho bolug, nenenda at obam dip-deberuk kahe halug, fanoapdoho nenobaharuk.

⁵ Ne, Allah en nit ap homi at il hanim fanoapdoho nenobaharuk wene anyo Musa en balduk kwit, ap eke Allah en, “Diroho diyug, airoho diyug,” ebag wene anyo duruk fam fanoap-dahuk bolug, Allah en hweag-hesasi hagdoho dil noruk ai fam heneluk welamuhup, ulug, balfag famen,

⁶ ap homi enenda Allah fam dip-deberuk men, aren fanoapdoho feseruk ai fahet, Allah wene fam lisu diroho balfag. “Hat hendaman de, San boholma lahaku? ulug, bouk fug,” ebag ai re, Kristus ebe walug, wambik wamag ulug, uk fug alereg, ulug, ebag ai.

⁷Ne, “Apma ap homi waratlug laukmu etma san wambuhu? ulug, bouk fug,” ulug, ebag ai, ebe re Kristus waratsi mu, niren oluk apdoho walug lahaik wamag ulug, uk fug alereg en, ulug, ebag ai.

⁸Ai halug de, ai diroho fahet ebag. “Allah wene henambilik fam inim, henendama inim horogma wereg,” ulug, ebag ai, ap homi en Allah demdoho bolug, enenda at obam dip-deboukwag ulug, niren saharil lauk kahe wene ai fahet ebag.

⁹Hat eke en, “At Allah en ap homi waratlug laukmen, Yesus demdoho oluk apdoho unduhuk fesi,” ulug, henda demdoho boruk kwit, “Nowe Tuhan ai re, Yesus at,” ulug, ap homi inil hanim fag-duruk halug, Allah en hahap wendat-habuhu.

¹⁰Nenendan demdoho boruk fam de Allah en at il hanim fanoapdoho nenobaharuk famen, “Nenowe Tuhan ai re,Yesus at,” ulug, ap homi inil hanim fag-duruk halug neg de, Allah en nenahap wendat-nenepuk.

¹¹ “Ap eke en Kristus demdoho bolug, enda at obam dip-deberuk halug, enggali aruhu fug” ulug, Allah wene fam lisu balfag ai,

¹²it ap homi dagma holduk eleg on inim, Yahudi on inim, enemu enemu eleg, misig deg ma, “Allah ai nit ap homi mundoho Nenakni Tuhan at,” ulug, lisu balfag ma hauk kahe. Nit mundoho en, Allah ayonggo foruk halug, aren humdoho let-nesauk.

¹³ Allah wene fam lisu baleg higitdoho, “It ap mundoho en, Tuhan, ulug, nayonggo fohup halug, ai famen enahap wendat-enebuhuk.”

¹⁴ “It ap homi wene Fano Wene hweag-isil waharuk ai, mun fano!” ulug, lisu balfag famen, mon-enepuk eleg halug, wene Fano Wene nanggoho hweag-esa lahup behep? Ne, Fano Wene hweag-esa lauk eleg halug, it ap homi nanggoho holuhup? Ne, holduk eleg halug, nanggoho Kristus demdoho bohup? Ne, demdoho boruk eleg halug, nanggoho “Tuhan,” ulug, Allah ayonggo fohup behep?

¹⁶ Mon-enepuk fano famen, at Yesaya en uruk kwit, “Tuhan abi! Nit hweag-esauk kahe anyo, sa mel, sa mel en wauk behen? Mun eleg!” ulug, ebag anyo higitdoho it ap homi mundoho wene Fano Wene hweag-esauk anyo wa fug angge wereg.

¹⁷Ai halug, Kristus wene demdoho bohup wene ai, hweag-esauk fam neg holeheg, wene holduk fam neg, demdoho bolug weheg, duruk.

¹⁸ Ai famen, it di ap homi su ap homi fano wene owan holuk fug angge welatfag, ulug, hweag-hesauk kahi boruk kahep? Eleg. “It hweag-esauk wene di o su o mundoho saha isi mu, o unggut-unggut elan-elan ambiang mundoho holdil lausa,” ulug, Allah wene lisu baleg ai fam it mundoho holfag, ulug, hweag-hisihi.

¹⁹ Ne, eke hweag-hesa. It ap homi Israel on fanoapdoho debeseruk wene enepeleg welatfag, ulug, hweag-hesauk kahi boruk kahep? Ai eleg neg. Eke, at Musa en uruk kwit, “An den it ap homi enunggul unuk sebeleg morue on oko henobalma feseik kwik waruhuk nealug, hiren henerik-henerim boruk kwit, henolok enobam foruk kamuhup,” ulug, Allah wene lisu balfag ai fam, it ap homi Israel on wene ai wauk eleg ma halug, enobalma ap dagma on og-enebuhu ale enelukdoho welatfag hehe.

²⁰ Ai en, Allah en Israel on hweag-esebag anyo Yesaya akol eleg angge lisu balduk kwit, “It ap homi an hera-napuk eleg on, an hweag-nabeheg, ne, it an hein og-neauk eleg on anyo, an nebe unug-esauihik mu, eneluk aheg, duswa” ulug, lisu balfag ai famen,

²¹ it Israel on en duruk esalug neg de, Allah en hweag-esauk kwit, “Hit an nele wa fug angge sahaloho foruk kahep on anyo hundig-hundig og-henepmin ulug, nenggik langdoho welahi famen, henenda haroreg lit, Yu o, uk fug angge welahep hisihi,” ulug, Allah ebag ale Yesaya en balfag.